السلام عليكم ورحمة الله وبركاته
اليوم كان يوم منتظر بالنسبة لي .. بعد قبولي المبدئي تم تحديد يوم السبت اللي هو اليوم كموعد لمقابلتي الشخصية .. كنت مررره فرحاانه لاني انقبلت مبدئي وكنت متفائلة بالنهائي كمان
ومن فرحتي والله النوم ماجاني ورحت مواصله ..
اول صدمة لما رحت كانت بالمباني
ما توقعت ابدا ان مباني المستشفى قدييييمة جدا وغير مؤهلة للدراسة لانها كانت على شكل عماير وشقق وغرف يعني مدري كيف جايه مو مبنى مستشفى
كثير اكئبت لما شفت المباني وانها قديمة جدا وغير مؤهلة وتجيب الهم .. والله مستشفى الشميسي بالنسبة للعسكري أفضل .
بعدها طنشت شوي نظرتي للمباني وقلت اذا عليها تهوون..
لما بديت اسأل الموظفين من مدراء وأشخاص لهم مناصب بالمستشفى انصدمت صدمتي الثانية ..
كانوا يتجردون من شيء اسمه لطف واحترام وذوق
الواحد يتكلم معك كأنك تطر عند بابه والا طالبه الجنه
كلها سؤالين ماراح تأثر وتاخذ من وقتهم شيء وبخلانين علينا وما ودهم
معاملة سيئة .. واذا هذا اولها ينعاف تاليها ..
لدرجة ان رجال الامن والله كانوا ارقى واكثر تعاون منهم
وحتى الامن النساء وبعض الممرضات السعوديات كانوا قمة بالاخلاق والرقي
بس المدراء واللي لهم مركز بالمستشفى حسافه عليهم مراكزهم ومناصبهم لانها ما تسوى شيء واخلاقهم كذا
..
تكلمت مع مدير شؤون الطلاب واستفسرت عن الدراسة وكذا وقال اجباري اتوظف مع المستشفى بعد التخرج 4 سنوات لاني بكون موقعه عقد معهم وكمان بعد السنة التحضيرية مو كل التخصصات تفتح يعني حسب احتياج المستشفى واحيان تفتح للاولاد بس واحيان بس للبنات
وغصب اختار شيء من اللي هم محددينه لان ماعندي خيار ثاني
كمان الشهادة دبلوم والتجسير ابدا مو مضمون .. يعني تخيلوا عمري كله على مسمى (فني)
وفيها اكمل وفيها لا ولو بكمل خارج المملكه ..< تعقيد
وسألت ممرضة هناك متخرجة من مركز الدراسات الصحية بالمستشفى نفسه وقالت بالبداية تشوفين كل شيء حلو وتكونين مرتاحة لانهم يعطونك اللي تبين ويخلون بعينك كل شيء حلو بس بعدين ينقلب كل شيء عليك .. وللمعلومية مستشفى القوات المسلحة يوظفونك ويعطونك امتيازات <امحق امتيازات
لصالح المستشفى فقط .. والطالب نفسه ما يستفيد اي شي
وفوق هذا كله مماطلة بالرواتب وكرف على اصووول
بعد صدمتي من سوء التعامل وهذا كله ما تحملت فكرة اني بيوم من الايام بكون وحده من اسرة هالمستشفى
والله طلعت ودمعتي على خدي لأني ما توقعت هذا كله بيصير وكنت اشوف املي بالعسكري
لكن قدر الله وماشاء فعل
والحمدلله انا الان طالبة بجامعة الاميرة نورة بنت عبدالرحمن .. بكالوريوس شبكات وانظمة اتصالات ..
بكمل دراستي بجامعتي ومستقبلي اضمن من العسكري يكفي اني اتخرج بمسمى مهندسة شبكات وبمركز حلو وتوظيف بمكان كويس
مو مسمى (فني) وتوظيف بمكان الله بالخير وفوق هذا كله انذل وكلن يملطش فيني ويعاملني حسب كيفه
هذا الكلام كله بقلبي مكبووت ومضايقني حبيت اكتبه هنا تشاركوني فيه
ادري هذرتي واجده بس لحد يلومني
الله يحقق للجميع ما يتمنون ..
ودي

الشكوى لله
الله يوفقك باللي تبينه

الله يرزقك بالوظيفة السنعه , وانا ما ادري ليش التكبر الي يظهر من المدراء والي مدري وش يحسون فيه !

من تواضع لله رفعه , والواحد لا كلمتيه كأنك تسبينه

الاشكال هذي مو كفو تمسك مناصب , هذولي يازين من سرحهم بالغنم وبعز الشموس


وعساها خيره , وخيرها بغيرها


بالتوفيق لك اختي

موفقه يا رب

شدي حيلك وحطي هدفك الماجستير والدكتوراه تنفعين نفسك وبنات بلدك

شـكرا لك وبارك الله فيك... لك مني أجمل تحية
الله يوفقك انشالله ...

موفق بإذن الله ... لك مني أجمل تحية .

الله يوفق الجميييع يارب

صح ياختي المبنى غير مؤهل للدراسة (شقق )
ومعاملت المسؤلين ززززززفت والسنة الاولى مافية مكأفاة اضافة الى صعوبة الاختبارات
بس وش نسوى حنا ندرس طمعانين بالوظيفة والله يصبرنا