بسم الله الرحمن الرحيم ..
السلام عليكم ورحمة الله وبركاته ..
وشخباركم وشعلومكم يا اعضاء منتدى البطاله ..
ان شا الله كلكم بخـــير و سعــــآده ..
..


قبل ايام كان في بيتنا حفله , وأي حفله حفله من نوع آخر ههههههه ,تجمع بزارين من جميع الأعمار .
الصراحه مو كثيرين مثل العاده , لكن هالمره صار فيه أعمار أصغر خخخ يعني في سن المواليد .
والسبب طبعا أمي و خالاتي قرروا يسيرون على وحده والده , ويقومون بالواجب , وأنا كبش الفداء والحمل الوديع
خخخخ اللي المفروض أستلم هالبزوره الله يحيهم عاد << وش عقبه ..
المهم مع حوسة البزوره وغثاهم جا في بالي ألحين حنا عندنا عادات غريبه ولها مسميات بعد غريبه .
ياترى من اللي اخترعها ؟ ومن بدا فيها و وش سرها ؟ يعني أبسط شي تذكرته ( الرفاعه , النزاله , الحفاله )
وغيره وغيره هههههههه مدري ليش تضحكني هالأسماء .

نبدا بالرفاعة </B>(لازم نكرمها ونبدا فيها هي سبب هالموضوع الكريم )
هي مبلع من المال يوضع للمولود في وقت النفاس , بصراحه مدري ليش سموها بهالاسم يمكن ترفيع لقدر المولود .
طبعا كل شي بطبعه يبدأ بسيط وبعدها يتطور ويطلع هوايل , خخخ يعني من أول يحطون أي مبلغ ع التيسير.
وخلينا نقول في الغالب 50 ريال ياحلوها ويا زينها ويلفون هالخمسين في منديل والله وأعلم هالمنديل وين كآن .
خخخ أعتقد في المخبأ السري للحريم وبعدها تلفزه في هالمولود وانتهت العمليه الخطيره هذا بالنسبة للضيوف البعيدين .
لكن الأقارب مرره ممكن يقدمون مبلغ أكبر ولو كانت المولوده بنت يجيبون لها ذهب << راحت عليكم يالأولاد .
أما بالنسبة للوالدة تحط ما تيسر لها من قهيوه وتوابعها مافيها كلافه أبد.<< يازين ذيك الأيام .
لكن ألحين لا , الواحد صار يستحي يمد 200 في خضم زيادة الأسعار وتطايرها .
غير التكلف اللي صار واللي الكل يعرفه بس بقوله بشكل مختصر وأبرز شي هو تغير مسماها إلى (حفلة المولود ) .
وصار يتحدد لها يوم معين, ويتقدم لها أشياء معينه وبأرقى وأفضل شكل , غير أن الرفاعه نفسها لازم تنحط بكرت جميل الشكل
وألا بعلبة غريبه خخخ وآخر شي تنذب هالخرابيط ,يعني إسراف ع الفاضي .
على الأقل سابقا المنديل يستفاد منه شوي خخخ مع أني ما ظنيت لكن هالاوراق قليل اللي بيستفيد منها.
ألا أن كآن بتصيرون مثل أختي خخخ تجمع كروت أمي وتلصق عليها أوراق بيضاء عشان تغطي كتاباتهم
وتزين بها دفترها التفصيل عشان تكتب فيها دروسها وألا تثبت الغرز حقتها ..
عاد أنا قلت لأمي لازم تتمسكون بتراثكم لكن تطورون فيه شوي خخخ قالت :كيف (أنا عارفه تآخذني على قد عقلي خخخ)
قلت : تحطون رفاعتكم بمناديل لكن تختارون مناديل كشخه ملونه ومخرمه يعني مناديل راقيه
يستفاد منها <<ماودي أقولكم عن النظره اللي رمقتني فيها أمي .

النزاله :
نزاله : من نزل ينزل منزلا << لا تحوقين الدعوه ,
وتعلمنا وش أصل هالكلمه << معليش وهقتك هههههه .
المهم أنها هي شي ممكن يكون مادي يعني مبلغ من المال أو عيني تشمل ( غساله ,ثلاجه, مايكرويف , واللي طايحين فيها هالأيام (بلازما )
, وممكن بالنسبة للحريم يعني طقم دلال أو سفرة مواعين , أو طقم بيالات وفناجيل ).
وأن هالشي اللي ممكن يكون مادي أو عيني يُعطى للناس اللي توهم ساكنين بيت جديد ,تقريبا مثل الهدية << احلفي .
و تقديم هالنزالة عادي جدا يعني يرووح الشخص يبارك لهم بمناسبة البيت الجديد ويعطيهم المقسوم ..
طبعا اللي أشوفه ألحين أن أغلب الناس اتجهوا للمادي , يعني صاروا يعطون فلوس وكلن عاد وقدرته الماديه .
يعني بسبب اختلاف أذواق الناس ويمكن لأن أهل البيت يحتاجون للفلوس أكثر بحيث يوفرون لهم الأولويات .

الحفاله :
الحفاله مأخوذه من الاحتفال , وهي نفس الشي هديه تعطى للعروس احتفالا بها لزواجها ولأنها فكت أهلها منها
ناشبتن لهم يالله تزوجت فيحتفلون بقلعتها عاد << امزح امزح ..
طبعا سابقا يسوون عزيمه للعروسه قبل زواجها تكون بسيطه جدا بحيث يجوون أقارب العروسه يباركون لها
ويعطونها هالهدية مع خالص دعواتهم بالتوفيق والسعادة في حياتها المقبله , ويمكن تكون هالهدية مثل السابق ذكره مبلغ مالي
( أزعجتكم فيها بس لازم أقول كل شي, لأني أراعي المصداقيه ) وممكن تكون هالهدايا شي من حاجيات العروسه اللي تحتاجها .
يعني اللي أتذكره من الهدايا اللي وصلت خالاتي قديما( ذهب (أيا كآن عاد ) , مواعين << لازم الغثا,عطورات , طقم شناط سفر << ياقدمي , مفرش نووم ..... الخ )
لكن ألحين تطوور هالشي , يمكن الهدايا مااختلفت ألا أنهم بدعوا فيها وبطريقة تقديمها .
لكن صار لازم نسوي حفله للعروسه , وفي الغالب يسونها صديقات العروسه أو بنات خالاتها أو عماتها (الأهل يعني )
ويسمونها حفلة توديع العزوبيه خخخ مدري عاد صارت لها مسميات واجده بس هذا اللي أتذكره
طبعا الميزه فيها لازم تكون مفآجأه للعروسه يعني ما تدري عن موعدها ونجيب كيكه وطبعا خرابيط واجده .
أحلى شي الرقص والصراخ والفله والاستهبال ههههههههه وكلنا نحاول نخمن من العروسه القادمه ..
اللي عرفته أن حتى بعد المعاريس تجيهم حفاله , يمكن اسمها غير مدري ,ههههههههههه لكن اللي ضحكني مررره شفت فديو للتصوير
زواج الرجاجيل المهم كانوا الأقارب يلفزون في يد العريس المتوهق هالفلوس وهو يتبوسم ومنشرح صديره
ههههههههههه أحس مخباته مليااااان ظرووف وقاعد يحسب كم بيطلع له هالليله خخخخ << كلن على همه سرا وأنا على همي سريت ..


هههههههههههههههههههه , ما أخفيكم لما رجعت أقرا موضوعي ضحكت من قلب وش هالموضوع اللي بنزله , ترددت كثيير خاصة أني أحسه يفتقر لمعلومات كثييره مثل ( هل هالعادات تصير في كل مناطق المملكة وألا أغلبها تصيير في نجد بس ؟ وهل فيه عادات أغرب منها تصير أو لا وهل هي للحين موجوده وألا اندثرت وألا تطورت ؟ و وش أسماءها ) يعني تسآؤلات واجده حاولت أستنجد بقوقل لكن للأسف ما فادني ضحكت على نفسي وأنا كل مرره أرجع أكتب كلمات ممكن توصلني للموضوع أو نقاط ممكن تفيدني بس للأسف باءت كافة المحاولات بالفشل الذريع ,قلت نستنجد بأمي الحبيبه بس ما عطتني وجه واستسخفت أسئلتي , مثل ما أنا خايف أحد يستسخف موضوعي , وخذوا راحتكم يامشرفينا الجميلين << أولم العصابة قبل الفلقة , بس قلت أنزل اللي عندي , وكل عضو أوعضوه يدلي بدلوه بالموضوع << أنشبكم معاي .

أحبكم خالاتي وكل يوم جيبوا بزارينكم ترى عادي
شكرا لوقتكم اللي ضيعتوه في موضوعي ..
منورين مقدما ..

محد عطاني راي وراكم مستحييييييييييين

خخخخخخخخخخخخ
منو قال اندثرت با العكس صارفيها فخفخه اكثر من ما قلتي
100 ريال صارت قليله
و200 ريال فشيله
الموضوع صاير من 500 وفوق والكل يهايط على حساب الثاني

هههههههههههههههههههههههههههههههههههههههههه تسلمين الموضوع
بس السالفه ومافيها انك تعطينهم لاجاهم مولود وهم يعطونك لاجاك مولود
يعني السالفه كأنها سلف *_*
عوافي