السلام عليكم

يا اخوان انا جتني فكره اني استاجر لموزين بالرياض لمده يومين واشوف اذا الفكره عجبتني

ومشيت فيها ودي استاجر على طوول

لكن مثل ماقلت ودي ادور شركات تأجرني يومين ثلاثه عشان اشوف التجربه

محد عنده خلفيه بهالموضوع أو وين الي يأجرون لموزين باليوميه

تأجير ليموزين والله ماسمعت به

اعرفهم يروحون بنك التسليف ويقدمون عليه وشغله اشوي ..

وبعضهم يقلب سيارته الخاصة لموزين ومن هالكلام يكلفه على ماعتقد وليس اكيد فوق 3000 ريال او من كذا ..

طيب ليه ماتاخذلك سيارة ايجار واحد يكفلك وعندك حلين

- ياما توصل الناس اللي بمطار الملك خالد

او

- تروح فيه كداده للشرقية والبحرين والله امورها طيبة ومكسبه كبير فوق ماتتوقع بس متعبة جدا خاصة بوجود ساهر بدو يكرهون الدعوة ..


الله يوفق يالغالي واهم شي الصملة..

الله يوفقك..
وانا بعد مثلك ودي ابدا بتجربه ياليت احد يفيدنا

يا اخوان انصحكم بقوه بالليموزين

انا ولله الحمد اخذت ليموزين وخليته باسم الشركه لاني موظف
ولله الحمد اقل شيء يجيك منه 50 ريال باليوم وانت مرتاح
واللي يشتغل صح يطلع من 150 الى 250 ريال باليوم

نصيحه لا تترددون تراها شغله بسيطه ومربحه ومافيها خسائر وغيره

السلام عليكم ورحمة الله وبركاته

من تجارب احد الزملاء .

فكرة الليموزين فكره ممتازه وفيها خير بس شرط تكون السياره ملك لك مو ايجار لأن شركات الليموزين تأجرك الليموزين بمبلغ يتراوح من 100 الى 140 ريال في اليوم تدفعها للشركه والبنزين عليك ومن ناحية الدخل اليومي لليموزين بالنسبه للشرقيه يتراوح متوسط الدخل من 140 الى 200 ريال وربما أكثر على حسب مجهودك يعني لو افترضنا ان مدخولك اليومي 220 ريال في 13ساعه عمل من الساعه السابعه صباحاً الى الحاديه عشر ليلاً تتخللها ساعتين راحه
220 اخصم منها 140 للشركه و40 ريال بنزين باقي لك 40 ريال تقريباً
السؤال : هل تعتقد ان 40 ريال كافي لمجهود عمل 13 ساعه في اليوم طبعاً .... اترك الجواب لكم .

ايجار الليموزين يصلح للعماله الوافده وبالأخص البنقاليه لأن البنقالي يكفيه 40 ريال في اليوم
لأن 40 ضرب 30 يوم = 1200 ريال راتب ممتاز بالنسبه للبنقال ناهيك عن مدخول يوم الجمعه فهو من حق السائق كاملاً الشركه لا تأخذ منه شي .

عزيزي انا لا اضع عقبه امامك ولاكن من وجهة نظري ان تحاول ان يكون الليموزين ملك لك حتى لا يذهب مجهودك لغيرك . وان كنت مصر على تجربة الايجار أذهب الى شركات الليموزين
وجرب استاجرها لمدة شهر .

والله ايوفق الجميع .

بصراحة هي فكرة حلوة
ومنها تكسب خبرة

في اعتقادي ان المستآجر اذا كان سعودي تكون قيمة الايجار اليومي اقل من الاجنبي ... ليس تحديدا ولكن اعتقد انها تتراوح ما بين ٨٠ الى ١٠٠ ريال ..
هذا شيء اما الشيء الاخر اللي حاب اني انبه عليه .. ان هناكـ بعض المؤسسات التي تختص في تآجير الليموزينات تآجر لكـ السيارة بنظام الانتهاء ب التملكـ..
ويكون القصد اليومي على حسب السيارة يعني من ٦٠ الى ٨٠ ك حد آقصى ... لكن المعضلة تكمن في آيجاد الكفيل وفي الاوراق المطلوبة كرخصة قيادة عمومي وما الى ذلكـ ..
احترامي لكم..

انصحك وبكل قوووه لايفوتك الليموزين فيه خير أنا ساكن بمحافظه قرب الرياض بحوالي 70 كيلو وأمشي الفجر ومارجع الا المغرب والله والذي لا اله الا هو أني اطلع 350 باليوم واذا الشغل مو زين ماتعدى 220 ريال بس تشتغل وتركب الهندي والباكستاني بعض اصحاب التكسي يطنش ويدور الحريم وهذا بشره بالخساره
والله ليله رمضان اللي فات اشتغلت من الفجر لحد الساعه 2 بالليل اللي حصلته 530 بيوم بس تعب بصراحه بس بالنهايه فلوووس والله اتمنى اني ساكن بالرياض فلوس وتلقى رجال شرواكم
التكسي ذهب واذا السياره ملك يكون احسن تعبك يصفى لك والمبلغ المطلوب للسعودي 70 ريال باختلاف نوع السياره وموديلها ويمكن واحتمال كبير يحطون مهنتك سائق ليموزين والشركه مستفيده لانها موظفه سعودي علشان عيون مكتب العمل
السياره ماتصرف عليك بالعكس
اعبي بنزين بعشره ريال تطلع 150 هذي معروووفه بس اشتغل بامانه وصف النيه والله بيرزقك
تشرفت بخدمه رجال وحريم وتعاملت مع الحريم بكثره والله بتلقى ناس تعطيك وتدعي لك
بس الامانه ياما ناس نسو معي فلوس وشناط وجوالات والحمدلله ارجعها لهم نكسب دعوه ويعوضني الله بخير ماكنت اتوقعه وهذي صوره سيارتي أماكن الدوران والشغل ، ( الدخل المحدود - البديعه - السويدي)






نصيحه لايفوتك الليموزين وسلامتكم

الله يعطيكم العافيه ياشباب ماقصرتوا

والله يرزقكم على قد نيتكم ياااارب

لكن السؤال وين احصل شركه تأجرني باليوم

ابي اجرب يوم يومين بس وين احصلهم

^
شف اقرب شركه ليموزين عندك اذا انت من اهل الرياض بالبديعه قرب اسواق الوشم
وعندك بالدخل المحدود على شارع الشركه باتجاه الغرب
ولازم يكون معك رخصه عمومي