السلام عليكم

أنا أمس السبت رحت لدفاع الجوي طبعا من الفجر
وماجات الساعه 6 الا الناس كلهم محضرين وصايره زحمات
المهم بعدين جاء ضابط وصفنا صفين بجوار البوابه
وياليت ياشباب ماحد يوقف سيارته بجوار الشبك
لانك بعد ماتوقف بيقولك اللي سيارته هنا يطلعها
صفينا صفين وصراحه كل شوي يزود العدد الى ماشاء الله
لدرجة أننا يوم خلصنا الا فيه طلاب توهم جايين بالباص
الهم دخلو الصفين داخل المركز وصارت تقريباً 6 صفوف داخل
وفيه باصين ينقلون الى الملعب وكل صف منه عشره يركبون
ويوم دخلنا الملعب لقينا المدربين حقين الوزن مستعدين ينتظروننا
وياخذون بطاقات الاشخاص ويروحون يقيسون الوزن والطول
انا ولله الحمد طولي 174 ووزني 73
زودني صانتي بالطول ونقصني كيلو
بعد ماتخلص القياسات فيه عسكري يسجلها على ورقه فيها بياناتك وأسمك
بعدين تروح للمدرب الثاني حق الهروله
يجمعكم ويحطكم على صف واحد ويصفر وتنطلقون من الخط
طبعا لفتين فيه ناس كثير يتحمسون من اول شيء وانواع السرعه
وبعد اللفه الثانيه تلقاه يلهث وتعبان وأخر واحد
لذالك نصيحه اللي يبدا اول شيء هروله على خفيف وماعليك من اللي قدامك
واذا جات اللفه الثانيه أسرع باقصى ماتقدر
بعد ماتخلص من اللفه الثاني تجي للمدرب وتقوله أسمك
انا ولله الحمد أخذت اللفتين ب 3 دقايق
ماني ضمن الاوائل ولا أخر شيء تقريباً 7 أو 8 من 20
بعدين يسجلها لك المدرب على الورقه
وتريح وتشرب مويه واللي يبي يروح دورة المياه وانتم بكرامه يروح
بعدين يجمعونكم من جديد ويودونكم لصاله الرياضيه
أشبه بملعب سله أو يد
بعدين يقولكم الضابط المطوع الله يجزاه الجنه
بعض التعليمات عن الجوال انه لازم تحطه صامت وعن الاماكن اللي ممكن تراجع فيها
بعدين فيه أربع ضباط ورئيس رقباء جالسين على طاولات
تروحون لهم بالترتيب ويسالكم أساله
كلن حسب سؤاله
أنا بالنسبه لي سالني عن الاصل وعن أسم الام ومزح معي وسالني وش تشجع

المهم اذا جيت تفطر أو تشرب مويه بالصاله الرياضيه لازم تستاذن من الضابط
لان الفطور والمويه بزاويه من الصاله والضباط اللي جالسين بالزاويه الثانيه
وصراحه تعاملهم قمه بالذوق فيه ناس كثير من المتقدمين عليهم اساليب ترفع الضغط
ومع هذا يسامحونهم ويغضون النظر

بعد ماتخلص من الضابط اللي جالس على طاوله
تدخل عند العقيد
صراحه أنا سالني يمكن أكثر من 5 أساله
وبعض الاخوان ماسالهم ولا سؤال الا وين تبي يكون تعيينك

أنا سالني ليش ماكملت دراسه الجامعه وش سبب دخولك للعسكريه
وأنت وش أصلك ومن وين تحديداً وكيف سمعت عن الدفاع الجوي

صراحه بعض اجابتي كانت مربكه لكن كنت اجاوب على طول بدون أي تفكير أو كذب

بالاخير تطلع ويعطيك ورقه حقت بطاقة متابعه
علشان لو طلع القبول النهائي تعرف وش لك ووش عليك

وتركب الباص وترجع الى حيث كنت
والوقت تقريباً دخلنا 6 على ماوصلنا الملعب وجاء دورنا 6 ونص وخلصنا 8 ونص



ملاحظات :

صراحه المتقدمين كثيرر وبعضهم ماتنطبق عليهم الشروط ومع هذا بكل حماس جايين
يعني تحصل واحد طوله 150 أو 155 ومع هذا جاي وكله حماس
والا تلقى واحد وزنه 100 والا أكثر على طول 160 وعلى باله الشخص المطلوب
وفيه ناس صراحه شكلياً مايؤهلون ك عسكر
ومن غير اللي جايين بدون جزم تكرمون يرجعونهم أخر شيء الى مايدبرون جزم من خوياهم
وفيه ناس تستعبط أو عبيطه يجلس يرد على الضباط بكل وقاحه ولا كانه بيتعسكر
على أي حال نظرات الضباط بغض النظر عن الاوراق الرسميه حسيت فيها شيء من الاختبار
حتى تركيز بعضهم عليك وانت جالس بالسرا ويشوفون ردة فعلك مع الانتظار والجلسه

بالنهايه الله يوفق جميع المتقدمين حسب الشروط المطلوبه
أما غيرهم صراحه مسببين لنا زحمه على الفاضي
أنا ماعرف الواحد اذا وزنه أكثر من 120 جاي ليش ؟!
والمشكله مع الهروله تلقاه أخر واحد وجالس يسحب رجوله

وفيه شباب الله يصلحهم أنواع الشعر والقصات تقل رايح سياحه ماهو جاي يتعسكر
صحيح ماقول حلقو زيرو لكن يكون الشعر شعر أنسان طبيعي



وأحب أشكر الضباط على أسلوبهم ورقي تعاملهم مع الافراد بشكل عام مهما كان
والعصير والمويه بالملعب وبالصاله من غير السندوتشات


أتمنى يكون الموضوع مفيد للمتقدمين

عقبال الدوره ان شاء الله

اولا اسأل الله ان تكون من المقبلوين اذا كان في انضمامك لهم الخيره لك في حياتك ودينك

ثانيا اشكرك وبعنف على طرح تجربتك ليستفيد الجميع

صراحه كلامك عين العقل فعلا في شباب مستهترين

والمشكله تلقاه اذا رجع من المقابله تلقاه يسب ويشتم والمشكله منه هو

في بعض الشباب السعوديين الله يهديه

حتى اذا توظف تلقاه لعاب ومستهتر واذا انفصب صار يقول انا مظلوم انا فصلوني

اتمنى من كل الشباب الي يدخلون موضوعك يستفيدون من كلامك الدرر

الشخص دائما ياخذ الشي بجديه ويفعل الاسباب ويتوكل على الله لينال مايريد

شكرا على طرح التجربه الرائعه

الله يوفقك

وييسر أمرك ....

موفق بإذن الله ... لك مني أجمل تحية . ..... انا ماحد سالني الاوين تبي تراجع وبس

^
أشكركم على تفاعلكم
والله يوفقنا بالقبول النهائي باذن الله

موفق بإذن الله ... لك مني أجمل تحية .