السلام عليكم ورحمة الله وبركاته

هذا المشروع للي يبغون يشتغلون بأنفسهم مو اللي يقولوا نستحي او نخجل

او يقولون نأجره على عامل .. ما ينفع لهم

بدل التسدح بالبيت والفرفره بالسيارة .. شمر عن ذراعك واشتغل بنفسك

الفكرة ببساطة هـي :

حـصـــــادة ثيــــــل ...

العملاء المستهدفون من المشروع :

حدائق المنازل / حدائق الاستراحات / حدائق الشركات / المشاتل الزراعية

الاصول الثابته :

** حصادة

** سيارة على قد حالها

التكاليف الماليه :

الحصادة : تختلف اسعارها .. هناك الحصادة اليدوي العاديه وتختلف اسعارها حسب قوة الحصان

حصادة بالنزين : اسعارها تختلف حسب قوة الحصان

لكن بشكل عام الاسعار رخيصه وما تتعدى الــ 4000 ريال

حصادة كهربائية يدوية سعرها : 1300 من ساكو

خلكم مبدئيا على اليدوي اللي عند ساكو رخيص وكويس

سيارة ونيت على قد حالها : من 5000 ريال الي 10000 ريال عشان تشيل المشروع فيها

طباعة ملصقات عليها صورة الحصادة ورقم الجوال ولصقها على الاستراحات والمنازل

بس انتبهو لا تلصقون الملصق على باب الفيلا عشان ما يجي صاحب البيت ويلصقها بجبهتك

طباعة كروت موضحا فيها الشغله ورقم الجوال ويتم توزيعها على الشركات والمشاتل

<< ولا تنسوا ترزوا الحصادة بالكرت تراها هي الرقاصه اللي تجيب فلوس

المردود المالي :

لو افترضنا اننا راح نتفق مع العملاء بالمتر .... فالمتر تقريبا 1 ريال للمساحة اقل من 100 متر

المساحة فوق 100 متر الي 200 م = .75 هلله

يعني لو 200 متر بيكون الاجمالي 150 ريال

ساعة زمن وانت منتهي من المكان ومشطب عليه ...

لو كررنا العملية باليوم مرتين = 300 ريال باليوم

بالشهر = 9000 ريال

بشرط انك تشتغل الشغله بنفسك مو تجيب عامل ....

وعلى فكرة الحصادة مثل الحلاق قد ما تحلق الشعر .. يوم ويطلع

يعني ما يمديك تقفل اخر الشهر الا عميلك حق اول يوم ... طلع شعر استراحته

بس انت كون قاعدة عملاء لك يصيرون يطلبونك بالجوال ....

وبالمره تدخلون القصور وتتفرجون ببلاش

مشروع مو مكلف كثير ومصاريفه بسيطة خصوصا البنزين ...

والحصادة تحت يدك عشان تحافظ عليها مو بيد عامل يفرط ابوها بساعه

وان ما مشت الفكرة والتجربه بيع الحصادة على مشتل زراعي .. والسيارة دور لها باكستاني معلم ديكور جبس يشتريها منك

للي عجبتهم الفكرة ...

آمل دراسة المنطقة اولا ... ومدى احتياجها لمثل هذا المشروع ...

يعني مو واحد بقرية مافيها استراحات ولاشي يقوم يجيب حصاده ؟؟