السلام عليكم ورحمة الله وبركاته،،،
صبحكم الله بالخير،، هذي أول مشاركة لي واستهل الفرصة بسرد معلومات عن الكشف الطبي الذي أجريناه ولله الحمد في يوم الأحد بتاريخ 29/4/1432هـ بقطاع الحرس الوطني (كتائب/أفواج) ,,
طبعاً راح أفصل الطريقة من طقطق إلى السلام عليكم بشكل دقيق مع إيضاح بعض الحالات في هذا الجانب.
أولاً: موعد الحضور إلى التجنيد الساعة 7 صباحاً طبعاً حنا حضرنا 6 وبعضهم من 5 جاي وبعضنا جاء متأخر وعادي يعني الباب يقفل نهائي 7:30 إلى 8 تقريباً ,, يعني حط في بالك هالشيء. وترى عادي لو جيت لقيت الباب مقفل ماهو يعني مقفل لانه هو مسكر فقط وكلهم داخل ولكن لو فتحته بتخش عادي العسكري تلقاه جالس جنب الباب عند ماصه ومايكروفون وينادي بالأسامي ويدقق على شكلك ولبسك وبطاقتك الهوية لازم تجيبها.
طبعاً اللباس رياضي بدون جزمات فقط (حذاء) واللي جايب جزمات يمشونه مافيه تعقيد نصهم اللي شفتهم بجزمات وركبوهم الباص..
الشعر ماعندك أحد يقولون حلاقة شعر الرأس وبعضهم شعره عادي (أهم شيء خذها مني شعرك لا يكون طويل تبي تعرف كيف؟ دخل أصابع في شعرك إذا تعداه لازم تخففه) لكن الاحتياط واجب خففه بشكل مرتب بالنسبة لي أنا كنت محلق رقم خمسة وواحد ردوه الساعة 7 قالوله رح حلق شعره طويل وراح المسكين يدور حلاق فاتح ماحصل رجعلنا بعد عشر دقايق قال والله ماحصلت وانا ماني من الديار هذي تكفى مشني وبعد مناوشات وطلايب مشاه العسكري ولحق على الباص اللي كان المفروض يمشيء 9 إلى 9:30 طبعاً بعد ماخشينا الصالة اللي فتحوها الساعة 7:10 جلسنا في الصالة حنا والأفواج بس بعدين جاء واحد مدني معه ملف وقال: أي أحد من الأفواج يطلع في الساحة برا , يعني الكتايب بس في الصالة , الوكاد بعد ماخشينا الصالة جلسنا والعسكري جلس على الماصة ومعه مايكروفون وملف وأوراق ويقعد يرتب فيها وبعدين يعطي فرصة للمتأخرين يخشون .. الزبدة بداء ينادي بالأسامي يتأكد من الحضور كلهم موجودين والغياب يسجلهم علشان يحسب العدد ويركبهم الباص ,, بعد ماخلصنا وجهونا على الباصات وخذ بالك لازم لازم لازم تشيل معك دراهم يبي يصكك الجوع هناك وبتروح فيها اقولك بعدين ليش ,, خذ معك بوكك وجوالك ودراهم عاادي مافيه تدقيق جوالك أهمممم شيء لا يسمع صوته أحد حط نغمة خفيييييفة مره ولا صمته أحسن لك وتبي الصراحة بعض العيادات هناك تكشف الجوال إذا كان فاتح من الطنين وزي كذا وبعدين إذا وصلتوا للعيادات وبدت إجراءات الكشف حقكم قفل جوالك وريح بالك ولا تجيب الكرت حقك ولا أي أوراق كلام فاضي تبي تحشرك وتزعجك ويمكن تضيعها بعد مالها أي داعي تجيبها ,, وين وصلنا؟ عند الدراهم خذ معك دراهم أقل شيء 10 ريال للشخص الواحد لان الأسعار دبل هناك ,, بعد مايوجهونكم للباصات تركبون فيها لمدة عشر دقايق إلى ربع ساعة علشان ينطلق الباص ,,
بعدين خلاص توصلون عند العيادات وهي مقرها في خشم العان عند لواء الإمام محمد بن سعود الآلي تنزلون من الباصات ويقولون لكم تبطحوا في الساحة (ساحة العيادات) الوصول هناك يمكن الساعة 9:30 تقريباً يصفونكم سرا وتجلسون على الأرض وفيه اثنين جنود هناك هم اللي ينضمونكم طبعاً إلين يجي الداهيه هههه (رئيس رقباء) هو المسئول عنكم بشكل كااامل في هالعيادة يجي طويل العمر على جيل بترول نيسان رتبة رئيس رقباء وينزل ويأخذ له شوي يتمسس ويتحكحك هههه ثم يجي يأخذ الأوراق ويرتبها ويجي قدامكم ويطلع اللي عندهم (إعادة) يطلعهم من المجموعة ويصفهم على جنب ثم يبدأ الهياط على أصول ( يعد يهايط عليكم ) تعليمات وقلق واللي عنده وماعنده يمسك الباب ماعندي فيها وكلام طويل وتعليمات وقوانين الكشف الطبي بس بيني وبينكم مايقصر يقول اللي عنده أعذار يقولها الحين ونطلعه يخلص أشغاله وأنا بنفسي باخذ ورقة الكشف حقه وبخليها عنده وبعطيه موعد الاسبوع الجاي لو يبي او أي موعد يبيه لكن إذا بداء الكشف لا يجيني يقول عندي وماعندي لاني بمسكه الباب ويبي يدور إعادة من شهر إلى شهرين المهم أنتم اسكتوا واحترموا الرجال وخلكم نظاميين أحسن ,, بعد مايعلمكم التعليمات يبداء فرز المجموعات يطلع 11 شخص و 11 شخص و11 شخص .. إلخ يعني كل 11 شخص مجموعة وتسمى المجموعة (مجموعة 1 ) يعني يطلع 11 شخص يقولهم أنتم الحين مجموعة واحد مثلا أو اثنين فهمتوا ؟؟ أنا طبعاً كنت في مجموعة (4) هههه يالبى قلوبهم بس ,, وخلاص تمشون على المجموعة هذي بالصوت تمشون بالمجموعات لين تخلص العيادة كلها .. بعد ماتروحون كل واحد مجموعة نبدأ الأن بالعيادات بالترتيب ,, :
أولاً: عيادة الطول والوزن ( حط في بالك مهما يكون وزنك لا تخاف إذا طولك يساعدك الوزن يطيح منك < خبر مؤكد ) يعني مافيه رسوب إلا إذا كان وزنك كبير وطولك قصير مايمديك أبد يعني بالمعنى الفصيح ,, الطول يكون متناسق مع الوزن زي كذا مثلاً:
طولك 170 > وزنك الحد الأعلى 190 والأدنى 64 ماني متأكد بالضبط لكن عندك مجال واااجد ماعليكم أبد ,,
بعد مانتهينا من الطول والوزن نجي للعيادة الثانية ,, طبعاً أنتم تمشون بالمجموعات يقولكم يامجموعة اثنين يجون هنا وانت معهم ,,
ثانياً: عيادة الأشعة الصدرية: هذي عيادة إلكترونية جهاز يثبتونك عليه طبعاً يقولون لك فصخ البدلة اللي فوق بدون البنطلون ويثبتك على الجهاز ويدق الأشعة الليزر ويطلع بلاويك كلها.. ما تأخذ ثواني وانت على الجهاز ,,
ثالثا: عيادة عينات البول (أعزكم الله)..
تروحون لدورات المياه حقت المسجد عندها ممرضين عندهم علب وشناط وأوراق ولزقات وشغلات: يقولون لكم تعليمات أخذ اليول ويأخذون منكم بول بمقدار (40%) من العلبة يعني ربع العلبة بالعربي,,
بعد ماتسلم العلبة يسألك أنت تاخذ علاجات؟ عندك أعراض؟ عندك مشاكل؟ انتهينا.
رابعاً: عيادة الأسنان والأذن:
الله يعيييينكم ,, بس ماعليكم يعني تبي تتجاوزها لازم تتوفر فيك الشروط التالية:
1. نظافة السنون,,
2. ريحة الفم,,
3. السنون الست الأمامية اللي فوق واللي تحت تكون سليييمة, ( الضروس لا تدقق فيها ) وحسب الدكتور عاد يمشيها ولا لا بس الأهم الست الأمامية.
4. اللثة ماتكون مجروحة يعني ماتكون ملتهبة,, من قوة التفريش هههه
5. بالنسبة للإذن تكون خالية من الشعر اللي متجمع على فتحة الإذن والصمغ لا يكون واجد سو له شفط أصرف لك تنظيف يعني وبالنسبة للطبلة لازم تكون واضحة يعني مايكون عليها شيء عالق وانصحك لا تنظفها قبل الكشف بيوم واحد لان أحياناً تكون ملتهبة او يتجمع فيها الماء يعني قبل الكشف بثلاث ايام سو لها تنظيف او أربع ايام.
لأن بيني وبينكم عصيمي ردوه مسكين بسبة الماء كان متجمع على الطبلة..
6. خلك أخلاق مع الدكتور لا تتفلسف وتكثر كلام وخلك هادئ معه. انتهينا.
خامساً: عيادة الدكتور النفسي:
هذي أصعب مرحلة تمر عليها,, حسب تصوري لانهم راح يختبرون شخصيتكم قبل تخش العسكرية,,
تخش على الدكتور يسلم عليك بكل هدوء يقولك تفضل استرح ويفتح ملفك ويقراء تفاصيل حياتك كلها يقولك بالنسبة للمؤهل ويذكر (مؤهلك) إنك أخذته في تاريخ كذا تقوله صح , يقولك بعدها وش سويت توظفت وين رحت ؟ تقوله الصراحة احسلك لانه والله يطلع كذبك في ثواني واذا طلعت كذاب عنده ماتصلح عسكري في نظرهم لانها أمانة وراح تحلف بعدين وتقسم على هالشيء ,,
بعد مايسألك وزي كذا في سؤال راح تدعون لي عليه بسبب الإجابة / السؤال يقولك:
وش تبي بالعسكرية؟
قلها بصريح العبارة ( خدمة ديني ، ثم مليكي ،، ووطني ,, وخدمة نفسي ),,
على طول بعدها يبي يقولك امتد على السرير،، راح يرفع بدلتك ويحط السماعات على صدرك وعلى قلبك ويقول تنفس مع فمك خلك هادي لا تخلي نبضات قلبك سريعة لأن فيه واحد ردوه من نفس مجموعتنا بسبب سرعة قلبه ياخفون انه ماكل شيء ,, على فكرة يسألك اسئلة محرجة يقولك ( انت تاكل ابيض؟؟ تحشش؟ تشرب خمر؟ لا تضحك ولا تتفلسف رد عليه بكل هدوء قل لا الحمد لله والأفضل إنك ماتكون مدخن لانه لو سألك أنت تدخن قل إيه لأنه يقدر يكشفك بالراحة),, باختصار انتبه تكذب عند النفسية ’’ أنتهينا ..
سادساً: عيادة العظام:
عيادة حساسة مضحكة وفلة:
دكتورين مصارية بس مايحبون الهزاار ~ يعني الاستهبال ~ يقولون نزل بدلتك وبنطلونك اول ماتخشون عليهم وانتم كلكم مع بعض يعني اقصد المجموعة بس مش كل البعثه ,, يعني تقريبا كلكم 11 شخص تفصخون الا المقوصر سروال السنة الصغير ماعليك لو مامعك لا تخاف بس لو كذبت عليهم بتاكلها يكتبون غير لائق على طول ,
هذي سلمك الله يكشفون على عظامكم يشوفون فيه كسور فيه عمليات فيه اصياخ مركبينها في السيقان ثم يطلع ثلاثة ثلاثة يقول امشوا بسرعة قدام وارجعوا ويقول اركعوا بعد ويمسك ظهوركم ثم يمسك واحد واحد ويمد يده ويلفها يمين يسار ويسألك وقتها فيك كسور فيك شيء وانت تجاوبه يبيك ترتبك وتكع بحاجة انت خلك طبيعي ولا تضحك او ابتسم خفيف لان بيني وبينك واجد يكركرون ترى الدكتور يحسبها عليهم وهم دلوخ ’’ بعدين يعطيك اصبعين من اصابعه يقول اسمكها وشد عليها بقوه اهم شيء يدك لا تكون معرقة خلها مفتوحة على طول ، بعد مايلف عظامك يمين ويسار فوق تحت يسدحك على السرير ويختبر رجولك بعدين يدخلك في غرفة صغيرة مع دكتور مصري مطوع يقولك فصخ سروالك الصغير هههههه ولا تخافون مايمسك شيء بس يشوف بسرعة ويقول لف ورا ويشوف على طول يقول ارفع خلاص واطلع ,, اول ماتطلع لاتضحك لان خوياك يقزون في وجهك ويضحكون دلوخ ,, خلك واثق من نفسك ,, إلين تطلع من العيادة هذي’ انتهينا ,,
سابعاً : عيادة (الدم),,
للأسف قبل اكتب شيء عن هالعيادة اثنين من مجموعتنا بس يعني 2 من أصل 11 اغمى عليهم طاحوا يوم سحبوا منهم جرعات الدم ونقلوهم المسجد ربع ساعة وجابوهم ،،
لا تخافون يسحبون منكم 5 عينات دم في علب مستطيلة ,, ثم خلااااص تطلع من العيادة هذي وانت طاااافي،، انتهينا,,
ثامناً: عيادة النظرررر:
أخيراً وليس آخراً عيادة النظر والله يعينكم عليه الدكتور سوداني لكن خلكم حريصين معه لانه سريع نسبياً في إلقاء الأسئلة او طريقة سؤاله بالعصا طبعاً يدخلكم غرفة ثم يجلسكم على كرسي ويسألكم عن ثلاث ألوان (أرزق ، أخضر ، أحمر ) يعني علبة موية ودباسة وقلم كلها له لون خاص’’
بعدين يقول ارجع آخر الغرفة ثم يطلع العصا يأشر على لوحة فيها حروف W و M لكن مختلفة الاتجاهات يقولك وين اتجاه W تقوله فوق بناء على الاسهم ويقولك وين اتجاه M تقوله تحت وزي كذا يمين ويسار ,, انتهينا’’
بعدها تبي تطلع وانت تترنح من التعب ورايح فيها لكن المفاجئة بتلقى لك تصبيرة من واحد ممرض ماقصر لكن مدبل الاسعار جايب الجيب حقه نيسان باثفندر ومعبيه موية وعصيرات وفطائر سفن دايز بالشوكولاته والفراولة وفطيرة لوزين بالجبن يبيع عليكم الحين رح واشتر اللي تبي وعب بطنــك لازم لازم تااكل وتعوض نسبة اللي فقدته من دم وجهد بدني وعصبي ،، انتينها،،
وفي الختام يقولون لكم تسدحوا في الساحة ويجهزون لين ينتهون من التدقيق وكل شيء وبعدين يعطون الإشارة بالإقلاع إلى الباصات ,,
ملاحظات:
- صلاة الظهر بعد ماتنتهون من عيادة الأشعة الصدرية يقولون لكم تصلون وترجعون على طووول للساحة هنا.
- خلك مركز على مجموعتك وبالذات للممرضين والجنود اللي ينادونكم،،
- الوضع إيزي مرره متساهلين في أموور كثيييرة لا تخافون’’
- تراني كتبت الموضوع على وانا مستعجل لا تواخذوني يالربع هههه
أرجوا إني كفيت ووفيت ,, وكنت أنتظر هالفرصة علشان أفيد أخواني اللي بعدي لأني عانيت قبل وأنا أبي معلومات عن هالكشف الطبي ومحد أفادنا بشكل واضح..
للإستفسارات أكثر أنا جاهز بشكل تفصيلي ,,
(أرجوا التثبيت إذا أمكن لسهولة الوصول إلى الموضوع )
شاكر لمنسوبي إدارة منتديات بطالة الاهتمام بهذه الجوانب من الوظائف وبالذات اقسام القطاع العسكرية وتقسيمها إلى عدة جوانب..
تكفون دعواتكم لنا بالتوفيق وتطلع النتائج تبشر بالخير,,
أخوكم/ العتيبي الذي كويس،،
منقوله
14-05-2011, 01:48 PM
العرض العادي
