كان اليوم اربعاء .. والجو شتاء وممطر وجو عال العال وطلعت اسهر مع العيال في الاستراحه ومبسوطين .. ومانغص علي الا اتصال من اخوي ابراهيم " جنايات " .. الساعه 12
يالله عساه خير .. وش تبي هذي ..!
*آلو .. سليطين تكفى هات من الصيدليه حفايظ لشربات خلصت حفايظها ..
*يابراهيم الله يهديك شربات بقره ام سبع سنين ؟؟ لالحين تلبس حفايظ ؟؟ تروح الحمام
*اقول جبها الحين ولا والله اصحي ابوي الحين واعلمه اني شايفه اليوم وانت جايبني في سيارتك سكار تحت المرتبه ..
* رميت جوالي ورحت بسرعه للسياره افتش ؟؟ لايكون احد حاطها في سيارتي ولا متبليني ..
ومالقيت شي ..
سكار يامعفنه ؟؟ سكار ؟
قولي اسمه زين اول .. بعدين قسم بالله ماعمري شلت سكار في سيارتي ولا شربته ..
خفت تلبسني التهمه .. ورحت اشتري لبنتها حفايظ ..
************

دخلت البيت الساعه 1 .. لقيتهم مجتمعين في المجلس على غير العاده .. وابوي نايم في غرفته .
خير .. شفيكم جالسين هنا ..؟!
قالت ( عَدَلات ) .. هذي امي عدلات .. تحب تعدل بيننا ماعندها احد أعز من احد كلنا سوى ..
المهم قالت مجتمعين على خير .. تعال اجلس ..
ورميت الحفايظ قريب من " جنايات " .. وقالت أي أي جنبي جنبي ومسكت جنبها ؟؟؟
رجفتها امي .. قالت والله لو حنا عميان يابنيتي والله ماجتس ولا هيب لمتس .. قومي وتعدلي بس خلينا نعرف نحتسي ..
ضحكت براهيم وقالت قسم بالله امزح يمه <-- تخاف من امي
قالت امي منهي له هالحفايظ ؟؟ قلت لشربات ؟ قالت براهيم انا قايلة له يجيبها عشان يجي ونكلمه بالموضوع لو قلنا تعال بنكلمك ماجا .. وقسم هذي خطة فتكات ..
( والتفت جنايات على فتكات وخافت وتوزت ورى امي ) ..
خطه مخيسه يافت فت .. أجل حفايظ هاه ؟
************

قالت امي : بنحاتسيك بس رح غير ملابسك وحول .. معاد الا خير
رقيت فوق وغيرت ملابسي ورجعت .. وانا داخل المجلس الا " عنايات " مقابلتني طالعه من المجلس .. وامعطها مع شوشتها وارجعها المجلس .. أدري تبي تروح تفتش مخابيي .. ماعندها وقت ..!
( انا ودي افهم بس لو حصلت في مخباتي ولاعه ولا دخان ولا حزام ناسف ولا حتى سارق شغالة خالتي المغربية الزينه .. وش بتسوي ؟؟ ) .. شكل مافيه الا حل من اثنين .. اما افصل ثياب بدون مخابي ولا اصير البس تنوره .. وارتاح . مهيب حاله ..
************

جلست وتمددت .. وقالت هاتوا ماعندكم .. خير ان شاء الله
جبت بتتكلم اختي ابراهيم بحكم انها الكبيره : وسكتها قلت اوص بس والتفت لأمي قلت كان الموضوع مهم لاتخلينها تبدا .. دوري احد ثاني تراها بتجيب العيد من اول حرفين وبطلع فوق ..
قالت امي انثبري ياجنايات شوي .. خلي همسات تحتسي ..
همسات كانت هايمه في جو ثاني ماهي معانا .. وجالسه تداعب خصلات شعرها .. وتطالع في السقف وتغني بشويش .. ومسكينه مادرت الا راجفتها " ابراهيم "
وانتبهت الرومنسية .. وتنحنحت .. احم .. احم
شف سليطين وانا اختك .. ( لو قالت هالجمله " براهيم " رجفتها .. ماتركب ابد ) ..
انا قلت لأمي اني شفت بنت عمة زوجي .. صراحه بنت ماتمنيتها الا لك .. وانت تثق في ذوقي ؟ قلت ايه طبعاً ( برضو لو قالت هالجمله جنايات ذبحتها ) ..
وهي لسه متخرجه من كلية الطب .. تخصصها طب اسنان ..
قلت : بس انا خريج هندسه .. ؟ <--- صراحه مدري وش دخل هالجمله ..
نطت " ابراهيم " وقالت شف انا خريجة اقتصاد منزلي وزوجي ضابط ..
صراحه انقهرت ودي اطقها .. لو ماهو ضابط كان مسجون وماعاش معك لالحين .. لو بيدي ماعطيك شهادة مهني وقسم نجاره ويخب ..
وحامت كبدي صراحه قلت منيب متكلم وهي هنا .. خلوها تروح ولا بروح انا ..
************

عصبت عدلات .. امي
وكرشتها .. وقالت جنايات خلاص بنطم منيب متكلمه ..
ولمحت احد رافع اصبعه ؟ فت فت .. طابه في صحن حلا وتمسح خشتها .. اكيد طابخه شي في راسها ..
وش عندك ؟ فتفوته ؟ ( تسوي نفسها مؤدبه نكايةً في جنايات ) ..
وقالت : شف يخوي .. انا اشوف انها مناسبه وانا شايفتها في عرس همسات لكن ماكنا ندري هي متزوجه ولا لا .. بس انت لازم اول توافق .. بعد ماتوافق تخطب .. بعد الخطبه انا بدبر لك خطه تكلمها وتقابلها.. بعد وتجلس معها تشوف هي مناسبه ولا .. لا ..
قلت طيب ماينفع اقابلها قبل الخطبه ؟
نطت ابراهيم للمره الزليون .. وقالت : والله ابلغ الهيئه .. هذي بنت الناس مهيب من الشارع ..!!
صراحه حسيت انها قالت شي صح .. من النوادر اللي احترم فيها رايها .. ولو كنت امزح ..
طبعاً " عنايات " ساكته وجالسه تفكر .. فيه زبون بيطير من يدها الحين .. انا بتزوج خلاص شلون بتفتش مخابيي ؟ اخاف بعد تدبر لها فتفت خطه وتفتشني وانا مع زوجتي ؟ تسويها ..
************

صراحه ماجاز لي الموضوع لإني شايل فكرة الزواج من راسي .. ولا بعد شبعت من العزوبيه ..
قلت خير ان شاء الله نكمل بعدين انا تعبت ابي انام .. وقالت امي لاتنام الا لين صليت الفجر بيذن الحين ..
ورقيت غرفتي وريحت شوي .. بعدين رحت لغرفة " عنايات " وحطيت ثوبي .. حسيت لو مافتشت ثوبي بتجيها جلطه .. وبعد شوي جت وشافت ثوبي في غرفتها .. وجابته وهي زعلانه
وش جاب ثوبك غرفتي ؟؟ قلت عشان تفتشينه .. مثل كل يوم
وزعلت وقامت تصارخ ؟ انا منيب ملقوفه ؟ وش انت شايفني ؟؟ جالسه افتش جيوب الناس ؟؟
صراحه قفلت معي . نصابه قسم .. اختي واعرفها
بس صراحه خمتني بغيت اصدقها ..؟!
خذت الثوب ( وقلت في نفسي اوريك الحين في هالضفدعه ام عيون )
وانا اخذ منها الثوب قلت : طيب وين الولاعه اللي كانت في مخباي ؟؟
قالت والله ماخذت شي وماكان فيه ولاعه اصلاً ..
قلت يعني فتشتي مخابيي ؟؟
قالت ايه
قلت طيب تعالي اجلسي شوي ..
************

وجلسنا انا وياها .. وقلت لها : شوفي انا اخوك واكبر منك واعتبريني صديقك ( بس لاتطلبين كروت سوا وموبايلي ) هاها ؟ <-- سامجه صح .. وادري انك تفتشين مخابيي كل يوم .. بس ابي اعرف .. لو حصلتي مثلاً ولاعه او دخان او شي تعتبرينه مهوب زين .. بتعلمين امي ؟ قالت لا
طيب بتعلمين ابوي ؟ قالت لا
طيب فتكات ؟ لا .. طيب همسات ؟ لا .. لاتكون جنايات قالت لا ..
قلت طيب ليش تفتشين
قالت والله منيب معلمه على شي حتى لو شفت اي شي انت اخوي وبستر عليك ( الله يكملك بعقلك يابنتي ) وانا بعد اختك واكيد بتستر علي ؟ <-- لعبت علي .. مدري وش ناويه تسوي
بس انا وصديقتي لين جلسنا نتكلم بالتلفون ماعندنا سوالف .. هي تقولي وش لقت في مخباة اخوها وانا اقولها وش لقيت بمخباتك ..
قلت بس ؟ قالت بس .. وحلفت
قلت طيب مادام انك تعلمين خويتك وش لقيتي بمخباتي .. بصير احط رقمي كل يوم وعلميها بالرقم
*************

طبعاً جانا الأضا المستعجل .. الأخت براهيم وسمعت طرف الكلمه " الرقم " وقالت من اللي بتعلمينها برقمه ؟؟ ترى قسم ان عملتيها بالرقم وقبل تكمل صراحه حومت تسبدي ورجمتها بالمخده .. وحتى عنايات حامت تسبدها منها مع انها اختنا الكبيره ورجمتها بالمخده الثانيه .. اول مره انا اشوف ام وبنتها ام سبع سنين اعقل واركد منها .. الله يعين زوجها
اثاريها جايه تقول انزل ابوي ينتظرك تروح معه المسجد تصلون الفجر ..
************

واحنا طالعين من المسجد .. انا وابو ( شهاب ) .. ابوي ابو شهاب صراحه شكلين مابيحكي .. بنوب بنوب .. كلماته اوامر مطاعه .. انسان دوغري .. يحسبها في راسه ويقلبها يمين شمال بعدين يتخذ قرار نهائي واجب التنفيذ .. صراحه انا احبه .. واحترمه جداً ( بغض النظر انه اكبر مني ) بس انه فوق كذا .. ابوي <-- ياشيخ ؟ وانا ادعي الله انه مايدري عن سالفة الزواج ..
وفجأه قبل نوصل البيت .. قالي : كلمتك امك اليوم ؟
وضاق صدري وانقلب اول نهاري لتالي الليل وقلت خلصنا .. عز الله راحت عليك العزوبيه ياحبة عيني ..
وانا في هالهم والغم .. عاد السؤال : سليطين ؟؟ حاتستك امك اليوم ؟
ترى عندنا زوج اختك همسات بيتغدون .. قم مبكر وحول قبل يجي وانا ابوك ..
حسيت انه مكبوب علي مويه بارده وتشققت من الفرحه قلت ابششششرررررررررررررر بركد الساعه على 2
قال ثنتين في عينك .. وانا ابوك .. بكر بكر ..
************

دخلنا ليوم الخميس رسمياً ( ياشيخ ؟ ) .. ايوه ..
وجت الساعه 12 الظهر وصحيت ونزلت وصليت الظهر .. وجلست مع ابوي .. والساعه 1 ونص جا العريس ( ولد عم اللي مفترض تكون زوجة المستقبل ) .. وركزت عليه صراحه حسيت اني احبه مع اني ماهضمته من اول .. شايف نفسه وسيارته زينه ومرتبته زينه وشكله زين وسيم وغني .. طبعاً بعضكم بيقول يالاشهب تغار منه عشانه وسيم وغني .. لا ابداً .. <-- نصاب
وجلسنا نسولف ونتجاذب اطراف الحديث ومن هنا وهناك .. طبعاً انا على نياتي لالحين .. هاه .. لالحين .. بس رحت اجيب القهوه .. وقابلت فتكات وتغيرت النية 100%
وفتفت تعطيني القهوه .. قالت شوف .. شرايك باللي يخليك تشوف بنت عمه وبأمر وموافقه من زوج همسات ..
قلت شلون
آهاااا .. قلت لي شلون .. : ابيك تلمح له ان اسنانك تعبانه .. وانك رحت لكذا دكتور ولا نفع وسو نفسك تتألم ولما يجي الغدا لاتاكل ..!
قلت جوعان شلون ما آكل ؟
حسيتها بتنادي لي براهيم تطقني ..
قلت طيب طيب منيب ماكل .. وبعدين قالت : حاول تقوله ان ودك تروح لدكتوره بعد ماجربت الدكاتره ولا نفعوا .. وان معاد تثق في دكتور اسنان بعد مالعبوا في اسنانك .. واكيد بيقولك وقتها انا بنت عمي طبيبة اسنان .. وبيقولك تروح لها
صراحه اقنعتني .. شكلها من صحت من النوم وهي غاطه خشتها في الدله لين طلعت هالخطه الفتاكه