السلام عليكم ورحمة الله وبركاته

كيف الحال عساكم بخير




انا حابه افضض واقول الي بخاطري وبكل صراحه بعد ماتاكدت اني بحاجه اني افصح عن الي بخاطري ولأول مره وبمنتداكم الي هوصار منتداي بعد مانظميت فيه



بقولكم حكايتي والاحداث الي مرت علي وبكل اسف
انا اتخرجت من الثانويه بنسبه مرتفعه ولله الحمد وكنت احلم اني اكمل دراستي الجامعيه بعد ماسهرت اليالي عشان اني اجيب النسبه

وبعد ماجبتها أبتدت قصة معاناتي
الي اثرت علي

وحده مبسوطه اول ماتخرجت ومعنوياتها 100على 100 ومتحمسه للحياة وللدراسه وللوظيفه


بعد ماخذت نسبه عاليه للاسف مانقبلت بأي مكان للدراسه وتحطمت نفسيآ الى درجة ان بعض الكليات قدمت عليها اكثر من 5 مرات بشهر واحد تخيلوا يعني

هذي اول سنة تخرج وبعدها للملمت جروحي وشلت الجامعه من بالي بشكل مؤقت وادخلت معهد ودرست كم دوره عشان اضيع وقت واستفيد

وخلصت دورات
وبعدها مانكتب للي اقدم للترم ثاني وبعدها صرت اقدم على وظايف على حسب المؤهلات


الي عندي ولله الحمد صح مادرست جامعه بس العلم الي عندي ممتاز وانا احب اتعلم

ومابقى شركه ولاومستوصف اسمع انه فيه توظيف الا وقدمت فيه وكنت اتامل خير وجلست سنه ونص على ذا الحال يعني مافي قبول ابد ونفسيتي كل مالها وتتحطم والمم جروحي واصبر واقول الحمد لله


وفي مره من المرات صارلي موقف مرتين تكرر معي قدمت على شركه وكلمني موظف شؤون التوظيف

وعلى بالي الرجال على اتصالاته وكل فتره متصل يسال عن شي انه صادق ولكن للاسف يبي يتسلى ويغازل على باله ان البنات لما يقدمون على وظايف قصدهم كذا

بدل مايحافظ على خصوصية البيانات الي عنده ويسوي شغله على اكمل وجه قام يتسلى بالاسماء ويتصل بالله عليكم موشي يقهر ليش وصل بعض الشباب الى هذي درجه

بدل مايساعد ويشوف شغله يروح يضايق خلق الله


بس احمد ربي ان انا ماخذه حتياطي للتوضيح بس انا cv يعني السيره الذاتيه حقتي اكتب الاسم الاول والعائله ورقم جوال
بس رقم الجوال وانا مخصصته بس للتوظيف يعني مش جوال الي اكلمه فيه عشان كنت حاسبه حساب المواقف الي تصير

لان في ناس ناقصين عقل مايهمهم الا ان يتسلون المهم
اخذت درست من الي صار معي وكملت مشواري بتقديم وبعد فتره تصلت علي وحده من موظفات لاحد شركات النسائيه ونبسطت ويوم
رحت تدرون وش قالولي
قالولي دوام 9 ساعات والوظيفه مندوبه مبيعات وياليت هذا السبب لا قالولي الراتب 300 ريال لكل اسبوع ولو انتي بالمكتب وماجبتي شغل لكل اسبوع تنخصم منك 300 يعني احسبوا كم راتب

1200تقريبآ واذا مالقيت شغل مافي امل تاخذ راتب وعلى طول تنطرد يعني اطق مشوار على الفاضي والشغل ارزاق مش شرط احصل شغل كل يوم وتركت الوظيفه من ثالث يوم

ووكلت امري لله وجلست بالبيت والى الحين وانا متعلقه بسراب
وهذي سنه نفس العام محد قبلني بالجامعات رغم نسبتي الي تاهلني ادخل الجامعه وبنتظام بعد بس مانقبلت رغم اني بعد هالسنه قدمت اكثر من 7 مرات رحت انا وراح اخوي وراحة ابوي ولا لقيت قبول



ادري بتقولون اجلسي بالبيت انتي بنت بس احب اقولكم وش ذنب البنت اذا عتمدوا عليها اهلها بان تنفعهم بعد ماتعبوا عليها ودرسوها

الحمدلله انا مش فقيره الحاله متوسطه ولله يعني عايشين بنعمه ومش محتاجين احد



بس انا عندي طموح وطموحي كلها طارت ماشفت شي مابقى موقع ماقدمت عليها مابقى فاكس مارسلت عليه قولولي بالله انا وش اسوي ؟؟؟؟؟؟؟؟



لا دراسه ولا وظيفه
انا اسفه على الاطاله بس هم بصدري ودي افضضه بينكم ومن زمان شايلته وانا ماذكرت اشياء كثيره تحفظآ عليها

ويمكن تتفاجؤن من صراحتي الزايده وخصوص اني بنت وتكلمت اتمنى ان الموضوع ماينحذف لاني ابي اشوف ردودكم ورايكم وشوركم علي



لاتقفلونها بوجهي بعد لاني تعبت من صدود ابي اشوف ردود تفتح النفس وتعلقني باالامل الي بدا يقل وينفقد يوم بعد يوم وجلسه على النت اكثر من 11 ساعه تخيلوا بس عشان ادور وظايف الله كريم الحين بس ابي احد يواسيني ويواسي الغير الي مثل حالتي



تقبلوا تحيات العاطله االمكافحه

عزوف الجروح