ضمن جلساتنا اليوميه مع عدد من العاطلين
في قمة مصغره لم يحضرها اي موظف حكى لي احد الاخوة قصص
والله يشيب لها الرأس لم اصدق انها تحدث في بلدي بلد الاسلام
حيث يقول انه قدم على القطاع العسكري في اكثر من مجال ولم تقبله اي جهه
لاسباب عده في كل مره سبب مره الطول مره العرض مره عندك سن تركيبه قلنا معليه هذي شروط ويعني معمول فيها من زمان بس الشئ الفظيع في قصته ان احد الاخوان خلص اموره كلها مع التقديم في احدى القطاعات وفي النهاية بعد مراجعات وايام مضنيه رفضوه؟؟ طيب حلو مو جديد في بلادنا الحبيبه ياماتصير كثير لكن اللي انا شخصيا ماصدقته ونفسي انه كذب انه رفض عشان حشوه في اسنانه ؟!! انا مابيكم تصدقون لانه اللي ماعاش الموقف او كان قريب مستحيل اصلا يصدق .. وقتها قلت له ياشيخ قول غيرها صح انا معك انك مقهور بس مو للدرجه هذي والله مباشرة مسك الجوال واتصل على شخص وقال له مع تشغيل مكبر الصوت فلان ليش ما انقبل يا فلان ؟ قال عشان حشوه في سنه وانا اسمع بنفسي !! طبعا برضه خلينا مو مصدقين ونقول يمكن هم مبالغين ..
الطامه الكبرى انه اثناء هذا المؤتمر قال احد الاخوة العاطلين ايضا والله ياجماعة قصة ولد خالي قريبه من الكلام هذا .. ايش القصه .. قال هذا قدم بنفس الطريقه ولما جا فحص طبي او ماشابه قالوا له انت في سنين عندك فيهم سوس ولازم تخلع السنين.. المسكين مستعد يخلع اشياء ثانيه عشان يتوظف مو بس سن !! فراح مستشفى وخلع سنين ورجع لهم قالوا معليه والله تأخرت التقديم انتهى !!
الله .. بكل بساطه شوفوا قيمة الانسان عندنا كيف ؟
هذا بالله لو قال باخذ حقي بيدي وسوا مصيبه ايش بيكون ردة فعلهم ؟؟ ولاشئ بيدفنوه حي ويقولوا شايفين شباب الوطن كيف ؟
القصه الثالثه وانا طولت عليكم بس والله من قهري على ابناء وطني..
يقول واحد من الشباب واعتقد هذي تحصل دائما انه في احد التقديمات على القطاع العسكري كنا نتجمع من الليل واللي جاي من بعيد واللي من مسافات تصل لمئات الكيلو مترات عشان مسكين يحصل وظيفه ويفرح اهله اللي قاعدين ينتظرونه.. المهم يقول كنا جموع غفيره وواقفين من الليل في وضع مأساوي مانبي نتكلم عنه فيقول لما جا واحد من العسكر الموظفين هناك قاعد يؤشر يقول ياشباب ترون الارقام هناك ؟؟ فبمجرد ماخلص كلمته الا الشباب كلهم راحوا للمكان اللي أشر له وطبعا كذب مافيه ارقام هناك يجدون موظف ثاني يؤشر في ناحية اخرى الارقام في المبنى هذاك .. وجري واللي يطيح الله يخلف على اهله .. يقول والله لعبوا فينا لعب في الاخير ارمو ملفاتكم في سياره شاص ونتصل عليكم !!

ياخوان بالله عليكم مو شئ يقهر ياخي احنا في بلد الاسلام ياخي والله العالم هذولا اولادنا اخواننا كيف نعاملهم بالطريقه هذي كيف ياجماعه والله حرام تشوف الواحد من الليل مسكين مستلف اهله ينتظرون خبر في ديره بعيده واحنا نتريق عليه ونضحك عليه ونقول في الاخير وين الوطنيه ..

في النهاية اقول حسبنا الله ونعم الوكيل وخلوا ايمانكم في الله قوي والدنيا مو كل شئ الحمد لله في حياة اخره خلونا نفكر فيها اما نصيبنا من الدنيا مانبيه خلاص ورزقنا على الله سبحانه.

حسبي الله ونعم الوكيل
بس كل قوي وفيه اللي أقوى منه
الله يسلط عليهم مين يلعب
فيهم ويذلهم بلقمة عيشهم
هذولا مو أوادم
والطامة تلاقيهم كلهم من أولاد البلد
بس فين بيروحون راح يلاقونها
ولو دامت لغيرهم ماوصلت
لهم
وعمر اللي يزرع شوك مايجني ورد
ناس وربي مدري وش صار
فيها قلوبهم أقسى من الحجر

يستمتعون بأنهم يذلون غيرهم كأنهم ضمنوا الدنيا

الله يهدي الجميع ويهديهم

هاذا شي من اشياء كثير تصير في التقديمات العسكريه

حتى اني اذكر واحد من الشباب الحين خلص دورته

يقولي ايام ما كنت ادرس جاني الظاهر ضابط

وكانت صوره الملك عبدالله معلقه

قاله حب خشمه طبعا لازم يطيع

والله وحب خشمه شنو السبب ..؟؟؟ بدون سبب .

حسبي الله ونعم الوكيل

ربك كريم وانا اخوك

ههههههههههههههههههههه


شر البلية ما يضحك ,,,


و سالفه المرمطة عند البوابات كثيرة و لا تحصى


الله يعين و يساعد

ياليت ما دخلت الموضوع ولا قريته

المعذره لصاحب الموضوع لكن زدت قهري

ganate
اشكر تواصلك اختي
بالنسبه للاخوان نسال الله
انه يهديهم على فعلهم هذا مع
شباب الوطن لا اريد ان ادعي على
احد لكن نقول حسبنا الله ونعم
الوكيل انا كنت اناشد المسؤولين
ان ينتبهوا لمثل هذه التصرفات
لان الشاب متى ماخرج عن
طوره بسبب تصرفات
مالها داع يعني قد
تؤدي الى نتائج
لايحمد عقباها ..

اشكر مرورك مره اخرى

الملقوف
الله يجزاك خير
على ردك الطيب اخي
دمت بخير

اخوي عبد العزيز
انا متاكد ان القصص الذي ذكرتها
هي عينه والله ياخي احنا مانرضى
يصير في وطنا مثل هذه التصرفات
التي تسئ اليه ابدا ..

اشكر مرورك العذب