المقابلات الشخصية - تجمع دفعة 11052 لنقاش المقابلة الشخصية

الهم خالد · #**281** (**permalink**) 16-09-2011, 01:23 AM

السلام عليكم

اخواني لا تشييلون هم المقابلة ابدا صدقوني تعدي سهالات وما تختلف سواء اجريتها في جدة او الرياض او الشرقية السستم واحد وطريقة الاسئلة متشابهة جدا اهم شي حاول انك تجيهم بشخصية معلم اجيال وابتعدو عن الموضات في حلاقة الذقن واختارو تفصيل منمق ومعروف للثوب اللي بتروح به وبس غير كدا لا تشيل هم

اتمنى لكم التوفيق

المحب الكبير · #**282** (**permalink**) 16-09-2011, 07:11 AM

يا شباب فيه واحد من الزملاء شعره طويل وجلسوا يطقطقون عليه على الشعر لين استفزوه

قصروا شعوركم او شوفوا لكم حل

نصراوي هاوي · #**283** (**permalink**) 16-09-2011, 07:25 AM

اقتباس:

المشاركة الأصلية كتبت بواسطة المحب الكبير

يا شباب فيه واحد من الزملاء شعره طويل وجلسوا يطقطقون عليه على الشعر لين استفزوه

قصروا شعوركم او شوفوا لكم حل

الشعر الطويل يهون

بس ابو كدش وش السوات معه

لو اني محل الي يقابلون واشوفة كدش اقول تعرف تقضب الباب حلق وخلك رجال

مقهور من زمان · #**284** (**permalink**) 16-09-2011, 12:54 PM

شباب انا من دفعة 434 ومقابلتي السبت بس امس ارسلوا لي رابط تحديد الرغبات وتم تحديد الرغبات وبعد ماخلصت قلي الموقع توجه لاقرب ادارة تربية وتعليم للتاكيد والطباعة .

علما اني بكالوريوس احياء غير تربوي مجتاز القياس وش السالفه؟؟

يعني يعينوني اداري؟؟

الراااائع · #**285** (**permalink**) 16-09-2011, 02:58 PM

اقتباس:

المشاركة الأصلية كتبت بواسطة مقهور من زمان

شباب انا من دفعة 434 ومقابلتي السبت بس امس ارسلوا لي رابط تحديد الرغبات وتم تحديد الرغبات وبعد ماخلصت قلي الموقع توجه لاقرب ادارة تربية وتعليم للتاكيد والطباعة .

علما اني بكالوريوس احياء غير تربوي مجتاز القياس وش السالفه؟؟

يعني يعينوني اداري؟؟

والله يالغالي ما احد يدري وش السالفه
الوضع ملخبط بقوووووووه
بس تكفى اذا رحت الوزارة اعطنا الخبر في اسرع وقت وش قالوا لك
حنا في انتظارك

الراااائع · #**286** (**permalink**) 16-09-2011, 03:18 PM

السلام عليكم ورحمة الله وبركاته
أسعد الله مساكم >> اللي عنده مساء

... وصباح الورد والجوري اللي عنده صباح

احم احم

أحداث مقابلتي في الرياض الأربعاء 16/10/1432 هـ
صحيت العصر وصليت ورجعت للبيت وتغديت >>لا احد يسأل شو الغداء

ودخلت منتدانا الغالي وشف الاوضاع واستودعتكم الله وطلعت لبسة الثوب

والغتره أبيض بابيض

والساعه

والقلم بالجيب

وامسك العطر وانواع البخبخه لما حسيت ملابسي صارت متبلله

خخخخ >> واشوف المرايه يالبى خشتي

حسيت اني رايح زواجي

مو مقابله

وانزل للموتر واشغل ولما حركت قلت خلني ارتب اوراقي جاني الشيطان

قال لا ما يحتاج خليها عند موقع المقابلات باقي معك وقت طويل المهم في صراعات مع النفس والشيطان

اتخذت قرار اني اشيك عليها سريع وبعدين امشي

اخذت الورقه اللي طبعتها من الموقع وقريت الاوراق المطلوبه فجأه ادور السجل الاكاديمي مو موجود

وادور ما حصلته

اوووه تذكرت انه في البيت قلت الحمد لله اني شفته وانا باقي هنا لو قد رحت عند مركز المقابلات مستحيل اقدر ارجع اخذه

ما يمديني لأني في شرق شمال الرياض والمقابلات في الجنوب

>> وما يحتاج اقول لكم عن زحمة الدايري الشرقي والجنوبي

المهم رجعت واخذته ورتبت اوراقي وتأكدت من كل شيء وحركت ومع الدايري الشرقي وتحصل الزحمه اللي يحبها قلبك

واذن المغرب ووقفت صليت وكملت مشواري طبعا مقابلتي الساعه 8 بس الحمد لله انا اعرف الحي اللي فيه المقابلات وحافظه مثل اسمي لان خويي ساكن هناك واعرف الشارع حته حته محل محل دار دار خخخخخخخ

ولما قربت على الموقع مريت ع احلى محل عصاير واخذت عصير برتقال مع ليمون

وهديت الاعصاب وروقت المهم وصلت الساعه 7 وحصلت قدامي 200 شخص يمكن المهم وادخل صالة الاستقبال قالوا خلك صاف هنا لما يجي دورك جا دوري ورحت للموظف قال اعطني صورة الوثيقه والبطاقه والسجل الاكاديمي وبطاقة الموعد قلت تفضل يالغالي قال تسلم واعطاني ورقة قال إمسك وكتب إسمك ووقع قلت تامر امر دبس الاوراق قال استريح لين تسمع إسمك وجلس تقريباً ربع ساعه كانت لجنتي رقم ثلاثه وكان رقمي في الانتظار 8 ولما قالوا رقم 7 يتفضل إلا والعشاء يأذن قالوا خلاص يا اخوان بعد الصلاة قلت تكفون واحد نفر بس شيل قال لا خلها بعد الصلاه قلت ابشر طال عمر يمكن خيره والله طلعنا صلينا العشاء ورجعا وجلست مكاني في الانتظار إلا واسمعه يقول نايف الغامدي وقلبي دق

بسرعه رهبه غريبه ههههههههههههههه

قلت يا لبيه
قال تعال قلت تعال إنت ههههههههههههههههههههههههه امززح دعابه
واتجة للجنة 3 واحصل إثنين جالسين ع طاوله وكانوا يسجلون درجة اللي قبلي
أنا :السلام عليكم
هم: وعليكم السلام وصافحتهم واحد واحد
انا: يسعد مساكم
هم : ومسائك اسعد
أنا : كل عام وانتم بخير
هم :وانت طيب وكلهم تبسمو

وعطيتهم إبتسامه حلوووه

قال لي واحد منهم وش تخصصك قلت تربية اسلاميه قال اي جامعة قلت الامام متى تخرجت قلت العام الماضي قال اكيد درست في مدرسة اهليه قلت نعم سألني وش اسمها ووين هي وقلت له قال كيف الطلاب عندكم قلت والله يختلفون فيهم كذا وكذا وفيهم النطيحه والمتردية ومن هنا بدا مشواري الجديد

خخخخخخخخ
قال والله ابو عبد العزيز (يقصد خويييه) راح يمسك عليك هالكلمه

قال ابو عبدالعزيز ليش وش يقول قاله يقول الطلاب فيهم النطيحه والمترديه

قال لي وش هالكلام ليش تقول لأبناء المسلمين كذا والله انت ما ترضاها ع نفسك

قلت يا اخي الغالي اكيد انا ما اقصد اشبههم بالبهايم بس انا ضربت لك مثل يعني قلت لك كلمتين توصل لك المعلومه بدون ما اتفلسف عليك واكيد انت عرف وش اقصد ووصلت لك المعلومه بأسهل طريقه قال هذا الكلام ما يصلح منك كمعلم قدوه

خخخخخخ تخيل انك قلتها امام الطلاب قلت لا مستحيل ما راح اقولها انا اتعامل مع الطلاب تعامل اخوي ومن المستحيل اقول لهم كذا وما اعتقد اي مدرس راح يقولها قال لا فيه وقد حصلت من مدرس كتبها في ورقه واسلها لولي امر ولي الامر اشتكى ووصلت عندنا الوزاره

قلت هذا ما يصلح مدرس بما ان هذا كلامه واخلاقه المدرس لازم يكون ذو اخلاق عشان الطلاب يقتدون به ونا ما قلت لك هنا الا من باب استخدام العباره كمثال قال لا ما يصلح كذا

قلت في نفسي لازم اقفل الموضوع واسوي نفسي اتقبل اراء الاخرين في النقاشات قلت له انا اعتذر عن الكلمة بس هي جت على بالي وقلتها كمثال وانا اسف وشكرك ع تنبيهك لي واعتبرها مكسب لي اني تعلمت منك وممكن يكون احلى ما في المقابه اني استفدت وتعلمت منك واتشرف بهذا فما نحن الا تلاميذ لكم

قال لا في شيء احلى من هذا

قلت وش هو !!!!!؟؟

قال اني شفتك وسولفت معك واعجبني اسلوبك واخلاقك

وانا ضاعت علومي ووجهي صار احمر

واخضر وبرتقالي خخخخ ومدري وش اقوله

لخبطت ههههههه

المهم قال لي وش رايك في التدريس قلت هذا حلمي وهدفي وامنيتي

قال ليش قلت تصدق من يوم وانا في الابتدائي وانا اشوف المدريسن كيف يعلمون الطلاب ويغرسون فيهم القيم والاخلاق كنت اتمنى متى اكون مكان هذا المعلم عشان اعلم وافيد الطلاب وووو

من هالفلسفه وانا مادرست الجامعه وتعبت الا هدفي التعليم فهي اشرف مهنه هي مهنة الانبياء والرسل المهم خق معي

,, كانت جلستي قدامهم حاط اكواع يدي على الطواله وفي اثناء كلامي قاطعنيقال ما شاء الله لابس الساعه في اليمين

ومطلعها للناس عشان يشوفونها

ضحكت

وقلت يحق لي شاريها بـ 350 متسلفها من عند امي

قلت لها في اول راتب برجعاها لك

هههههههههههههههههه فطس الرجال من الضحك

وخويه ما قدر يمسك نفسه صار يغطي وجهه

قال طيب ليش لابسها في اليمين عندك مشكله في اليسار حسسيه او شيء قلت لا بس انا استغرب هذا السؤال دايم يتكرر علي وبعض الناس ينتقد انتقاد يقول ليش تلبس الساعه في اليمين

انا اللي اعرف ان النبي يحب التيامن في كل شيء حتى في لبس النعال وانتم بالكرام وانا اقتدي بالرسول والبس الساعه في اليمين

وحتى وانت ما ادري ليش سألت يعني هذا شيء خطأ

قال لا بس العادة تكون في اليسار حتى في الدعايات تشوفهم لابسينها في اليسار

قلت ليش حنا مو بشر وعندنا عقول ونفكر ليش نحب التقليد بعدين حنا عندنا الرسول وهو قدوتنا انا البسها في اليمين اقتداء بالرسول
قال تصدق توي انتبه لهذا الموضوع منك

والله كلامك صحيح

واستفدت منك واشكر من كل قلب

قال لخويه باقي تبيه انا انتهيت منه ومجتاز عندي بتميز

قال خويه لا ابد سلامته وربي يوفقه ويتعين وريجع فلوس امه

وانواااااااااع الضحك

ههههههههههه واعطوني ورقة مشهد حضور مقابله وقال الله يوفقك يا رب بحياتك وكان ودنا نجلس أكثر النقاش معك ممتع

لكن الوقت ما يسمح
انا : تشرفت بالجلوس معك والله يبيض خيرك

ويطول وجهك

ويكثر عمرك

ويرزقك المال الصالح

ويرزقك الذرية من حيث لا يحتسب

من هذا الكلام

اخذت المشهد واتصلت ع خويي اللي ساكن في نفس الحي قالي ها بشر وش سويت قلت سو القهوه والشاهي وجايك اعطيك السالف قال حياك ورحت له وسواليف وفله وبعدين طلعنا مع الشباب عند المعلق وسمره وفله ووناسه الى الساعه 3 تقريبا

هذي اهم احداث قصتي بالامس
والمعذره طولت عليكم بالهذره

a7asess · #**287** (**permalink**) 16-09-2011, 03:36 PM

والله ان قصتك تموت ضحك وفالك التعيين ...

المنوره · #**288** (**permalink**) 16-09-2011, 03:41 PM

هههههههههه بجد ممتع
بالتوفيق ان شاءالله

قسّام · #**289** (**permalink**) 16-09-2011, 05:28 PM

أسئلة مقابلتي كانت كالآتي:

س: عرّف بنفسك ؟

س: اذا كان في الفصل الذي تدرّسه طالبين فقط . هل هذا يكون ذلك نقطة ايجابية ام سلبية في بداية مسيرتك التعليمية ؟

س: لنفرض بأن وظيفتك كانت مدير ، هل تفضل ذلك ؟ وهل يكون مع رغبتك أو ضدها ؟

س: هل تؤيد اكتساب الخبرات بشكل تدريجي ام بشكل سريع ؟

س : ما آخر كتاب قرأته ؟ اسم المؤلف ؟ عن ماذا يتحدث الكتاب ؟

والمقابلة على بعضها ما اخذت اكثر من اربع دقائق ... علما بأن المقابلة كانت بالمدينة المنورة.
وما سألوني عن التخصص نهائيا .. علما بأن تخصصي لغة عربية وغير تربوي ..

وتمنياتي للجميع بالتوفيق .