العادات والتقاليد

مازن البلادي · #1 (**permalink**) 21-10-2011, 11:57 PM

السلام عليكم ورحمه الله وبركاته

بسم الله الرحمان الرحيم.....

انا عندي وجهه نظر وحاب انزلها بهالمنتدى الراقي فلابد الكل يحترم وجهه نظري وان تعجب ناس ولاترضي ناس

الحين في الزواج ليش التشرط وهذا بسبب العادات والتقاليد ابغي زي فلانه وابغي زي فلانه

القهوه لابد انك تمر علي كل شخص ليش مايجيبو عربيه وخلاص نفتك من هالتعب نمررها علي الناس لان بالاول والاخير بتشربها بالعكس طريقتي اسرع واوفر بكثير

لمن نصافح بعض في الزواج ليش مانكتفي بكلمه السلام عليكم ليش الخد يصقع بالخد او الانف بالانف

لمن اقابل شخص من زمان عنه يقولي كيف الحال اقوله تمام الحمدلله شوي ويرجع لنفس الموال ويقولي كيف حالك وش علومك وربي شي يرفع الضغط طيب قبل شوي سألتني يأبن الحلال

لمن يجي العشاء اكبر واحد يجي ويقول تفضلو حياكم الله علي العشاء المفروض جرس طن طن وخلاص احنا نتجه للعشاء وربي اصرف

يمكن الاخيره بالغت فيها شوي ومو حلوه بس اختصارات

الفريق أول ركن · #2 (**permalink**) 22-10-2011, 12:13 AM

الكرم والسوال عن احوال الحبيابيب من واجبات ديننا الحنيف وليست من العادات حنا شعب تعودنا على ديينا وجائو فئه ونسبوها للعادات كذبو وأحترم وجهت نظرك والله يوفقك

فاتنه · #3 (**permalink**) 22-10-2011, 12:15 AM

انت سعودي ولاسوداني؟

مستشار العشاق · #4 (**permalink**) 22-10-2011, 12:27 AM

حبيبي خلك زي ساحب ع ابو العادات والتقاليد

والله والله ماوراها الا وجع الرآس

جرب تطنش هالخرابيط وتسوي الشيء اللي تعتقد انه صح

صدقني بتعيش حياتك صح ولا يهمك فلان ولا علان

وبس ...

عاطله ونحمد الله · #5 (**permalink**) 22-10-2011, 12:31 AM

ههههههههههههههههههههههههههههههههههههه
يعني الدنيا مافيها مشاكل الا هذي

إِنتعآش~ · #6 (**permalink**) 22-10-2011, 12:33 AM

العادات الي ذكرتهااا الحمدالله ما منها ذاك المشاكل ,,,

يعني فيه عاداات يجب الوقوف عليها وتغييرهااا

لكن

اقتباس:

لمن نصافح بعض في الزواج ليش مانكتفي بكلمه السلام عليكم ليش الخد يصقع بالخد او الانف بالانف

نفس تساؤلي .... ليه ما نكتفي بسلام السنه

الي هوه .... المصافحه ..

يعني سواء بين النساء او لما اقابل اخوالي او عماني ,.....

ماله داعي خد بخد ..

زيدان · #7 (**permalink**) 22-10-2011, 12:34 AM

كل ماذكرته يعبر عن المحبه للضيف والسؤال المستمر بكلمة كيف الحال وش الأخبار يعبر عن الإهتمام الكبير

بحيث انك لو قلت للشخص السائل انك تمر بمشكله معينه تلقاه يهب للمساعده ويقدم لك يد العون

فلا تتضجر من السؤال المستمر انا أكثر من كلمة كيف الحال لمحبتي للشخص لو مااعزه واغليه كان اكتفيت بالسؤال مره واحده بس

وسالفة الاختصارات والعربية والجرس ، اعذرني لو كنت ضيف مااتوقع انك بترضى بمثل هالطرق البارده في الضيافه

وامس كنت في نقاش مع شخص حول سالفة تقطيع اللحم ومده للضيوف على صحن العشآ

كان يقول بعض الناس يقوم من العشآ أو يقول شايفني كلب تقطع لي ؟

قلت يحمد ربه اول شي انه لقى من يقدره ويحترمه ويعزمه على عشا والغنم غاليه وصلت 1600 ريال

وثانيا الرجال يأثره على نفسه بأفضل لحمه في الذبيحه ويمدها له ولايقصد بهالشي غير المحبه

اللي يكنها لهذا الشخص ويقوم هذا بكل وقاحه ويقول لاتمد لي

قال والله هذي عادات عندكثير من الناس

زي هذي العادات والتقاليد اللي مفروض تنتقدها وتمقتها

الف شكر لك اخوي والله ولي التوفيق ..

لولو المنسيه · #8 (**permalink**) 22-10-2011, 12:39 AM

لو اقعد على عادات وتقاليد الناس ماني خالصه

اسوي الشيء الى ارتاح فيه وخلاص

عآآآشق القمرآا · #9 (**permalink**) 22-10-2011, 04:33 AM

يآربي لك الحمد .. الحمد الله اللذي فضلنآ على كثير من النآس .!

امآ سالفة الجرس والعشآآء ذكرتني بسألفة البيجر والبقره .!

تخييل نفسك يدق الجرس وانت رآح تدربي رآسك تدور العشاء

شي لآ يدخل العقل ..!

المالكي احمد · #10 (**permalink**) 22-10-2011, 05:03 AM

ذكرتني بقصة شيخ مره جاه ضيف وقدم له الماجود ..
وبعد زمن راح هذا الشيخ مسافر وبالصدفه مر على الرجال اللي ضيفه قبل فتره ..
المهم الرجال قال هذي فرصه اوريه الكرم ..
قام الرجال وذبح املح غنمه وحطها "مفطح"
وقدمها للشيخ قال شوف وش اقدم لك ياشيخ ماهو مثل يوم جيتك ضيف ..
قال له الشيخ "والله هذا قدري وهذاك قدرك "