السلام عليكم ورحمة الله وبركاته .. مشروعي اللي بقوله اللحين لو ان الوالدهـ ماعيت علي الله يطول بعمرها ولا كان سويته انا . بس عيت علي ولا فكرت اسويه ذا المشروع بقوله لكم وابيكم تفتحون مخكم معي شووي .. اللحين مشروعي يتكلم عن انتاج القطط ونصيحه للي يبي يتاجر بالحيوانات الله يكرمكم .. القط الحيوان الوحيد اللي مكسبه خيالي واللي سهل يتربى ونظيف وكل شي .. ركزوا معي بسم الله .. مشروعي يكلف تقريبا 25 الف .. تحتاج 10 بسس 8 اناث و2 ذكور
ونوع القط اللي تشترونه اسمه بيكي فيس اللي خشمه داخل اكتبوا بقوقل قطط بيكي فيس ويجيكم
والشي الثاني طبعا توفرلها مكان خاص يعني غرفه ماتحتاجها .. طيب ندخل بالتفاصيل سعر القط
اللي نوعه بيكي فيس وهو اغلى نوع بالسوق تقريبا سعره 2000 ريال.. واولاده ينباعون على 2500 تقريبا .. وبالمحلات الكبيره يبعونها على 3500 .. انت اذا تبي الشاري وتبي بيعه بسرعه اقل شي ينباع بـ 2300 .. واذا تبي تستنى بالبيعه راح تبيعه ب 2500 .. طيب اللحين توفرلهم مكان زي ماقلنا وتخليهم يتناسلون ومدة الحمل للقط من 9 اسابيع الى 10 اسابيع واذا جابوا اولاد اكثر شي يجيبون 5 ... انت كيف تخليهم يجيبون 5 بعد مشيئة الله تعطيهم فيتامينات بالاكل والشرب طيب اللحين نجي عند الحسبه ... انت جبت 10 بسس 2 ذكور و 8 اناث .. بعد ماتعطي الاناث فيتامنيات بعد اذن الله راح يجيبون 5 احسب معي 8 اناث ضرب 5 بسس لكل واحد راح يجي 40 قط صغير سعرها بالسوق اقل شي 2500 احسب معي 2500 ضرب 40 يساوي 100000 طبعا انت ماراح تبيعهم الى بعد مايفطنون يعني اذا صاروا يعتمدون على نفسم حرام تبيعهم وهم صغار يعني شهرين حمل وشهرين عبال مايكبرون 4 شهور وتدخل مئة الف ويالله من فضلك البس نظيف مهو زي العصافير والدجاج ريحه وقرف لا ذي تلقاها متعوده على كل شي .. يعني المشروع يكلف 25000 ريال قيمة القطط مع اكلهم مع الغرفه .. واعذروني على عدم الترتيب بالكتابه .. واللي يبي يعرف بنوع القطط يعني وش تحتاج ووش الفيتامينات يدخل منتدى اسمه تو زو ويستفيد ... وانت تقدر تزود الدخل طبعا بانك تجيب اناث زياده يعني ذا المشروع تقدر تجيب انثى وحده وتقدر تجيب 50 بس انا حسبت 8 اناث لين انصح بالبدايه فيها عشان اكتساب الخبره . ومكان بيعتهم بالمنتديات امثال منتدى تو زو ومنتدى محبي الحيوانات الاليفه ولا عندنا بالرياض بسوق الحمام .. وكل مدينه ولا قريه يوجد فيها ولا قريب منها سوق للحيوانات .. وللعلم تقدر تبدأ بذا المشروع بـ 2000 ريال اقل شي وتقدر تبدأ بمليون لو تبي على كيفك يعني تقدر تجيب انثى وحده للي احواله ماتساعد ويروح يوديها لاي محل ويقولهم ابي تزاوج وتخليها عندهم اسبوع وتاخذها منهم واكرر خذوا القط النوع بيكي فيس هذا اغلى نوع بالسوق تلقون صورته بقوقل زي ماقلت .
(( للعـــلـــم هذا مشروع جديد وفكرتي انا وكان مشروعي الرئيسي بس خليته عشان الوالده الله يحفظها .. اللي ابيه انكم تدعولي بالرزق والمشروع الجيد ليني قاعد ابحث عن مشروع حاليا والله يعين )) هذا والله اعلم وصلى الله على سيدنا محمد وعلى اله وصحبه وسلم تسليما كثيرا .. واي استفسار انا حاظر ^_^

افكارك ومواضيعك ممتازه وشغل الحركه داخل السوق بدون فتح محلات وخرابيط يعجبني

[align=center][/align]الله يرزقك من واسع خيره

صحيح مشروع القطط مربح لاكن فيه نقاط مهمه ماذكرتها

بحكم خبرتي في القطط وتربيتي لها من سنواات طويله

القطط تحتاج الى خبره كبيره في التعامل معاها وتربيتها وامراضها

خصوصا البيكي فيس نوع حسااس جدا وامراضه كثيرره

يحتاج الى نظافه دائمه وجو مناسب لا حر ولا برد

وفيه امراض ممكن تصيب القطط ويتطلب علاجها اكثر من شهرين

اللي هيه الفطريات وهيه معديه للقطط الثانيه وللانسان كمان

واذا انعدى منها الانسان بيكون على شكل بقع كبيره وعلاجها يستغرق اشهر

واذا اتعالجت بيكون مكانها مثل الحرق بقع بنيه

ولا تنسى الاكل والفيتامينات والرمل والتطعيمات كلها مكلفه جدا

يعني انصح اللي عجبه المشروع

لازم يبدأ بقطه وحده فقط ويكشف عليها عند البيطري ويطعمها

ويروشها كل اسبوعين مره وحده

ويكون مكانها نظيف بالديتول والمطهرات والرمل يتنظف في اليوم ثلاث مرات

لانه الرمل الله يكرمكم يطلع ريحه قويه اذا ماتنظف دايما

وفيه اشياء كثيررره لازم الواحد يعرفها قبل مايتاجر فيها

وفعلا تجارتها حلوه لاكن تعبها اكثر

وبالنسبه للبيكي فيس ماتنتج صغار كثيرر الا في الناادر

ونسبة الموت في الصغار كبيره جدا مقارنه بالقطط الامريكيه

ماكان بودي اذكر كل هذا لاكن حبيت اشاركم برأيي بحكم خبرتي في تربيت القطط بكل انواعها

والله يوفق الجميع

موفق بإذن الله ... لك مني أجمل تحية .

1- اكيد الشخص انه مايجلس عندها كثير وانا ذكرت فوق لازم غرفه خاصه
2- الشئ الثاني لازم يهتم بالنظافه وهذا شي اساسي
3- وعادي لو يجلس اذا كانت سليمه انا ذكرت فوق اسم لمنتدى واسمه تو زو الواحد يدخل يعرف امراض القطط كيف يتجنبها ويستفيد ولازم كل واحد يدخل للمنتدى قبل لايبدأ المشروع عشان يستفيد
4- اشكرك على مرورك

موفق يارب