فكرة توزيع وبيع : مستلزمات مغاسل الملابس بالتفصيل

هِـــَـِزاعً · #1 (**permalink**) 29-07-2011, 03:14 AM

السلام عليكم ورحمة الله وبركاته ؛؛؛

في البداية كل عام وانتم بخير وبصحة وسلامة ورمضان كريم علينا وعليكم .

لأننا كلنا هنا في هذا المنتدى المبروك كالبنيان المرصوص بعضنا يشد بعضاً ولأن الشخص مهما بلغ من العلم والمعرفة لايستغني عن الراي والمشورة ولأن بعض الاخوان يسألون عن هالمشروع حبيت أطرح فكرة مشروعي القادم بين ايديكم وهي على النحو التالي :

بيع وتوزيع
مستلزمات مغاسل الملابس
(علاقات ملابس واكياس بلاستيك ونشا وصابون وكلوركس وووو)

طبعاً هناك انواع كثيرة وشركات بلاستيك ومنظفات منتجاتها مليانه في السوق وما كل مغسله يشترون نوع واحد .

فمثلاً عندنا الكلوركس فيه نوعين هي الماشية في السوق الكلوركس المعروف وهو يعتبر سعره غالي على المغاسل ولايطلبونه باستمرار وفيه نوع كلور الفاخر وسعره اقل من الكلوركس وماشي عند المغاسل مثل السلام عليكم وبالنسبة للحجم انا اتكلم عن جراكل مش العلب الصغيرة .

كذلك عندنا النشا طبعاً المريتو نادر تواجده في السوق لذلك حصلت نوع اسمه موبي سعره من المورد 93 ريال وسعر البيع على المغسلة 110 ريال وانت تضحك لأن فيه ناس يبيعون على 120 ريال وطبعاً المغسله الوحده تستهلك 3 كرتون شهرياً على الاقل .

وكمان عندنا اكياس البلاستيك اللي اسمها في السوق رولات مغاسل هذه فيها هامش ربح مناسب جداً وفيها نوعين فيه ملون سعره من المورد 37 ريال وسعر بيعه على المغسله 40 ريال وفيه سادة سعره من المورد 35 ريال وسعر بيعه على المغسله 38 ريال والرول فيه 200 كيس والمغسله تستهلك مايقارب 15 رول شهريا على الاقل . وانا ما تكلمت عن اكياس الملابس الداخلية اللي مايقل هامش ربحها عن الاكياس الاخرى .

نجي على سالفة علاقات الملابس اللي سعرها من المورد 53 ريال وسعر بيعها على المغسلة 60 ريال وهذا هامش ربح ممتاز اذا كنت تبي تنزل على المغسلة الواحدة 10 كراتين شهرياً باستثناء المغاسل الضعيفه .

المتطلبات :
مستودع لتخزين البضاعة يكون ايجاره من الـ 10 الاف ريال او في هالحدود يدفع نصفها مع ابرام العقد والنصف الاخر بعد 6 شهور لأن شغلك راح يكون خارجي توزيع على المغاسل .

وتحتاج سيارة عبارة عن فان بضائع قيمته كذلك من ال 10 الاف ريال وفي هالحدود .

وتحتاج مندوب شقردي على الكفالة يشتغل بالراتب وبعمولة مناسبه للطرفين .

في البداية يكون الشغل قدر الامكان على كسب اكثر عدد من الزبائن والمغاسل اللي تشتري منك حتى لو تنزل من اسعار البيع عليهم وتكسر سعر السوق وتسيطر عليهم لان هالشيء دعاية لك بحيث ان كل مدير مغسله يبّلغ المغاسل اللي حوله ويجيك الطلبات على الجوال .

وكذلك عشان تكسب زبائن اشتغل على موضوع الهدايا يعني مع كل بضاعة تعطي العامل دباسة او اقلام او كرتون علاقات ملابس مجاني وتحاول بقدر المستطاع تغري وتقدم مزايا مايحلم بها .

ايضاً بامكانك التوسع في حال انك امتلكت قاعدة من العملاء وبحبحت من الدراهم بحيث تجيب مندوب ثاني وثالث ويبقى المستودع كما هو ويتم توزيع المناديب على المنطقة لإجتناب التضارب بينهم وبإمكانك تخصص واحد للمناطق والهجر اللي تكون منافسة الموزعين فيها قليله وتلعب بالسوق لحالك .

الامر الاخر اذا رزقك الله وصرت هامور تقدر تفتح او تشتري مغسله او تفتح محل يختص بالمنظفات والبلاستيك والامور هذه وتعطي فرصة للموزعين اللي يشتغلون على حسابهم فرصة للربح منك لان هالشيء يعطيك تسويق كبير لبضاعتك .

وبامكانك يكون عندك صيانة معدات المغاسل اذا حصلت فني ممتاز وبامكانك تشتغل على تنظيف المنازل وجلي البلاط اذا قدرت تتعاقد مع قروب نظافة من احدى مؤسسات النظافة وبامكانك تسوي وتسوي وتسوي

انا واعوذ بالله من انا تكلمت عن سعر المورد من المصنع مباشره لأنه ينزل بمبلغ جامد ويربح ريال ريالين على المنتج الواحد
والمصنع مشكلته للاسف مايبيع لك كرتون والا خمسين كرتون يبيع كميات كبيرة .

اخواني
انا كتبت الموضوع على عجالة واتمنى المعذرة ولا استغني من ارائكم وتوجيهاتكم

واسأل الله التوفيق لي ولكم وصياماً مقبولا وافطاراً شهياً

هزاع

مفلس ويدور مشاري · #2 (**permalink**) 29-07-2011, 04:28 AM

الله يوفقك والله انت تفكيرك حلو وانا اشجعك واهنيك على المخيخ الي عندك وروح بس لا تعتمد على الشقردي الى على كفالتك اشتغل انت عشان تتعرف على اصحاب المغاسل وخلي اسلوبك حلو وكثر من الهدايا عشان يتعاملون معك مره ثانيه وموفق خير ان شاء الله

asdfghjk · #3 (**permalink**) 29-07-2011, 05:18 AM

والله ياخوي ياليت تتأكد من هامش الربح مزبوط لان اذكر واحد جاب فكرة تصنيع معاليق ملابس وبالاخير ماقدر ينافس مصنع الصغير للاسلاك
الي هو طبعا يوزع للمغاسل

شراب كحه · #4 (**permalink**) 29-07-2011, 05:38 AM

ولا تنسى الله يوفقك البيع بالدين على المغاسل

مآعاد بدري · #5 (**permalink**) 29-07-2011, 12:47 PM

كلام كبير وجميل ياهزاع

نقاوي · #6 (**permalink**) 29-07-2011, 02:08 PM

والله الهامش الربحي الي ذكرته اذا كان صحيح حول .... بس السؤال كم ممكن المندوب يغطي من مغسله ؟
يعني المناديب الشغالين الان كيف تصريفهم ؟
والله يوفقك وكل عام وانتم بخير وشهر بركه ورحمه لنا جميعا ان شاء الله ,,,

هِـــَـِزاعً · #7 (**permalink**) 29-07-2011, 07:32 PM

اقتباس:

المشاركة الأصلية كتبت بواسطة مفلس ويدور مشاري

الله يوفقك والله انت تفكيرك حلو وانا اشجعك واهنيك على المخيخ الي عندك وروح بس لا تعتمد على الشقردي الى على كفالتك اشتغل انت عشان تتعرف على اصحاب المغاسل وخلي اسلوبك حلو وكثر من الهدايا عشان يتعاملون معك مره ثانيه وموفق خير ان شاء الله

بارك الله فيك اخوي ولاهنت على كرم حضورك وتواجدك واطرائك
والشقردي شر لابد منه لكن بشرط يكون تحت الرقابه المشدده والتواجد المستمر والأفكار واجد لكن تبي واحد يتحرك

تحياتي وتقديري

هِـــَـِزاعً · #8 (**permalink**) 30-07-2011, 02:52 AM

اقتباس:

المشاركة الأصلية كتبت بواسطة asdfghjk

والله ياخوي ياليت تتأكد من هامش الربح مزبوط لان اذكر واحد جاب فكرة تصنيع معاليق ملابس وبالاخير ماقدر ينافس مصنع الصغير للاسلاك
الي هو طبعا يوزع للمغاسل

هامش الربح مزبوط واذا فيه اختلاف فهو شيء بسيط وبالنسبة لعلاقات الملابس فهي من انتاج مصنع الصغير وهي المعروفه في السوق

لأني ماتكلمت عن التصنيع لان المنافسه فيه صعبه