السلام عليكم ورحمة الله وبركاته

طبعاً تعودنا ان النصايح والاسئلة عن الرواتب
والقطاعات وايهم افضل وايهم اسوأ

نصايحي متواضعه لكل منهو مقبل على دورة عسكرية او مقدم عليها

نصايح خفيفه لكنها مهمة بشكل كبير جداً وللأسف قليل من يتطرق لها

* يعرف الجميع ان الدورة تحتاج جهد بدني كبير فلابد قبل الدوره تكون اعديت نفسك
لياقياً ولا يرتسم للبعض اذا قلنا لياقة انه يمتر الدنيا رايح جاي لا خصص لك فترة
10 باليوم الأول تمشي فيها 5 دقايق وتركض 5 دقايق ومن بكرا خل الوقت 15
تمشي 10 وتركض 5 وبعدها 20 دقيقة تمشي 10 وتركض 10
فهذي طريقة سهله جداُ لرفع معدل اللياقة
طيب بيجي واحد ويقول مايحتاج اوجع راسي اتعب شهر بالدورة ماعندي مشكلة
نقول اوكـ تتعب شهر كامل بس هل انت تضمن انك بتكون قادر بشكل مفاجىء
على انك تستمر لمدة شهر ونص وبشكل مفاجىء حط تحتها مليون خط
فالمسئلة ماهي ركض وبس المسئلة جسم يمكن يتأثر ويعوقك عن امور كثيرهـ
بالدورهـ يوم مافيه جال للتراجع او المرض

* التغذية السليمة قبل دخولك للدورة والعسكرية
انا ما اقول لك حط لك برنامج غذائي وتفلسف على اللي عندك ان التفاح زين للركب
والموز مفيد للبنكرياس
لايالغالي انا ابي منك شي بسيط جداً جداً
لاتسهر وكل باليوم 3 وجبات رئيسية وبينهم وجبات خفيفة ساندويش ولا خفايف من الفطاير
ولا غيرها وابعد عن المشروبات الغازية واحرص على الحليب والله الله بالتمر >> ياشيخ ولا
عبد الباسط حق بداية خخخخ
جد ياشباب للمعلومة التمر يحتوى على 90 بالمية من الفيتامينات اللي يحتاجها الجسم
فابتدي كل باليوم من 5 - 10 تمرات باليوم

* قاطعوا ابو الشباب
للأسف العادهـ السرية منتشرهـ بشكل كبير وماراح نوجع روسنا بالكلام عنها
بس احرص كل الحرص كل الحرص كل الحرص على الامتناع عنها ياليت نهائي
بس اذا مرهـ مرهـ مولع اقطعها قبل الدورة بشهر علشان جسمك يسوي رسيتارت >> ترا مدري هي كذا ولا لا

* خلك ذيب
القطاع العسكري يعتبر قطاع عملي ويحتاج شخصية قوية
فحاول تكون واثق من نفسك ولا تكون مهزوز واذا كنت من
ألنوع الخجول حاول تعزز جانب اختلاطك بالناس قبل
دخولك للعسكرية لإن الفجئة احياناً مو حلوهـ

* تعرف المروحه حقت بيتكم ؟

بيتنا مليان مراوح ليش مدري المهم قاهرتني مروحهـ بغرفتي
لها فترهـ ماتشتغل كل ماجيت انام اناظر فيها اقول هذي ليش
محطوطه مالها فايدهـ ففئجة من المرات وانا اهوجس
جا على بالي تقديمي وحوسة الوزن والطول
فقلت ياولد خل نكرف المروحه عساها تمغط عضلات الكتف
والصدر والظهر وتعطينا كم انش تنفعنا

المهم فبديت استعمل المروحه بتمرين ممتاز ويعطي نتائج ممتازهـ
التمرين هو انك ترفع يدك اليمنى ثم تنزلها ثم اليسرى وتنزلها
تحاول تلمس المروحه يعني
امغط رجولك ويديك فوق وشد نفسك وحاول تلمس المروحه مع اي جهه
هالتمرين اذا استمريت عليه بتتمدد عضلات الكتف عندك وتشدد عضلات
الصدر والظهر وتعدل ظهر اذا كان فيه تقوس مؤثر عليه
واللي ممو مطنوخ مثلنا وبيتهم مافيه مراوح
يمغط يدهـ بالجدار ويحط خط على اقصى حد وصلت له يدهـ
ويبتدي يومياً يمغط يدهـ لين يوصل للخط بيلقى نفسه شوي شوي
يرتفع عن الخط وهذا يعني ان التمرين اعطى مفهوله



وبالتوفيق للجميع وصدقوني ترا كل اللي انذكر شي سهل جداً
ونتائجه ممتازهـ خصوصاً جانب التغذية لإنك بتستهلك جهد كبير
جداً