كثير منكم خايف وكثير منكم ينتظر وكثير منكم يسئل ومايلقى اجابة على اسئلته انا بتكلم لكم عن الي حصل معاي من الألف الى الياء
اول شيء قدمت عن طريق الأنترنت واخترت دفاع جوي بعد ماتسكر التسجيل ارسلو رساله تم قبولك مبدئي ويجب عليك تحميل الأستماره رحت وحملتها وبعد كذا رحت وطبعتها واخذت ملف اسود شفاف طبعا لدفاع الجوي وذا مثال عليه ولونه اخضر واهو للحربيه
بعد كذا عبيت الأستماره كامله ولاتنسى الشروط ذي
المعرفان مايكونو اخوانك والشاهدان كذلك ولاتنسى تختمها من العمده وتصدققها من الشرطه او الأماره
بعد ماصدقتها لزقت صورتين مكشوف الرأس بالأماكن المطلوبه عادي مو ضروري تحلق راسك بعد كذا اخذت الشهاده الثانويه طبق الأصل وسحبت درجة التحصيلي والقياس وصورتين من بطاقة الوالد الله يحفظه وصوره من كرت العايله وصوره من كرت العايله حق جدي الله يرحمه والي ماعنده مو لازم وطبعا مافي حسن سيرة وسلوك لانها مضافه في الشهاده نفسها وبعد كذا رتبتهن وخرمتهن من اليمين وبالنسبه لرقم التسجيل الي في اول الأستماره من فوق اكتب رقم طلبك
بعد كذا رحت لرياض وفي نقطة تفتيش بعده على طول يجي مخرج صلبوخ على يدك اليمين والي مايدل يسئل العسكري ويقوله وصلنا للكليه الحربيه في العيينه ولاتنسون تجيبون معاكم 4 صور مكشوفة الرأس لأنهم بياخذون صورتين دخلت داخل في الشبك وعلى طول دخلونا غرفه فيها ناس كثيرين ويكون الترتيب كالتالي
على اليسار دفاع جوي وفي الوسط جويه واليمين بحريه والبريه (الحربيه) يكونون ورانا بعد كذا قالي العسكري اجلس هنا وجلست وكانو قليلين الدفاع مقابل الجويه الي كثيريين مرهه
واخذ ملفي والحمد لله كل شيء تمام مو ناقصني ولا شيء وانتظرت حدود الساعه وناداني العسكري وقال صورتين وعطيته وبعدها قال ارجع لمكانك وبعد ربع ساعه نادى اسمي وفرحت قلت خلاص
الى وقال امسك رجع الصورتين
وبعدها بنص ساعه نادا اسمي وقال عطني صورتين وقال اجلس قدام وانتظرت خمس دقائق وناداني وعطاني ملفي وكرت اصفر مكتوب عليه معد الفحص والمقابله وقال الموعد بكره امام اسواق الشعله الساعه 4:30 الفجر وتجي بالزي السعودي الكامل وممنوع تاخذ الجوال معاك بس بطاقتك المدنيه وملفك والكرت
بعدها رحت لرياض واخذت شقه قريبه من الموقع وبالأصح غرفه وحمام والأيجار 120 ريال تبعد عن اسواق الشعله 1 كيلو او اكثر شوي ونمت الساعه 3 او 4 العصر وصحيت الساعه 11 في الليل وعلى الساعه 3:30 رحت على رجولي لأسواق الشعله وتشوف زحمه وتدخل داخند العسكري ويشوف الكرت ويدخلك وتمشي وتمشي وبعدين تاخذ يمين تشوف الشعب ماسك سرا
وتمسك سرا معاهم وتنتظر ساعه وبعدها تشوف ناس تركب وانت مو معهم طبعا بعد مايتحركن الباصات يدخلونك داخل في مظلات وكراسي تجلسون وفي ناس برا تنتظر في السرا وبعدها بساعه
يوقفونك برا تصف طابور وبعدين انتظرنا ممكن نص ساعه وحركنا بعدين دخلون داخل في وزارة الدفاع الجوي وانتظرنا في المسرح بعدها ب 3 ساعات او 4 او 5 انت وحظك ياخذون مجموعات انا بعد 3 او 4 ساعات قالو الدفاع الجوي اخذو 20 واحد وفي سله تحط فيها ملفك بس تاخذ الكرت الأصفر وورقة الفحص الي يكونو عطوك اياها امس مع الكرت ورحنا مشينا ورا العسكري ونزلنا تحت في القبو الي تحت مره ولقينا عالم لابسه ازرق في ازرق وانتظرنا على الكراسي وبعدين عطونا كيس تحط فيه شماغك ويعطونك كيس ثاني تحط فيه محفظتك واغراضك بعدها تروح لغرفة الملابس ويعطونك كنه بشت ازرق طقاق او لزاق وتعلق ثوبك وترمي الفانيله والسروال وتظل بالسناوي
وتلبس الأزرق وتطلع (نصيحه علق ثوبك في اخر شيء لاتصير مثلي
) وتروح لسيب فيه 9 غرف اول شيء العيون يفحصونك اول شيء عمى الألوان نفس الي في الرابط ذا
https://www.btalah.com/eyetest/
بس يكون مطبوع بورق بعدها تجلس على الكرسي ويسئلك ذي وين وذي وين وبعدها تقوم وتجلس مع الشله تنتظر اسمك في الغرفه الثانيه الي هي الباطنيه ويفحص نبضات قلبك وبعدها العظام يشوف اذا فيك شيء بعدها الفحص
القوي الي يكون الدكتور عميد جالس في الغرفه وينادي اسمك ويقولك افصخ السناوي
وكح وبعدها تدخل على الي يشوف فيك عمليات او لأ وبعدها الأنف والأذن والحنجره فحص عادي وبعدها الأسنان ونصيحه الي فيه تسوس او سنه طايح او ضرس لازم يعمله من الحين بعدها تدخل على النفسيه ويقولك اقرأ سورة الناس ويسئلك ليش جيت هنا ويقولك قل أمر امير المؤمنين وبعدها تقيس وزنك وطولك وبعدها تجلس تنتظر اخر غرفه وهي الي يقولك رح مقابله او يقولك مسرح (يعني روح للمسرح وانتظر الباص مانت مقبول) انا قال لي مقابله لأني الحمد لله كله لائق بعدها رحت لغرفة الملابس ادور ثوبي مالقيته
بس الحمد لله لقيت الكيس الي فيه الشماغ والسروال والفانيله اما الأغراض الثانيه معاي بجيبتي واقعد ادور وادور ومالقيت شيء
رحت لبس السروال والفانيله ولبست فوقه الأزرق ورحت وصليت وبعدها رحت للمقابله
والناس قاعده تطالع ذا وش فيه لابس كذا والحمد لله كنت مو خايف من المقابله ونصيحه لاحد يخاف وانتظرت الدور ودخلت على العميد هو الي يقابل واول مادخلت ضحك وقال وين ثوبك قلت انسرق قال عسى مافيه اغراضك قلت لأ اغراضي الحمد لله موجوده وبدا يسئل عرف عن نفسك وايهما يشع اكثر النجم ام الكوكب واي اثقل طن حديد ام طن قطن واسئله اغلبها ناسيه بس الحمد لله اجتزت المقابله في بعض الشباب سئلهم من زوجة الرسول او من وزير الدفاع او اقرب منطقه لخط الأستواء او دوله وعاصمتها يعني يبيلك تكون هادي والي ماتعرفه قول مادري بعدها ختم على الكرت الأصفر وقال اطلع فوق وخذ موعد الأختبار اللياقه والتحريري طلعت فوق وعطيته الكرت الأصفر وجلست مع الشباب والي ينتظرون الموعد واقل من 10 دقائق اخذت الموعد وكان الساعه 4 الفجر وتكون لابس بدله رياضيه وجزمه رياضيه (الله يكرمكم) وقلم رصاص وبطاقة الأحوال والموعد عطونا في العيينه ببس بعد قيادة الأركان ورحت في الباص ونزلنا قدام اسواق الشعله رجعت اتغديت ورحت العصر واشتريت المطلوب ورجعت المغرب ونمت وصحيت الساعه 1 ونص وامشيت للعيينه وصلت الساعه 3:30 تقريبا وفي شباب قليلين مو كثار وبدو يجتمعون بس مو مثل زحمة امس لأن كثار اخذو مسرح وصلينا وبعدها وصلن الباصات وركبنا وانتظرنا نص ساعه وحركن ودخلنا داخل الكليه الحربيه وصلنا للملعب ودخلنا وجلسونا على الكراسي وبدو بالحربيه بعدها حنا وطبعا اشرحو لنا كيف التدريب يعني اول شيء بشم(ظغط ) بعدها بطن وبعدها قفز بعدها هروله 1600 متر اربع لفات على الملعب وعطونا ارقام طبعا الرقم الي يعطونك هو خاص فيك انتبه تنزله او ترميه بعد الهروله يضل معك لين تختبر تحريري بعد ماجاء اسمي تنزل وتعطي العسكري الكرت والبطاقه ويرجعهن لك وتدخل تنتظر يعطونك رقم نفس الي بالسباق بس قماش تلبسه والرقم يكون قدام مو ورا وتحط الكرت الأصفر والبطاقه وقلم الرصاص بعد ماتستلم الرقم في مكان رقمك قطعة قماش كبيره وفيها جيوب وكل جيب عليه رقم ولون يعني لونك ازرق تحط في الازرق لونك اسود تحط في الأسود بعدها يصفونكم 40 واحد ويقولكم بالتوفيق وتمشون قدام شوي وتلاقون و10 مدربين وينادون كل واحد 6 ارقام وتصفون اول شيء بشم بعدها بطن والبشم مطلوب 30 والبطن الي تقدر عليه في 30 ثانيه بعدها تروح تنط وبعدها تنتظر لين ماتخلصون ويبدون بالمجموعات تنطلق مع 80 واحد او 40 واحد مسافة 1600م ونصيحه لاتتسابق لأنه انت تتسابق مع الزمن مو مع خويك ووزع جهدك على اربع لفات عشان ماتتعب بعدها تريحون وطبعا بين كل اختبار واختبار راحه 10 دقائق او 5 دقائق بعدها تريح نص ساعه وتجيب اغراضك واذا خلصو كلهم هروله يريحون وتروحو للأختبار التحريري وقف نقيب من الدفاع الجوي وقال الدفاع يوقف هناك والحربيه هنا وقال الحقوني يقصدنا احنا يالدفاع الجوي ورقينا الدرج بعدها لقينا 3 امريكيين ورائد وشرحو الطريقه ودخلونا داخل والأختبار عباره عن 60 سؤال في 60 دقيقه واختياري واسئله بالأنقلش بس عامه يعني سهله بعد ماخلصنا تنزل الرقم على الطاوله وترجع الكرسي مكانه وتوقف تنتظر طابور وتكتب اسمك وتوقع ويقولك ان الفرز المبدئي الثاني بعد اسبوع الى اسبوعين وتركبو الباص وترجعو بمكانكم وتركبو السيارات وتتيسرون
هذا الي حصل معاي واتمنى من الله ان يوفقنا جميعا والي ابيه من كل واحد دعوه في ظهر الغيب واي سؤال او استفسار انا جاهز للكل
والسلام عليكم ورحمة الله وبركاته
21-07-2011, 10:19 PM
هذا ماحصل معي من الألف الى الياء كلية الدفاع الجوي| ضباط
العرض المتطور
