لاحظت الكثير منكم يوصف نفسه انه عاطل واللي بحث عن وظيفه ولا لقى واللي معاه شهادات ولا استفاد منها شي يحز الخاطر لكن...هنا بقولكم

ليه تترجون الخير من الغير وانتم بيدكم تصنعون المستحيل الزمن زمن صنعه الشهادة لا تغني ولا تسمن من جوع يعني ديكور في المنزل تعلموا لكم شغله مهنية وطوروها بدل هالركود والانتظار...

.ليه الواحد منكم ناقص ايد او رجل والا غير هالناس...حنا بشر محنا افضل من الرسول صلى الله عليه وسلم كان راعي حرفه مهنيه وهي رعاية الغنم مع ان بامكانه عليه السلام يصير اللي يبي هذا اكبر قدوة لكم ومشجع انكم يا اخواني واخواتي تشوفون حرفه مهنية وتطورنها للافضل وتكونون مميزين بها والله الغرب والصين مو احسن منا لو شغلنا مخنا وعلمنا نفسنا مو عيب ولا حرام .......يعني يرضيكم محلات الديكور ومحلات الصباغه ومحلات التنجيد ومحلات ورش الصيانه وغيرها يمسكها هالبنغاليه وغيرهم وحنا يا اهل الديرة جالسين بالبيوت ليه مانصير مثلهم مهم احسن منا

كل انسان فيكم اكيد عنده موهبه مدفونه وابد لا تخجلون من مواهبكم مهما كانت بسيطه طوروها في اي مجال

خلونا نفكر بهالتجار الكبار شوفو قصصهم قبل شكانو وكيف صارو ولا استحوا من مهنتهم....ليه مالواحد يتعلم صنعه مطلوبه عندنا بالمجتمع السعودي بكثرة اي صنعه كمثال صيانة السيارات حتى يكون الشغل سعودي 100% ونطرد هالعماله اللي مستحلين هالسوق
وربي انقهرت تسولف خويتي عن بنغالي مستاجر محل ايجاره 100 الف بالسنه عشان يفتح محل تنجيد وتقاططو له هالبنغاليه ايجار حق ست شهور اللهم لا حسد من وين لهم هالمبالغ الكبيره وكيف واثق تماما انه يستاجر مثل هالمحل بهالسعر ؟؟؟؟ لانه واثق بقدراته مو زينا نعتمد على الغير

بضرب لكم مثال
ولد جيارانا مثلا خطير بالعبث بالسيارات عوطلي لا شغله ولا مشغله غير يحورف بالسياره حقته وحقت اخوياه وصادف احد المستثمرين كان معزوم بالحاره اللي بها الشاب وانبهر بسيارة هالرجال كيف ابوابها تفتح على فوق وكيف غير شكل السيارة وخلا شكلها جذاب وشغل محكم خالي من العيوب..شوفو الرزق كيف يجي الانسان من اوسع ابوابه بفضل الله سبحانه وتعالى..المهم المستثمر اتفق مع هالشاب انه يفتح له ورشه ويتكفل بها من الى ويصير هو والولد شركاء فيها وافق الولد هذا حد علمي بالموضوع ..الموضوع حقيقي ولا هو من نسج الخيال المستثمر يصير حمى جارتنا ..

.ويارب لك الحمد الان المتبنين للمشاريع الصغيرة كثار ليه ما تستفيدون من هالشي بدل مالواحد او الوحده حاط ايده على خده خلونا نكون مجتمع نشيط يعتمد على نفسه لا على الغير...

الصراحه يوم مره رحت لسوريا وتعطل جمسنا وجينا نصلحه بالورشه انبهرت باللي شفت تلقون الواحد هناك ماسك شغله ومشغل عياله وعيال عياله ومافي يمه ارحمني كرف تبي فلوس اتعب يعامله كنه عامل عنده مو ابنه ..المهم .دار نقاش بين اخوي وصاحب الورشه من ناحية عياله يدرسون او لا لانهم صغار ويشتغلون مع ابوهم قال يدرسون وياويلهم يقصرون لكن لابد الى جانب الشهادة في صنعه يتعلمها لو ماضمن الوظيفه الا ضمن حرفه يشتغل بها ويكسب من عرق جبينه وينا حنا عن هالتفكير..

الجد حنا اخطئنا بالتربيه الصراحه
عيالنا عيال بلاي ستيشن وتربية خدم الواحد منهم يعجز يرفع الكاسه عن الارض او امه او ابوه او خواته مدلعينه من يومنه صغير ...وشبابنا حقين سهرات وطلعات استراحه نوم طول النهار همهم بس الوناسه مو حقين مسؤوليه يبون الرزق يجيهم ولا يسعون له


ليه ما تاهلون نفسكم وتقتحمون سوق العمل بخبرتكم لا بشهاداتكم...

بقولكم عن نفسي انا اومن بتفكير راعي الورشه وعجبني رايه ولازال كلامه لاخوي يدور براسي ...شهادة وحصلتها ودورات واخذت وخبره بالحاسب وتعلمت ...وتعلمت التصميم كمصممة جرافيكس ولا استفدت ...قررت اتبع سياسة راعي الورشة وهي اني اتعلم لي صنعه بشرط يكون لدي الميول لها واستهويها حتى ابدع بها...

انا قررت ان شاء الله اذا احياني ربي اني ادخل مجال صناعة مفارش الاسرة بالبدايه انا استهوي مفارش الاسرة ودايم اشتري وانقهر اشتريها مع المدة تبهت من الغسيل والاستعمال ويطفي الوانها...وحقات الماركات مثل دبمنهامز ولورا اشلي الوانها محدوده ومقيده ...قررت افصل تفصيل رحت لمحلات المفروشات المعروفه ولقيت الاسعار بالمره غاليه..روحت لمحل باحد الاحياء العادية يفصل مفارش برضوه نفس الشي غالي لكن ارخص من المفروشات بقليل بس الحشوة كانت اي كلام..قلت ليش انا ما اتعلم وانافسهم... اجمع بين السعر المناسب والجوده والشكل المميز

اول خطواتي ان شاء الله الالمام بمجال العمل اللي بدخل فيه واني اتعلمه فانضميت لمعهد للخياطه مدتة الدراسه ست شهور بعد شهرين ابدا الدراسه صباحا
سجلت بدورة خياطة الستائر والنجارة وتصميم كوش وتصميم الاكسسوارات تغليف هدايا بعض اعمال النجارة والاعمال اليدوية مدة الدراسه شهرين بعد شهرين ببدا الدراسه مساء

ثاني خطواتي باذن الله بعد متخرج من المعهد راح تكون امتحان لقدراتي بان اصمم لشخصي يعني اصمم مفرش لغرفتي ولغرف عيالي وبناتي لخواتي حتى اقيس قدراتي واقيمها شو ينقصني واطوره لما احس اني فعلا متمكنه وواثقه من عملي 100%

ثالث خطواتي ان شاء الله مرحلة التمويل ابحث عن ممول لمشروعي وعمل دراسة الجدوى

رابع خطواتي ان شاء الله الانتاج والتوزيع

بالنهاية بشوف من اللي يغلب الشهادة ام الصنعه وراح اذا الله راد ان اول عمل لي راح اطرحه عندكم حتى تشوفون بانفسكم كنت وكيف صرت...على فكره ترو معرف لا اخيط ولاشي ولا عندي اي خلفيه عن هالمجال لكن عندي ميول لاعمال اليدويه احب اتعلمها و وراح مستقبلا تعرفون كيف استفدت من موهبتي وتطورتها الا وهي التصميم الجرافيكس وكيف بدلها في مجال عملي ولم يسبقني احد اليه..دعواتكم لي

على فكرة انا كنت ادرس تمريض وطالبه مجتهده لكنني مللت من الدراسه انا ارغب بالعمل لا بالدراسه فتركت التمريض لاحقق ذاتي بيدي لا بشهادتي
ودمتم بود

بارك الله فيك

بارك الله فيك
ويعطيك العافية

والله اختي حالك من حالي..


تعرفين المشكلة ساعات بالمعارف يعني ما احد يعطيك الثقة يبي ياخذ وببلاش..



انا كوافير.. واعرف المكياج والتسريحات وعندي دورة..

وقريباتي يجوني بالمناسبات.. وكنت اسوي لهم واوقف 6 و7 ساعات.. كنت اسكت لانه ابي اخذ خبره..



وبعدها صار الكل من يسألهم اي كوافير.. يقولون بالبيت.. ما احد يجيب اسمي.. وطبعا ولا حتى نص ريال يندفع لي..



مرة طلبت منهم يعطوني فلوس بطريقة مؤدبة.. واسعار مرة رخيصة..
المكياج بدل 200 لمحل المكياج يدفعون لي 50 ريال..
الشعر بدل ما يدفعون 70 و100 انا طلبت 30 ريال للاستشوار..
لتسريحة الحين 200 او 250 انا طلبت بالتسريحة 50 ريال..


يعني اتاخذين مكياج وتسريحة ب100 ريال..


والله وكيلك الكل هرب لانه ما يبي من سعودية شئ ولا يبي يدفع لها ريال .. والمشكلة يروحون بمحلات والله اقل من شغلي مليون مرة ..ومكياجهم تبقع..بس عادي اذا سورية او لبنانية يدفعون لها..



حتى الحناية.. انا حناية بس مو ذاك الزود.. وصديقتي حناية شغلها حلو مرة.. واسعارها مثل باقي الحنايات.. بس ايش.. يرفضون ياخذون صديقتي ويجيبون حبشية..


من احد يسألني واقول سعودية وبنت قبيلة يصير لالالالالالالالالالا...




الحين قررت افتح لي مشغل .. بس مطلوب اخذ دورة خياطة.. الحين انا ادرس خياطة سنة تركت الوظيفة.. عشان افتح لي مشغل..


وان شاء الله ربي ييسر لي ولك يارب ..

الله يوفقك



كلامك درر

اختي المكافحه

هذي اهم كلمه في موضوعك....اعجبتني

الله يوفقك
وإذا عرضت أعمالك في هذه المنتديات
تراني أول زبون أبشتري من عندك

الله يوفق الجميع

ما شاء الله كلامك روعة الله يوفقك و يوفق الجميع