السلام عليكم ورحمة الله وبركاته




تكلمنا كثيراً عن مكتب العمل ولمنا الدولة على تقصيرها في توظيف الشباب … وزدنا وعدنا في آثار البطاله على المجتمع … ولكن لم نجد مجيب .. بل وجدنا ” اذن من طين واذن من عجين “.

خلونا نغسل ايدينا بماء وصابون من تعديل الوضع من ناحية الجهات المسؤؤله ونتكلم عن نفسنا حنا يالشباب…

الكل يعرف حالة البلد الأقتصاديه من ناحية أرتفاع الأسعار وغلى المعيشه … مما يصعب على الشاب الذي في مقتبل عمره أن يبداء حلمه في تكوين أسره يلمها منزل أحلامه … فنجد البعض قد ألغى من باله كل حلم .. وأستمر في إنتظار التعديل والخير اللي بيجي على يد المسؤلين… ( إنتظري يازرافه لين يجيك الربيع)

بروي لكم قصة ” بنقالي ” عمره 27 سنه … جاء واشتغل في مغسلة ملابس كذا سنه وبعد ماعرف الشغله وعرف مداخلها ومخارجها … أستقل لوحده في مغسله ويعطي كفيله مبلغ مقطوع … كان دخله الشهري الصافي 6000 ريال ..
يعني أفضل من دخل أغلب الشباب السعودي اللي مضيعين نفسهم في وظائف دخلها لايتعدى 1500 ريال …

والقصه الثانيه قصة ” مصري ” شفته في “خطاط” وكانت شغلته (بتاع كله) يعني يسوي أي شئ … ياخذ مقاسات لوحات المحل يوصل أغراض وأحياناً محاسب ….كنا في طريقنا لتركيب لوحة أفضل مغسله في العالم ” مغسلة فقاقيع ” … فسألته :- إنت شغلتك خطاط ولا ايش بالظبط؟ قالي لا .. أنا أول ماجيب السعوديه جيت بفيزا حلاق .. وبعد ماشفت البلد والوضع فيه قلت مايصير أضيع وقتي من الصباح الى الليل وأنا أحلق للعالم مقابل راتب ” أي كلام”.. فرحت لجماعة بلدينا( يعني من جماعته) وظبطت معاهم اني أرجع مصر وبعدين أرجع على كفالة كفيلهم السعودي بفيزا خطاط أو محاسب … قلت له طيب وش اللي خلاك تسوي كذا … قالي الجمله هذي ..



“ياعمي الفلوس في السعوديه مرميه في الشارع وعاوزه من يلمها “.. واللي فهمته من الرجال انه مطلع خيرررر …

القصه الثالثه لسعودي من أهل الخرخير أو ديره جنبها … اللي يقال لهم ” المهريين ” رجال بدى حياته شغال في سوق الخضره … وبعدها مثله مثل غيره استقل لوحده وفتح له محل …. وبعد فتره ليست بالقصيره … يمتلك الآن في حي الدوحه خمس محلات خضره ومحل للمكسرات .. وفي نفس الوقت تاجر أغنام …. الرجال شغال في محله ومعاه ناس من جماعته … وأتوقع انهم سوف يحذون حذوه مثله مستقبلاً … والرجل مرتاح ومعه لاندكروزر 2007 من حر ماله … لا أبوه طلعه له ولا قسطه على تويوتا …

والقصص كثيره وأغلبكم يعرف حالات مشابهه…

اللي حبيت أوصله يا أخوان إن الديره فيها خير في كل النواحي … الى متى وحنا نتعفف عن الشغل الحلال … الى متى الشخص يرضى انه يجي نص الشهر مافي جيبه ريال , لكنه يتعفف يشتغل شغله في تعب ويمكن المجتمع يرفضها لكن فيها خير … وصدقوني المجتمع بينقد عليك لما تشتغل بأي شغله ماتعود السعودي يسويها … لكن لما تكثر فلوسك بتصير العزيز الغالي وبيضربون فيك المثل … رساله إلى كل عاطل تآخذ فلوس من أبوك وانت مقهور انك رجال وش كبرك وتاخذ مصروفك من ابوك … أقولك .. شمر عن يمينك والميدان ياحميدان ..

والمسؤلين خلوهم ربهم يحاسبهم ..



الكاتب
ابراهيم القحطاني

صحيح صح لسانك الرزق موجود بس يبقى من يسعى له مهما الواحد حصل في الشهادات راتب اخر الشهر المعيشي مو مثل المدخول اليومي المهني وانا شخصيا خير مثال جربت المعاش الشهري وجربت الرزق اليومي والله ان اليومي يكفي ويزيد اما المعاش حدك بدك يادوب يغطي احتياجاتي شكرا لموضوعك الرائع

انتم شباب تقدروووون تطلعون وتدورن الرزق لكن احنا ياا لنساء صعبه علينا نطلعومالنا الا ننتظر الخدعه المدنيه وسوالفها

انا كلمتي مع فشفوشه احنا البنات اشلون نشتغل مثل شغلكم يالرجال

ساعدونا بافكار

ايتني ولد
كان فحطت المملكة كلها وارتحت وربي

شـكرا لك وبارك الله فيك... لك مني أجمل تحية .

ايوه ، عليك نور


يعني لاتحلم انك تصير مدير شركه او لك منصب لا لا خلك على محل خضره او خطاط على قولتك اوما الشركات والمناصب للاجانب وعيال الهاي

الله يرزقنا الوظيفه العاجلة اميييييييييييييين

تسسلم يمينك .. الصرراحه ابدعت ..
ولو انا ولد والله لا اشتغل اي شي عالاقل اصرف على نفسي ..مو اخذ من ابوي وانا رجال !
وتذكروا >>> وعن عمره فيما افناه وعن شبابه فيما ابلاه



ودي