بسم الله الرحمن الرحيم





السلام عليكم ورحمة الله وبركاته

جيت اخبركم انه في وظايف بالسجون النسائية اللي بالرياض

وانا اعرف البنت اللي توظفت من 10 شهور تقريبا بالسجون....بس معرفتي بها كانت عادية ....يعني كنت احيان اشوفها عن ناس من جيرانا زمان....اخذت رقمها وكلمتها قبل شوي.....وسألتها عن طبيعة الشغل؟؟<<<<قسم بالله يوم أسألها قلبي يرتعد خوف.....


طبعاً جاوبتني وقالت....الشغل هذا بالذات يبيله صبر....وحرص....واحترام السجينات عشان يحترموك ويحبوك.....


وفي الشغل استلام مثل العسكر.....يعني من 7 المغرب إلى 7 الصباح...واليوم الثاني من 7 الصباح إلى المغرب....يعني تقريبا بالشهر اسبوعين بالليل واسبوعين بالصبح..وممكن احيان تروحين مع بعض السجينات للمستشفى وتكون معك وحدة موظفة وعسكري واحد في جو محاط بالأمان وعدم الخوف


قلت لها طبعن وشلون اللي هناك يحترموك؟؟

قالت انتي افرضي احترامك وشخصيتك ولا تخليهم يلعبون عليك....يعني مرة حصل لها موقف....تقول دخلت العنبر اللي به سجينات من الأجنبيات العرب....عشان تاخذ وحدة عندهازيارة....وتطلعها...جت وحدة من دولة عربية من السجينات تبي تقهرها وتخوفها....قالت يا هية ترا أنا قتالة قتلا!!

ردت عليها هذي اللي اعرفها...قالت لها.اذا قتلتي 2 او 3 انا اقتلك واقتل 6 غيرك....تقولي قسم بالله قلته وانا قلبي يرتعد خوف بس ابي اسوي شخصيتي قدامها وتحترمني...بعدها تقسم بالله انها صارت تحترمها ولا تتلفظ عليها..



بعد في شي قالته لي....إن السجينات مثل أي احد من البشر طفشانين من السجن ومن الحياة اللي حكمت عليهم كذا....وفيهم الطيبات كثير..



وقالت لي على شي مهم....ان الموظفات اللي هناك اول من زمان أجسامهم جثث ومعهم إبتدائي ومتوسط..بس دفعتها كانوا اغلبهم جامعيات!! تخيلوا اللي تخصصها رياضيات واللي تخصصها علم نفس وخدمة إجتماعية...واشكالهم عادية جدأ....يعني مو ضخمات.....



<<<<<<كل هذا عرفته وباقي تسأل.......بس وربي اني ارتعد خوف اذا تخيلت وظيفة بسجن!!





سألتها وين اقدم....قالت روحي حي السلي إدارة السجون مقابل مستشفى الملك سعود


ويروح ولي امرك يقدم لك ويحط ملفك....اهم شي شهادة الثانوي.....واذا معك شهادة جامعية حطيها ....بس لازم الثانوي....واي شهادة ثانية معك حطيها بعد...

ويوقع ولي الأمر على تعهدات وبس


وقالت لي شي ثاني انها توظفت عن طريق احد هناك تعرفه يعني تقريباً فيها وسيط....بس اذا راح ابوك او اخوك....يحاول وإذا قاله الموظف مافي يقوله خل الملف عند إذا في وظيفة دقوا علينا...




بنات انا مافكرت بالشي هذا إلا بعد ماخلاص حاسه إن شهادتي مابتنفعني بالتدريس...ولا فيه امل لا من الديوان ولا من المدارس الأهلية


طبعن انا تخصصي بكالريوس جغرافيا وتقديري انا وجهي جيد
ولي سنتين متخرجة ....اطالع وين احط الشهادة بأي ركن بالبيت وأعلقها<<<<اه ياقلبي

ومعي حاسب 6 شهور وطلع المعهد اللي درست فيه غير مرخص ولا عطوني شهادتي الله لا يبارك فيهم..


وإذا في امل بالديوان ووزارة الخدمة صدقوني راح يطيروني من الرياض لأبعد منطقة وانا مابي ابعد عن أهلي واتغرب...<<<<<هذا اذا وظفوك خخخخ



تدرون كم راتب الوظيفة هذي 5 ألاف ويزيد وتترقين مثل العسكر خخخخخ



بنات اللي بتقولي اهلك بيقبلون....امي رضت....بعد ماشافت حالتي لا وظيفة زي الناس ولا عريس الله يسامحه بس..وابوي سكت بس احسه رافض شوي ...بس بقنعه




بستخير اليوم أن شاء الله وبحاول في ابوي وان وافق بخليه بكره يقدم لي...بنفس المكان اللي كتبته فوق...

وانتوا بعد حاولوا إذا اهلكم راضين بالوظيفه هذي وقدموا....ومابي منكم إلا الدعوة الصالحة..

والله يوفقني ويوفقكم لما فيه خير ورضا لرب العالمين



000000000000000000000000000000000000000000000




هذا الكلام صار قبل سنه تقريبا ونشرته بأحد المنتديات...وراح ابوي قدملي وطلعت السالفة واسطة بواسطة..

ادري بتقولون مهبووولة انتي تتوظفين عسكري خخخخخ اقصد عسكرية

بس والله انها احسن من البيت على الاقل وظيفة رسميه

ها وش رايكم يا بنات ويا شباب

<<<وللي عنده لي واسطه لا ينسى يخبرني..والحمدالله على كل حال..ادري واسطتنا رب العالمين وربي مايضيع احد بس هم ندور على الاسباب اللي تساعدنا..



اتمنى عدم نقل الموضوع

لا إله إلا الله..محمد رسول الله

حتى البنات يبون عسكريـه...!!!!!!

بعدين هذي فيهـا روحـات وجيـات ويمكـن سفر مع المسجونات لمنـاطق

أنا أشوف القعـدهـ بالبيت ولا هالشغلـه...

يانااااس والله فيـه وظائف كثيرهـ...

بس اللي يتدلـع ويتشكى..هذا مافيـه خيــر

الواحـد يذكر الله ويطلب من والديـه الدعاء ويدعي ربـه يرزقـه وظيفـه

سؤال بس..تخيلي حالك مع هالوظيفـه شلون بتكـون..؟؟

الله يرحم الحـال بس...وربي يوفقـك ويرزق بوظيفـه وزوج صالحـه يعينـك على هالحيـاهـ

شكراً لك

مآادري كيف ارد!.
يعني الشغله حلوهـ من نآحيه انسانيه وعآطفيهـ.!

لكن كل اللي اقدر اقولهـ الله يكتب لك الخير,, والزووج الصآلح الي تتوفقين واياه..
والوظيفه الحلوه,!
ءامين,!

عسكريه

دخلت مزاجي هالفكرة

الشغله ماهي عيب ولاحرام

ولاهي محكورة على الرجاجيل

عسى الله يوفقك ويختار لك الخيره الصالحه

الله يرزقك زوج صالح
والوظيفة اللي تتمنينها