بدون مقدمااات

تعبت من جلست البيت والعطاله وحابة اني اسوي لنفسي مشروع

بس الحاااله طفراانه << بس هذا مايمنع اني كل يوم افكر في مشرووع

صادف اني جالسه مع جارتي عرضت عليها مشروع من مليون مشروع في راسي

المهم انها وافقتني الراي وقالت لي يالله انا معاك وبنص راس المال


الخلاصه انا فكرت في مشروع تقسيط المكيفات

يعني لو محتاج مبلغ تعال عندي وانا راح اساعدك

أنا اشتري مكيفات وابيعها تقسيط لك .. وبعدها ارجع انا اشتريها منك كاش وأنت تأخذ المبلغ ..

_بس انا ما ادري هل هذي الطريقه شرعيا تجوز وإلا لا .؟ << أني انا ارجع اخذها منك وإلا لازم تبيعها لأحد غيري ؟

_لو بديت بمبلغ 10 ألاف ريال تتوقعوا ممكن يمشي الحال معاي وإلا لآ .

_كيف اضمن حقي من المشتري ؟ << بحكم اني ابيع واشتري بدون محل !


ولو شايفين فيه مشروع ثااني احسن ياليت ماتبخلون علي ..

بالتووووووووووفيق للجميع

[align=center]
السلام عليكم اختي اشكرك على قوة عزيمتك وهمتك

المهم مشروع الاقساط بالنسبه للحريم مو حلو السبب انك ماتقدري تطالبي بحقك يعني لو مثلن بعتي لرجال وماسدد الاقساط كيف حتطالبيه بس اختي بما انك في البيت اشتري اغراض للحريم مثل العطور البجايم وبيعيها عليهم احسن..
والمكيفات حلوه بس بشرط ان يكون معك رجال يساعدك..
[/align]

لا اختي لا يجوز انك تشتريها منه ... يروح يبيعها على شخص اخر ما تربطك فيه علاقة او معرفه ...

اما طريقتك فهي محرمه ....

المشروع ككل ... لا اعتقد انه ينجح مع النساء .. لان وراك مطالبات و وراك مقابله للزبون واتصالات عليهم سددوا لا تسددوا .. الا اذا احد من اهلك راح يستلم الشغل منك ...

الشغله ما تنفع لك يالطيبه ... شوفي غيرها

لا كلام بعد كلام الأخ تسويقار
طيب ليش ماتقسطي
آيفونات وجوالات و هالسوالف
ترى فيها خير لكن المهم تتعاملي مع ثقات

بما انك فتاة عندي لك كذا اقتراح ..
الاول تقسيط صابون .. مربح جدا وعن تجربه احد الزملاء .. تروحي لاحد مستودعات الصابون وتشتري من عندهم مثلا صابون بقيمة 10 الاف ريال وتدفعي لهم المبلغ وتاخذي الفاتوره وتتركي الصابون عندهم
تسوي اعلان وياحبذا يكون للمدرسات لانهم هم الي يدفعوا من دون اي تاخير التزامهم بالدفع ممتاز
طبعا مجرد ماتجيك زبونه تعطيها الفاتوره بالقيمه الي تبغاها مثلا بـ 5 الالف وهي تروح للمستودع وتبيعه وتاخذ فلوسها وانتي تحددي القسط وعلى كم شهر وتحددي فائدتك كم ..
الضمانات الي تضمن لك حقك تطلبي شيكات من الزبون مثلا نقول القسط الشهري 700 ريال
تطلبي شيكات بتواريخ كل استحقاق القسط الشهري وتخليها عندك

اقترح اذا تعرفي لك مكتب عقار وتحطي فلوسك عنده وهو يشغلها لك يكون احسن

ثانيا تقسطي اجهزه جوال ايباد شاشات بلازما اجهزه لاب توب بعد فيها خير
وضمانات حقك بشيكات نفس الصابون ولا عقود من مكتب عقار

اهم شي تاكدي ان شغلك حلال 100% قبل كل شي وبالتوفيق لك ..

بعلمك شغلة عجـــايز .. بس عاد بعدين بترتاحين ..

شوفي الناس الآن ما عاد تسوي شغل العزايم في بيوتها يالله بس يتزينون الحريم ، و تبي تتكشخ ، و الرجال صاروا يدلعون حريمهم و يجيبون الأكل جاهز .. حتى السلطات و الأكل الشعبي ..

إذا والدتك أو أنتي محترفة طبخ .. فروحي لأسواق الجملة طقي لك كيس دقيق .. و معدات الطبخ و غيره .. و أبددئي بمبلغ بسيط .. و حاولي تبيعين للبيوت .. و إذا عندك أخوك في الثانوي و توه بادي يسوق قولي له كل مشوار تودي فيه لك عشرة ريال .. عشان يتحمس .. و تسوينها في حاظفات و يأمنون عليها .. بمجرد يرجعون الحافظات ترجعين لهم المبلغ


باختصــار الناس تبي تشتري راحتها هالوقت .. و مع خدمة التوصيل .. اووف أحلى شي صدقيني ينبسطون عليك ..


سوي لك إعلان نص صفحة .. و صوري مية صورة منه .. و قولي لأخوك بعزمك في مطعم على حسابي بس بشرط .. تروح تمر عند السيارات الي واقفة عند الأسواق طيبة و العويس .. و تعلقها على شباك الراكب .. و الا الباب الخلفي ..

و تسمي نفسك مثــلا أم فيصل و الا أم ياسر و الا أم صــهــل ( مميز بيعلق هالأسم ) .. و تقولين نقدم لكم جميع الأكلات الشعبية .. باسعار مناسبة .. صدقيني بتحطها الحرمة في شنطتها و بتكلمك و بتناقشك .. و أضمن لك بس أول عشر زباين يزبط شغلك معهم .. و الله كل وحدة تعطي أقل شي ثنتين ... صدقيني يا أم صــهـــل بتقولين بس بس بس فلوووس

و ما يمنع تجيبين خدامة زيادة بعدين شغلتها تعاونك في الطبخ و كذا و تعودينها
عاد زينة الخدامات مو زي اعمال ينحاش و لا تشوفينها
في بيتك ما فيه امل تطلع