السلام عليكم ورحمة الله وبركاته

كيف حالك إن شاء الله دائما بخير ؟

هذا الي صار معاي في مدينة تدريب الامن العام بالرياض على رتبة جندي اول موعدي كان 11/18 يوم الأحد ... المهم جيت يوم الأحد لمدينة التدريب والله يا عالم وزحممه بالقووه توصل للبوابة
والمشكلة اكثرهم ما معاهم مواعيد جايين بملفات كذا بس ...
المهم دخلونا كلنا وخلنا نصف ورى بعض ثم بدوأ العسكر يطلعوآ الي لابس ثوب والي شعره طويل يقولوآ له يالله مع السلامه روح حلق او روح غير ملابسك والبس رياضه وتعال بكككره ...
انا شعري طويل شوي لكن ما لآحظوآ وعديت ثم جاء النقيب وقال الي معاه موعد يقوم ...
المهم انا من الي معاهم موعد ورحنا على جنب وسوينا صف ثااني وجآبو المرمى حقهم
المهم ويالله واحد واحد من تحت الحديده الي يصك راسه بالحديده يصف على جنب والي ما يصك راسه بالحديده مع السلامه ....
المهم انا الحمد لله صك راسي بالحديده لكن وقفني العسكري قال توكل حلق شعرك وتعال ( كفششني )
المهم طلعت وحححلقت على رقم 4 وجيتهم يوم الاثنين ( يوم التعقيد )
جيت حصصلت العالم برى وفكوآ البوآبة الساعه 7 لكن هالمره منعوآ آحد يدخل الا الي موعده يوم الاثنين 19/11 بسسس ...
والعالم الي موقعين لهم وقالوآ تعالوآ بككره مآيدخلون .... لمآ جت الساعه تقريباً 8 ونص ...
بدوآ يدخلون الي قالوآ لهم حلقوآ وتعالوآ والي ناقصه ملفاتهم تصديق او صوور ...
انا دخلت الساعه 8 ونص ... ومسكنآ سرى ورى بعض عشان يقيسوآ الوزن والطول ...
( نصيحة كل وآحد يرتب ملفته ويحرم الشهادات الصور بس مو الاصل )
المهم مسكنآ سرى وجلسوآ يقيسوآ وطردوآ ناس ... مآ قهرني الا رقيب آول جآء ينآدي اسماء عيال قدآم العالم انت مرسول من طرف العميد فلان بن فلان .... قال ايه ... قال تعال من ورى ... خلآه يتعدى الطول والوزن وكل شي ...
المهم جآء دوري والي يدقق بالاوراق مقدم .. نآظر بملفي قال وين شهادة الحاسب .. قلت ما معاي الا مشهد الشهاده يبيلها شهر عشان تطلع .. قال مع السلامه ما تنقبل هاذي ... يا ولد من هنآ من هنآ مآآفي آمل .....
والله وآروح آدبر لي وآسطه وآخذ ملفي وقالي بحآآول لكن ما اضمن لك ودخل جلس يمكن ابو ساعه ثم جآآني قال والله رفضوآ المشهد ... ووراني ملفات ناس انقبلوآ .. قالي شوف هذول قدرت اخليهم يقبلونهم لان معاهم شهآيد ... لكن انت حاول تجيب الشهادة معاك الى يوم الاربعاء وان شاء الله آدبرك ( يعني يا عيال الي يعرف احد يبيع شهآيد معتمده يقوولي )
المهم قضبت الباب وتوكلت على الله ... وقلت يمكن انها خيييره ...



نصآيح:
1- حلق شعرك على رقم 1 او 2 او 3 او 4
2- ما معاك شهادة حاسب لا تتعب نفسك وتروح
3- اهم شي تصدق الصوره حقت الشهادة
4- البس رياضه لا تفكر تروح بثوب لانك بتنطرد
5- اذا طولت مو 170 ريح حالك لان ميزانهم منقصين منه 2 صانتي او 1.5 تقريباً
6- اذا ما قدرت تجي على الموعد روح عااادي قول لهم انتوآ قلتوآ لي حلق شعرك وتعال او صدق الشهاده وتعال بيمشونك ...
7- رتب ملفك وخرم الاوراق ( شهادة الثانوية مصدقه + شهادة الحاسب مصدقه + الموعد + صورة بطاقة الأحول )
8- اذا عندك وآسطة لا تروح تقول انا من طرف فلان بيقولك ما اعرفه خلي واسطتك يدق عليهم وهم ينآدونك

هذا والسلام مسك الختآآم

واذا نسيت شي ان شاء الله اكتب بالرد ...