هنـــــا الاكشــــن .. هنا الابداااااااااع في فن الافكار (1)

تسويقار · #1 (**permalink**) 01-06-2011, 02:54 PM

بسم الله الرحمن الرحيم

بدايه هذا الموضوع كتبته لاحدى الاخوات الكريمات من خلال الرسائل الخاصه

حيث طلبت مني ان افيدها عن فكرة الروضة للاطفال حسب ردي على احدى المشاركات في احد المواضيع

وآثرت ان اكتبه للجميع لعل ان احدا يستفيد منه ويدعو لي وللاخت التي كانت سببا لكتابته ..

فدعواتكم لي ولها .. جزاكم الله خيرا ....

-------------

نبدأ الموضوع .. ورجاءا قراءة الموضوع كاملا حتى تتعرفوا على ان الافكار التسويقية الجديده

والتي دائما ما انادي بها كأفكار خارجة عن المألوف هو ما نبحث عنه ...

يا اخوان ويا اخوات :

اخرجوا عن المألوف واخرجوا عن التفكير التقليدي ... الافكار التقليديه انتهت وولى زمنها واصبحت افكار مستهلكة ...

نبدأ على بركة الله :

بداية المشورع هو بتجمع 5 خريجات من الجامعه تخصص ادارة ...

حيث طلبوا مني مساعدتهم بانشاء روضة اطفال ودراسة الجدوى لهم مع ادارتي للمشروع في بدايته من بعيد ..

كل وحده حطت 100 ألف يعني الاجمالي 500 ألف ريال

لا تنزعجوا من المبلغ بانه كبير ولكن المشروع كان كبير ويحتاج لمثل هذا المبلغ

بالاضافة انه لو قسم على كل واحده منهم بيطلع عليها 100 ألف ريال بس

بدأنا الدراسة والعمل مع بعض كمجموعة واحده في مثل هذا الوقت بعد نهاية الاختبارات العام الماضي وبدأنا بالاتي :

اولا : موقع الروضة ...

اخذنا شهرين وهم كل يوم يكلموني يقولوا روح شوف الموقع الفلاني حصلنا فيلا ...

كنت اروح واشوفها وارجع اقولهم لأ الموقع مو عاجبني .. هم كانوا يشوفون رفضي للموقع بسبب الموقع نفسه ..

انا ما كنت اشوف هالشي رغم انه شي مهم ان يكون موقع المدرسة مميز وبارز للجميع

اخذنا شهرين تقريبا على هذا الحال كل يوم موقع منهم وكل يوم رفض مني لحد ما طفشوا البنات ...

في يوم وانا راجع من الدوام حصلت المدرسة الثانوية اللي جنب بيتنا وهي مدرسة مستأجره

وداخل الحي حصلتهم ينقلون اغراضهم .. سألت العمال وين رايحين ؟؟ قالوا مدرسه جديد

اختي كانت تدرس انجليزي بنفس المدرسة .. سألتها انتم ناقلين ؟؟ قالت ايوه نقلنا للمبنى الجديد الحكومي ...

المدرسة هذي كانت عبارة عن اربع فيلات ..

رجعوا اصحابها وقطعوها مره ثانيه كل فيلا رجعوها زي ماكانت كل فيلا لحالها بسور مستقل .

طلبت من صاحبها استأجار الفيلا اللي كانت مدخل للطالبات ...

وركزوا مدخل الطالبات لان الاهالي ما يعرفون عن بقية المباني الداخليه هم يعرفون فقط المبنى اللي فيه مدخل الطالبات ...

كلمت البنات قلتلهم روحوا المكان الفلاني وشوفوه واعطوني رأيكم ....

راحوا البنات وشافوا الموقع قالوا لالالالالالالالالالالا مو حلو ... وداخل الحي وما احد بيعرفنا بالمرررررره

ويحتاج صيانه وما اعرف ايش .. قلتلهم انا مصر على الموقع والا راح انسحب من الآن .. بالاخير قالوا اوكي

انا اخترت هالمكان لعدة اسباب :

1 / البنات كانوا يدوروا على مكان بارز وبشارع رئيسي عشان يكون سهل الوصول << فكره تقليديه

لكن مبنى اطفال على شارع رئيسي بيكون ازعاااج لهم

بالاضافة الي خطر انو ممكن وفي اسوأ الحالات يخرج طفل من باب الروضة بالصدفه

وعلى الشارع الرئيسي وهنا ممكن تكون كارثه للطفل بحادث .

2 / مسألة صيانة المبنى حليتها مع صاحب الموقع وطلبت منه انه يسوي لنا الصيانة المطلوبة على حسابه

لان احنا المفروض نستأجر مكان صالح ومرتب ومسوين له صيانة كامله

وبالفعل صاحب الفيلا سوى لنا كل المطلوب من تغيير للحمامات والسيراميك و و و و و الخ ...

3 / انا اخترت هالمكان بالذات لاني ما راح اخسر اعلانات كثيرة على تعريف الناس بالموقع ... كيف ؟؟؟؟

مدرسة البنات الحكومية لما نقلت من المكان ما بلغت الاهالي انهم ناقلين مدرسة جديدة ...

والاهالي ما زالوا يعتقدون ان المدرسة بمكانها ولما بدأت الدراسه في العام الجديد

اولياء الامور والاهالي جابوا بناتهم بالثانوية للموقع القديم

وجدوا على المبنى لوحة كبيرة تدل على ان المكان صار روضة اطفال ...

هنا صار الاهالي كلهم يعرفون ان هنا صار روضة اطفال ..

والكل خبر فلان وفلانه ترى الثانوية نقلت ومكانها صار روضة

اذن انا هنا تخلصت من مسألة الاعلان وخسائرة رغم انه مهم وما اغفلناه ...

بالعكس كنا متهمين في مسألة الاعلان بشكل مميز .

بدأنا بتأثيث الروضة بديكور طفولي وليس بشكل ديكور رسمي او ديكور طلاب كبار

وعلى فكرة البنات هم اللي سووا كل شي من ديكور ومن اشياء اخرى

حتى بالبداية كانوا متخوفات من كيفية الديكور قلت لهم روحوا اي مستشفى وروحوا عيادات الاطفال

وشوفوا كيف الممرضات الفلبينيات مسوين غرف الاطباء .

فعلا راحوا وشافوا وكبروا الافكار ونموها عندهم وبدأوا التنفيذ ...

بعد شهرين كانت المدرسة جاهزه من العاب وديكور وطاولات وووووو واشياء كثيرة سويناها ..

البنات طلبوا مكاتب لهم انا رفضت وقلت المكتب فقط للمديرة ..

اما انتم لكم طاوله وحده تجتعموا فيها للراحه فقط

وفيه دواليب مقسمة كل دولاب له مفتاح خاص لكل بنت من البنات

او معلمه معاهم تحط عبايتها واغراضها داخل الصندوق وتقفل عليه ...

انا كنت ابغى من هالشي ان البنات يكونوا طول الوقت مع الاطفال ولا يتعودوا على الكسل

لانهم لو كسلوا راح يخسروا كل شي .. بالفعل البنات وافقوا وهذي ميزه عندهم كانوا يسمعوا الكلام وينفذوه ....

يتبـــــــع

فتى مغيد · #2 (**permalink**) 01-06-2011, 02:58 PM

ماشالله حلوة الفكرة هههههههه

تسويقار · #3 (**permalink**) 01-06-2011, 03:01 PM

تابع بس فتي مغيد قطع الاشاره الله يهديه

بدأنا العمل اول يوم دراسي و كان فيه اسئله عن المدرسة تجينا ..

طبعا سوينا اعلانات بالافتتاح وزعنا بروشورات على البيوت بالحي ككل والحي اللي جنبا ...

نزلنا بسعرنا وكان البنات رافضين مسألة انخفاض السعر وبلغتهم نبدأ رفع السعر درجة درجة

و بلاش نطير الاهالي من اول مره بسبب السعر خصوصا ان هناك روضات حكومية ...

اول يوم كان مجرد اسئله واتصالات .. مافي احد جاء ..

الاهالي اللي ما عرفوا ان الثانوية نقلت لما حضروا الصباح حصلوا المدرسة صارت روضة

صاروا يسألوا حارس الروضة وكنا مدربينه ومعلمينه كيف يرد على الاستفسارات ...

بدأ اليأس يدب في قلوب البنات وان تعبهم راح خسارة وفلوسهم بعد .. صبرتهم بكم كلمة والنجاح مو من اول يوم

ثاني يوم اول طفل يسجل .. كانت فرحة البنات لا توصف لما سجل اول طفل ..

كانت بنوته صغيره .. وطبعا بنوته صغيرونه كانت فرحة البنات فيها جدا كبيرة وفرحتهم فيها كانت اكبر من لو كان طفل ..

تعرفوا البنات يحبوا البنت الصغيره يجلسوا يمكيجوها ويلعبوا فيها ...

المهم ....

بعدها بكم ساعه التسجيل الثاني وبعدها الثالث والرابع وبدأت الروضة تستقبل

وصلنا لحد 45 طفل من اول اسبوع ووقف التسجيل ..

البنات بدأو العمل ...

طبعا البنات وقتها قالوا كيف نسوي بالفصول ونقسمهم هل البنات لحال والاولاد لحال .. اتفقنا اننا نخلطهم خلط

نروح للفصول :

حبيت اغير ونخرج من المألوف ونكسر حاجز التقليد .. فصل اولى ( أ ) او فصل ثاني ( ب ) ..

هالكلام يمشي مع مدارس الحكومة وليس مع اطفال ..

قلت لهم نسمي الفصول بشي محبب للاطفال .. وكانت التسميه اللي اطلقتها على الفصول كالتالي :

1 / فصل الورود وهنا يطلق على الطفله : الورده فلانه << لازم نقول الورده

2 / فصل الدكتوره << وهنا نطلق على الطفل او الطفله : دكتورة فلانه

3 / فصل الياسمين << وهنا نطلق على الطفله : الياسمينه فلانه

لا تتخيلوا الضرب و المضارب وصياح الاطفال على فصل الورود وفصل الدكتوره كلهم يبغون هالفصلين

عدلنا بعدها فصل الياسمين الي فصل الكرز وصرنا نطلق على اطفال هالفصل : الكرزة فلانه ...

بدأنا للترم الواحد 2000 ريال لكل طفل .. جبنا اول اسبوع 90000 ريال مقابل عدد 45 طفل

بلغت البنات انو مبدئيا ما راح يكون لهم رواتب المبلغ اللي دخل للحساب بيكون راتب للحارس وكمان عندنا امور ومصاريف لازم نوفرها .. طبعا بكل تأكيد وافقوا البنات

الاسبوع الثاني :

ومن كلام فلانه من امهات الاطفال لام ثانيه جانا تقريبا 30 طفل ..

وبدأ العدد يكبر الي ما قبل نهاية الفصل الاول بشهر واحنا مازلنا نسجل ....

نهاية الفصل كان عدد الاطفال 74 طفل والمبلغ زاد ووصل الي 148000 ريال .

ايش سوينا خلال الفصل الاول ؟؟؟؟

طبعنا كتب خاصه فينا .. من تأليف البنات انفسهم ... صممناها ورتبناها

وكنت اعرف اردني في السفارة الاردنية طلبت منه يطبعها بالاردن ارخص للسعر ويدخلها لي للسعودية وفعلا ماقصر خدمني فيها ..

الكتب مطبوع عليها اسم مدرستنا واسماء البنات اللي ألفوا الكتب وكان شكلها مره شيك وخيالي ...

الفطور :

طلبنا من اولياء الامور عدم احضار الطفل لاي وجبه ..

بل يرسل مع الطفل خمسه ريال واحنا نعطيه وجبه صحيه تحت اشراف اخصائية تغذيه ..

الوجبه ما كانت تكلفنا 2 ريال والباقي قلت لهم اجمعوه راتب للحارس .

المياه الصحيه :

طلبنا من اولياء الامور عدم احضار الطفل لاي علبة مياة او ذيك العلبة اللي تجي مع شنط الاطفال ويحطوا فيها ماء ..

وقلنا لهم انها تسبب تسمم عادة .. ارسلوا مع طلفكم ريال مقابل قارورة ماء من عندنا ...

طبعا الماء اشترينا مياه من البقاله من اللي قميتها نص ريال ..

بشكلها الجديد والحلو وشلنا من على العلبة الورقة اللي مكتوب عليها اسم المياه ..

مو قارورة الماء يجي فيها ورقة ملفوفه بشكل دائري على القارورة وعليها اسم المياه ؟؟

احنا شلنا الورقة هذي ورحنا المطابع وقلنا لهم سووا لنا ورقة مثلها بس مكتوب عليها اسم مدرستنا ..

وفعلا صار ولصقنا ورقتنا احنا على القارورة وصارت القاروره كأنها مصنوعه خصيصا لنا .

وسويناها على علب كثيره جدا ونبيعها بمكسب نص ريال

صرنا ناخذ الاطفال للملاهي ورحلات وكل رحلة بــ 20 ريال = لعب بالملاهي مخفض + وجبة من كودو مخفضة لنا

العدد بدأ يكبر ... لكن عندنا مشكله وهي توصيل الطلاب معظم الاباء اما نايم او حالته حاله ..

محتاجين باص خصوصا ان بعض اولياء الامور طلبوا هالشي ...

كلموني البنات وقلت لهم انا مسافر عندي دورة مسافر دبي شوفوا اخ اي وحده منكم يشوف له باص نظيف وشبه جديد واشتروه ..

سافرت لما رجعت حصلتهم مشترين الباص

ما اخفي عليكم عصبت عليهم .. كلمتني وحده منهم وقالت شوف الباص ..

رحت وحصلت الباص ومسوين له تصميم بلون اخضر زيتي مع خط ابيض ... شي غبي

وصلت الروضة وكلمتها يافلانه وين الباص ؟؟

قالت عند باب الروضة .. قلت لها ماني شايف باصات قالت الا موجود قلت ما اشوف الا باص شركة ...

قالت لا مو حق شركة هذا ... هذا باصنا ومكتوب عليه اسم المدرسة .

قلت اوكي مع اني شايف الباص وعارفه .. قلتلها اوكي شغلوا الباص . قالت كيف يعني ؟؟

قلت لها شغلوه وجيبوا طلاب شوفوا مين راح ياخذ منكم

كنت ابغى من هالشي ما يتصرفوا من انفسهم خصوصا ان تصرفهم خطأ

اسبوع بعد اعلانهم عن بدء تشغيل الباص ما سجل الا 2 فقط

رجعوا لي شرايك ؟؟ قلت لهم انتم خسرتونا وقت ومصاريف تصميم للباص ..

رحعت وحذفت كل البلاوي على الباص ورجعته ابيض زي ما كان واخذته لمحل دعاية واعلان وقلت له ابي الاتي :

تسوي لي الباص من الخارج كله العاب وشخصيات اطفال .. توم وجيري .. بطوط .. مدري ايش

اي شخصيه كرتونيه محببه للطفل حطها بشكل متناسق وحلو

جبنا فلبيني سواق للباص ومعاه زوجته .. السواق ما يلبس ملابسه العاديه لا ..

يلبس لبس مهرج لكن دون قناع عشان المرور ..

الباص كمان من الداخل صممناه كعالم ديزني ... العالم المحبب للطفل ...

هنا الطفل صار يبكي يبغى يركب بالباص زيه زي الاطفال اللي دافعين

وصار الطفل مايبغى يجي للروضة الا بالباص وهنا اضطر الاب دفع رسوم الباص خمسمية ريال كل شهر

اي طفل يسجل بالباص سوينا له مقعد خاص فيه ما احد يجلس فيه غيره ..

بس كيف يعرف الطفل ان هذا مقعده .. كانت مشكله خصوصا ان الطفل ما يعرف يقرأ ..

بالاضافه انو مو معقول زوجة السواق بتبتلش فيهم ؟؟

جتني فكرة وقتها وهي :

حطيت على كل كرسي صورة الطفل .. صار الطفل يمشي لحد ما يشوف صورته ويجلس فيه

زوجة السواق كانت تنزل لحد باب البيت وتستلم الطفل من الباب وتركبه للباص وتتطمن عليه

وكمان لما يرجع تنزله من الباص وتسلمه امه عند الباب .. كنوع من الاهتمام والامان للطفل .

البنات او المعلمات صاروا يعلموا الاطفال كيف يحافظوا على مقاعدهم نظيفة ومرتبه ..

منها كتعليم للطفل بدل بهذله سيارة ابوه بالشوكولا ... ومنها احنا نضمن نظافة الباص

طبعا السواق كان من الفجر يغسل الباص وينظفه من برا ومن جوا ويعقمه ويعطره ..

هنا زاد الطلب على باصنا اللي اصبح مشهور بالمنطقة .. بس مافي مكان خلاص الباص فل كامل

اضطرينا نشتري باص اخر وسوينا فيه نفس التصميم للباص الاول ...

واطلقنا على الباص الاول باص بوكيمون

والباص الثاني باص زيتونه << زوجة بباي

وصرنا في نهاية اليوم الدراسي ووقت الخروج ننادي على الاطفال بـــ اطفال باص زيتونه .

يقوموا يتجمعوا وتطلع المس معاهم لحد الباص وتركبهم وتشرف عليهم ان كل الاطفال موجودين حسب مقاعدهم وصورهم

وبعدها ينطلق الباص ... وبعدها يبدأ تجمع باص البيكمون وهكذا

وبدأ العمل على الباصات بطريقة مشجعه جدا ..

طبعا قبل انطلاق الباص الثاني وبناءا على كثرة طلبات اولياء الامور سوينا بروشورات وكتبت على البروشور :

لاحاجه لتوصيل طفلك للروضة الان الروضة تأتي اليك ...

هذا كان اعلاننا المقلوب بدل كلمة خدمة التوصيل او ما اعرف ايش يكتبوا

الان عدد الباصات الي امس 5 باصات

باص البيكمون .. باص زيتونه .. باص توم .. باص جيري .. باص السندباد

عدد مقاعد الباص 20 مقعد × 500 ريال شهريا لكل طفل × 5 باصات = 50000 ريال شهريا دخل الباصات شهريا فقط

50000 ريال شهريا × 4 شهور دراسه = 200 ألف ريال فقط من الباصات

الي امس عدد الاطفال المسجلين بالروضة 320 طفل ورفعنا القيمة الي 3500 ريال = مليون ومائة وعشرون الف ريال دخل الروضة فقط

هذا دخل الروضة من قيمة التسجيل للفصل الثاني

1120000 دخل الروضة + 200 ألف دخل الباصات = مليون وثلاثمائة وعشرون الف دخل الروضة من اول سنه .

سوينا حفل تخرج امس + بازار لطالبات الجامعه + هدايا واشياء

وكل طفل تخرج اخذ شهاده ولعبة كبيرة + صوره له وخلفه شعار المدرسة بملابس التخرج والقبعه

وكانت فرحة الامهات بالصورة اكبر بكثير من اي مبالغ تتوقعونها .

من الان بدأ الحجز على مقاعد الروضه بالاضافة الي حجز مقاعد الباصات للسنه القادمه ...

وبدأ دفع عربون للحجز .. كله خوفا من انتهاء المقاعد ...

كل ماسبق كان بالمجان مني لكن دعواتهم لي تساوي كنوز الارض

كتبت بالعنوان رقم ( 1 ) ..

لاني ساوافيكم فيما بعد بفكره خارجة عن المألوف من افكاري

وهو الان من افضل المشاريع بالمنطقة رغم محاولة تقليده ...

انتظروني ..... <<< ان طلع ما رجع ترى ..