بسم الله الرحمن الرحيم

السلام عليكم ورحمة الله وبركاته

أهنئ القائمين على هذا المنتدى الرائع صراحه والفكرة الرائعة وانا الآن كلي فخر بأني عضوة منتسبة له ..

حابة هنا اطرح مشكلتني أولا ثم اسألكم الحلول ...

مشكلتي هي ( زوجي ) وآآآآآآآآآآه
أنا خريجة كلية التربية تخصص رياضيات وعاااااطلة الى الآن وبصراحه مليت من سكب الدموع لما أشوف أسماء المعينات بدون ما يكتب اسمي
ولكن الحمدلله على كل حال ....
متزوجة من رجل طيب وخلوق لكني مشكلتني معاه بحاجتين

أولا : ماضيه
ثانيا : حاضره

ماضيه اللي اضاعه في اللهو واللعب والكلام الفاضي مثل كثير من الشباب .. هو متخرج من الثانوية الصناعية تخصص ميكانيكا وشهادته احسن له يبلها ويشرب مويتها
اشتغل خمس سنوات في البلدية واستقاااااااال بحجة تحسين حالته لان رواتبهم ضعيفة
واتجه للقطاع الخاص في شركة ما اقول الا حسبي الله ونعم الوكيل بصاحبها

الآن له 7سنوات يعمل فيها براتب ثابت 3000 بدون زيادة بدون عقد بدون تأمين صحي ولا اجتماعي بدون حوافز بدون مكافآت بدون .......الخ
لدرجة ان اسمه مو مدرج ضمن قائمة موظفين الدولة في القطاعين يعني يعتبر عاااااااااااااااطل

كل ما احط عيني بزوجي احس اني اكره هذا الرجل اللي ظلم نفسه وظلمني معاه .. ورغم حزني لاننا ما انجبنا اطفال من 3 سنوات الا انني اقول لله حكمة لو عندنا طفل كان مات جوع بسبب استهتار والده ..

احس ان المستقبل مظلم امامي مع هذا الزوج ووالله ثم والله لو كنت اعلم ان هذا وضعه وهذا ماضيه ما تزوجته ..

انا الآن اطرق جميع الابواب للتوظيف سواء لي أو لزوجي ( اللي شارف على الاربعين )
ولكن لا شهادة ولا عمر ولا تدريب ولا خبرة تشجع اي رب عمل انه يوظفه ...

فكرت كثيرا اني اتطلق منه كل ما اتذكر انه ضيع شبابه في الملذات واللهو واسراف المبالغ اللي كان يحصل عليها في الطيش

أعتذر عن الاطالة كان هذا فضفضة وسؤالي الآن

هل يمكن لزوجي بعمر 38 سنة وبشهادة الثانوية الصناعية اللي اخذها عام 1415 انه يحصل على وظيفة حكومية ؟؟؟

وجزاكم الله خير

ربنا كريم والله يرزقكي ويرزق كل مسلم
بعدين يروح يشتكي زوجك على الشركه في وزاره العمل عشان يدخلونه في التأمينات لان التأمينات تساعده لما يكبر وما يقدر يشتغل يعطوه راتب تقاعدي

السلام عليكم ورحمه الله وبركاته

هلابك اختي

اولا اذكري الله وقولي الحمد لله على كل حال

واتمنى انك تفكيرين بكل كلمه اكتبها ويارب تعود عليك بالمنفعه

وكلامي من واقع تجربتي

انا مثلك متزوجه

اولا ليش تكرهين زوجك دامك تقولين انه على خلق فالكلمه هاذي بحد ذاتها تكفي

فمعناه انه ان شاء الله ينرجى منه خير

وفيه خوف من الله وخذيها مني حلقه في اذنك منثل مايقولون

الي مافيه خوف من الله خافي منه

يعني احمدي ربك مو طايش وضايع

او يجيك يرقل اخر الليل

احمدي ربك حالك افضل من حال كثيرات

ومع ذلك ماسكين بيوتهم ويقولون يترب الستر

من شاف مصايب الناس هانت عليه مصيبته مثل مايقولون

ومن ناحيه نقطه الماضي

من فينا ماله ماضي

يكذب مع كل احترامي الي يقول انا وانا الي ماله ماضي ماله حاضر

والعاقل هو الي يستفيد من اخطاءه ويخليها تطوره عشان ترجع عليه بكم هائل منً الفوائد

اما من ناحيه الحاضر وضروفه الوظيفيه

هذا قدره وقسمته ونصيبه

وصدقيني بعض الرجال يكةن ماعنده نضج في التفكير

بالسعودي

(ماعنده دبره)

مايعرف يرتب وضعه

بعدين دام الوضع حاولي انتي تتصرفين اذا بتنتضرين وظيفه حكوميه

رددي ياليل ماطولك لاتنتضرين احد وتحطين يدك على كفك وتقولين ساعدني ياحظ

نعم رب العالمين من عباده بس لازم الانسان يسعى يطور نفسه ويفيدها

مافيه احد ينكر انه يرفض الفايده

حتى بو ضروفه الماديه ممتازه

الانسان بدايته بسيطه

وبعدين تتحسن

واحمدي ربك مايدرى وش حكمه رب العالمين انه لحد الان مارزقك اطفال العلم عنده سبحانه

شغلي افكارك

شوفي اي مجال انتي مبدعه

فيه

اي شي

طبخ. خياطه اي مشروع يرجع عليك بفايده لو بسيطه

واي خدمه انا حاضره

بصراحه انا من ميؤيدين الطبخ

اذا انتي مبدعه في شي معين توكلي على الله

وانا بصراحه اعندي مانع اذا كنتي صدق حابه

تطورين من نفسك

دام وظيفته ماساعدوه انتي حاولي تساعدين وضعكم والله يوفقك

وقولي دايم الله يهديه يترب ويسخره

ونصيحه

لاتتركين صلاه اخر الليل

الله ماتتخيلين الراحه الي بتجيك منها

واخيرا قولي الحمد لله

كلنا بدينا بتعب وحسن الله اوضاعنا

حتى لو تحسن بسيط بس نحمده يارب

وسهبي الامور يسهلها عليك علام الغيوب

واذا بتشكين وبتبكين اشكي وابكي للخالق هو الي بينفعك وبيسبب لك الاسباب

والله يسهل امرك ويرزقك من باب رزقه سبحانه

والعذر والسموحه طولت عليك

جزاكم الله خير وآآآمين على الدعاء ..

والله يا اختي ما تكلمت ولا اشتكيت الا من تعب لاني ما اخبر اهلي ..
تدرين وين المشكلة ؟؟؟ انك ما تعرفين الوضع بصورة دقيقة ...
هالحين تظنين اني ما طرقت ابواب كثيرة ؟؟؟ دخلت مدارس خاصة وزوجي نكد عيشتي لين خرجت منهم ..
طبخ خياطة تجهيز بيع كل شي سويته وجربته وهو قاااعد يتفرج بس بس بدون فايدة ..

زوجي يا اختي ممن ينطبق عليهم ( عزيز قوم ذل ) أبوه كان عميد واعمامه واهله كلهم ألوية ومليونيرات لكنه ضيع ورث ابوه وقاعد هالحين على الحديدة ومع ذلك مازال عزة نفسه انه ولد ناس وولد اكابر تمنعه من انه على الاقل يساعدني في اي شي اسويه يخاف من كلام الناس .. حتى الوظايف انا اللي اقدم له
حتى زواجه مني كان من مساعدة اهله واهلي وهو ما قط ولا ريال من جيبه
إنساااان لاااااااااااامبااااااااااااااااااااااااااااالي مستهتر لابعد الحدود هو طيب نعم ..
لكن وش الفايدة اليوم وصلنا إنذار إخلاء الشقة بسبب تأخر الايجار تدرين ليش ؟؟
لأنه ما يقدر يشتري الا ماركات ولا يلبس ولا يتعطر الا من ماركة
فهل يعقل هذا يا عاااالم ؟؟؟

قصر الكلام انا فقط كنت ابغى اعرف هل له فرصة بوظيفه حكومية وهو بهالسن ؟؟؟ ووين ؟؟

وشكرا

اختــــي نصيحــــه لاتشتكين همك هنـــا اشتككي للخالق ليس للمخلوق وادعي الله كل وقت بالهدايه والصلاح

السلام عليكم ورحمة الله وبركاته

ادعيله في اخر الليل ان ربي يصلحه ويصلح جميع المسلمين

وحاولي انك تفهمينه وترسمين الخطط المستقبليه له

وينك أيام عزة ويوم كان يلعب بالفلوس على قولتلك مافكرتي بمستقبلكم وفكيتو مشروع او نبهتية

ولاإلحين لمن ضاعت فلوسة جيتي تتشكين ,,كل شيء ترا مقسوم ومحد ياخذ الا نصيبة

اهم حاجة إبعدي عن التشكي والتذمر وربك حيفرجها علية الي مبين إنك زوجك طيب وإبن حلال

الله يوفقك ويوفقة ,,وإعذريني على ردي

الله يعين
وبس ...

فهمتوني غلط !!!!!!!!!!!!!!!!!!!!!!!!!!!!

انا مو اشتكي انا كنت افضفض بس لكن وضعي للموضوع فقط عشان اسألكم

هو في سن 38سنة وثانوية صناعية يقدر يلقى وظيفة حكومية تنااااااااااااااااااااااسبة ؟؟؟ووين ؟؟؟

بس
بعدين الاخت اللي تقولي هو وينك يو اخذ فلوس ابوه

كنت طفلة وقتها ... اخذ فلوس ابوه من 15 سنة وهو تزوجني من 3 سنين
اتمنى يكون واااااضح كلامي

موفق بإذن الله ... لك مني أجمل تحية .