موقف سويته اليوم ندمانه منه

أم عقاب · #1 (**permalink**) 14-07-2011, 02:15 AM

السلام عليكم ورحمة الله

صبحكم الله بالخير يا عظماء البطاله

بشرونا عنكم عساكم طيبين ؟؟

اليوم حصل لي موقف بس متندمه مره على اللي سويته حسيت أني إنسانه به مس أو جنون

أنا أعاني من ضيق بالتنفس وقلبي كأنه أحد ماسكه يالله يالله أخذ الأكسجين تعبت مره و كتفي الأيسر متخدر والخدر يمشي من أعلى الكتف ألين أخر أصابعي وما أحس بالراحه حتى أعطي بوكس على الكتف غديه يصحصح

جلست فتره على هالموال حتى رحت أسوي بحث عن هالشي المزعج والمكدر علي لقيت ممكن يصير جلطه لو تهاونت

ورحت على المستشفى شيكت على القلب وسويت فحوصات والحمدلله تمام مابوش شي

والعله ماسكتن الكتف ماغير ألف يدي للخلف بقوة حتى يهجد الخدر
اللي يقهر الخدره على مزاجه أيام يروح وأحس براحه وأيام تسذا تجي فجأة و مزاجي يتغير من هاللي يمشي عاد أذكر الله وأسمع سورة البقرة وأرتاح كتفي
بس مو مره على كيفه هاللي يمشي أحياناً يهجد وأحياناً يتحرك

عاد اليوم وصيت خيي من أمس أبي أغراض من عطار وقالي اليوم ورحت أريح إلين صلاة العشاء قمت سألته جبت أغراضي قالي خليه بكره

جتن شياطين الجن والأنس براسي وأخذت أصرخ ليه تأجل شغلي محتاجته من اللي بيجيبهن لي ورحت أصيح من قلب تسن أحد ضاربن و هو مطير عيونه مستغرب والله ماينلام

السؤال اللي مضيق صدري وراي أصيح من قلب على شي تافه أخاف بي جن وإلا مس ؟؟

هل ضيقة الصدر له علاقة بالصياح ؟؟

على فكره أكلمكم الآن وصدري منحشر و كتفي متعبن جداً جداً بالرغم أذكر الله وأستغفره وأسمع القرآن لو بي جن تسان طلع وفك شره عني وعلى فكره رحت لراقي بس أستغفر الله جالسه أناظر فيه وأضحك و مانيب حوله جالستن أناظر بالحريم

والحل الله يجزاكم خير جداً متعبني الموضوع والله ما تكلمت لكم إلا أني أعيتني الحلول

مستشار العشاق · #2 (**permalink**) 14-07-2011, 02:23 AM

الله يشفيك ويعينك !!!

تعالي جدتي تكوووووي ويقوولون وحده بوحده وتآخذ ع الكويه الوحده 500 ريال وبتوسط لك عندها بنص السعر

ومعروووفه عندكم بالقصيم اذا بتروحين لها ماراح تندمين بس اكتب وصيتك يعني سبحان الله يمكن تزل عن مكان الكويه والا شي لان يدينها تراعد بس كوي مايحتاج !!!

وش قلتي ؟؟؟

وبس ...

أم عقاب · #3 (**permalink**) 14-07-2011, 02:28 AM

الله يجزاك خير أخوي بالله إذا جدتك عنده معرفه بالطب الشعبي تسأله عن الواهنه ..

قالوا لي ناس أن يمكن اللي بي مرض أسمه الواهنه ومايخبره إلا عجز أول

ما أبي الكوي الله لا يحدن عليه بس إذا قدرت تسأله عن الواهنه وش علاجه ؟؟؟

و ماقصرت

social worker · #4 (**permalink**) 14-07-2011, 02:29 AM

وعليكم السلام ورحمة الله وبركاته

أختي أسأل الله العظيم رب العرش العظيم أن يشفيك إنه على ذلك قدير

ومو شرط الأعراض تكون مس أو جن بسم الله علينا

ممكن الأعراض هاذي تكون عين إذا كنتي تشكين في أحد معين خذي من أثره

زي ما إنتي عارفه العين تودي الجمل القدر والرجل القبر

والرسول صلى الله عليه وسلم قال أغلب أمتي يموتون بالعين فيما معنى الحديث

إدهني كتفك بزيت مقري عليه

وحطي يدك على مكان الآلم وإدعي الله إنه يشفيك

فيه كمان لصقات جونسون للظهر

جدي دايماً يشكو من الآم في عظامه ويمدحها يقول تشيل الألم

أجر وعافيه إن شاء الله

تقبلي مروري

فخر الوطن · #5 (**permalink**) 14-07-2011, 02:30 AM

http://ruqya.net/forum/showthread.php?t=7828

أُتـرَجة · #6 (**permalink**) 14-07-2011, 02:31 AM

إن شاء الله مافي الا الخير
وأنفجارك بالبكاء في وجه أخوك لانك تعبتي من الألم ودك ترتاحين
وكأنك تقولين محد حاس في يلي أحس فيه والناس تأجل وأنا أنهلكت من كتفي
ومن ثم أتى الانفجار
لكن أنفجارك فيه خير لماذا ؟!
لانه بكره من النجمه راح يجي عندك
..,,,..
أهتمي بكل شيء يفيدك ولا تدخل وساوس الشيطان لتحبيطك
الله يفرج همك إن شاء الله

أُتـرَجة · #7 (**permalink**) 14-07-2011, 08:18 PM

اقتباس:

المشاركة الأصلية كتبت بواسطة ≈●• أُتـرَجة •●≈

إن شاء الله مافي الا الخير
وأنفجارك بالبكاء في وجه أخوك لانك تعبتي من الألم ودك ترتاحين
وكأنك تقولين محد حاس في يلي أحس فيه والناس تأجل وأنا أنهلكت من كتفي
ومن ثم أتى الانفجار
لكن أنفجارك فيه خير لماذا ؟!
لانه بكره من النجمه راح يجي عندك
..,,,..
أهتمي بكل شيء يفيدك ولا تدخل وساوس الشيطان لتحبيطك
الله يفرج همك إن شاء الله

,
أحب أضيف شيء تذكرته
مفيد جداً جداً جداً وعن تجربة
كريم أفالون لألم العضلات
كانت تتعب أعصابي لان شغلي باليد سواء كمبيوتر او مختبرات
فأتعب جداً كل الساعد إلى راس الاصبع ثقل جداً وخمول
أستخدمت وانا أختك هذا الكريم كمية منه على مكان الالم وأتغطي بعيد قليل عن المكيف ونامي
بإذن الواحد الأحد يزول الألم ويصير كان وتدعيلي ...برمضآن وبكل وقت ,,, أن شاء الله
هذه صورته فيه من رائحة الفقس لونه أبيض ..ممتاز ياملاهيب ممتاز ..

..
.

عاطل ومعطل · #8 (**permalink**) 14-07-2011, 02:32 AM

مااقول غير الله يكون بعونك ويشفيك يارب
تقبلي مروري

الراآسيه · #9 (**permalink**) 14-07-2011, 02:50 AM

وعليكم السلام ورحمة الله وبركاته
سلامتك يالغلا ماتشوفين شر
شيكتي على القالون اخاف انه السبب
اما الضيقه والعصبيه عادي الانسان مرات يكون عليه
ضغط ويجيك احد يكلمك وتكونين واصله حدك وتجي فيه
على فكره انا اليوم اشتغل بالبيت غسل وكنس وجاء اخوي
يقول انتم ليش ماسويتوا كذا وكذا وانا واصله حدي ..صرخة وانا انطل يدي
وانت وشفيك هذا شغلنا ولا شغلك وراح للدوام وهو متعجب من تعصيبي عليه ^-^
وقدد تكون عين الله اعلم انتي اقري سورة الأنبياء قبل تحطين راسك .