شارع ميناء الاحمدي بحي اشبيليا بالرياض يا عاشقة السهر

الوصف بالضبط ياطويلين العمر وانت على طريق الملك عبدالله جاي من جابر تجيك اشاره الي يصير يسارك قسم الروضه

تتعدا الاشاره وتقريبا ثاني دخله الي بزاويتها صيدليه كبيره

مكتوب شارع ميناء الاحمدي

المحل باخر الشارع اخر عماره على يسار جنب محلات العقار

وفيه بقاله بعد توها فاتحه جنبي


بفتح المحل بالضبط يوم الاحد ان شاء اللله



بس ياليت يفيدونا الشباب منين نجيب الفلين عشان نقسم الخضار فيه

مش امورك بسطول التمر الى ان تحصل فلين

بس اعتقد تلقا الفلين بمحلات الجمله حقين البلاستيك

انا مو من الرياض بس اكيد بالبطحى تحصل

خذ البلاستيك من محلات الجملة أرخص وحلو .. وأهم شيء ياخوي أنك تتدعي الله أن يوفقك والضحكة الدائمة وصدقني حتكسب الزبائن .. بالنسبة للعامل لو تشغله بالنسبة أفضل << من شأن يتلحلح ويشتغل حريقه وعطه نسبة من 15 إلى 20% حلوة له .. أسأل الله أن يرزقك من واسع فضله .

ألف مبروك أخوي وأسأل الله لك التوفيق وسعة الرزق
التسعير شيء مهم لمحلات الفواكه لكن توجد بعض الخضروات والفواكه سعرها تقريبا شبه ثابت طوال السنة مثل الطماطم والكوسة والبطاطس الكيلو 4 ريال وأيضا الموز 4 ريال والبرتقال 5 إلى 6 ريال وبعضها سعرها يرتفع وينزل مثل البامية

أما طريقة البيع في سوق الخضار ببساطة إذا اشتريت كمية كبيرة الصباح حراج تجلس في السوق إلى ساعتين إلى ساعة ونصف تبيعها بهامش ربح بسيط مثلا اشتريت كرتون الطماطم ب30 تبيعه ب35 لإن السوق يكون نشيط في هذا الوقت واللي يبقى يكون للمحل

نصائح أخرى
1-فتح المحل يكون من الساعة 8 صباحا إلى 2 ونصف في الظهر ثم بعد صلاة العصر إلى الساعة 11 ونصف ليلا
2- حاول إنك توفر جميع أنواع الفواكه والخضروات ولو تشتري بالحبة ماعندك مشكلة المهم إنها تكون موجودة عندك
3 -الابتسامة وأن تمتلك سماحة مع حزم في البيع والشراء
4- توفير التمور بجميع أنواعها والمعمول والعسل

أتوقع ربحك راح يكون إذا عملت اللي كتبته ومع نصائح الخبراء لايقل عن 500ريال يوميا
فالك التوفيق

ربح 300 ريال سهل جدا في الخضار

أنا اليوم كنت بالسوق الارباح جدا مشجعه

وجاري إفتتاح مشروع خضار
وتجربة البيع في السوق المركزي

فكرة الفلين حلوه وتجذب
المكينه اللي ترقم فيها ماهي غاليه ( حقت الاسعار )
وأظن كمان النايلون حق التغليف ما يكلف
بس سعر الفلين ما أعرفو

إخسر 500 ريال بالشهر على النايلون والفلين بس حتكسب الزبون ويكون شي مرتب
ومنها كمان توفر بالمساحه

فكرة البيع بسوق الجملة والباقي تاخذه للمحل كالتالي

سوق الجملة فيه اوقات معينة للحراج وعادة بعد صلاة الفجر تجي البضائع من الليل وترتب وبعد الفجر يتم البيع بطريقة الحراج والمساومة

طبعا الشراء لا يكون الا لمئة كرتون ومافوق ويكون الحراج على سعر الكرتون

يعني تلاقي حراج الطماط وصل 5 ريال معناته ان سعر الكرتون بيطلع عليك بـ 5 ريال بس انت راح تاخذ اقل شئ 100 كرتون وتلاقيها مرصوصة قدامك كل مئة كرتون على جنب

طبعا فيه ناس مثلك عندهم محلات يبيله عشر كرتين واللي يبغى لبيته صندوقين بس هذولا مايقدرون يشترون من الحراج 100 كرتون لذلك انت اذا رسى عليك المزاد تبدأ تبيع بالمفرق على اللي واقفين حولك

مثلا طلع عليك الكرتون بـ 5 ريال تبدأ تبيع الكرتون بـ 6 ريال بشرط ماتبيع الا بالرصة والرصة خمس كراتين

يعني يجونك الزبائن تقولهم انا مابيع الا بالرصة اقل شئ 5 كراتين واعطيكم الكرتون بـ 6 ريال واللي يبي اقل من 5 كراتين تبيعه الكرتون بـ 8 ريال مثلا أغلى شوي وبكذا تفرق بضاعتك ونت واقف بمكانك وتكسب وخلي جزء من البضاعة لدكانك خذها معك

انا كنت اتبع نفس الطريقة اشتري 100 كرتون وافرقها بالرصة احيانا كنت اطلب في الرصة 3 ريال مكسب لان الزبائن شايفين انا بكم شريتها ومن حقي اكسب فما يساوموني على طول ياخذون وهم مغمضين

يعني 5 صناديق اطلب فيها مكسب 3 ريال فقط واحيانا في الكرتون نص ريال وبعد ساعة زمان تلاقي نفسك بعت الـ 100 صندوق وفي جيبك حدود 70 ريال مكسب من هالـ 100 كرتون


على فكرة الدلال له نص ريال على كل كرتون يعني لو رسي عليك المزاد بـ 5 ريال اضرب حسابك نص ريال للدلال

يعني يطلع عليك كل كرتون بـ 5 ريال ونص ... أنا هذي مانتبهت لها اول مرة الا بعد ماجيت احاسب الدلال وقال هذا النظام معروف


ولازم تشتري لك أخياش فاضية تبللها بالماء وتفرشها تحت الخضار وتغطي بها الورقيات حتى لاتخرب بسرعة

والورقيات لو تقدر تحطها بعلب ماء مثل حقين الزهور يكون افضل حتى تقعد اطول فترة ممكنة ماتخرب


واتمنى لك التوفيق

يعني من كلامك مافيه ضروره ماسه للثلاجه

لاني انا ميزانيتي ماتسمح اجيب الثلاجه

اذا كان تبغاها للورقيات فالماء افضل واوفر والخيش بيعطيك نفس المفعول مبدئيا بس خلي الماء بارد ووجه المكيف عليها ولو تقدر تكثر الخياش يكون احسن تحطها بين طبقات الخضار وماتخليه فوق بعضه بيعطيك مفعول الثلاجة تقريبا

والثلاجة لو قدرت عليها بتنفعك اكثر بس مبدئيا هذا حل مؤقت وغير مكلف