23-05-2011, 05:05 AM
|
 |
عضو سوبر
|
|
تاريخ التسجيل: Apr 2008
المشاركات: 355
معدل تقييم المستوى: 2617
|
|
بنك التسليف او المئوية او معهد ريادة الاعمال الوطني
[align=center]
بسم الله الرحمن الرحيم
السلام عليكم اعضاء وعضوات منتدى البطاله
عساكم على القوة والصحه والرزق من رب العالمين
موضوعي بسيط جدا وهي عباره عن بداية تجربه يستفيد منها الغير وفي نفس الوقت حاب اشوف ارائكم
نفيد ونستفيد
اصحاب المشاريع \ الاشخاص اللي يعملون دراسة الجدوى لمستقبلهم التجاري \ الباحثين عن جهات التمويل \ اي شخص اخر عنده معلومه يسدحها هنا
قبل ثلاث اسابيع تقريبا قررت افتح لي مشروعي الخاص
دخلت على اكثر من منتدى وبحثت وبحثت وبحثت ليل نهار حتى بالشارع وانا معلق الايفون بوجهي داخل عن طريقه النت يعني كل وقتي وانا ابحث
بتقولون وش يبحث عنه
جايكم بالطريق عن اللي ابحث عنه
انا مااملك راس المال للمشروع فا جلست ابحث عن الجهات اللي تمول وتدعم المشاريع الصغيره والمتوسطه
اول ماطاحت عيني على صندوق المئويه دخلت على موقعهم وشفت شروطهم طبعا عجبتني سياستهم في الدعم من ناحية انك اول ماتفتح مشروعك تسدد القسط بعد ستة اشهر يعني شي حلو يمديك تدبر حالك وتوقف شوي على رجولك والشي الثاني انهم يعينون مرشد لك لمدة ثلاث سنوات نقول شي حلو يعطيك النصايح ،يساعدك اذا احتجت شي من استشاره او غيره ....
اما السياسه اللي ماعجبتني فيهم بعد البحث عنهم بالمنتديات ورؤية اراء الاعضاء
حصلت انهم مثلا لو مشروعك بيحتاج 200 الف ريال يعطونك بس 170 الف ريال يعني 30 الف ريال ياخذونها ويقولون لك هذي رسوم اداري ونسبه منها للمرشد الخاص فيك وانت تسدد الـ 200 ألف
المشكله مو بس شخص واحد تكلم بموضوع الثلاثين الف اكثر من منتدى واكثر من تجربه شفتها يتكلمون عنها ومن هذا السبب ابعدتهم عن فكري يعني مراح اقدم عليهم يعني الحين انتوا تعتبرون وسيط بين صاحب المشروع (المقترض) وبين بنك التسليف فا ليييه تاخذون الـ 30 الف وخاصتا انهم يتاخرون في صرف المبلغ وانهم بأي وقت خلال فترة الانتظار يقولون لك جيب كفيل يعني بعد المقابلات والتشحيط من مكان لي مكان حتى تخلص دراسة الجدوى ويوافقون عليك واذا بتستلم المبلغ في اخر اللحظات قالوا لك جيب كفيل ههههههههه الله يهديهم طبعا هذي مو تجربتي هذا اللي حصلته من بعض المنتديات
في اعضاء في بعض المنتديات تقول انهم يتأخرون عليهم اكثر من سنه يعني حتى لو كنت متحمس للمشروع خلاص يكرهونك تفتح مشروعك وتقول اروح اجمع قواطي مشروبات غازيه احسن لي ههههه
معلومه نسيت اذكرها صندوق المئويه تسدد لهم القرض لمدة خمس سنوات
بعد صرف النظر عن صندوق المئويه
بحثت عن مصادر اخرى وحصلت معهد ريادة الاعمال الوطني
عجبتني سياستهم بشكل كبير بس في شي واحد خلاني افكر قليل اني اصرف النظر عنهم
بعد البحث والتحري واراء الاعضاء والناس ودخول موقعهم
شفت هذي المميزات اللي يمتازون فيها انهم يدربونك لمدة ثلاث اسابيع بنفس المعهد بقيمة ألف ريال لكن هذا التدريب مو شرط قبولك للتمويل لكن مو مشكله لايقبلوني بس الشهاده اللي بحصلها منهم بتنفعني لجهات اخرى
طبعا هذا المعهد نفس طريقة صندوق المئويه يعني فقط وسيط بينك وبين بنك التسليف ويقرضونك الى 200 الف ريال حسب تكاليف مشروعك
طيب نجي للمميزات اللي شفتها افضل من مميزات صندوق المئويه على كلام الاعضاء في المنتديات واللي مذكور في موقع المعهد بحطها بشكل نقاط تكون اسهل ...
1- تدريبك ثلاث اسابيع بمبلغ 1000 ريال اسم البرنامج كيف تبدأ مشروعك الصغير
2- يعينون لك مرشد لمدة سنه
3- تسدد اول قرض بعد 18 شهر ( سنه ونص )
4- بعد ماتخلص التدريب يساعدونك في اعداد دراسة الجدوى لمشروعك عكس صندوق المئويه اللي يطلبها منك وتسويها بنفسك
5- مدة تسديد القرض 8 سنوات يعني باراحه بتسدد لهم وللتذكير صندوق المئويه 5 سنوات
وهذه اهم المميزات اللي يتمتع فيها
لكن اللي سمعت عنه من السلبيات
انهم نفس الشي ياخذون منك 30 ألف ريال رسوم
وهذا انا مو متأكد منه لاني شفت رد واحد في المنتديات انهم ياخذون 30الف يعني مو اكيد وحتى لو بياخذون 30 الف عليهم بالعافيه تكفي مميزاتهم واجابياتهم تغطي عيوبهم
طبعا في ضمانات ومن ضمنها الكفيل
والتسجيل موقف حاليا لانهم الظاهر لهم اوقات بالسنه للتسجيل والتقديم عن طريقهم
اليوم دخلت موقعهم عشان اسجل لكن يقولي التسجيل غير متاح حاول لاحقا
انا ماجلست كاتف ايدي
راسلت مدير الفرع حقهم بنفس منطقتي عن اقرب وقت للتسجيل بالمعهد وان شاء الله يتكرم ويرد علي هذا اذا ماسحب علي ههه
في النهايه قررت انتظر بنك التسليف الى تاريخ 2\7\1432هـ
لانهم راح ينزلون قرارات دعم المشاريع جديده مع الاوامر الملكيه الله يحفظ لنا بو متعب والله ماقصر مع الشعب الله يجعلها في ميزان حسناته لانها كلها تصب في مصلحة الشعب
وهذا قراري النهائي
بنتظر الرد من مدير الفرع واذا مارد علي بكمل مشواري في دراسة الجدوى الميدانيه من محل لي محل والموردين واجار المحلات لييين مااكملها
بيكون كذا قرب موعد بنك التسليف
واقدم في بنك التسليف وخاصتا انه الغى سالفة الكفيل يعني قدم بدون كفيل وشي ثاني انه يقرضك الى 400 الف .....
وفي شي خايف منه
ويلعب في راسي من ناحية القرارات اللي ننتظرها من البنك
اقول يمكن تكون قرارات التقديم لدعم المشاريع الا عن طريق هالصناديق يعني كفيل مافيه
بس عموله للوسيط فيه <<<<<<<<<<< تخمين فقط
ولا تنسون هالنقطه يمكن تكون مو معروفه عند الكل
اذا تم تمويلك وفتحت مشروعك بيمشي لك راتب ثابت من 2000 الى 3000 ريال لمدة سنتين الى ثلاث سنوات على حسب الجهه الداعمه لك
الراتب من صندوق الموارد البشرية
(راتب وارباح مشروعك )
يعني لاتشيل هم من ناحية تسديد القرض
وفي النهاية اتمنى يفيدونا اهل الخير وكلكم اهل خير لولا رب العالمين وثم لولاكم لما توصلنا لكل الخير اللي حنا فيه
وبالتوفيق للجميع
[/align]
التعديل الأخير تم بواسطة wesamoo ; 23-05-2011 الساعة 05:30 AM
|
باقي على التاريخ 12 يوم تقريبا 
يعني ابشروا بالخير ان شاء الله تكون اجراءاتهم الجديده من صالحنا 
العرض العادي
