مشاكل الجمهور



الوظايف اللي تحتاج مقابلة جمهور من اكثر الوظايف اللي تجلب المشاكل للموظفين ، لأن الناس يختلفون ، فيجيك واحد هادي لو تعمل معه اي شي ما يزعل، ويجيك واحد حريقة اي غلطة غير مقصودة يقبع فيك.

جا متقدم لإدارة التوظيف وقدم اوراقه ، تخصصه ماكان يناسب الشركة ودرجاته كانت متدنية مرة وعمره كان كبير شوي (35 سنه) وما معه اي خبره تساعده. الرجال قدم اوراقه لأحمد وهو المسؤول عن استقبال الطلبات، احمد قرا اوراقه و طالع شهاداته وقال له ان تخصصك ماله مجال في الشركة، المتقدم نشب لأحمد الا ان يقدم اوراقه ، في الحاله هذي، وبتعليمات من الإدارة، قبل احمد اوراقه وقال للمتقدم انه راح يرسل اوراقه للإدارة للنظر في إمكانية توظيفه، ووضح للمتقدم انه فيه إحتمال كبير ان الادراة ترفض. ارسل احمد اوراق المتقدم للإدارة وجاء رد الادارة بعد كم يوم بالرفض مثل ما كان متوقع، بعد اسبوع اتصل المتقدم وسأل احمد عن وضع الطلب ، فرد عليه احمد بأن الادارة رفضت طلبه لنفس الاسباب اللي قالها له احمد قبل ، المتقدم عصب وقال انا لازم اقابل المسؤول اللي رفض الطلب انا مواطن ويحق لي اتوظف في اي مكان ابيه!! اعطاه احمد موعد مع مدير التوظيف بالتنسيق مع المدير.

جاء وقت الموعد ودخل المتقدم على الإدارة ، المتقدم كان البس نظارة سوداء داخل المبنى (!!) !! دخل على المدير ودار النقاش التالي:

المتقدم: السلام عليكم

المدير: وعليكم السلام

المتقدم: معك فلان الفلاني خريج جامعة الملك سعود تخصص علم إجتماع

المدير : ونعم فيك

المتقدم: انا قدمت قبل اسبوع ورفضتوا طلبي ، ممكن اعرف السبب

المدير: احمد ممكن تعطيني طلب فلان الفلاني

احمد: سم - وجاب له صوره من الطلب

المدير: ياعزيزي طلبك رفض لأن تخصص علم الإجتماع ما يناسب الشركة

المتقدم: كيف مايناسب الشركة؟ طيب اذا مايناسب ليش فتحوه اصلا وتعبونا وخلونا ندرس اربع سنين؟؟

المدير: تخصصك مايناسب للشركة لكنه بالتأكيد يناسب لأماكن اخرى مثل قطاع التعليم وقطاع الصحة والمستشفيات وغيرها

المتقدم بعد مارفع صوته: مايصير هذا ، كل مارحنا لمكان مايقبلونا فيه ويتحججون بالتخصص، قولوا انكم ما تبغون توظفون سعوديين احسن

المدير: طيب ياعزيزي مافيه داعي لرفع الصوت ، فيه متقدمين برا وفيه ناس يختبرون

المتقدم وهو مازال رافع صوته: انا مارفعت صوتي ، هذا صوتي كذا مرتفع خلقه، وبعدين ارتفاع الصوت من سمات الشخصية الكاريزماتيكية ، وانا عندس كاريزما وشخصيتي كاريزماتيه

المدير: حاول تغير شخصيتك لفترة بسيطة الين تطلع من الإدارة

المتقدم: لا تقعد تلف وتدور ، انا مواطن ولي حق في التوظف في الشركة مثل مالك حق

المدير: ماقلنا شي ، لكن تخصصك غير مرغوب فيه بالبنك بالإضافة إلى انه ماعندك خبرة وعمرك الله يعطيك طولة العمر كبير شوي، ولو طبقنا كلامك ووظفنا اي شخص يتقدم علينا كان فلست الشركة وماقدرت تدفع رواتب موظفيها

المتقدم: طيب اذا ما كنتو تبون توظفوني ليش تحتفظون في طلبي؟ رجعو لي طلبي

المدير : تفضل - واعطاه صورة من الطلب وباقي اوراقه

المتقدم: لا انا بي اوراقي الاصلية

المدير: الطلبات اللي يتم رفضها ترسل للارشيف في مكان ثاني

المتقدم وهو يصارخ: انتم قطعتوا اوراقي اكيد ، هذا انتم يا إدارات التوظيف تاخذون طلبات العالم وتقطعونها لكن انا ما تمشي معي الحركات هذي ، ان ما حصلت على اوراقي الاصلية راح اشتكيكم لوزارة العمل ، والله مايردني غير مكتب القصيبي

المديروهو يحاول ضبط مستوى الضغط عنده: انت قريت الطلب قبل ما تعبيه؟

المتقدم: اكيد قريته ، كيف اعبيه اذا ما قريته؟؟

المدير: قريت الملاحظات اللي تحت بخصوص اعادة الأوراق؟

المتقدم: وشي؟

المدير ورٌاه صورة الطلب وخلاه يقرا الملاحظة الثالية:

"إدارة التوظيف غير ملزمة بإعادة الارواق المرفقه مع الطلب في حالة الرفض او القبول"

المتقدم:يا سلم وحاطينها بخط صغير؟؟ انا راح اشتكي عليكم انكم ماتوظفون سعوديين، والله لأروح لغازي القصيبي واخليكم تتعدلون

المدير بعد مافقط اعصابه: لا لا ماله داعي تروح، كلم الوزارة بالتلفون اعطيك رقمهم؟ حتى رقم الوزير بكبره نقدر نجيبه لك وتكلمه الحين

المتقدم: انت تقول الكلام هذا لأنك عارف انه مو موجود الآن ، انت عارف انه في جدة

المدير بعد ما ضحك : اذا تبي احجز لك على حسابي لجدة ماعندي مانع، وهذا كرتي روح للوزير وقله فلان الفلاني في إدارة التوظيف رفض يوظفني لأن تخصصي مايناسب الشركة و درجاتي متدنية

طلع المتقدم من مكتب المدير وهو منفعل ، وقبل ما يطلع من الادارة التفت لأحمد وخلع نظارته الشمسية وقال:

انا وش قلت لك يا احمد اول ما عطيتك الطلب؟

احمد بعد ماطقته ام الركب: وش قلت؟

المتقدم: انا قلت لك اننا راح نبقى اصدقاء سواءاً انقبلت او رفضوني

قال احمد اكيد اكيد

"وطلع المتقدم وهو يقول : " إن ماخليت القصيبي يمسحبكم البلاط ما اكون ولد ابوي

بغيت اجيب العيد



وصلتنا اوراق متقدمه جديدة عن طريق احد الروس الكبيرة في الشركة ، يعني واسطه ، البنت ماعليها.. متعلمه ومعاها لغه انجليزية ، دارسه في الخارج ، شهاداتها اوكي واجتازت كل الاختبارات و المقابلات

لما انتهت كل اجراءات تووظيفها من اختبارات ومقابلات واعتماد الإدارة العليا، جاء دوري هنا وهو تجهيز العرض الوظيفي والاتصال عليها عشان تجي توقع العرض ، اتصلت على الجوال المسجل في سيرتها الذاتية وحصلته مقفل ، اتصلت على البيت رد احد اقاربها ، قلت له معاك فلان الفلاني من الشركة الفلانية ، هذا منزل فلان الفلاني؟ قال نعم ، قلت انا متصل بخصوص الاخت عبير قال اشفيها عبير؟ قلت ابد اجتازت اختبارات التوظيف والمقابلات عندنا وترشحت لأحد الوظائف وودنا انها تجي وتتطلع على العرض وتكمل باقي اجراءات التوظيف ، قال سم متى تبيها تجيكم؟ قلت بأسرع وقت وياليت يكون اليوم الساعة 4 العصر ، قال وهو كذلك

كانت الساعة 9 الصباح ، وجهزت كل اوراقها ... جاء الموعد لكنها ما شرفت!! انتهى الدوام وهي برضه ما شرفت! قلت عادي سعوديين تقلقاه طنش البنت ونسى يخبرها

اليوم الثاني يوم جت الساعة ثلاث العصر اتصلت بجوال المتقدمة وبرضو لقيته مقفل،، اتصلت بالبيت ورد علي احد اقاربها ويظهر من صوته انه رجل كبير ورسمي وشكله ابوها

قلت منزل فلان الفلاني؟ قال نعم! قلت انا اتصلت امس بس ما ادري انت اللي رديت علي او واحد ثاتي ،، قال اول شي من معي!! قلت آسف ماعرفتك بنفسي ، قال اخلص علينا ،،، قلت في نفسي تعال طقني احسن!! ثم قلت معك فلان الفلاني من ادارة التوظيف في الشركة الفلانية ، قال ايوه وش موضوعك؟ قلت ابد انا اتصلت امس على اساس ان ...قاطعني وقال المهم الزبدة؟؟ طبعا ضغطي ارتفع وباقي شوي وانفجر عليه ، مسكت نفي في اللحظة الاخيرة والحمدلله اني مسكتها والا كان صار علوم ،، قلت بنتكم المصونة عبير،، عندنا لها عرض وظيفي ونبي حضرتها تجي توقع ،،، اذا كان ماعند سعادتكم مانع - طبعا انا كنت استهبل عليه بإسلوب محترم - وهو الظاهر انه متعود ان الناس ما يتعاملون معه الا بهالطريقة المحترمة ،، قال متى تبونها تجيكم؟ قلت يناسبكم اليوم طال عمركم - والاستهبال مازال قائماً - قال لا اليوم مايمدي مافيه وقت ، بكره متى تجيكم؟ قلت الساعة العاشرة صباحاً مناسبة لسعادة حضرتكم؟ قال الساعة عشر تماماً تكون عندكم ! قلت في نفسي اقعد يا الخواجة ، بعدين سمعت طرقعععع ،، سكر السماعة ! انا ارتفع الضغط عندي زيادة ،، مسكت اوراقها ودخلت على المدير وقلت له كلمت الست عبير الفلاني وقال ابوها انها راح تجي بكره الساعة عشر تماما ،، قال حلو ،، قلت بس ترا ابو الشباب شايف نفيسته والاسلوب عنده زفت ما ادري هو شايف نفسسه على ايش ،، قال ابوها فلان الفلاني ماغيره؟؟ قلت ايه وخير ياطير؟ ومن يكون يعني؟؟ قال قبل لا اقول لك من يكون قال هات الاراق ،، اعطيته اوراق المتقدمة وطلع لي صورة بطاقة العائلة المرفقه مع الاوراق ،، قال شفت صورته انت؟ قلت لا ،،، قال شوف ،، ناظر ،، ماتعرف منهو هذا؟ يوم شفت صورته قلت هذا مو غريب علي ،،، قد شفته في التلفزيون الظاهر؟!! قال المدير قلي وش سويت معه ،، سردت له السالفة كاملة من طقطق لصباح الخير ... قال هذا الله يرجك فلان الفلاني من كبار مسؤولي الجيش السعودي (وقال رتبته اللي تروع) ثم قال ولو بغى يحرك كتيبة يهدم الشركة بالدبابات على راسك وراسي ما تعوق معه،،، قال عرفته الحين؟ قلت اكيييييد ونعم الله به وانا اضحك ،،، قال ويومه يصك السماعة في وجهك تلقى وزير الدفاع معه على الخط الثاني ،،، ويتنق انت وجهك ،،، وكععععععع قعد يضحك المدير وباقي الزملا ،، قلت يحق له والله خخخخخخخ

قلت الحمدلله جات سليمة ، في اليوم الثاني يوم جت الساعة عشر تماما والا المتقدمة تدخل علينا في الادارة قالت معكم عبير الفلاني

قلت سلملي على العسكر ومواعيدهم

موقف مع متقدم



المواقف مع المتقدمين كثيرة ، معظمها يكون محرج والا مضحك بشكل خرافي

اتصل احد المتقدمين اللي سبق و عمل اختبارات القبول عندنا ، المتقدم كان يسأل عن اختباراته، هل نجح والا لا!!

بعد ما رن التلفون رفعت السماعة ودار بيني وبينه الحديث التالي ... مع ملاحظة ان اللي باللون الأحمر كلام اقوله بيني وبين نفسي .. مايسمعه المتقدم:

انا: إدارة التوظيف مرحبا

المتقدم: السلام عليكم

انا : وعليكم السلام ، تفضل

المتقدم: إدارة التوظيف؟؟

انا: تناحة من اولها الله يعين (طبعا قلتها في نفسي) ... ايه نعم اخوي معاك إدارة التوظيف

المتقدم: انتم اللي تسوون الإختبارات؟؟

انا : اي نعم حنا اللي نسويها ،، آمرني اخوي

المتقدم: انا سويت اختبار عندكم ولا اتصلتوا علي

انا : متى سويت الاختبار اخوي؟

المتقدم: الاسبوع الماضي

انا: طيب مين معي عشان ابحث لك عن نتيجتك في السيستم

المتقدم: معاك فيصل

انا: الله يعيني عليك يافيصل فيه مية الف فيصل ،،، الإسم الثلاثي الله يحييك

المتقدم: فيصل بن فلان بن فلتان الفلاني

انا: والنعم

المتقدم: ماعليك زود

انا: ثواني اخوي

--- بحثت في السستم عن اسمه ودرجاته ، وظهرت لي نتيجته انه ما اجتاز إختبار الإنجليزي وجايب درجه متدنية جداً ---

انا: اخوي فيصل نعتذر منك ، بس انت ما اجتزت اختبار الإنجليزي

المتقدم: وشلون ما اجتزته؟؟

انا: يادين الله ،،،،،،، يعني ما عديت اختبار الانجليزي ،
المتقدم: كيف يعني؟

انا: يعني ما جبت الحد الأدنى لتجاوز الإختبار ياضنايا

المتقدم : انا متأكد من حلي ،، مجاوب كل الأسئلة ،،

يعجبني اللي واثق من نفسه

بعدين قلب يتكلم انجليزي
Me speak english very very good. me go school because me english better . now me sure me test me good you undrstand me?
طبعا حطيته على الهولد ومافيه الا كععععععععععع ضحك الين بغى بطني ينفجر ،،، الرجال يبغى يثبت انه يعرف لكنه اثبت العكس

انا: Me no english

انا: فهمتك لكنك ما عديت ،، هذي درجاتك قدامي في السستم والاختبار يتصحح في خارج الشركة

المتقدم: انا ابي اراجع درجتي

ذكرتني بايام الثانوي يافيصل

انا: اعتذر منك مافيه امكانية لمراجعة الاختبار لكن تقدر تعيد الاختبار بعد سنة لما تحسن لغتك

المتقدم: طععع ،،،،، طوط طوط طوط

انا: شكرا على اتصالك وبالتوفيق في الحلقة القادمة ---- اكلم نفسي طبعاً

يا الله شدو حيلكم وقولو لنا عن مغامراتكم

ههههههههههههههههههه
ذكرتيني بموقف تحفه .....!!!

مره وكلتني شركتي الي كنت اعمل فيها " عساها تفلس" بأني اراقب في قاعه اختبار الانجليزي للتوظيف

المهم وزعت على المتقدمين الاوراق والمراسم وجلست اراقب

وقلت " شباب انتم رجال وجايين تتقدمون على وظيفه ما ابي غش وحركات مالها داعي تحرجوني معاكم "

المهم :
اثناء الاختبار في طالب مو عارف يقرأ وبصراحه ماينلام الخط مو واضح وكل شوي يناديني يبيني اقله وش هي الكلمه ........... والمشكله اني ميح في الانجليزي

كل ماناداني اقله وبعدين معاك اشرايك اجي احل الاختبار عنك .....!!!

ومتورط لاني معرف معناها

ويوم الح عليه

قلت له هذي الحركه من الشركه طابعه الاختبار مو واضح تبي تشوف دقه ملاحظتكم ههههههههههههههههههههههههههههههههه



والله موقف يفشل بس الحمد لله عدى

تحياتي

ههههههههههههههههههههههههههههههههههههههههههههه
ياسمينه من جد المواقف حلووووووووووووووة

ولا ياعيني حظنا تعبان
بصراحه خخخخخخخخخخخخخخخخخخخخخخخخ عرفت تصرف
ههههههههههههههههههههههههههههههههههههههههههههههههه
جعلني انشاء الله ما أمر بموقف شين واتفشل وعقبها لايكون وجهي له لون ولا ملامحي تبان وان كل الموجودات وعلى راسهم المدير والسكرتيرة يتعلقون فيني ولا يفرطون فيني(اول شيء روحي سوي مقابله عقبها تكلمي)
يسلمو ياسمينه غيرتي لي جو شوي ياقلبي

يسلمووووو ياسمين على المواقف الحلوة هذي

ولعيونكم راح أقول موقف صار لي أول مرة أقوله لأحد

يوم توظفت على وظيفتي الحالية كانت المقابلة الأولى مع مديري المباشر وكان عربي وعدى على خير وأرسلني للمقابلة الثانية في نفس الوقت لأنهم كانوا محتاجين موظف بسرعة..

المقابلة الثانية كانت مع المدير الإقليمي - بريطاني - وتعالوا شوفوا الوهقة

لهجة سريعة منه + تناحة غير طبيعية مني = من جنبها والله

أزين شي كان فيه واحد جالس معه عرفت بعدها إنه عميل بس الرجال ونعم فيه

كان المدير يسألني وأنا أجاوبه وإذا فيه شي قاله ومافهمته أقول اممممممممم والرجال يترجم لي علشان أفهم وأرد عليه بالإنجليزي

موقف كان يفشل واللي فشلني أكثر بعد ماتوظفت كان المدير الإقليمي جاي عندنا في الفرع وكنا جالسين أنا وهو والمدير المباشر - العربي - قال لي المدير الإقليمي تذكر ذاك اليوم يوم المقابلة ؟ قلت له ايه وش فيه؟ قال ترى أدري إن العميل كان يغششك << الرجال كان يعرف شوي شوي عربي وطاااااااح وجهي قدام مديري لأنه سألني بعد مارجعت له قلت له كل شي أوكيه!!!
اليوم الثاني من زيارة المدير الإقليمي جاني المدير المباشر وقال لي ترى سجلناك في دورة في المجلس الثقافي البريطاني على حساب الشركة

رب ضارة نافعة

تسلم لي عيونك

الفكاهة والروح المرحة أحيانا تلعب دور كبير في التعيين ..
هذا سلمكم الله .. لجنة في الدفاع المدني .. لإستقبال مجندين ..
المهم وصل الدور لإحد الشباب (( ويبدوا إنه بايعها .. ))
سين (( رئيس اللجنة )) \ يا إبني إذا أشتعل حريق أمامك في مخيم .. ما هي الإجراءات التي ستقوم بها ؟؟
جيم (( المتقدم )) \ أصب (( أسكب هههه )) عليها بنزين ..
اللجنة تسدحوا من الضحك ..
((رئيس اللجنة)) يا ولدي .. اقولك حريق قدامك في مخيم اش حتسوي .. بشر حتموت ؟؟
(( المتقدم )) أصب عليها بنزين .. ويضحك ..
وتم تعيينه لخفة دمة .. وهاهو يحمل على عضده الآن رتبة جندي أول ..
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــ

حلوةةةةةةةةةةةةةةةةةةةةةةةةةةةةةة

بس وين الحلقه الثانيه