السلام عليكم ورحمة الله وبركاته

القصة حدثت في تاريخ 06/01/2008م.

كنت مريض - انفلونزا حادة بعيد عنكم مع التهاب في سقف الحلق والغدد اللمفاوية -

المهم أخذت تحويل إلى مستشفى الحمادي من عيادة الشركة التي أعمل بها.

وحين وصلت إلى هناك أخذوا مني بطاقة التأمين الطبي وبطاقة الأحوال للمطابقة.

وبعدها تم تحويلي إلى الكاشير !!

طيب ليش اروح الكاشير وأنا جاي بتحويل من عيادة الشركة.؟؟

حيث أن الفقرة الثامنة من العقد بين شركة بوبا الشرق الأوسط للتأمين الطبي وبين مستشفى الحمادي هو تحصيل مبلغ وقدره 30 ريال لمن هم على الفئة B إلا في حالة أنه تم تحويلهم من العيادة الخاصة بالشركة تحويل مباشر فإنه لايتم تحصيل أي مبلغ من المريض.

المهم لما سألت الأخت اللي على الكاشير - وكانت من الجنسية الإندونيسية على ما أعتقد - ليش ثلاثين ريال وأنا محول من العيادة؟

قالت لي واضح عندي على السيستم أنه لازم آخذ منك 30 ريال وبس.. مو واضح عندي أي ملاحظات ثانية.

في اللحظة هذي اتصلت على شركة بوبا الشرق الأوسط من جوالي وكلمت واحد هناك من خدمة العملاء - أحتفظ بإسمه - وشرحت له الوضع قال لي لا ماياخذون منك ولا ريال.

في الوقت هذا أنا دفعت الفلوس بالفعل.. وأخذت إيصال..
في الوقت هذا أنا دفعت الفلوس بالفعل.. وأخذت إيصال..
في الوقت هذا أنا دفعت الفلوس بالفعل.. وأخذت إيصال..

<<< التكرير هنا متعمد حتى نتابع الموضوع بتمعن أكثر...

وقت ماقال لي الرجال (ماياخذون منك فلوس) أخذت الإيصال ورحت لمدير العيادات (بليهد البليهد) وللأمانة كان رجل لايحمل من الرجولة سوى إسمها. (وأنا أتحمل كل كلمة موجودة في هذا المقال)

شرحت له الوضع قال لي أحنا مالنا شغل!!!

أشلون مالكم شغل وانتم المستشفى اللي أنا محول له هذا غير العقد اللي بين شركة بوبا وبينكم؟؟

قال لي روح للمالية ..

قلت له أوكيه..

رحت للمالية عند الأخ الباكستاني الجنسية (جاســـم)

ومديره المصري الجنسية (عاطف)

وشرحت لهم الوضع قالوا لي أن العقد اللي موجود عندهم غير مُحدّث.. يعني قديم وهم مافكروا يغيرونه لأنه مو في صالحهم.

لأن العقد القديم غير مذكور فيه الفقرة الثامنة السابقة الذكر.

المهم بعد ماشرحت للأخ عاطف الموضوع وهو يتذمر من كثر الشغل اللي عنده وبعد ماتناشبت مع الباكستاني الحقير السيد جاسم ومازالت خدمة العملاء معي على الخط طول هذه الفترة وهم يتهربون من الحديث مع الأخ الذي يمثل شركة بوبا... وبعد إقناعهم بالتحدث إليهم تحدث إليه الأخ (عاطف) المدير المالي واتضحت الأمور وتم إرسال فاكس بالموضوع إلى مستشفى الحمادي.

الأخ الباكستاني قال لي بالحرف الواحد .. مالي شغل فيك جاي بتحويل والا غير تحويل أنا ما أعرف غير الفلوس.

الأخ المصري قال لي بالحرف الواحد .. تدفع نعالجك ماتدفع اطلع برى.

إلى هنا يعتقد الجميع أن الموضوع انتهى..

بل الموضوع للتو ابتدأ.

تتساءلون كيف؟؟

أقول لكم.. بعد عودتي إلى قسم العيادات الخارجية قابلت الأخت اللي كانت على الكاشير وعطيتها الإيصال وطلبت منها الإتصال على الإدارة المالية واتصلت بهم وأوضحوا لها الأمر.

باقي إنهم يرجعون لي فلوسي ... صح؟؟

نراجع الموضوع مع بعض.. الفلوس أنا عطيتهم من أول وأخذت ايصال بكذا...

المهم ... تصدقون؟؟

سألوني أي فلوس يالطيب !!!!!!!!!!!!!

أي والله... قالوا لي بالحرف الواحد.. أنت مادفعت فلوس علشان نرجعها لك..

ياناس طيب والإيصال اللي معي وشو؟؟ وش معناته؟؟

وبعد ما ارتفعت الأصوات تدخل الشنب (بليهد البليهد) وتكلمنا في مكتبه وقلت له ترى كل الموضوع 30 ريال.. تبي ضعف ضعفها كم مرة راح أعطيك..

بس ماتكذبني وتقول اني ماعطيتكم فلوس والإيصال في جيبي!!!

قال لي أصلاً الإيصال نعطيك قبل ناخذ الفلوس..

ياشباب.. كلمة حق.. من متى كان فيه محل يعطيك الإيصال قبل ماتعطيه الفلوس؟؟

المهم قلت له بالحرف الواحد.. (واللي رفع سبع ونزل سبع اني عطيتها الفلوس)

قام دق عليها وقال لها شيكي على الصندوق ( يعني سوي جرد)

تخيلوا يطلبون من الحرامي أنه يتأكد من سرقته .!!!

ردت عليه وقالت له كل شي سليم..

قام يقول لي البنت تحلف أنها صادقة وانها ما أخذت منك فلوس.

قلت له الحين أنا أحلف بالله وبأغلظ الأيمان.. وهي وش قالت واللاة والعزى؟؟؟

قال لي الدين المعاملة <<< مدري وش دخل الموضوع هذا الحين!!

المهم اني طلعت من عنده وانا ادعي عليه وعليها.

واللي قاهرني أن بليهد يقول لي .. معك فلوس؟

حلوة هذي.. بس انت اللي معك فلوس يعني؟؟؟ جاي اشحت منك أنا؟؟

حسبي الله ونعم الوكيل..

ويعلم الله أن المشكلة هذي ليست المشكلة الوحيدة اللي تصادفني مع مستشفى الحمادي.

حيث أن مشاكلهم كثيرة والله. خاصة مع الناس اللي تدفع عن طريق شركات التأمين.

= اللي حبيت اذكره هنا.

والله ماهمتني 30 ريال والا 3000 ريال.. والا أكثر والا أقل..

بس اللي يهمني الفساد اللي في المستشفى هذا..

سيأتي يوم وسترى الظلم يا استاذ بليهد وسأقتص منك عند الله تعالى ..

وسوف يعلم الجميع على أي أساس أصبحت مدير عيادات وانت ماعندك أي سالفة ولاتدري عن أي شي حولك.