السلام عليكم

أول شي ايش هو مركز الحلول الممتازه؟

مركز الحلول الممتازه هي من أحد الجهات اللي تقدم خدمات التوظيف من دون أي مقابل!

ولا راح ياخذون عليك أي رسوم ولا أي شي من راتبك!

هم بس راح يطلبون سيرتك الذاتيه

والمؤهلات العلميه هي الثانويه واللي وظايفها راح تكون في الغالب في البنوك..
أو الدبلوم واللي وظايفها راح تكون في الغالب في الاتصالات..

موقعهم (بالنسبه للريـاض) في مجمع البستان اللي على طريق الملك فهد.. اللي بعد برج المملكه بعد الإشاره.. شفت المدخل الرئيسي لمجمع البستان؟ استخدم الباب اللي بعده الصغير.. راح يقابلك مصعد بوجهك.. اطلع للدور الثاني.. أول ما تطلع من المصعد وتكون لوحة الشركات والمؤسسات بوجهك روح يمين.. وراح يكون المكتب بالوجه.. مكتب رقم 4001.. اذا دخلت المكتب سلم سيرتك الذاتيه للي في الريسيبشون واطلع! من دون تعبية أي أوراق (لانه راح يكون رقم جوالك أو وسيلة الاتصال بك في سيرتك الذاتيه!)

راح ياخذ الرد (يعني راح يتصلون عليك) بعد أسابيع الى شهر و نص!

أرقام هواتفهم هي: 4198493 - *******
و الفاكس: 4198490 للي يبي يرسل السيره الذاتيه على الفاكس بدل ما يطلع لهم!

واللحين نجي لتجربتي معاهم... (اللي في الرياض)

انا طلعت لهم قبل تقريبا شهر... سلمت لهم سيرتي الذاتيه... الموظف اللي استلمها مني (اللي في الاستقبال) رجع لي اللي بالعربي واكتفى بالانقليزي! و قال لي انت توكل على الله واحنا راح نتصل عليك بعد أكثر من اسبوع الى شهر...

و أمس حصلت (مس كوول) على جوالي منهم حوالي الساعه 8 الليل... فطلعت لهم اليوم الصباح... اللي في الاستقبال قال لي انت توكل على الله وانتظر منا مكالمه ثانيه الليله!!!!! فطلبت منه أقابل أي مسؤول لانه مو معقوله أرجع للبيت انتظر مكالمتهم مره ثانيه وانا موجود عندهم!!! ف أرسلني لأحد الأشخاص... و بعد النقاش و بعد ما وضح لي انه الاتصال اللي فاتني كان عباره عن مقابله هاتفيه.. سوا لي مقابله على السريع وانا واقف (كم عمرك؟ هل عندك أي مانع بخصوص وظايفهم المتوفره؟ هل انت موظف حاليا؟ كيف لغتك الانقليزيه؟) و بس!!! نجحت... قال لي توقع منا مكالمه بعد اسبوع الى شهر لمقابله شخصيه مع شركة زين!!!! لوظيفة مندوب مبيعات أو مشرف مبيعات في معرض!!!!!!! براتب يبدأ من 4000 الى 5000 كراتب أساسي غير البدلات... (غير وظيفة البائع اللي يبدأ من 3200 ريال)... وانا حطني على "مشرف مبيعات" حسب تقييمه...

و بالتوفيق ان شاء الله

أخوكم/ تركي