[align=center]
السلام عليكم ورحمة الله وبركاته
والله العظيم اننا شعب مسكين مغلوب على امره ضاحكين علينا بالسياحة الداخلية

البلد اصلا تعيش في فوضى في كل شي

يعني من يوم تطلع من بيتك رايح تسيح في بلدك الين ترجع وانت سايح مرة ثانية لبيتك


اول خطأ ان رئيس هيئة السياحة ما يصيف في مصايفنا ...وان صيف عندنا سوالنا زحمة في شوراعنا اللي اساسا وهي فاضي تحس انك ماشي في زقاق..!!!!

عاد انا في سنة من السنون قررت أني اروح سياحة داخلية ...

طلعت من جدة ويوم وصلت الليث خرب المكيف قلت ابشوف لي أي بقالة اشتري اسكريم ابرد شوي ....تخيلوا بقالة مافيها عسكريم ...اخذت سنتوب حق الكفار الا لعنة الله عليهم وعلى من والاهم ....

وصلت للمخواة وقلت ابطلع الباحة عشان الجو ابرد....وصلت الباحة الساعة وحدة ونص الظهر ....قاعد ادور لغرفة ابنام فيها ...رحت لواحد قلت له يابن الحلال ابي غرفة بس ابغى اقيل شوي قالي ب 50 ريال قلت له طيب ابشر....عطيته اوراقي ووقفت السيارة برا وطلعت انام رحت ابغسل وجهي .... مالقيت موية ..اتصلت على الاستقبال قلت وين الموية وين هالعلوم قالي الوايت جاي في الطريق ...ويوم حطيت راسي الا الرجال يدق علي يقول انت صاحب السيارة السودا قلت ايه قال تعال وخرها الوايت يبي يدخل ...نزلت وخرتها ...ورجعت نمت ....صحيت الساعة خمسة ونص رحت احاسبه قالي المرة الجاية تعال عندنا قلت ضف وجهك بس عطني الباقي...عطاني الباقي ...ومشيت


قبل النماص وقفت عند بوفيه ابي شي اكله طلبت سندوتش جبنه ...الهندي حطه لي في خبز شامي ...اول مرة اشوفه سندوتش جبنه في خبز شامي ...والهندي يحسبني من الاتراك يقولي انت سوي شامي في شاورما قلت اول شي صك فمك ثاني تكلم بشويش لا اجي احط راسك في سخان السندوتش واحط عليك شطة ومايونيز..

طلعت من عنده ووصلت النماص لقيت الخط مسوين فيه حفريات مدري توسعه يعني نايمين طوال السنة ويوم بدا الصيف قاموا يوسعون في الطريق

وصلت ابها الساعة 12 في الليل واتفقت انا وزوجتي انا ما نعلم احد اننا جايين...رحت استأجر غرفة قالي ب 650 وكل ما اروح فندق او شقق مفروشة القاها فل

رحت لواحد شايب استاجرت منه غرفة ب300 ريال...

ثاني يوم قالي ياولدي بكرة تطلع....قلت له اطلع وين ؟؟ قالي بكرة لازم تسلم الشقة قلت له خير ان شاء وش جاك مني..؟قال ما جا الا كل خير بس الناس رفعت الايجار وانت تدفع 300 يعني غرفتك هذي بتجيب لي 450 وانا معطيك 300 قلت له اختصار للوقت واحتراما للشيب اللي براسك مانيب طالع واذا فيك خير قرب من الغرفة...قالي تطلع وانت ماتشوف ....قلت انا ابروح انام الحين وبكرة يصير خير...

طلعت الصباح حصلت مجمع عياله كلهم عند الباب....واحد منهم معه عجرة ...

قال اكبر واحد فيهم وين المفتاح قلت له لا يكون انا جالس ببلاش..؟؟

قالي تسلم الغرفة...قلت له بيني وبينك عقد والعقد مفتوح واجلس فيها الين ابغى وبالسعر اللي في العقد ...والا اتصل الان على هيئة السياحة
اتصلت على الهيئة رد علي الرد الالي يقولي للعربية اضغط مدري كم

يعني بالله بيجيكم سائح اجنبي في هالزبايل اللي تسمونها سياحة ويلطعني ربع ساعة

جلست مناحلة مع الشايب بعد 5 ايام واخر شي قالي رح دور لك شقة قلت له دور لي انت وبنفس السعر وبشرط انها تعجبني ...

قال ياولدي والله ما اعرف قلت له طيب عندي لك اقتراح وش رايك...

ترد لي الفلوس بطيب نفس وانا اعتبرها تعويض عن الاذى النفسي اللي سببته لي قالي خلاص تم

قلت له عندي شرط كمان ...توقع على ورقة انه لا يحق لك مطالبتي بأي مبلغ قالي ابشر

قلت له اخر طلب عندي

قال عطنيه بسرعة

قلت له الفلوس ما ابيها منك كاش ابيك تحولها على حسابي في البنك,,,,انا ما اضمن يجيني واحد من عيالك يذبحني وياخذ قروش قالي لا هذي صعبة قلت له خلاص اجل بيني وبينك المحاكم وانا راح اقعد هنا يمكن ثلاث اسابيع

قالي اجل خلاص ابعطيك الله لا يوفقك قلت له الله لايوفق اللي ينقض العقود من بعد توثيقها...انا وقعت على عقد معك وبالسعر اللي تبيه وانت اللي نقضت الاتفاق وبالتالي الله لا يوفقك قم حولي الفلوس ولما تخلص تعالي عشان نسوي صيغة الورقة ..

راح ولما جاني لقي الورقة مكتوب فيها...
بسم الله الرحمن الرحيم

السلام عليكم ورحمة الله وبركاته

اتقدم انا المواطن/ بهذه الورقة وافيدكم انني بكامل قواي العقلية ولا يحق لي مطالبة الاستاذ / بأي مبالغ مالية كتعويض عن الفترة التي قضاها نزيل في فندقي الخاص وقد تقرر دفع 1500 ريال للاستاذ/ كتعويض نفسي عن مالحقه مني اثناء تهديدي له ولا يحق لي المطالبة باسترداد مبلغ التعويض تحت أي سبب كان...واكرر انني في كامل قواي العقلية


الشاهد الاول
الشاهد الثاني

رقم بطاقة الشاهد الاول
رقم بطاقة الشاهد الثاني

جوال الشاهد الاول
جوال الشاهد الثاني

عنوان الشاهد الاول
عنوان الشاهد الثاني

مقر عمل الشاهد الاول
مقر عمل الشاهد الثاني


ووقعوها عن يد وهم صاغرون

طلعت من الفندق ودقيت على اختي قلت لها عندي لك مفاجأة ....انا في ابها.....

ورحت لها البيت وجلست عندها بقية الاسبوع



لا بارك الله في السياحة الداخلية كلها سرقة
دخول المنتزهات برسوم شاملة الاكل والشرب وتروح للمطعم تلقى السنتوب ب3 ريال وسندوتش الجبنة ب5 ريال تجلس على طاولة تلقى فوقها خمس بساس وثلاث فيران واثنين طعمية وواحد شاهي

تكاليف السياحة الخارجية هي تقريبا نفس تكلفة السياحة الداخلية او اقل
على الاقل لما يجي مطر في الخارج ماتلقى بزارين القبايل ينطون في الموية
والله اني كنت جالس في القرية التراثية وفي يمكن عشرة بزارين برا قاعد يحاذفون علينا حجار....امحق من سياحة




والسلام عليكم ورحمة الله وبركاته
[/align]