سليطين سسلييييييييطييييييييين هييييييييييييييه قم قم قم قم لاتأخرنييييييييييييي يلاااااااااااا وااااااااااااااااااااا 
ياربيييييييييييييييييييييييه كل يوم على هالحاله حرام علييييييييييك الساعه سبع ونص 
.. قسم ان ماقمت اعلم ابوي اخليه ياخذ سيارتك ترى حامت كبدي ثلاث سنين مكتوب علي اصحيك كل يوم مهيب حاله ..
************
هذي اختي فت فت
( فتكات ) .. انسانه على اسمها تفتت لك اي مسأله .. عندها خطط ماتخرش الميه خطط فتاكه وتجيب نتايج ودايم استعين فيها لين بغيت شي من احد في البيت وصعب علي
( بس مشكلتها مايشتغل مخها لين اجيب لها حلا من القباني وتلتح عليه نص دله قهوة ) .. وبغض النظر عن انها ملسونه وقرقر كتير .. وقلق نفسي وعلة باطنيه .. لكن ماستغنى عنها ابداً ابداً .. وتصلح عشاي توالي الليل لما ارجع البيت ..!
باقي لها سنه وتتخرج من الكليه .. وانا اللي اوديها كل يوم .. ودايم تصحيني بهالطريقه .. إذاً بذمتكم : مايحق لي اعطيها ركبه واكمل نومي ..؟!
طبعا مايحق لي .. لإنها بتطول يدها وهذا عيب .. بس وش يفهمها ..!
اولاً انا اكبر منها .. وثانياً هي بنت .. وانا ولد وثالثاً بيننا اتفاق بما أنها اقوى مني .. انه مهما حصل بيننا ماتوصل للـطق ..
************
قلت لها روحي الحمام عبي السطل مويه .. وعلى ماتمغط شوي واروق
طبعاً انا متعود لما ادخل الحمام اول شي اسويه ارعص السيفون .. قبل اي شي .. مدري وش اسميه .. مرض نفسي ، وسواس قهري ، انتقام شخصي <--جايه غلط
ولما اسوي شسمه .. وبضغط السيفون طبعاً فاضي لإني رعصته قبل ومايمديه يعبي مويه .. واكبت امي هذا الحدث المفصلي في تكويني الشخصي .. وصارت تحط لي سطل مويه .. لين خلصت : اكبه
ومن مبدأ الشفافيه لابد من ذكر جميع الأحداث بما فيها من تفاصيل..
************
طلعنا انا وهي و
( عنايات ): هذي اختنا الصغيره في ثاني ثانوي وماعندها مشكله في التأخير لإن مدرستها قريبه .. وعنايات على اسمها .. نسميها ام عيون .. برج مراقبه تشوف من جا ومن راح ولما تشوف احد يحكي تلفون تحب تعرف منهو وليه وكم عمره .. مشاكل .. وتحب اللقافه وتفتش مخابيي دايم .. حطيتها في ثانويتها وذيك حطيتها في الكلية متأخره مثل العاده .. ورحت الدوام
انا ماعمري شفت احد يمدح المدير حقه في العمل .. ماعدا انا
صراحه عندنا مدير عسل ، قشطه ودك تاكله أكل .. ودك تعضه .. ودك ترفسه في بطنه <-- تحمست ..
مايدقق في التأخير .. انا سببت له تبلد حسي من هالناحيه من كثر التأخير .. لدرجة لما اجي بدري ( من النوادر يعني ) خطر تجيه جلطه .. سـ سـ سـ سليطين خير اللهم اجعله خير .. إش جابك بدري ياولدي ؟؟؟ ان شاالله ابوك وامك بخير ؟
************
بعد الظهر ابوي يجيب عنايات لإنها قريبه من البيت .. وانا بعد الدوام اطلع انتظر فتكات عند الكليه حتى تطلع ..
اكثر من مره تطلع مع صديقتها
( نظرات ) اللي تمر من عندي وتضحك .. سنتين وهي كذا كل ماتمر من عند سيارتي تطالع وتضحك .. صرت اضطر اروح الحلاق كل يومين احدد *****وكه ..
وكنت مستحي افاتح فتكات بالموضوع لكن جتني الشجاعه وقلت : ترى خويتك نظرات تضحك دايم كل ماشافتني .. ماقالت لك شي ؟
قالت الا داريه
<-- تقولها معصبه ..
قلت شفيك عاد معصبه ؟ عادي كانها معجبه فيني قولي انتي عارفتني منيب راعي لف ودوران
بس قولي ..
قالت : ياثور ( <--- نسيت اضيف في مميزاتها انها دفشه ) .. هي تضحك كل ماشافتك لإنها تقولي انك تشبهني وناقصني شنب و***وكه وشماغ واصير انت ..
صراحه مافهمت .. مدري البنت بكلامها تمدحني او تسب اختي ..
بس من طريقة كلام اختي .. اظن الآنسه نظرات تمدحني وتسبها .. وشكلها بالعربي سبتني انا واختي بس مايخالف .. اللي يغارون من الحلوين واجد ..
************
وصلنا كالعاده وقت الغدا .. وتغدينا
ورقيت غرفتي اتوضى لصلاة العصر واغير ملابسي
طبعاً بعد مافصخ ثوبي بدقيقتين ( حاسبها ) وانا في الحمام .. لازم تجي عنايات وتفتش مخابيي كان فيها ولاعه ولا مرقمتني بنت مثلاً ولا فيها صور الشغاله ؟ .. وتشم شماغي فيه ريحة دخان ولا مافيه ..
المهم ياناس تعبت من لقافتها ودي احط اصبع ديناميت في مخباتي ولا لغم ولا قنبله موقوته تنفجر بمجرد تدخل يديها في مخباتي .. تعبت نفسياً
وشكلي بجرب غرا فيران .. عشان امسكها متلبسه واصورها واعطي الصوره
اختي الكبيره جنايات .. تلبسها تهمه على كيف كيفك ..
************
بعد ماصليت ورجعت ابنام .. رن الجوال :
ورديت آلو ..
وجاني الصوت الشجي : آلو .. نعم خير ..
نعم الله عليك انتي اللي متصله ,, خير انتي وش تبين اخلصي
طيب طيب .. تعال خذني رجلي بيسافر انتداب الحين وطلع المطار وعلى ما اضف عفشي تجيني ..
طيب طيب ..
طرآآآآآآآآآآآآخ <-- تصك جوالها في الجدار ماتسكر الخط
هذي اختي الكبيره الحبيبه ..
( جنايات )
جنايات كل شي فيها حلو ماعدا سوالفها ..تحس ان سوالفها عباره عن " اسرائليات " لاتصدقها ولا تكذبها .. قويه مره .. وبعد فيها عيب زغينون .. انها ممكن تتبلى عليك وتلفق لك تهمه وانت نايم ..
يعني مره زوجها رفض يسفرهم في الصيفيه .. لفقت له سالفة زواج مسيار .. وقالت انت متزوج مسيار شافتك صديقتي انت وياها في السوق .. ووالله .. والله .. والله لو ماتعترف لا اعلم سليطين ( تهدده فيني عشان كذا هو حاط رجل على رجل ومطنشها ) ..
انا دايم اقولها يختي ياحبيبتي هدديه بواحد قوي .. واحد صاحي .. واحد يطق مهوب ينطق ؟ .. لعاد تهددينه بي ؟ تقول ماعليك ادري انك زلابه بس لازم اعطيك قيمه واحسسه ان وراي رجال .. <-- نصابه ادري
المهم حلف لها لين تعب انه ماتزوج واضطر يسفرهم .. وعلى هالحال كل سنه .. مسكين عشان كذا ساكن في ايجار طول عمره .. ماعرف يجمع دراهم .. وعلى هالحال كل مابغت منه شي تلبسه قضية وتهمه .. لين يضطر ينفذلها اللي تبي ويخلص ..
************
رحت اجيبها .. واحنا بالطريق قالت
( شربات ) بنت جنايات ( عمرها 7 سنواات وطايحه اسنانها الاماميه ) .. ابي آيثكريم باثكن روبنذ ..
مايخالف .. نوقف نشتري لك باثكن .. يامعفنه
قالت ( براهيم ) .. صراحه جنايات انا اسميها براهيم احسها اخوي الكبير مهوب اختي .. المهم قالت : انت المعفن وانزل جب لها اللي تبي .. صراحه خفت وسكت لاتلبسني تهمه وتنزل من السياره تقول خاطفني انا وعيالي .. هذي جنايات مو حي الله .. الحرص زين حتى لو انها اختك .. الناس اللي في الشارع جزاهم الله خير يطقون أول بعدين يسألون هذي وش تقرب لك ..
************
وصلنا البيت وقبل ندخل تقابلنا عند الباب مع اختي
( همسات ) .. همسات اصغر من الكبيره جنايات واكبر من فتكات وعنايات .. وهي انسانه رومانسيه ماتسمع لها صوت وأنيقه ومحافظه على رشاقتها .. لما كنا نطلب وجبه قبل تتزوج كانت هي الوحيده اللي تطلب وجبة طفل .. وبعد ماتزوجت " وضمنتها " صارت لما نطلب وجبه تقولي انا مابي وجبه جب لي نص دجاج مثلوثه .. تزوجت قبل ثلاث شهور وتعيش جو لحالها ..
اول ماشافتها جنايات نطت بحلقها قبل تسلم : شفيك جايه ؟ مسوي لك ؟ قايلك شي ؟ تراه يغازل وشايفه رجلي عند كلية البنات ( ماعاقت معها لبسته تهمه .. بعدين رجلتس يالنصابه وش يوديه كلية البنات ؟ )
قهرتني قلت انا كل يوم اجيب فتكات قسم بالله ماعمري شفته حرام عليك .. قالت انطم بس ورجع الباقي تراك يوم تشتري لشربات عسكريم مارجعتلي باقي الخمس ميه ( قسم ماعطتني ولا ريال انا دافع من جيبي وش هالمجرمه ياناس ماتعوق معها ) <-- بيصيح .. المهم دخلنا وقلطت الرجال .. وجايين مسيرين بس براهيم ماعنده سالفه ..
26-04-2011, 10:38 PM
رَجُـل ..... وأربع بنــــــات
العرض الشجري
