السلام عليكم ورحمة الله وبركاته على الجميع ..
الف مبروك للناجحين ذكورا وإناثاً ..
أكيد انكم مشغولين الحين بالجامعات اللي بتسجلون فيها وايش التخصصات ووين نروح ..
موضوعي بيختص بفئتين وهم : الراغبين بدراسة البكالوريوس والماجستير
طبعاً موضوعي جاء من باب المساعده لأني عانيت في تحصيل المعلومات والبحث عنها من خلال المواقع
(
نجاحتكم 
) وبكتب لكم أو اجمع لكم الأشياء اللي مو موجوده بالمواقع
موضوعي هو عن
الابتعاث الداخلي أو برنامج المنح الدراسية الداخلية من قبل وزارة التعليم العالي .
وش هو الابتعاث الداخلي ؟
وشلون نقدمّ عليه ووين ؟
كل هالأشياء ان شاء الله بتلاقون لها اجابه .
بدء التقديم :
في 1 رمضان سيتم البدء باستقبال طلبات الابتعاث الداخلي ( المنح ) للراغبين في دراسة البكالوريوس - الماجستير
كثير مايحصل لهم قبول في الجامعات الحكومية سواءا بكالوريوس أو ماجستير , والابتعاث الداخلي ممكن تكون فرص القبول فيه أكثر ..
لكن أكيد بالمقابل راح تخسر بعض المزايا اللي يتمتع بها الطالب في المنشأة الحكومية .!
عشان كذا ونصيحه مني , قدّم على كل منشأة حكومية واترك التقديم للمنح آخر شي لأنه بيكون معك وقت وماراح يفوتك
خلونا نشوف وش الأشياء اللي بتواجهها اذا كنت مقبول في المنح للمنشآت الأهليه أو في الحكومية
اذا انقبلت في المنح راح يتعرّض لك التالي :
1.تبحث عن التخصص المرغوب بدراسته والشروط المطلوبة , وتوفره في منطقتك والجامعات التي تشملها المنح (مو كل الجامعات والكليات فيها منح من وزارة التعليم العالي )
2.الذهاب شخصيا الى مقر الجامعه أو الكليه الأهليه مع الأوراق المطلوبه ودفع رسوم التسجيل (غير مستردة سواءا قبلت أم لم تقبل )
3.تسجل في موقع وزارة التعليم العالي كـ طالب منحه
4.تنتظر القبول من الكليه أو الجامعه للالتحاق بها .
5.تنتظر الفرز (بالنسبة لي كانت أصعب شي ) لأن الناس بدت تدرس لها شهرين والى الآن ماعرفت هل قبلت ولا لا . بتوسّع في هذي النقطه , بعض الجامعات تطلب من المسجلين دفع رسوم الدراسه للفصل الدراسي الأول عشان تبدأ مع الناس في الدراسه وفي حال قبلت في المنحة تسترد الرسوم واذا ماقبلت الله يعوض عليك ياتكمّل على حسابك وتنتظر التقديم القادم أو تنسحب .
6. النتيجة تكون ظاهرة لك في حسابك في الموقع أو عن طريق اتصال الجامعه او الكليه اللي سجلت فيها
7.طالب المنحه لايستلم مكافأة
8.اذا كان المعدل اقل من جيد للبكالوريوس ماتستكمل له المنحه , وبالنسبة للماجستير لايقل عن جيدجدا
9.بعض التخصصات لاتغطيها المنح كامله , ولاحظوا اني قلت بعض , وراح تشوفونها في شروط المنح بعد شوي .
أما الطالب في الجامعه الحكومية (البكالوريوس):
1.البحث عن التخصص المناسب للدرجات والمعدّل
2.ارسال الملف للجامعه
3.اجراءات روتينيّة
4.يستلم مكافأه
5.اذا كان المعدل اقل من جيد تستمر دراسته
6.مايدفع أي رسوم
وخلصنا :D
اللي ابي اقوله ان الحكومي يعتبر أسهل وأريح وأضمن لكن الأهلي يتيح لك الفرصه في حال ماتوفر لك في الحكومي ويقدّم لك نفس التعليم ويمكن أفضل بشرط إنك تبذل جهدك وتحافظ على مستواك .
الآن نجي لشروط القبول في المنح والتخصصات المشمولة بالمنح:
وما ابي أطوّل عليكم فيها تلاقونها بالموقع
http://grants.mohe.gov.sa/brief.aspx
بس أبيكم تنتبهون له
الملاحظة :
1- لن يقبل أي طلب من الطلبات المقدمة على موقع الوزارة الخاص بالمنح إلا بعد تسجيل الطالب في الجامعة أو الكلية الأهلية المشمولة في برنامج المنح .
2- أن تعبئة الطالب لنموذج طلب المنحة لا يعني قبوله فيها .
وموجود في الموقع بعد طريقة التسجيل فيه بالتفصيل من بداية تسجيل اليوزر وحتى انهاء الطلب .
الشي اللي أبي انوّه عليه للراغبين في دراسة الماجستير , نظرا لصعوبة القبول في الجامعات الحكوميه , أشوف ان التقديم على المنح الدراسية الداخليه فرصها أكبر .
والله يوفقنا ويوفقكم ويرزقنا وياكم كل مانتمنّى
وأي سؤال حاضرين
25-06-2011, 05:47 PM
العرض الشجري
