حادث
السلام عليكم ورحمة الله وبركاته


اما بعد

وش تسوي لو حصل حادث امامك؟؟؟

انا عارف ان اغلبكم يقول اجنب سيارتي وانزل اصور....وانا بدوري اقوله ان شاء الله تطب في يد واحد خال مايخاف الله ويجلدك ويصورك هو بدل ماتصوره انت

في حال حصول حادث

اذا كان الخط مستقيم اول شي اذا تقدر توقف قدام السيارة اللي صار عليها الحادث يكون اسلم لك اذا ماقدرت جنب ...وانزل وقبل ماتوصل للسيارة المصدومة انتظر شوي الين تتكدس السيارات يعني يصير الشارع زحمة عشان تقدر تقطع الشارع بهدوء وتلقى من اهل الخير من يساعدك في الفزعة...

اذا كان الخط منحني او في طلعة او نزلة حاول تستعين باحد الملاقيف ويوقف في مكان يشوف في السيارات من مسافة بعيدة....عشان ينبه السيارات اللي جايه من بعيد

واذا تعذر وجود ملاقيف في هذه الحالة وقف سيارتك في مكان يشوفونه السيارات القادمة من بعيد ودق فلشر ....عشان تنبه اللي جايين....

اول ماتوصل للحادث الافضل ان يكون معاك طفاية حريق ...وقبل كل شي حاول فصل البطارية عشان تتفادى حدوث التماس في الكهرباء وتتحاشى حدوث حريق

اذا كان الحادث في الليل استخدم النور العالي عشان تشوف اذا في ناس طاروا من السيارة ....

بعد كذا ترجع مسافة 10متر تقريبا وتكشح بالنور العالي على السيارة ...منها عشان تشوف اللي داخل السيارة...ومنها عشان اللي جاي من بعيد يشوف السيارة المنكوبة

بالنسبة لحالات الكسور حاول قدر المستطاع انك ماتحركه الا للضرورة القصوى عشان تتفادى مضاعفات الاصابة والتي قد تصل الى الشلل...

اما بالنسبة للمصاب بالنزيف الداخلي فهذا للاسف مسألة وفاته هي مسألة وقت لانك ماتقدر توقف النزيف ...

وللمعلومية فيه شريان صغير فوق العين اذا انقطع ...فان المصاب مهدد بالوفاة خلال خمس دقايق ...وهذي معلومة قالها لي مسعف باشر احد الحالات
حاول ان تكون اعصابك حديدية عشان تقدر تتحمل المفاجأت...والمناظر الغير متوقعه....


حاول فرز الاصابات على حسب الخطورة

حاول ستر عورة المصابين والمتوفين...

حاول ابعاد المصابين والمتوفين عن الشارع.

اذا ربك ستر وما فيه وفيات...حاول تسحب السيارة واجزاء السيارة المكسر من الشارع...

يفضل وضع واير في الشنطة....الواير هو سلك حديد يستخدم في سحب السيارة...

اثناء سحب السيارة انتبه لا تطير اجزاء من السيارة عليك خليك بعيد قدر المستطاع....
اعظم احساس في الحياة لما تلمس يد شخص ما تعرفه ولا يعرفك وحتى لايمكن انك تشوفه ويكون محتجز داخل سيارته وينظر لك نظرة انك انت الوحيد في هذي الدنيا بعد الله اللي تقدر تساعده وحياته كلها بين ايديك...ان شاء الله الكل يكون قد هذي النظرة ويكون قد الموقف
اذا ماكان فيه اصابات حاول تواسي اصحاب السيارات التالفة وتجبر بخاطره ...واعرض عليه أي نوع من المساعدة....سواء الاتصال بأهله او قريب له عشان يبلغه بالحادث ...اعطيه مويه....حطه في سيارتك وشغل له المكيف...وصله لبيته..اعطيه أكل...

يا اخوان من خلال حوادثي الكثيرة والمريرة....اقولكم ان اشنع الحوادث واغلب الوفيات هي اللي تحصل عند التقاطعات....في احدى مراجعاتي لاقسام المرور يخبرني الضابط ان جميع المراجعين خلال الاسبوعين الماضيه حوادثهم في تقاطعات....وللاسف كل سياراتهم تالفه...

اعتقد ان السبب الوحيد بعد السرعة ...هو ان الناس ما تعرف الاولوية في التقاطع لمين؟؟؟

اذا كان فيه اشارة فليشر باللون البرتقالي هذا يعني الاولوية لسالك هذا الطريق


اما اذا كانت فليشر احمر هذا يعني انه يوقف الين تعدي السيارات من الجهة الاخرى وبعدين يمشي هو....واي خطأ ممكن تكون الحياة ثمن لهذا الخطأ

• اجماعه تذكرت يوم المقص و زحفت بي للماصوره وصفقت الرصيف وضربت الماصوره