بسم الله الرحمن الرحيم

السلام عليكم ورحمة الله وبركاته، واسعد الله اوقاتكم بكل خير، اما بعد..

يا جماعة الخير، بقلبها بالعامية، ولا تستعجلون بالحكم على فكرتي، ولا تستهينون بقدراتي ^_^

...

أولاً:

لدي خبرة في الجوالات، تفوق الخمسة سنوات، كـ حد أدنى، ولدي خبرة في السوفتوير لجميع أجهزة الجوال

وفك رموز القفل، بدون فقد البيانات، واخراج الفايروسات، بدون فقدان اي معلومات مهمة، ولدي خبرة في التصميم بجميع مجالاته

ومن اهم ما يحتاجه الجوال، الوسائط، والثيمات، والخلفيات، واكاد اجزم، بان من لديه ميول للتصميم، يعرفني شرط ان يكون له عام في

هذا المجال، ولدي خبرة ايضاً في تعريب برامج الجوالات والكمبيوتر، ولا اريد ان اتشعب الى مجالات اخرى.



ثانياً:

المدينة التي اسكن فيها، كبيرة.. ولدى عمي مجمع جوالات، وعرض علي محل باجار رمزي 800 ريال ^_^ "اذكروا الله"

ولا يوجد مبرمجين في مدينتي، لدرجة ان الاغلبية يأتون الي في بيتي، لثقتهم بي أولاً.. وبخبرتي ثانياً.


ثالثاً:

المشاريع التي اسعى اليها كثيرة، وهي الجوالات اول مشروع، والكمبيوترات المشروع الثاني، والتصميم والمطبوعات مشروعي الثالث

باذن الله تعالى.

رابعاً:

اريد أن اتعامل في تجارتي، مع السعوديين فقط، ولو وجدت أجانب، بأسعار أقل لثقتي بأبناء بلدي أولاً

ولكي نتبادل المنفعة، فالاقربون اولى بالمعروف.

خامساً:

راس مالي من 15.000 الى 20.000 ريال، وابي اتعامل مع ابناء جلدتي، كـ موزع على التصريف، من ناحية الجوالات..!

اما الاكسسوارات، امرها سهل، واسعارها بسيطة ^_^ ومن الممكن اتفق مع واحد سعودي، اذا تعاملنا بالتصريف.. يعني من الممكن

نتعاون، ولا تنسون "في الاتحاد قوة" ولدي منتدى خاص فيني، عدد اعضاءه يفوق 70.000 من الممكن ندعم بعض بالتسويق ^_^

...

المهم اخواني.. الي ابيه منكم، المشورة، ويا جماعة الخير، والله ما ضيعنا غير الاتكالية، والنوم على الاذان، وعدم الثقة بالنفس..!

وعلى قولة ابوي "النية مطية" <<< صح السانك يا يبه

و الزبدة:

ابي توجيهكم يا اهل الخبرة، ونصايحكم، وانا عند كلمتي، ماني متعامل الا مع ابناء جلدتي، بشرط الامانة، والمصداقية

والله يكتب لي ولكم الخير

اخوكم
عبدالمحسن الشراري
"اللهم لا علم لنا الا ما علمتنا"

ما شاء الله عليك
انا ما ادري وش تنتظر الحين
عندك محل
و الاهم عندك خبره و امكانيات قليل نحصلها
يا اخي ابدأ و الخير جايك جايك لان سوق الجوالات على ما اشوفه ماشي ما يوقف و اكثره اجانب بالهبل

وعليكم السلآم ورحمة الله وبركاته ::.

ماشاء الله عليك يالغآلي شيء مفرح والله ماقرأته ::.
عندك امكانية تدير محلك بنفسك انت خذ المحل الي من عند عمك وارشح لك ان تبدأ بكشك صغير لحد ماتكون قاعدة عملآء كويسة وبعدهآ تبدآ بكشك ثآني لحد الرآبع طبعآ الكشكات حلاتها تسلمها اي شخص ويكون يشتغل قدامك وتحاسبه يوميآ::.

شيء ثآني تفتح المحل الي من عند عمك وتبدأ بشغل الجوالات وركب لافته بعروض غير عن السوق <<شطحات
ترى العالم يحبون الشيء الغريب والله لو بأي مجال ::.
وتقدر تحط زاوية المحل لامور التصميم واشياء خفيفه وبكذآ اثنين بواحد على قولتهم ولو لاسمح الله الشغله الاولى مامشت عندك شيء ثآني بالمحل ودخل اضافي لكـ وماتدري بكرة يمكن نشوفكـ فآتح تصميم لحاله .. والله يرزقك ,,

بس فكرة شآطحة لو بتفتح مجال التصميم خذلك مساحة صغيرهـ وركب تصميم ممتاز وابدآ بنشر تصآميمك على شركات لانهم هم الي يدفعون وكثير منهم يحبون البهرجه وتغيير التصميم ك 6 اشهر ومن هالكلآم ذآ ,,

والله يوفقك ويسدد خطآك يالغآلي ,, تمنيت اطرح لكـ امور اخرى بنفس المجال لكن كثيرة وان شآء الله يجي وقتها وارسلها لكـ ..

اخوي مشرروع ما بقولك انه مكرر او مستهلك لنك اذا بتدخل وفيه وتبدع واكيد بتناجح نجاح كبير
وثاني شي احرص تكون بدون شريك لنه يقولك المثل الاعب لوحدك ترجع راضي او كسبان
3- والمهم هو موضوع الجوالة الربح فيه قليل جدأأأ لكثرة المنافسه في هذذ المجال عشان كذ صعب يدخل مع شريك
4- انت في اي مدينه .؟

توكل على الله وابدأ في مشروعك

بعد فترة افتح كشك ثاني وسلمه لشاب سعودي أو قريب لك ويكون تحت تدريبك

وبعدها تدخل على عالم الكمبيوترات ويكفيك الشهرة في مجالك

ابدأ ولاتتاخر وعمك مابيقصر معك

الله يعطيك العااااافية

الله يوفقك
وانا نقلتلك هذا الكلام للافاده من احد الاخوة هنا جزاه الله خير

(((صيانة جوال ادخل *يامن تريد الفايده*
السلام عليكم ورحمة الله وبركاته .. اما بعد انا كان لي محل الكترونيات بـ عبدالرحمن الغافقي في الرياض .. وقبل فتره بعت المحل لاسباب خاصه المهم ... انا بقول نصيحه يامن يبي يقبل على التجاره في الجوالات .. ياخوان انا في بداية المحل يوم شريته
.. قعدت فتره اسوق بضاعتي فيه واللي صراحه يمشي مهو الجوالات ولا شي اللي يمشي صيانة الجوال هي اللي كسبتني صراحه (( ومعلومه مهو كل الناس تبي تشتري جوال بس كل الناس تصلح جوالها ))
*ي البدايه رحت لبنقالي لقيته بالاتصالات قلتله ابي تعطيني دوره عن الصيانه وبعد ما وافق الدوره كانت بـ 2000 ريال .. حلو
. اهم شي يوم تعلمت الصيانه .. خليت عندي بضاعه بالمحل كذا خليتها شكل بس والا الشغل الاساسي كان صيانة جوال يعني انصح ياخوان اللي يبي يشتغل بالاكترونيات شيين اللي تبي تكسبك واسال مجرب الشي الاول اللي هو صيانة الجوال والشي الثاني بيع الجوالات المستعمله يعني الجوالات المستعمله تكسب فيها على 200 ولا 150 ريال والجديده تكسب على 40 ريال بس .
فأي نصيحه تبغون علموني واللي يبي بصيانة الجوالات نصيحه يدخل ويستاجرله محل جوا بالاتصالات يعني مايخليله محل برا لا لا يدخل جوا احسن له
.. وماراح تكلفه شي متراوح قيمة الطاولات بالاتصالات من 3000 الى 7000 شهريا يعني اللي قريبه من الباب هي اغلى واللي بعيده عن الباب ارخص والله يرزقني ويرزقكم هذا والله اعلم وصلى الله على سيدنا محمد وعلى اله وصحبه وسلم تسليما كثيرا*
(( ولا تنسون تدعولي بالرزق الحلال ))

عــدنـــا

كل عام وانتم بخير، وصحة وسلامة، وألف ألف شكر لكل من أفادني، وشاركني برأيه

أو نورني بمروره، أو حتى اكتفى بالدعاء.

...

"اقتربت ساعة الصفر"

ابشركم حالياً ما تبقى علي الا القليل، لافتتاح المحل ^_^

وان شاء الله بيكون محل (( صيانة وبرمجة للكمبيوترات والجوالات ))

وهذا العامود الاساسي اللي برتكز عليه، لكن تابعوني لاخر المشاركة، وبتعرفون المطلوب.

أما الاشياء اللي بقت ومقوراً عليها، هي:

عدد 2 مكيفات مركزية + عدد 3 شاشات للفورمات + عدد 2 كمبيوتر للبرمجة والسوفتوير

واخيراً.. خط انترنت 4 ميجا، وهذي كلها باذن الله، ما تاخذ مني شهر.

يعني حالياً المحل باقسامه، وديكوره، والباترينات، والاضاءة، جاهز.. باقي علي اكسسوارات

للكمبيوترات، والجوالات، وهذي ان شاء الله بجيبها من جدة، او الرياض.

المهم، أو الأهم الحين..!

اسم المحل بيكون على اسم منتداي، وان شاء الله بخصص صفحة، بفتحة اجبارية فيه

فيها بيكون عنوان المحل، والاحداثية، و رقم الهاتف والجوال، كذلك المستجدات.

يعني الزبدة، هالصفحة بتكون على شكل دعاية للمحلات أو المؤسسات، أو الشركات

اللي راح تموني بالكمبيوترات المحمولة، والجوالات.

...

ايش تبي توصل له بالضبط؟

سلمكم الله، قلت من اول اني مركز على مسألة البرمجة، سواء للكمبيوتر، أو الجوال

مثل الفورمات، والتعريفات، وحل المشاكل والاعطال، كمان سوفتوير الجوالات وفك رمز الحماية

والروت والجيلبريك، للنوكيا والسامسونج، و أبل.

لكن المحل مابيه يكون فاضي ^_^

لذلك ابي اتعامل مع سعوديين، يدعموني وادعمهم، من ناحية التجارة..!

مثلاً:

يرسلون لي جوالات، مثل الايفون والايباد، والنوكيا، والجالكسي، والايبود، وكذلك اللابتوبات

بحيث اروج بضاعتهم، وابيع لهم البضاعة باسعارهم لمدة 3 شهور.

يعني مابي فايدة عليهم ^_^ وبكذا بكون اقل سعر بالسوق، واستقطب مجموعة من العملاء

لاني بقدم صيانة لها، من ناحية الفورمات، والبرامج، لكن هالاشياء اكيد باخذ عليها، وهذي

بيني وبين الزبون ^_^

ايش تستفيد انت كـ صاحب محل؟

برجع اقول ان غايتي من المحل الصيانة، والاكسسوارات ما راح تشكل لي فائدة اكثر من 10%

من دخل المحل، لذلك ما عندي استعداد اجمد مبلغ وقدره، على اساس اربح من 10 الى 50 ريال

على تصريف البضاعة.

وبنفس الوقت، مابي المحل فاضي، أو خالي من الجديد..!

خصوصاً ان اهل الديرة، يعرفوني عز المعرفة ^_^ ويثقون فيني ولله الحمد، وبشغلي وأمانتي.

فـ راح اركز على المستعمل، من ناحيتي، في البيع والشراء، اما الجديد؟، لابناء جلدتي كـ أني فرع

لهم بالشمال، وبصراحة..!

اذا وفقني الله "ان شاء الله" بعزل المحلات عن بعض، خصوصاً ان المحلات أو المجمع كامل

لعمي، وامون عليه، فـ يكون محل للجوالات منفرد، ومحل للكمبيوترات منفرد.

...

اهم نقطة، اكيد اني ابي عامل صيانة، وعامل برمجة مستقبلاً، لكل محل..!

وانا بكون متابع للمحلات فقط، وعشان كذا، اكيد اني بحتاج الناس اللي اصرف لهم البضاعة

يدبرونهم لي من الرياض أو جدة، وبيكونون على كفالتي.

...

اخيراً وليس آخراً..

تأخرت بالحضور، بسبب انشغالي بترتيب افكار المحل، وسفرياتي..

وانا جاد بكلامي، وابي آرائكم، فاللي يعرف احد سعودي اهم شي، يحط عنده خبر..!

ولا تنسوني من دعواتكم، وآرائكم وملاحضاتكم.

"احتكاري ليس عنصرة، او حسد، بل أثق بالسعوديون 80% ويكفي أنهم أبناء جلدتي"

وين بالشمال يالطيب ؟؟

لأن احد الاخوان عنده علاقات مع تجار الجمله ..واذا فيه امنكانيه نخدمك ليش لا ابركها من ساعه .. ارسل بياناتك ع الخاص .

كل عام وانت بخير يابعدي، وربي يبارك بايامك ^_^

ان ارسال الرسالة، وربي يوفق الجميع

اخوك