[align=center]السلام عليكم ورحمة الله وبركاته


افكر في مشروع ليموزين , خصوصا أني عاطل , وطول الوقت فاضي , افيدوني بنصائحكم وتجاربكم , وكيف استأجره , ووين ألقى الشركات اللي تأجر .






وفق الله الجيمع [/align]

يـــجي من يــفيدك إن شاء الله ..ويكون جــرّب ...


مــــــــــــــوفق ,,,

ممكن موقع الشركات ,, والشروط ,, انا عندي رخصة عمومي

140 ريال لليوم كثير لا تستفيد خاصة وان البنزين عليك وهذا المبلغ يستفيد منه الاجنبي يعني لو يصفى له في اليوم 70 ريال تخارج معاه اما سعودي لا اعتقد خاصة وان العمل على الليموزين متعب حوالي من 10 الى 12 ساعه يوميا - يومك كله شغل والفائدة قليلة
ما انصحك وبالتوفيق ولو مصمم خذ لك سيارة اقساط وتكسها او بنك التسليف مع اني ما انصحك بالشغله هاذي لا تستفيد خبرات وسيارتك تخرب وما فيها فايده بالمره اسأل مجرب
هي مفيده بشرط السياره ملك لك وعندك وظيفة او مصدر دخل اخر وتخلي التاكسي للمصاريف فقط
والله يوفقك

رح لمؤسسات التكاسي وشف وش شروطهم
واستأجر وجرب الشغله حتى لو ما تكسب
واذ حسيت انك قادر عليها
دور لك سيارة انوفا تويوتا
اما مستعمله او جديدة تأجير مع الوعد بالتملك
والصبح ود لك 4 معلمات ب 4000
وفي المساء تكد عليه ومنها بعد تحط لك رقم تعطيه كل من يبي مشاوير خاصه
ولو طفشان في ويك اند وانت في الرياض مثلا
خذ لك ركاب من البطحاء لشرقيه ب100 ريال لراكب
والسيارة تشيل اعتقد 6 تكون 600 ريال رايح
100 مصروف والباقي في الجيب
والرجعه نفس الكلام

ولانوفا حسب ما اسمع انها قويه وتتحمل الكرف

ما انصحك فيها...


خذ قرض وافتح بوفيه في مكان حلو او تجمع شبابي....

وانت اشتغل فيها ومعاك عامل

ولاتكون تقليدي

اصنع افكار وخلطات سريه



بكره نشوفك منافس للبيك الله يوفق

مرورك شرفني , وما زلنا بانتظار الخبرات والمجربين

خذ سيارتك الخاصه ووقفها بمواقف مطارالملك خالد وخلك مع الكداده اللي بصالة الاستقبال بتعين خييييير وسيبك من الليموزين بس انتبه لايصيدونك اتوقع فيها غرامه اذا صادوك

تستاجر التاكسي ان كنت سعودي تعطيهم في اليوم 100 ريال تقدر تكد علي خطوطمثال الطايف الرياض 750 ريال تطلع في الروحه 150 ريال لكل راكب والشرقيه بميه ريال لكل واحد



اتمني افدتك