هلا بك اخوي الفتى المكافح
اولا اللي محرم هو الاحتكار
ثانيا لو ماخزن المزارع في الصيف وين بتحصل برسيم في الشتاء واكثر الناس غافل عن هالنقطة
رابعا ما احد يخزن من المزارعين الا الكبار لان عنده سيولة زايدة
لكن راعي المزرعة الصغير يبيع في الصيف احيانا بسعر التكلفة ويخزن نصف كل حصدة الى الشتاء حتى يربح
وهذا استثمار يا اخي مثل الحطب بتبيعه في الصيف او في الشتاء في الصيف يمكن ما تاخذه لو بريال بس في الشتاء سعره طيب وعليه طلب
طيب انا كمستثمر متى اشتري وابيع
طيب الاضاحي الواحديشتريها قبل العيد بشهرين رخيصة ويبيع غالي
وشكرا لك

قاتل الشوق بدت احلام اليقظة عند اخوك الي هو اناودلني الله يرحم والديك على قصة البرسيم والله لوتبيني موظف عندك بدون راتب قابل الين اتعلم الشغلة

واترك بعض الردود الموسوسة خلها تنحشر وتنفقع

أخوي عمر بارك الله فيك .
ماشاء الله لديك كما يظهر استيفاء لأسرار البرسيم ..
عن التخزين .. وفي التخزين .. إذا ماعليك كلافة تحط موضوع يتكلم عن جميع جوانب تخزين البرسيم .. من حيث وقت الشراء ومكان التخزين والأدوات والسلبيات والمخاطر ...

ولك التحية .. والثناء

السلام عليكم أخواااني .. شدني حواركم وحبيت أسدح المعلومات البسيطه الي عندي ...

أولا لا تغامر في الزراعه وأنت ما تعرف فيها (( نصيحه )) .. لأنه المسالة ما تنتهي بزراعة البرسيم في الارض ونقعد نحتري لين نحصد ... البرسيم يمر بظروف ويحتاج لوزنيه في الري في الكيماوي في اليوريا .. وأذا كنت جاهل في هذه الامور أو سقطت في يدي أحد مهندسي الزراعه الي للأسف يتعلمون عليك وعلى غيرك . النتيجة راح تكون مشكلة في الانتاج ...

ثانيا أخوي قاتل الاشواق أغفل تكاليف دورية لكل حصده ألا وهي : تكاليف :

ديزل + أسلاك + يوريا + مركبات + حصاد + تلبين + أخراج البرسيم من الرشاش + رواتب عمالة ...

والقاعده الذهبية في الزراعه أذا لم تتوفر لديك أحتياطات , مثال أستأجرت مزرعه فيها كل شي جاهز من رشاش لقيرات لطرمبه لمكينة . وزرعت البرسيم وبنصف المده خبطت المكينة ؟؟! ما هو الحل ؟؟ أو خربت القيور .. تعطل الرشاش كهربائيا .. أنكسر أحد الابراج ...
أذا القاعده وش تقول أذا لم يكن لديك أحتياطي أو أسبير لا تغامر .. لانه المساله فيها وقت مثلا خبطت المكينة وأنت بعز الصيف وأنقطع الماء عن البرسيم لفترة من الزمن ليست بالقصيرة يا ترى ما ذا سيحدث للبرسيم هل سينتظر حتى تحصل مكينة (( لا سوف يهلك لا محالة )))

بعطيكم حسبة من تقديري المتواضع البسيط جدا :

أستاجرنا الرشاش جاهز ومجهز بـــ 100 ألف ريال لمدة الزراعه كاملة .6 أبراج
حرثنا وقلبنا الارض ومسحناه بـــ 5000 ريال .
شرينا برسيم 45 كيس .. البرسيم الامريكي الممتاز وعن تجربة بـــ 1000 ريال للكيس = 45 ألف ريال .
بذرنا البرسيم بــ 5000 ريال .
عبينا ديزل بــ 8000 ريال .
راتب عامل شهرين 2000 ريال .

طبعا أغفلنا أمر اليوريا وهو راجع للشخص أذا كان يرغب في زيادة الانتاج بنسبة ..


المجموع = 100 ألف + 5000 ريال + 45 أف + 5000 ريال +8000 ريال + 2000 ريال === 165 أف ريال . تكاليف أنشاء .

بعد شهرين (( ليش شهرين لاننا تونا زارعين البرسيم )) حصدت البرسيم وطبعا راح يكون مخلوط وطلع لك 7000 لبنة( بلكة ) .

جبنا واحد يلبن لنا بــ ريال للبنة ..
شرينا أسلاك أحسب معي كل 700 لبنة يحتاج كرتونين أسلاك والكرتون حوالي 200 ريال .
جبنا ناس يطلعون البرسيم من الرشاش يطلعون اللبنة حاليا بــ 35 هللة للبنة أحسب معي .

مجموع التكاليف الدورية قبل البيع = 7000 ريال +4200 ريال + 2450 ريال === 13650 ريال

لو حسبنا تكاليف الانشاء + تكاليف دورية = 165 ألف + 13650 ريال === 178650 ريال .... وأنت للحين ما بعت ..

طيب نجي للبيع .. وأخوي قاتل الشوق يقول بـــ 28 للبرسيم أعتقد أنه يقصد البرسيم الصافي وهي صعبة حاليا لان الناس أتجهت لزراعت البرسيم بكثرررره ولم يصل أليه الا مره قبل سنة ووصل لــ 32 ريال للبنة أو 35 .. هذا الكلام بالقصيم

لكن نرجع لحسبتنا .. البرسيم مخلوط طبعا راح تبيع اللبنة بالكثير بــ 15 ريال صافية مشيول منها تكاليف التحميل والوساطة ..

يعني عندي 7000 لبنة * 15 ريال = 105000 ريال ... هذا المبلغ المذكور في الشتاء وبالصيف ما راح تبيع أكثر من 12 ريال ... طبعا المبلغ المذكور أذا أنت أكرمت الرشاش بالماء وبالمتابعة وكان السوق ممتاز والطلب عالي ...
راح نخصم الـــ 5000 ريال ديزل زائد ..

يطلع عندك 100000 ريال صافي ربح ...

أنت أكيد تشوف المبلغ ممتاز لكن ما نغفل أن المبلغ المستثمر كبير أيضا فحجم المغامره كبيرة والنتائج غير مضمونة أبدا لأن الزراعه تحتاج للجدية العالية والقلب القوي + الاهتمام + المعرفة الكاملة . ضرورية ...
وقلنا سابقا لازم فيه أحتياط الالات ومعدات وناخذ بالحسبان أن أي تعطل كهربائيا أو ميكانيكيا راح تحتاج أن الفني يجي للمزرعة ويمكن تحتاج قطع غيار (( وهذا بحد ذاته مكلف ماديا ))))


أنا أشوف وجهة نظري لو تكون أنت تاجر برسيم أفضل .. وليس مزارع برسيم ....

((( أي خطا في الحسابات او المعلومات واررد وليس لدي العلم الكافي والخبرة )) ودمتم بود ...

والله انا زرعت دقيق بر سمراء بمزرعتنا الخاصه طبعا البر الاسمر يعتمد علي نوعيه الذري الذي تستخدمه احنا عندنا حوالي ٥ اكياس من حصاد السنه الي راحت استهلكت منها ٣ ونص والباقي خليته. طبعا ماستخدم طرق الري بالرشاش او الوسائل الحديثه عشان تقليل التكاليف( الوسائل التقليديه) حتي السماد والله ماستخدم الا سماد طبيعي اشتريه من مربي الاغنام. كل الخساره علي الي هي ١٨٠٠ ريال اجار عاملين وشراء السماد تقريبا ٥٠٠ ريال. بس فيه مخاطر كبيره اولها البرد وهذا الي خايف منه.
طبعا تقلب الارض بواسطه حراثه خاصه فينا وان شاء الله وقت الحصاد استآجر حصاده ب ١٠٠٠ ريال واعطي صاحبها كيس هديه.
وعلي فكره ترا انا شغال معي العمال يوميا بعد الدوام لانو المزرعه مره ضخمه وموب ملحقين. *

كيف حالك ياقاتل الاشواق
انا رديت عليك لانك تقول مايكلف عشرين الف كبداية وتحصد كل 14 يوم واشوفك اقتنعت ب140 الف كبداية والحصاد وانا اخوك مافيه كل 14 او 15 يوم اللي يعلمك مايدري وش السالفة
واما من طرف اني معلق على شهر و3 شهور فهذاا لاني ادرى وانا اخوك واعرف باللي اقوله مو اروح اسال وارجع
وانا ماقلت ان مافيه ارباح وانا اخوك بالعكس ذهب بس مو للي بيزرع بعشرين الف
وشكرا
وان شاء الله نشوفك اكبر تاجر برسيم
وترى ما فيه منطقة اغزر من حرض وبسيطا وميقوع وتبوك
واما من طرف التخزين فانا ما اخزن البرسيم انا قلت متابع للتخزين واشوف اهل المشاريع اللي حولي يخزنون غير السودانية والافغان
اتمنى اني قدمت اللي فيه فايدة
والسلام عليكم ورحمة الله وبركاته

[align=center]الموضوع شيق ورائع جزاك الله خير
ياليت اخي قاتل الاشواق ترسل لي جوالك لمزيد من التواصل والاستفسارات[/align]

يا شباب حنا اهل مزارع

ترا الزراعة ماهيب بالحسبة الي شفتها بالسهالة في الردود ، ترا تطلع لك طلبيات وامور ما كنت تتوقعها

الزراعة يبيلها راس مال كبير وخاصة مثل البرسيم

والرشاش ابو ست ابراج ياكله فوق 100 الف الين وقت حصده

عندك اول ايجار المزرعه بتدفع النصف يبيلك اقل شي 40 الف
عندك حرث الارض تاكل حدود 5 الف
عندك البذر والأسمدة والأدوات من بذاره وغيره تاكل 10 الف
عندك راتب 2 عمال لمدة ثلاث اشهر 6 الف
عندك ديزل وكهرباء ومصاريف نثرية اقل شي 5 الف
لا قدر الله انه تعطلت المكينة او انكسر الرشاش
لازم يكون عندك مبلغ للمشاكل الي تواجهك

ترا الزراعة يبيلها واحد راعي دراهم وصبر كمان عشان يتعلم
صحيح انه الواحد ما يستغني عن المشوره لكن التجربة هي الي بتعلمك كل شي

اذا ماكنت من اصحاب روس الاموال القوية ولا يهمك اذا خسرت لا تدخل نصيحة

طيب واللي بيزرع خضروات وخصوصا البطاطس كيف الطريقه

مين يعرف ويعلم واحد غشيم مثلي
وهل فيها مكاسب وكم تكلف
جزاكم الله خير