[frame="11 98"]
السلام عليكم ورحمة الله وبركاته

ببدا بالموضوع دغري اكيد الكل الحين حايس ومايدري من وين يجيب الطلبات اللي بالورقه لان الدوره قريب لكن انا اعرف واحد اشتراهم وبقولكم من وين عشان ماتنحاسون مثل مانحاس هو بالبدايه

الموقع = شارع الخبيب بريده تمشي لين يجيك مسجد اللي عنده مواقف السيارات (( الكدادين )) الاشاره اللي عند المسجد تعديها تجيك بعدها اشاره عدها على طول التفت يسار في محلات على يسارك بس مو مباشره غاطسه لكن اذا التفت بتشوفها ومكتوب عليها يوجد لدينا جميع المتطلبات العسكريه أبد ماعليك اللي تعطيه الورقه ويعطيك كل الاغراض
بس عاد انت تاكد من العدد وانها كلها كامله وخليه يراعيك بالاسعار تقريبآ عندهم كل شي
مايتبقى لك الا الادوات المدرسيه والأقلام هذي تاخذها من المكتبه ويتبقى لك أدوات الحلاقه هذي عاد بكيفك تاخذها من اللي تبي لكن صاحب المحل وصف لي محل يبيع شناط حلاقه
طببعآ قلنا تلقت على يسارك تشوف المحلات اكيد انك بتديور لها وتصير على يمينك لخلصت من أغراضك امش سيده تجيك اشاره اطلع يمين تجيك اشاره اطلع سيده يجيك تقاطع اطلع سيده بعد تجيك اشاره اطلع يسار بيصير على يمينك مدرسة بنات بعدها بيجي محل محمود سعيد للعطور تعده في محل بعد اسمه عوارض يقول يبيع ادوات حلاقه



* ملاحظة (( اللي مو من بريده ولا يدري وين شارع الخبيب = قبل محطة الرياض السريع اضن فيه لوحه مكتوب وسط عنيزه ابد تاخذ منها يسار هذا امتداد شارع الخبيب تتجه شمال تصير الجامعه ومدينة التدريب على يمينك ))

* (( الحقيقيه انا خريج جامعه وانتظر التعين ولا لي بالعسكريه بس حبيت أخدمكم ومابي منكم الا الدعوات والله يوفق الجميع ))

* (( إحذر تقول بجميع اغراضي من محلات الرياضه أو محلات المفروشات وكذا لانه راح
ينضحك عليك بأسعار خياليه وراح تتعب ))

* (( بعض أنواع الأغراض فيها الغالي وفيها الرخيص لاتاخذ غالي خذ ارخص شي هي كلها دوره عسكريه وكرف مشي حالك ))

(( المحلات ترى عليها زحمه وبس يمشون حالك ويحطون لك اي مقاس انشب لهم وشوف المقاسات اللي تناسب لك وخل الورقه معك وخله يشيل بالكيس واللي تخلص منه حط علامه عليه ))


بالتووووووووووفيق للجميع

[/frame]

شـكرا لك وبارك الله فيك...

حبيت أضيف نقطه فيه محلات مفروشات انتبهو تشترون منها غالين مره