السلام عليكم ورحمه الله وبركاته..

اخواني انا متابع لمنتداكم الرائع لا بل الاكثر من الرائع بكل صراحه من فتره طويله..
شي طيب ان الواحد يشوف اخوانه وعيال بلده قلوبهم على بعض.

حبايبي
محدثكم موظف في شركه بتروليه كبرى ومتزوج جديد والحمدلله.
وحبيت اني ادخل مجال التجاره لسببين الاول رغم امكانيات الشركه اللي انا فيها الا راتبي 4300 شهريا والحمدلله على كل حال.

الثاني اني حاب ادخل مجال التجاره وعندي هوايه مكانيكا سيارات وخليفه حلوه عن مكائن السيارات واخص بالذكر شركه هوندا بحكم ان عندي سيارتين منها..وحده قديمه للتجارب ووحده جديده للحياه اليوميه.
لاتستغربون اذا قلتلكم اني في ايام العزوبيه كانت تمشياتي في تشاليح جده والورش..خخخ
ولاتستغربون اذا قلتلكم انو حتى في شهر العسل مريت على تشاليح وقطع غيار..

طبعا في بالي مشروعين واحد يحتاج له راس مال عالي
اللي هو ورشه سيارات وابشركم مقدم على صندوق المئويه ومركز رياده. وانتظر الرد.

والثاني يحتاج فلوس ووقت اللي هو محل لتوفير مكائن وقطع غيار سيارات.



ابي استشيركم ياخوان اي المشروعين افضل وكبدايه ..

صندوق المئويه ومركز رياده من شروطهم اني لازم اتفرغ للمشروع يعني اترك الوظيفه اللي انا عليها وهذا شي مستبعد.
لكن ماعتقد اني راح القى اي تمويل بدون شروط تعجيزيه.

وفي نفس الوقت سياسه تسويقيه ماعندي..


حاولت اكثر من مره ..لكن بدون فايده..


نصائحكم يا اخوان في المشروعين تهمني جدا جدا جدا..

والسلام عليكم ورحمه الله وبركاته.

[align=center]اسأل الله لك التوفيق والنجاح ..
ويفيدونكـ الاخوة ان شاء الله ..[/align]

السلام عليكم ورحمة الله وبركاته
أهل بك أخوي متابع
بالنسبة للوظيفة لا يجبرونك بتركها إلا عند إستلام القرض وتستلم 3000 راتب شهري كدعم من الموارد البشرية لمدة سنتين بشرط تعمل في الورشة أو محل قطع الغيار

المهم أنت تكون ملم بجميع أجزاء المشروع
على سبيل المثال محل قطع الغيار يجب أنت تعرف هامش الربح في القطع وفروق الأسعار بين الموزعين إلخ

تمنياتي لك بالتوفيق

من رايي افتح ورشه وجنبه دكان قطع غيار بسيط

تكسب هنا وهنا

والله ياخوك الله يعينك يبقى هاجس الوظيفة في العقل. و ان سالك اي احد من العامة الناس الذين ما جربو التجارة راح يقلك انت مجنون تسيب الوظيفة. و العكس ان رحت لأهل التجارة يقولولك راح تدخل ٣ أضعاف وراتبك.
لكن من وجهتي نظري ماحد يحكم الا انت. هل انت متمكن من جميع الخرابات الميكانيكية؟؟
هل تعرف تتعامل مع الزبائن؟؟؟
هل تعرف تسعيرت السوق في التصليح؟
هل حسبت التكلفة الابتدائية للمشروع؟

أنا اقترح عليك اقتراح. وهو انك تدور لك ورشة تشتغل فيها بعد العصر مع الوظيفة شهرين او ٣ شهور. بكذا انت اتعلمت و شفت السوق و اتعاملت مع الزبائن واذا شفت فيها خير اتوكل ع الله واهتم بمشروعك و طوره وسيب الوظيفة الي ٤٠٠٠ والله الموفق

الراي السديد اللي قاله الأخ محمد عبدالإله

اشتغل ألأن في ورشة حتى يجيك التمويل ووقتها ياتواصل ياتعتذر وتكون في وضع آمن

اخوي عبدالرحمن السعد:
اللهم امين يارب
و اسال الله لك التوفيق في حياتك شاكر مرورك الكريم.

اخوي العضو الذهبي:

هنا مربط الفرس ..هذي بصراحه مغامره وخصوصا اذا كان عليك ديون.

اخوي فضفضض:

فكره حلوه وليش لا لكن وقتها بعد نايصير المشروع واقف زي مايقولو على قدم وساق...

اخوي محمدعبدالاله:

الله يعطيك العافيه كلامك صحيح وكمان العائله مافيها تجار..فزي ماقلت اي فكره ممكن يسوولك من الحبه قبه وظيفه وتامين طبي وشغله طويله عريضه..واذا رحت للتجار او اللي لهم تاريخ في التجاره بيقولولك خش في التجاره تسع اعشار الرزق في التجاره وانت مضيع وقت على الفاضي وتطلع اضعاف راتبك في التجاره...

والحمد لله متمكن من الخرابات الخاصه بهوندا فقط بنسبه 40 % لاني ماشي على ملفات التصليح حصلت عليها عن طريق النت وشغال في مكينه قديمه عندي اهندس واطبق..
وزي ماقلت لفيت الورش ومحلات قطع الغيار والتشاليح... بكل صدق لاتعليق الاسعار تزيد وتزيد..
القطعه اللي كنت اخذها بمبلغ معين زادت تقريبا 30% خلال سنه وحده فقط.
المكينه اللي كان سعرها مايتعدى 1600 ريال الان سعرها 3000 ريال..ويمكن اكثر
هذا غير اذا كانت مكينه رياضيه شووف كم سعرها يوصل عاد ...ممكن تصك 13 الف مع كامل اغراضها اذا انها من 2005 وفوق ..وممكن تكون في حدود 7000 الى 9000 اذا انها من الموديلات القديمه

واقتراحك على العين والراس والشغل دائما مو عيب..لكن الدوام ورديات وفي منطقه بعيده عن جده ومافيها محلات صناعيه كثيره..

الشي الوحيد اللي سويته اني اتفقت مع مكانيكي يجيني للبيت بحكم قربه من سكني وابداء اتعلم معاه خطوه خطوه الين اتمكن صح من التصليح وبعدها ان شاء الله لها الف حل وحل..

اخوي معين
الله يعطيك العافيه صحيح كلامك ..
الخوف الوحيد هو ان اترك الوظيفه ويخسر المشروع..واقعد بها صح..
.................................................. ..........................................

طيب ياشباب معليش.
فكرت اني اجيب انصاص سيارات من دبي..
وابداء اعرضها على التجار او اني ابيعها..

لكن مين له خبره في الشحن وطريقه النقل والشغلات هذي..

عارف راح اتعبكم معي شويتين لكن الله يعينكم علي..

اخوي لو ودك انك تتجار في تشليح السيارات أنا ممكن أني اكون معاك ان شا الله. أنا اشوفلك هي من اليابان ارخص من الامارات. بس اذا امكن انك تسال عن كيفيت استيراد السيارات المقصوصه. أنا عندي سجل تجاري خاص بقطع السيارات المستعملة و استوردة مرة واحدة و الحمد لله مشيت ف ان كان لك رغبة. لأيهينك اسأل و عطني خبر ع الخاص بحكم أني خارج السعودية الان و شكرًا