الأخوة أعضاء دفعة 11052 (الدفعة المنكوبة)

نظراً لما يشوب هذه الدفعة من تعتيم وتغيب تام لما سيتخذ في الأيام القادمة.. فقد قررت يوم أمس أن أتهور وأن أبيعها بريال، (وهي خاربة خاربة)..

توجهت بحفظ الله وسلامته إلى وزارة الخدمة المدنية، وعندما دخلت تجاهل حارس الامن الموجود عند الباب ونزعت نظارتي الشمسية وكأنني موظف في الوزارة لي خمسطعشر سنة، المهم طلعت للدور الثاني وسألت أحد الموظفين: ودي استفسر عن دفعة 11052 المنكوبة وش صار عليهم؟.
فتبسم ضاحكاً من قولي وقال لي رح للمسرح رقم واحد هناك يجاوبون على إستفسارات هذي الأشكال.
ثم سكت هنيهة وقال: ولا أقول أطلع لقسم التوظيف الدور الثالث واسألهم..
وبالفعل اتجهت أنا والصديق أبو مرزوق للدور الثالث وسألنا ولكن دون إجابة..
ثم نزلت للأخ القابع في مسرح رقم 1، جلست انتظر لين جاني الدور فذهبت إليه وسألته.. قال لي ما أدري.. قلت يعني وش لون ما تدري.. ما عندنا أي خبر، قال لي فيه مفاضلة ولازم تصبرون اللي يطلع اسمه يباشر ولا ما يطلع اسمه ينتظر الأعوام القادمة المهم قلت له أشوف عيونك ناظرني كذا.. يوم شفت عيونه عرفت إنه نصاب وعارف السالفة كلها بس مانعينه من التصريح بأي كلام..
المهم قلت ما عني وعن الخبر الأكيد..
طلعت للدور الثالث قسم التوظيف ولقيت مكتب بدون ذكر اسماء مكتب كبير فيه رجال كبير.. واضح إنه مسعور كبير..
دخلت قلت له شف أنا جايك وعندي استفسار، وأبي لي رجال يعطيني الخبر الأكيد ذبحتني اللموزينات رايح جاي، وأبيك تسلفني حق اللومزين عشان أرجع.. فطس الرجال من الضحك وقال لي إقعد:
جلست قال وش استفسارك وابشر بالجواب الشافي..
قلت حنا الآن 11052 مواطن طلعتوا اسماءهم على أساس انهم مرشحين للوظائف التعليمية، وأنا والرفيق اللي معي (حلوة الرفيق أخس يالحزب الاشتراكي) مجتازين القياس ومسوين مقابلة شخصية..
قال لي شف ياعزيزي حتى تكون في الصورة.. 11052 كلهم متوظفين لكن راح نستخرج منهم 7000 للوظائف التعليمية والباقيين إداريين حسب المفاضلة، ثم قال كلمة لو مزجت بماء البحر لمزجته.. قال كل هالزحمة عشان الوظائف التعليمية، وعندنا مشكلة مع خريجي اللغة العربية اللي عددهم تقريباً 6000 موجودين في هذي الدفعة يعني 11052، وحنا في مفاوضات مع وزارة التربية التعليم عشان يزيدون عدد الوظائف التعليمية للغة العربية، عشان نخفف هذا التكدس..، ثم قال لي حنا ما وصلنا إلى العدد المطلوب لحد الآن..

ما يستفاد من القصة:
1- ما فيه وضوح تام بشأن عدد المطلوبين لبعض التخصصات.
2- الجميع موظفين ولن يستبعد أحد.
3- ستتم المفاضلة بين الجميع بعد ان يستكمل البقية المقابلة الشخصية.

بالنسبة للي شايلين هم التعليمي والإداري ترها ما تفرق كثير والراتب متقارب..

الله يوفق الجميع

الله يبشرك بالخير
والله ماقصرت

الله يعطيك العافية
والله معندهم سالفة الملك يقول تعليمية وهم يحرفون الكلم عن مواضعه=ويقولون سمعنا وعصيا
خلنا من اللغة والحاسب والشريعة و000
يااخي يعينون اي تخصص بس تعليمية يعني على مستويات
الشباب مجتازين القياس ويعينوهم على ادارية
طيب ليش التعب وقياس وخياس وفي الاخير ادارية

((هذه 13000 وعفسو امها كيف 39000 الله يعين النساء جايهم الدور))

يا عزيزي خلنا نكون واضحين الأمر الملكي ما نص على نوع الوظائف وهنا المشكلة..

الأمر الملكي يقول توفير 52000 وظيفة في وزارة التربية والتعليم فقط، بدون ما يحدد إذا كانت تعليمية أو غير تعليمية يعني بإمكانهم يحطونها كلها إدارية..

ثم جائت الخطة التفصيلية موزعة حسب الميزانية للمرصودة من المالية وصار 6000 إداري 7000 معلم

بيييييض الله وجهك والله يكثر من امثالك

ويارب يصدق الرجال

ابو مرزوق اش تخصصه ؟