السلام عليكم ورحمة الله
اولا الحمدلله انا تخرجت بشهاده بكالوريس قسم لغه انجليزيه المؤهل تربوي التقدير ولله الحمد ممتاز
لكن مشكلتي ماعرف مجال مناسب لشهادتي غير التدريس وانا بصراحه مااحب التدريس ومالي نفس ادخل هالمجال
حبيت اسئلكم ايش هي المجالات المتاحه لتخصصي وشهادتي سواء كانت شركات او بنوك او وظائف حكوميه ولو في دورات مطلوبه ياليت تقولوا لي
واتمنى الاقي رد ولكم دعوه مني ان شاء الله

اهلين اختي
حياك الله
مبروك التخرج والنسبه الحلوه وعقبال الوظيفه يارب ..
بالنسبه لسؤالك وعلى حسب خبرتي
مافيه مجال محدد
يعني قدمي على اي وظيفة تلقينها بالمنتدى
واللي بيصير لك نصيب فيها بتجيك
واي سؤال انا موجوده
اتمنى اكون افدتك

جزاكي الله خير يارب
وربي يبارك بابامك
اتمنى القى اجابات اكتر

وعليكم السلام ورحمة الله وبركاته ..

حيآآك الله ..

اولاً .. الف 1000مبروك التخرج وعقبال الوظيفة يآآرب ..

مآشاء الله تبارك الله تخصصك ومعدلك حلو
تقدرين تكملين اذا حآآبه دراسات عُليا ادب انجليزي وووو
اي مجال حابه تكملي فيه لان معدلك مناسب اقراءي عنه بجامعه الامام والملك سعود او حسب جامعات منطقتك اللي فيها ..

الشي الثاني ..
ماتحبين مجال التدريس هههه كنت نفس حالتك والحمدلله ع كل حآآل تغيرنا خخخ
بصراحه مافيه اسهل واحلى من المعاهد روحي لمعهد سجلي بياناتك مدرسة حاسب او اذا ماتبين مسجلة معلومات موظفة بالرسبشن ووو,.

لاتقولين ماحب التدريس لان هذا وين والتدريس وين اهئ
مافيه تحضير دروس والوقت قصير وجميع المميزات فهالمجال حلوه لاتفوتين الفرصه هذا اول مجال تقدرين تسجلين فيه وانسب لك ..

وغيره البنوك .
لكن انتبهي من سالفة البنوك الربويه ومدري ايش حاولي تبحثين ع الاصلح ..

وفيه المستشفيات مترجمة للممرضات بعض الممرضات يجو جدد وصعب التعامل بينهم وبين المرضى فيكون هناك مترجمين ..

هذا في مدينة الملك عبدالعزيز الطبيه ومادري فيه مستشفيات غيرهم لكن هذا اللي اعرفه

والشي الثاني تقدرين تترجمين عن بعد بحوث او كتب ..الخ ابحثي عنه فالنت ..

هذا مالدي اتمنى افدتك ولو بجزء بسيط ..

دعواتي لك بالتوفيق والسداد ,,

: )

قدمي كل مكان واستخيري

وقبل تقدمين على أي شي أعرفي طبيعة عملهم بالواقع وبشكل عملي قبل تتورطين
أنا معي شهاده تربويه وقلت مااابي التدريس وآخذت دبلوم عالي بعدها بالأداره المصرفيه

كانت الدراسه ممتعه ومافي أي مشاكل خصوصا إني حاطه ببالي ما آخذ إلا بنك أسلامي

بسس ياأختي الواقع غير أنصدمت البنوك
فيه شي أسمه هدف وظيفي لازم تجيبين لهم عملاء ولازم كل سنه يكون تحت أسمك حسابات كبيره
ومبالغ تكونين سبب احضارها للبنك

هذا غير التسوويق الملطوب إنك تسوقين عروضهم يعني تطلعين للمدارس لشركات
بجد أنا جاني أكتئاب يوم عرفت
بس وش الفايده أنا الحين بمرحلة التدريب وأنهبلت

وكل إلي قلته كوم وساعات الدوام كوم ثاني من ثمنيه ونص إلى خمسه المغرب

يعني لاتعليق صراحه والله ياأختي من يوم أدخل ما أجلس وأطلع والشغل والعملاء ماخلصوو

والحين بحافز ما أضفت شهادة الدبلوم وأخترت مجال تعليمي بسسس
يازين أيام التطبيق والبراءه والله

الله يوفقك آمين

ماشاء الله عليك ... الف الف مبروك التخرج وعقبال احلى وظيفه يآربِ ....... نصيحتي لك خذي دوره حآسبِ
اختي .... عندك المعاهد+بنوك>> هذا رابط بنك الرجحي وكم مره اشوف له اعلان يطلب بكالوريوس انجليزي ببنات https://recruit.alrajhibank.com.sa
الله يوفقك واتمنى افدتك