السلام عليكم ورحمة الله وبركاته

اخواني اخواتي لا اعلم من اين ابدأ....(لا ياشيخ)
فقد اثقلتني الهموم والاحزان.....( الاخ شايل اسطوانة)
ولم اعد اعلم اين انا ومن انا ......(من السوبيا الله يكفينا شرك)
لا استطيع المشي او الحراك لوحدي...( شكلك ماتسحرت زين)

ياللي بين الاقواس اهجد الله ياخذك....(طيب فك وانا افك)
اخواني اخواتي....قسم بالله ان الوضع هذا مايصير...؟؟

كم كافر يعيش بيننا وحنا معطينه اشكل؟؟ يعني لا دعوة للاسلام ولا حتى تعريف بسيط....يعني مزلبين ابو ابوهم...

ياخوان اللي مايعرف شي عن الاسلام ويبي يدعي شخص للاسلام اقل شي تكون اخلاقه حسنه...يعني ياكثر عمال النظافة الهندوس والنصارى هالايام...وخصوصا وقت القايلة وش اللي يمنع اننا نعطيهم موية باردة في عز القايلة؟؟؟؟

ليش حنا دايم نحارب الكفار حتى لو كان كافي خيره شره؟؟مين اللي اعطانا احقية اذيتهم وقتلهم...؟؟؟

ألم يقل الرسول في كل كبد رطبة اجر؟؟؟

والله العظيم اننا نجهل علاقتنا بغير المسلمين...في حي من احياء جدة سكن احد العرب النصارى بين المسلمين والله ان المسلمين اذوه في نفسه وفي دينه وفي عرضه الين لعن الاسلام والمسلمين وللاسف اني وصلت متأخر لهذا الكافر انا واهل الخير بعد معاناه دامت 3 سنوات....هل هذا من الاسلام؟؟؟؟

قبل 6 سنوات ....احد الاخوة الهنود من المسلمين جاني وهو يبكي بحرقة يقولي بابا موت وهو هندوسي وهو الان في جهنم....حسبي الله ونعم الوكيل...حاولت اهديه لكن ماقدرت...قالي انتم السبب ....هذي بلاد الاسلام ولا احد يدعو فيها للاسلام...كلكم مشغولين بالدنيا....والله العظيم ماقدرت ارد عليه ...وكان معنا ثلاثة هندوسيين وواحد نصراني....والنصراني الله يهبله قنبلة يقول وش الاسلام؟ مدري بس حسيت انه يحارش..وكان نقاشي معهم بالانجليزي....

ياعالم احمدوا ربكم انك في السعودية بلاد الاسلام...اقسم بالله ان هذا الهندي كان في يوم من الايام يحكي لي قصة اسلامه بكيت قهر

...يقول بعد ما اسلمت طردني ابوي من البيت انا وزوجتي واولادي ...واخذ عفشي رحت استنجد بأمي طردتني ...وكل ما اروح لاخواني يقولون انت منت اخونا...ومرة يقول كنت ادعو واحد للاسلام وفي اليوم الثاني انتشر الخبر قاموا فصخوا ملابسه وخلوا عليه ملابسه الداخليه وحرقوها قدامه....يقول انتقلت لقرية ثانية فيها اغلبية مسلمة يقول من شدة الامان حسيت اني في الجنة...

احنا للاسف تشتت جهودنا والمفترض اننا ندعوا للاسلام كل واحد بطريقته....

اشتغلنا بانفسنا وانا اولكم ...كل همي ان افرش ولد جارنا اللي لصق فيني الجنسية التركية...مرة يقولي يبي يسمكر سيارته ومرة يقولي يبي نفر كباب....

واصبح هو شغلي الشاغل....

مين فيكم فكر في يوم من الايام انه يهدي كافر مطوية صغيرة عن الاسلام؟
مين فكر انه يطعم كافر؟؟ او يعطيه موية في نهار رمضان؟؟

بل للاسف في احدى مخيمات افطار الصائمين اللي كنت مشرف عليها كان احد الاشخاص المجتهدين يطرد النصارى...واللي يتريق عليهم...واللي حجته ضعيفه ومايعرف كيف يجادلهم....وكل هذي تحسب ضدنا كافراد مسلمين...

نصراني نيبالي في محطة في الوجه وقفت عنده على الطاير اعبي بنزين ايام سفرياتي على تبوك وكانت في فترات متقاربة....كنت اريح عنده في المحطة...واسولف معه واشرح له عن الاسلام وكان مبسوط...وكنت في كل سفريه اجيب له كتيبات عن الاسلام والرجال كان معجب بالاسلام..يقولي لي 13 سنة في المحطة والمسجد قريب مني ولا عمره احد كلمني عن الاسلام...عطيته رقم جوالي...وفي اخر مرة سافرت لتبوك سألت عنه في المحطة قالوا لي توفى....حسيت بألم واني مسئول عنه يوم القيامة....

فيه هندي يصلح جوالات كنت ادردش معه بعد ما ضمنت انه ارتاح لي قلت له ورا ماتسلم...انت قديم في السعودية وعارف الاسلام زين...قالي ...مسلم كلو حرامي...شيل جوال مافي جيب فلوس....صراحة كانت لكمة موفقة على وجهي...ولاعرفت ارد عليه....

بعد هذي المواقف اخذت عهد على نفسي اني ما اتردد في دعوة غير المسلم للاسلام مهما كانت ديانته وجنسه ومنصبه....والحمدلله وفقني الله اضافة الى اجادتي اللغة الانجليزية....وكلمات بسيطة من اللغة الهندي...وكم كلمة لاتينية....واعرف كيف اكسر الحواجز والخوف والرعب من قلوبهم...

وان شاء الله في المراريت القادمة ابكتب لكم عن تجربتي في الدعوة الى الله...

والسلام عليكم ورحمة الله وبركاته

كان معكم من الاعداد والتقديم قاصر الشر..ومن الهندسة الصوتية ابو فجر....

اتمنى لكم صوما شهيا

فمان الله

لو الكلام جاي من واحد ثاني كان صدقته بس من قاصر الشر سبحان الله وبعدين الكافر يعني اللملحد ( مداعبه )

فعلاً ماقاله أخي قاصر الشر نحن مقصرين كثيرا في الهندوس والبوذين والملحدين ترا ذولا سهل عليك أنك تقنعهم بالاسلام وعلى ما قال أخي قاصر الشر كتيب صغير بريال خذ كل يوم ريال وعطه ترا الله الهادي يمكن مقدر لهذا الشخص أنه يدخل الجنه .

تشكرا تشكرا قاصر الشر على الموضوع ابي اقوللك سالفه أنا كان عندي خدامه وأخوك بالله متحمس يبها تسلم راحت شريت لها قرآن ( أثري القران لا يمسه الأ المطهرون يعني يقولي الشيخ مايجوز تعطيها قرآن لين تسلم قمت سحبت القرىن منها قالت أنا ابي أنجيل قلت أنجيل وربي بغيت اصكها على وجهها بس مسكت اعصابي وقلت في بلادي مافيه أنجيل لازم أنتي أمريكيه من شان نجيب لكي أنجيل أما سيرلانكيه تاميليه مافيه )

هم يتأثرون بالتصرفات أكثر من غيره يعني لازم يكون الواحد قدوة لكي يؤثر فيهم بالمعاملة والأخلاق الحسنة
موضوعك كويس ولو كان فيه بعض الأخطاء

جزاك الله خير .,

اهم شي المعاملة الطيبة . من الشباب .. والهداية بيد الله ..
والله إن الدعوة الاولي الحين صار فيها اللى منتسبين للاسلام .. وهم من جنبها ..
إسلام بالهوية والاسم فقط ..

قاصر اشكرك بعنف حتى يغمى عليك ..
والله يكتب لك الاجر ..

عظم الله اجرك صديق
هذا دنيا نفر روح نفر يجي

ناظر توقيع الاخ اللي قبلك

^^
ماهي عاجبتك النواظير