المكان : استراحة في غرب الرياض ( السويدي )
العدد : 6 اساسيين + رَشيد الهندي حارس الاستراحه + 3 نهاية الاسبوع وهم اصدقاء ابو سليمان في النادي = 10 نفر آخر الاسبوع
الحاله : نعاني من تسلط وسيطره وظلم وديكتاتوريه ..
اقوى واحد : ابو سليمان
الكديش : الخمسه الباقين ( سعد ، حمد ، وليد ، منصور ) .. بما فيهم انا سليطين طبعاً .. تصوروا .. صرت كديش ؟!
انا انسان معتدل .. من كل بحر قطره .. سعد وحمد سرابيت يحبون يسافرون دايم .. وليد ومنصور عاقلين وتقدر تقول ملتزمين بس مهوب مره ..
القطه : متكافئه وبالتساوي ..
النظام : ديكتاتوري بقيادة ابو سليمان لحاله ..
من حطه رئيس ..!! سؤال جميل .. والسالفه اول ماستأجرنا الاستراحه من 5 سنوات .. قلنا نسوي انتخاب او تصويت في البدايه يكون واحد منا مسئول عن كل شئ من قطه وعيشه وعزايم ورحلات وتعبية المويه وشراء المعسل .. الخ الخ الخ .. وصراحه كلنا ماودنا لإن فيها ارتباط ومسئوليه ووقتها كان لايسافر ولا يروح ولا يجي وطول وقته بالاستراحه في كل الاوقات يجي ويحب يخدم علينا ويصلح كل شي وخفيف نفس وحبوب وكان جسمه نحيف لو تعطس في وجهه طاح .. وجبان في نفس الوقت .. ويشاورنا بكل شي قبل يسويه وقلنا نصوت له ونخليه هو المسئول ..
كيف ( تضخم ) ابو سليمان ..! : الحقيقه بعد اول سنه لنا في الاستراحه دخل ابو سليمان نادي صحي .. وكان حلمه من زمان يتعلم كاراتيه .. وتعلم كاراتيه لين وصل الحزام الاسود .. ثمن صار يتمرن حديد لين انتفخ جسمه ودبل مرتين وصار كأنه فيل بس ناقصه خرطوم .. ومع ثاني سنه بدأ سلوك ابو سليمان يتغير .. وصار مزحه ثقيل ويطق .. ثم تطور الامر وصار يأمر وان مالبينا اوامره .. يطقنا .. واصبح هو الآمر الناهي بعد ما عطيناه الرئاسه وسجلنا العقد حق الاستراحه بأسمه ..!!
بعض ممارساته الديكتاتوريه : قوي مره ومعه حزام اسود وخمسه دان ( وطي ) يعني يوطي ويلعب حديد في النادي الصحي كل مغرب ويتروش ( احياناً ) ويجي الاستراحه .. وكم مره يطقنا ولا نقول شي .. محد يقدر يقول له شي .. مره جا من التمرين ماتروش وبعد ماطفشنا من الريحه قلت فيه ريحة فار ميت ..!! ومن قلتها وانا واقف على راسه اهف على الجمر حق معسله .. لين سرينا .. ويتحكم بالريموت ويحط القناة اللي يبي حتى لو فيه مباراة مهمه في دوري ابطال اوروبا نبي نشوفها يحط برنامج عن سمك القرش في قناة ناشيونال جيوجرافيك .. ولين جا خوياه الثلاثه في النادي نهاية الاسبوع يلعبون بلوت لحالهم ويعطينا باقي الورقه يقول العبوا كنكان ؟ طيب الورقه ناقصه ؟ .. يقول دبروا نفسكم .. وكم مره طالبناه باصلاحات مثل استحداث انتخابات سنويه لرئاسة الاستراحه عشان مايستأثر فيها ويتأمر علينا وزيادة هامش الحريه ان كل واحد يحط القناة اللي يبي بدون مايطقنا لكنه يرفض ويتعنت .. ويصفنا بالخونه والعملاء للاستراحات الثانيه اللي كنا ننعزم فيها ونشوف الحريه والوناسه هناك ..!! وكان يقول صدقوني لازم يحكم الاستراحه شخص قوي وديكتاتوري ولا ترى تخرب وتشوفون كل يوم واحد منكم مدخل علينا واحد لين نوصل عشرين ياكلون ويشربون ببلاش .. لازم نضبط الوضع ويكون فيه نظام ..! بس شفنا انه استغل قوته ونشب بحلوقنا .. ومانقدر نطرده .
المطلوب : اسقاط ابو سليمان بس شلون ..!!
سوينا تنظيم سري احنا الخمسه.. صار بيننا اتصالات الصباح وكل واحد في الدوام حقه واتفقنا نجيب حارس الاستراحه رَشيد عشان لو انكشف التنظيم نقول انه هو قائد التنظيم وهو اللي غرر بنا وتصير الطقه براسه .. وكلمت انا رَشيد الهندي ووافق ينظم للتنظيم السري بس قال عندي شرطين .. الاول منيب مسوي لكم شاهي ولا معسل برا الاستراحه انا مثلي مثلكم !! والثاني ابي عشرين ريال حق البنزين ( مع ان معه سيكل مهوب سياره ) .. ووافقنا لإن اللي يجمعنا الحين مصير مشترك وحريه ورفض للاستبداد والدكتاتوريه ..
وعقدنا أول ورشة عمل .. اجتمعنا عصر احد الايام في مقهى قريب من الاستراحه عشان يقدر رَشيد يحضر بالسيكل .. وصراحه مارتحنا .. حسينا انه قريب ويمكن يمر ابو سليمان العصريه رايح للتمرين ويشوف سياراتنا وسيكل رَشيد ويعرف اننا مجتمعين من وراه .. ويطقنا ..
بعدها اتفقنا نجتمع الجمعه في الثمامه .. لإن بالعاده الجمعه غالبيتنا يكون مع عياله طالع يتمشى ومانجتمع في الاستراحه وكانت فرصه سانحه من ناحية التكتيك العسكري ( عايشين الجو ) ..
تواعدنا الساعه 2 الظهر في البطحا عشان رشيد يقضي اجازته الاسبوعيه هناك مع ربعه ووزينا مواترنا وركبنا كلنا مع " سعد " في الجيب حقه وحطينا سيكل رشيد فوق التنده وانطلقنا في رحلتنا السريه للثمامه وشرينا غدانا على الطريق ..
اخترنا مكان بعيد في الثمامه .. ووقفنا موتر " سعد " على طعس شامخ في وجه الرياح .. ( ماكان فيه رياح الا من حمد .. خاصه بعد مايعسل ) ونزلنا سيكل رشيد وقلنا له رح جب لنا ببسي من اقرب بقاله ( 10 كيلو ) من موقعنا .. بس عشان نبعده عن الخطه لإن ابو سليمان لو عطاه كف واحد خرط له السالفه كلها .. وقلنا لين خلصنا نعلمه مايخالف ..
وافترشنا البساط ونزلنا غدانا .. وبعد الغدا بدأنا الجلسه السريه بعد ماقفلنا جوالاتنا وبعدنا عن السياره " لايكون ابو سليمان حاط جهاز تنصت في الجيب " .. احتياطاً يعني ..
تبادلنا الافكار والخطط تقريباً ساعتين ونص .. واتفقنا اخيراً على خطة " التظاهرات اللي سائده في المنطقه واثبتت نجاحها " .. وقلنا نسوي مظاهره واحتجاج سلمي واضراب شامل في الاستراحه بقيادة رشيد ( عشان تجي الطقه براسه لو فيه طق ) ووزعنا الادوار وكل واحد عرف مهمته اللي يروح الخطاط يسوي الشعارات ( ياسليمان ئول لآبوك .. اخوياك بيكرهوك ) ، ( تطقنا ولا ماتطقنا رشيد بياخ ذ حقنا ) ، ( الله حريه رشيد وبس ) ، (مش حـ نخاف مش حـ نطاطي .. احنا كرهنا الصوت الواطي ) .. واللي يحرق خيشة الجمر كلها حق راس معسل واحد واللي يسرق احجار الريموت .. وغيره من ادوار العصيان المدني السلمي وبعد مانتهينا حوالي الساعه خمسه وقبل المغرب بدقائق .. لمحنا رشيد ماسك السيكل يمشي جنبه على رجوله وتلحقه سياره .. وهو يصارخ .. انا مافي معلوم انا مسكين هازا نفر خطط فجر انا مسكين مافي معلوم ..!! ولما قربوا عرفنا انه ابو سليمان كان يمشي عياله في الثمامه و شكله شاف رشيد عند البقاله وخاف رشيد ولحقه ابو سليمان ..
تسمرنا في اماكننا .. وكأن الشمس فوق رؤوسنا وتصببنا عرقاً مع اننا كنا في عز مربعانية الشتاء ..