كان فيه شايب اسمه حمدان كان هواوي " مايشوف بنت الا ينفتن فيها "

وكان طيب وحبيب .. وكانت في بنت في نفس القبيله راعيت مقالب " ملكعه"

قالت في نفسها ليش مااروح للشياب امزح معه شوي واستهبل عليه واوسع صدري

واشوف وش رده فعله وارجع .. قامت وراحت للشايب وسلمت عليه وقالت كيف حالك ياشايب ؟؟

رد السلام وقال بخير الحمد لله وفجأه عطته ظهرها وراحت ولا أستأذنت وولا شيء

عاد الشايب ولع من حركتها وكتب فيها كم بيت يستعطفها فيها وبيقول انها ذكرته بايام أول

و بالماضي وقال لها انها

اذا ماعطه وجه لحق باخوه حمود الي في قبره !

وذكر بعد اليوم الي قابلته فيه البنت في قصيدته .

يقول الشايب:

يا بنت خوذي خاطري وارحميني***لا تجرحين العود بعيونك السـود

غضي نظرك وغطي الوجنتينـي***لعل يومٍ جدد الجرح مـا يعـود

يوم انتهى مع مرمسات السنينـي***جتني صواديفه على غير مقصود

باول شهر عشره نهـار الثنينـي***حمدان مروا به على جنازة حمود

البنت كانت تقصد من استفزازه انها تجاريه في الشعر وترد عليه

والمسكين ما كان يدري انها شاعره

فردت عليه وهزأته تقول:

يا شايب الرحمن وينـك ووينـي***عزي لحالك قدمك الباب مسـدود

قلبك عطوف وجاه قلـبٍ متينـي***والبنت ما تشفق على مغازل العود

حبل الرجا مقطوع بينـك وبينـي***مثل الغليث اللي رعا قلبه الـدود

اقفى شبابـك والعـرب مقبلينـي***يا عود ما يرجع من العمر مفقود

حطمته يوم قالت له انك عود وان الشباب ما يرجع وان ما فيه امل

تعطيه وجه حس العود انه تورط وقال كم بيت يقول لها صدي عني

انه ما يبي الغزل بعد ما وصل عمره ثمانين سنه

يقول حمدان :

يا بنت صـدي بالعيـون الظليلـه***لا صد عنـك الله نهـار القيامـه

مالي ومالك يالفـروع الطويلـه***لو فيك من رسم البـداوه علامـه

يابنت مـا لـي بالثمانيـن حيلـه***اهدف كما تهدف على البير قامـه

اقفى شبابي والدهر شفـت ميلـه***يالله حسـن الخاتمـه والسلامـه

اعطيك موجز والبضاعـه قليلـه***واخذت لك من صافي الماء سنامه

راحت الايام والشايب مسكين سنه خذله معها شايب

وهي بنت وتقول له كيف اعطي شايب وجه


بعد فتره مرته مره ثانيه وردت عليه السلام واستفزته وراحت

وخلته ولع الشايب مره ثانيه وقال ليه ما ابين لها في كم بيت انها بتشيب

مثلي واني رجال طيب وان الناس تنصاني ومعروف بالكرم واني

ما ابي منها غير التحيه والترحيب


يقول حمدان :

يا بنت ما جاس الكبـر والخشونـه***وعادت شباب اليوم يجفل من الشيب

ياسرع ما وبلـك تمـزع مزونـه***يالفاتنـه يـا ام الثمـان الرعابيـب

يا بنت مـا بينـي وبينـك مهونـه***كلمة شرف نبي تحيـه وترحيـب

الله مـن عـودٍ ثقيـلـه طنـونـه***ينصاه راع المشكلـه والمواجيـب

على الكرم والديـن نفسـه حنونـه***تلقاه بالاجـواد شـرق وتغاريـب

جهز الابيات وارسلها مع عجوز ووعد العجوز بهديه اذا وصلت الرساله لها

راحت العجوز وعطت البنت الابيات شافتها البنت وقفلت على العجوز في غرفه

وقالت مثل ما جيتي بابياته ترجعني بابياتي العجوز مسكينه قالت طلعيني ولا ابي

منكم شي الله لا يعودكم انتم واوراقكم. ردت البنت ابيات اقوى من الاولى واكثر

تحطيم مسكين الشايب ما احد رحمه حتى لو حاول يستعطف


تقول البنت :

العود عود وطايحـاتٍ سنونـه *** من كثر ما يرقد على جرة الذيب

عودٍ مهرقل والعرب ما يبون*** ياعود ما لك في طويل المراقيب

اقفى شباب العود راحت حتونه***مثل اليتيم اللي بكا ما له مجيب

جداه ينثر دمعـة ٍ مـن عيونـه***غريق موجٍ ما لقا له مقاضيـب

الله يخارجنا

يعطيك العافيه اخوي عاطل علي القصص والقصائد الاكثر من رائعه

الحب لولا عيونك تسلم على المشاركه الحلوه

ابو سيف الله يعافيك

يا ابوي عذبني جفا رمش صيته

شخص سكن إحدى القرى وتولع بحب ابنة عمه (صيته) بنت الشيخ بتّال

وكانت صيته تعني له الشيء الكثير خصوصاً وأنها تحضى بقدرٍ لا بأس به من الجمال ولكن طبيعتها

القروية جعلت من عاشقنا الولهان شخص رقيق: فهاهو يشكو بُعدها عن عينيه فهو لم يعد يراها ,

ويقول لوالده :

يابوي عذّبني جفا رمش صيته

صارت حياتي بين همٍ وغربال

البعد يا صيته ترى ما نويته

لا تسمعي للهرج والقيل والقال

أنتي دفا القلب المعنّا وبيته

وانتي علاج الروح يابنت بتّال

منك ابتديت الحب وفيك انتهيته

يا اجمل بنات الخلق في كل الاحوال

والله لوترضى بهالحب صيته
لأجعل مهرها من عزيزات الأموال

وأخيراً يسمع والده هذه الأبيات ويأخذ بيده الى بيت عمه الشيخ بتال ويطلب (صيته) لولده

ويوافقون عليه زوجاً لها وتستمر فترة الخطبة ويسافر هذا الشاب الولهان الى

إحدى المدن الكبيرة حيث وجد عملاً في المطار الدولي .

وأثناء انشغاله بتجميع مهر محبوبته (صيته) اذ يقابل المضيفة اللبنانية (تغريد) ويفتتن قلبه بجمالها

ورشاقتها ولتختلط الرؤية في عقله حيث انه لا مجال للمقارنه بين ابنة عمه القروية (صيته) والمضيفة

اللبنانية (تغريد) ويحاول التقرب منها ولم تمانع هذه الفتاة من اظهار اعجابها بوسامة صاحبنا و طيبة

قلبة وخفة دمه ولكنها تقول له انها سوف تنهي خدماتها في هذا البلد وسوف تسافر الى بيروت , بلدها

الاصلي والمكان الذي عاشت فيه طفولتها , حيث بيتهم الجميل الذي يطل على شاطيء البحر الأبيض المتوسط

ويأتي اليوم الذي يعلن فيه صاحبنا لـ (تغريد) عن حبه لها وافتتانه بجمالها , ويعاهدها انه سوف يسافر

الى بيروت ليطلب يدها من اهلها ويرسل صاحبنا الى ابيه هذه الابيات … بدت قلة الخاتمة:


يابوي انا غيّرت رايي بصيته

ماعاد ابيها لو تقولون بريال

القلب شاف اللي على الشط بيته

فيها الجمال وصافي الحسن يختال

يابو عيون وساع قلبي كويته

مابين قلبينا تقاطيع وارسال

وضّبت قلبي لك وغيّرت زيته

منشان تقبلني على عثرة الفال

ياحبني للبنان لو ما لفيته

لا صار خلي وسط بيروت جوال

إن ما نواني بالمواصيل جيته

أسوق له من صافي الحب فنجال

الشيخ الشاعر :سعيد بن عويض آل مهود الروقي عاش في عالية نجد والطائف ,وكان ماله قليل يرحمه الله وفي أحد الأيام جاءه ضيوف عزيزين عليه ولهم قدر كبير عنده ,فأرسل ابنه إلى رجل لديه غنم ورجع ابنه يقول:لقد رقض الرجل طلبنا ياوالدي وقال أنه يطلب منك دينًا لم تسدده فأخذ بندقيته ورهنها في قيمةالذبيحةالتي قدمها لضيوفه ,وقال هذه الأبيات الشعرية:

لم يكن الحصول على القهوه فيما مضى أمرا سهلا ولم تكن تتواجد الا عند القله القليله من سكان الجزيره حيث الفقر راكز اطنابه . لكن الشيخ مهل بن عتيق الرياحي البقمي كان له مجلس لقبيلته وضيوفه وكان له نجر يسمى (منادي) نظراً لصوته الذي يسمعه جيرانه والطرقيه من العابرين وكان مجلس الشخ مهل ( مدهال ) للضيوف نظرا لكرمه وحبه للضيوف ولكن الايام مرت وأجبرته الظروف الصعبه أن يبيع نجره الملقب بـ (منادي) ودلال القهوه الخاصه به وبعد أن باعها ولم يعد عنده نجر أخذ يبحث عن بديل نجره حتى وجد نجرا خشبياً لا صوت له وبرادا أسود بعد تلك الدلال التي تلمع وقام في صباح اليوم كعادته يوقد النار ويعد قهوته ولكن هذه المره لم يأته جيرانه في مجلسه لذا أرسل ابنه (حراز) لدعوتهم وعندما اجتمعو في مجلسه سألهم لماذا لم تأتوا مثل عادتكم فقالوا لم نسمع صوت (منادي) نجره قلنا ربما الشيخ مشغول ولم يكن في مجلسه بعد ذلك قص عليهم قصة بيعه لنجره منادي ودلاله المميزه عندما اجبرته الحاجه والظروف واشترى بدلا عنها هذا النجر الخشبي وهذا البراد الاسود ثم قال هه الابيات :






يالله يالـي تجعـل النـور بـادي
يامـطـلـع فالبـيـنـه والخـفـيـات
تفرج هموم تدلـج فـي فـؤادي
والعيـن عـيـت لا تخليـنـي ابــات
أنا أحمد الي عاضني في منـادي
بنجر (ن) صموت(ن) مايهيض بالأصوات
وشريت بـراد كسـاه السـوادي
مـن عقـب هذيـك الـدلال العـذيـات
يا (حراز) ما حنا الرخوم الزهادي
حنا هـل الطـولات فـي كـل الأوقـات
يازيـن فـوح ادلالنـا بالقنـادي
وليا هبطت أشتري لهـا سبـع حاجـات
ويازين سوقه للوجيـه البـوادي
بـن مصفـى مايجـي فـيـه خــلات
زال الولد في شبته لـه هـدادي
ورزقـه علـى الله مايفيـد التشـتـات
ليا ادرج له الله رزق ماهوب غاي
وكثر الحسايـف مـا تجيبـه ليـا فـات

0
0
0

لاشك ان الدنيا مليئة بالعجائب ... ولله في خلقه شئون ... وان مما يثير العجب لدى الانسان هو الكلام عن الغائب والمجهول ... فتكثر الاساطير والاقوال الكثيرة حول ذلك.


والجن من أغرب مخلوقات الله سبحانه وتعالى ... بل يعتبر مصدر الخوف لدى بعض الناس ... مع العلم ان الجني يبادله نفس الشعور في الخوف .

والمطلع على روايات العوام يجد العجب العجاب من تلك القصص ... ولكن هل نصدقها أم نكذبها ... لأننا لم نراها !!!

على العموم الجن مخلوق من مخلوقات الله ... وهو مكلف ... ويجب الإيمان بوجوده ... لأن الشريعة الاسلامية تقر بوجود الجن ... وقد تكلم القرآن الكريم عنهم والسيرة النبوية أيضا ... بل ان الاحاديث الشريفة ذكرت أصنافهم ...

وانهم ثلاثة اصناف ... فصنف لهم أجنحة يطيرون بها في الهواء ... وصنف حيات وكلاب ... وصنف يحلون ويظعنون


وبما أن المجتمع مليء بالكلام عن الجن وقصصهم ... وأشعارهم وأمثالهم ... فإنه يتحتم علينا عدم إهمال تلك الروايات والاساطير ... لأن فيها إثراء للأدب الشعبي.

يـــلا نبــدأ .. بســم الله


هذه القصة جرت على احدى القبائل العربية في الزمن السابق (قبل مائة عام تقريبا) ...

اختفى رجل من قبيلتهم ولا يدرون وين مكانه ... بحثوا عنه في كل مكان ولا لقوا له اثر ... وبعد مده ... قرابة الشهر او الشهرين ... كان واحد من هذي القبيلة ابن عم للمفقود مفلّيٍ اباعرة في الخلا ... واسمه علي ... وكان علي هذا قاهرٍ المقهور ... وقريب منه رضم كبار ( صخور كبيرة) ... ويوم شاف البل رتعت وبعضها برّك ... انسدح وحط راسه على الارض ... وما أثاره إلا صوت رجل يغني ... ابك هذا وشنهو ... أنصت على لصوت المغني ... والصوت مهوب غريب عنه ... كنه صوت ولد عمه المفقود ... المهم تثبت الرجال منه ... وكان الصوت يجي من يم الرضم ... قام يتوحي في قصيدته اللي يغنيها ...


لينه يقصده بالكلام ويقول:




يا علي صحت بالصوت العليّ ****يا علـي لا تحمّلنـي مـلام
يا علي لا بليـت بمقعـدي ****بين صدعين في غدرىً ظلام
آآه يا ونتي عند ولـد التنـي ****عند ثـلاّم مـردوع الوشـام


قام علي مسرع وركب الذلول ... وتوجه يم العرب يصيح ... انتبهوا الناس له ... وجوه من كل مكان ... أنت علامك يا ولد ... أباعرك اخذتها القوم ...

قال انا اوحيت حس فلان ( المفقود) يغني في الرضم ... ويقول كذا وكذا
فزعوا العالم له وقاموا يفتشون الرضم حصاة حصاة ... ويوم جوا عند هاك الصدع الكبير بين رضمتين ... لقوا الرجال المفقود ميت... فعلاً بين صدعين في غدرى ظلام... لكن منهو اللي قال القصيده اللي سمعها على ؟! الرجال لقوه ميت من مبطي !!!


طبعا القوم قاموا يتفهمون القصيدة اللي حفظها علي واكتشفوا ان سبب قتله كان عند عرض اخت (ولد التني) ... وكان ولد التني هذا يعرفونه من اقصى الجماعة ... وقاموا وطلبوا منه الدية ... ودفعها لهم ولد التني.


(الجني العاشق)


هذي القصة قريبة نسبياً .... يعني قبل حوالي ثلاثين او اربعين سنه.... كان فيه بنت مع اهلها ... وتسرح في الغنم .... وعلى هذي الحالة طول الزمان ...

وفي يوم من الايام ...

يوم ضوت الغنم على اهلها ... البنت ما ضوت معها ... راحوا اهلها يدورونها في الليل ... يا الله اني دخيلك من الهجاد ... وما لقوها ... ويوم اصبح الصبح وهم يروحون يدورونها في مفلا الغنم امس ... ويلقونها طايحة على الارض مريضة ... ويشيلونها ويودونها للبيت ... ويوم جت في البيت وهم يعطونها عيشة .... وتاكل ... وهي تقوم تهرج لين ما بها غير العافية... أخذت لها أيام على هذا الحال ... ولكنها مرضت من جديد ... واهلها ما يدرون وش فيها ... راحوا يعالجونها في كل مكان ... وما لقوا لها علاج .

جاهم واحد من ربعهم وقال (ترى فيه واحد في الكويت يعالج مثل هالحالات ) .

عزموا اهلها انهم يعالجونها في الكويت ... وقالوا لواحد من اخوانها ... يا فلان اسرح في الغنم ... وحنا نبي نروح نعالج اختك في الكويت ... طبعا هي تركت السرحة من زمان بسبب وجعها ... ويوم راحوا للكويت ... واخوها سارح في الغنم ... وكان قريب من احد الجبال الصغيرة ...


سمع له صوت واحد يغني ورى الضلع ويقول:





هذي مفالـي خـويٍ لـي ****(........................)
اللـي قرونـه شعافيـلـي ****وامضللاته عـن الشمسـي
وخويتماتـه تفـاريـزي ****ومفرقاتٍ علـى الخمسـي



ويوم رجعوا من الكويت علمهم باللي سمع ... واكتشفوا ان اللي فيها جني ... وراحوا يعالجونها عند مطوع ... واخرج الجني منها ... واشفاها الله.






في احد السنين ..

تأخر الرجع عن نجد ... والشمال ربّع ... وأحالوا اهل نجد للشمال قريب من حايل ... يبون الحيا ... وربعوا وعينوا من الله خير ... وكان وحده من حريمهم اسمها هدابة ... أصابها حمى ... وماتت ... الله يرحمها ... قاموا وصلّوا عليها وقبروها في صاح هاك الضلع ... وراحوا وخلوها ... وجاء القيض ويبس العشب ... وكلٍ رجع لديرته.


مرت السنين والسنين على هاك الربيع ... وفي يوم من الايام كان لجماعة هدابة غرض في حايل ... عند ابن مساعد ... راحوا له ويوم قضوا غرضهم نكسوا راجعين ... وهم سارين في اليل انهكهم التعب ... وقالوا خلونا نمرح ونريّح ركايبنا ... ويوم نوخوا وهم يبطّون النار ويسوون عشاهم ... ويوم تعشوا وهم يتسدحون ... ذابحهم التعب ... بس الرياجيل ما رقدوا ... لأنه ايقضهم صوت حرمة تغني بأعلى صوتها في راس الضلع في الليل ... والصوت بعد مهوب غريب عليهم ...


قاموا يتوحون فيها لينها تقول:





شيلوا على الاملح بقايـا زهابـه ...جملكم اللي فـالعشايـر تهـدّون
ذيله على العرقوب غادٍ اخضابـه ...وَقْم الرباع او السديس او بعد دون
قولوا هـذا قـولٍ تقولـه هدابـة ...والاجنبي بديار الاجناب مشحون




ويوم اصبح الصبح اكتشفوا انهم جنب امراحهم هاك السنه اللي ربعوا فيها يم حايل ... وان الضلع اللي كانت تغني على راسه الحرمة هو الضلع اللي قبروا هدابة فيه.

الله يرحمك يا هدابة ... والله اني اول ما سمعت هالقصة وكنت في وقتها صغير حزنت لاخر درجة.... وراهم يخلونها في ديرة القوم.


((ومن الامثال اللي جرت على ألسن الجن))



( يا الله اقلعها عنا لو حذفت حصاة)

هذا المثل مثل معروف عند العامة ... وقصته ان فيه رجال له ابن وبنت ... قدر الله وماتت البنت ... وقام الابو والابن يحفرون القبر ... ومن العصر لين المغرب عجزوا يحفرون شي ... لأن الارض صلبة ... ولا يدرون وش سبب صلابة الارض ... لأنهم يحفرون القبر في ارض هشه وكأنهم يحفرون على الصفى ... وامسى الليل وهم ما سوو شي ... صابهم الارهاق والتعب مع الحزن ...

وجلس كل واحد لحاله ... حاطٍٍ يدينه على عيونه من التعب ... ولا افزعهم الا صوت رجل غليظ يقول ( يا الله اقلعها عنا لو حذفة حصاة) ... قام الابو واخذ له حصاة وحذفها .... ويوم وقعت في الارض قال لولده ... تعال نبا نحفر هناك عند مطيح الحصاة ... وفعلا حفروا القبر وتيسرت امورهم ... وهم قبل كانوا يحفرون فوق بيت جني .... بغوا يشقون السطح على الجني.


( انت وش عليك من ذيبي ياكلني ولا ما ياكلني)


كان راعي ابل معشيٍ اباعرة العصر ... على فرسه ... ومعه العبد يقهر المقهور ... ويوم جاء العير (العصر المتأخر) قال للعبد ... يا فلان حط عينك على البل ...انا ابا اروح ادور لها مبيتٍ زين ... مشى من عند العبد على حصانه ... يدور لاباعره مكانٍ دَمْث تبرّك فيه البل في اليل ... ويوم رقى هاك الزبارة ... سمع له صوت ورعٍ يصيح ( يستنجد) .... يوم عاين في اسفل الخبة ... لين فيه عواشز (العوسج) ...

والورع يدور حولهن ويصيح ... وفيه ذيبٍ يراوغه مع العواشز ( كلما راح الذيب في جهه راح الورع في الجهه الاخرى) ... صاح الرجال على الذيب ( الخلا ... الخلا ) وهذب الحصان يمه ... والذيب يوم سمع صوت الرجال هج ... ويوم اقبل الرجال على الورع والعواشز ... قال للورع ... ابك هو بغا ياكلك ... قال الورع ... انت وش عليك من ذيبي ياكلني ولا ما ياكلني ...

ويوم قرب منه ليا هو مهوب ورع طبيعي ... شوشته كلها شوك ... وعيونه مثل الصدوع من فوق لتحت ... وقال له ... الله يجعله ياكلك ولا يخلي لك شريدة ... ويوم اقفى عنه ... ووصل راس الزبارة اللي سمعه منها اول مرة ... سمعه يصيح بعد ... ويوم التفت يمه لين ذيبه اللي اولا يراوغه بعد ... بس هالمرة ما رجع له ... راح وخلاه في حال سبيله هو وذيبه ... ويوم جاء النهار الثاني ... والبل تمر العواشز حقة الجني ... ويمر الرجال على العواشز ... ويلقى مفارس الذيب للجني ... وفي المكان نطف دم بسيط ... وكان الذيب حافر له زرب صغير في طرف احدى العواشز ... عاد الرجال فسر محفر الذيب للزريب ... ان الجني ( الورع) كان ناوي يدخل في بطن الارض... بس الذيب صاده قبل تبلعه الرقة ...

والبادية يقولون ان الجني ليا شاف الذيب ما عاد تبلعه الارض ... ومن رواياتهم عن الذيب يقولون انه سبع ليال يتعشى من البهايم وخشاش الارض ... وسبع ليال يتعشى من الجن .وسبع ليال من الجميم الايبد

السلام عليكم ورحمة الله وبركاته

وأسعد الله مساكم جميعا بكل خير

مثل ما للعرب الأوائل من معلقات فإن للعرب الأواخر معلقات أيضا وهذه إحدى معلقات وكنوز موروثنا الشعبي الغالي
فموروثنا الشعبي يزخر بالكثير من القصص القيمة والرائعة والعظيمة التي سطر مواقفها وأحداثها رجال من جزيرتنا العربية فحفظها التاريخ الأصيل لتبقى للأجيال درساً وموعظة وضربت بأحداثها الأمثال في المجالس العربية والأشعار العامية وهذه احدى تلك القصص النادرة التي لا يمكن أن يتم التطرق لموضوع الصبر أو الجيرة بدون أن تذكر قصة المهادي ومفرج السبيعي ففي هذه القصة من الطيب والشجاعة والصبر والحكمة والموعظة الشيء الكثير ، وفيها من حقوق الضيف والجار القدر الكبير ، وفيها من النخوة والشهامة الزخم الوفير .

محمد المهادي من فخذ عبيدة من قبيلة قحطان ومفرج السبيعي من قبيلة سبيع وقد عاشا في القرن الحادي عشر الهجري وللمهادي والسبيعي حكاية غريبة عجيبة وان اختلفت روايتها إلا أنها تبقى رمزا للتضحية والوفاء والإيثار
وتقدير الجار للجار في أروع الصور التي يمكن للعقل تصورها ، وقصتهما بشكل عام هي أن المهادي نزل على قبيلة سبيع وهو في طريقه ومكث عندهم أيام عشق خلالها بنت عم مفرج السبيعي ولم يكن يعرف أنها بنت عم السبيعي ونظرا لتوطد علاقته مع مفرج السبيعي اتجه المهادي لمفرج كي يخطبها له وكان السبيعي يحبها وهي تبادله نفس الحــب وعلى موعد للزواج قريبا ولكن السبيعي اكراماً للمهادي لم يخبره بتلك الحكاية وزوّجها له بغير رضاها وعندما علم المهادي من البنت عن الحكاية كاملة بقي معها اسبوع ثم طلقها لتعود لابن عمها ورحل المهادي إلى دياره،
وعندما دارت الدنيا على السبيعي وأصابه ما أصابه من سؤ الأحوال تذكر صديقه المهادي فرحل إليه هو وزوجته واولاده فاستقبله المهادي أحسن استقبال وأنزله في بيته، وفي نفس الليلة التي نزل بها السبيعي على المهادي قام السبيعي عن غير قصد بقتل ولد المهادي فكبرت المصيبة على مفرج ولكن المهادي هوّنها وكأن شيئاً لم يكن وبقي السبيعي في ديار المهادي ضيفاً مكرماً وصديقاً مقربا للمهادي فترة طويلة من الزمن ، وفي ذات ليلة سمع مفرج من جاره المهادي كلمات احتار في تفسيرها فقد كان المهاادي يقول (.. اما ارحلوا والارحلنا ..) فرحل السبيعي مستغربا عدم معارضة المهادي لرحيله ، ولكن السبيعي لم يهدأ فقد اخذ يبحث عن السبب فاكتشف ان السبب هو أن أحد أولاده قد قام بمضايقة بنت المهادي فتره طويلة وصلت إلى ما يقارب الثمان سنوات سنوات وهو يراودها عن نفسها والمهادي صابر لا يتكلم حتى أخبرته ابنته بأن الولد يكبر وقد قويت شكيمته ولم تعد تقوى على صده وبسبب ذالك قال المهادي الكلمات التي حيرت السبيعي ( ارحلو والارحلنا ) .فما كان من السبيعي الا أن قام بقتل ابنه اكراما ً لجاره المهادي ووضع رأسه في كيس وأرسله مع أكبر أبنائه إلى المهادي بعد أن رحل عنه ، وما كان من المهادي إلا أن لحق بالسبيعي وأرجعه إلى دياره وعاشا جيران بقية العمر معاً ، وهناك رواية تقول بل زوّج البنت لابن مفرج الذي أتى حاملا رأس أخيه في الكيس وعاد الابن بزوجته لوالده ثم رحلوا لديارهم ، وقد قال المهادي قصيده يتحسر على فراق مفرج السبيعي عندما رحل عنه :





يقول المهادي والمهـادي محمـد=وبه عبرةٍ جمل الملأ مـا درابهـا
أنـا وجعـي مـن علـةٍ باطنيـة=بأقصى الضماير ما دري وين بابها
تقد الحشا قـد ولا تنثـر الدمـاء=ولا يدري الهلبـاج عمـا لجابهـا
إن أبديتها بانـت لرماقـة العـدا=وان أخفيتها ضاق الحشا بالتهابها
ثمان سنين وجارنـا مجـرمٍ بنـا=وهو مثل واطي جمرةٍ ما درابهـا
وطاها بفرش الرجل لو هي تمكنت=بقى حرها ما يبرد الماء التهابهـا
ترى جارنا الماضي على كل طلبة=لو كان ما يلقـى شهـودٍ غدابهـا
ياما حضينا جارنـا مـن كرامـة=بليلٍ ولو بني الغبـا مـا درابهـا
وياما عطينا جارنـا مـن سبيـة=ليا قادهـا ****هـا مـا انثنابهـا
نرفا خمال الجـار لـو داس زلـة=كما ترفا بيـض العـذارا ثيابهـا
ترى عندنا شات القصير بها أربـع=يحلف بها عقارهـا مـا درابهـا
تنـال بالمهـادي ثمـانٍ كوامـل=تراقى وتشدي بالعلا من صعابهـا
لا قـال مناخيـرّ فــرد كلـمـة=بحضرة خـوف الزرايـا وفابهـا
الأجواد وان قاربتهـم مـا تملهـم=والأنذال وان قاربتها عفت مابهـا
الأجواد وان قالوا حديـثٍ وفوبـه=والأنذال منطوق الحكايـا كذابهـا
الأجواد مثل العد من ورده إرتـوى=والأنذال لا تسقـي ولا ينسقابهـا
الأجواد تجعل نيلها دون عرضهـا=والأنذال تجعل نيلها فـي رقابهـا
الأجواد مثل الزمل للشيـل ترتكـي=والأنذال مثل الحشو كثير الرغابها
الأجواد وان ضعفوا فيهم عراشـة=والأنذال لو سمنوا معايا صلابهـا
الأجواد يطرد همهم طول عزمهـم=والأنذال يصبح همها فـي رقابهـا
الأجـواد تشبـه قـارةٍ مطلحبـة=لا دارها البـردان يلقـى الذرابهـا
الأجواد مثـل الجبـال الـذي بهـا=شـربٍ وظـلٍ والـذي ينهقابهـا
الأجواد صندوقين مسـك وعنبـر=لا فتحـت أبوابهـا جـاك مابهـا
الأجواد مثل البدر في ليلة الدجـى=والأنذال ظلماً تايهٍ مـن سرابهـا
الأجواد مثل الدر في شامخ الـذرا=والأنذال مثل الشري مـرٍ شرابهـا
الأجواد وإن حايلتهم مـا تحايلـوا=والأنذال أدنـى حيلـة ثـم جابهـا
الأنذال لو غسلوا إيديهـم تنجسـت=نجاسة قلوب مـا يفيـد الدوابهـا
يـارب لا تجعـل بالأجـواد نكبـه=حيث لا ضاع الضعيـف التجابهـا
أنا أحب نفسي يرخص الزاد عندها=يقطعك يا نفـس جزاهـا هبابهـا
لعل نفـسٍ مـا للأجـواد عندهـا=وقار عسى ما تهتني في شبابهـا
عليك بعين السيـح لاجيـت وارد=خل الخباري فـان ماهـا هبابهـا
ترى ظبى رمـان برمـان راغـب=والأرزاق بالدنيا وهو مـا درابهـا
سقى بالحيا ما بين تيمـا وغـرّب=شمال غميق الجوع ملقى هضابها
سقاها الولي من مزنـةٍ عقربيـة=تنثر دقاق الماء في مثاني سحابها
لمطرت ذي ورعدت ذي بساق ذي=سنا ذي وذي بالماء غارق ربابها
نسف الغثا سيبان ماها ليا أصبحت=يجي الحول والماء ناقع في ترابها
دارٍ لنـا مـا هيـب دار لغيـرنـا=والأجناب لو حنـا بعيـد تهابهـا
يذلون من دهمـا دهـومٍ نجرهـا=نفجي بها غـرات مـن لا درابهـا
ترى الدار كالعذرا ليا عـاد مابهـا=حرٍ غيورٍ فكل من جـاء زنابهـا
ياما وطن سمحات الأيدي من الوطا=وعدينا عنها من دنا من هضابهـا
تهامية الرجليـن نجديـة الحشـا=عذابي من الخـلان وأنـا عذابهـا
له بياض عيـون المـاء منـازل=عذب زلال الماء قـراح شرابهـا
سقاني بكـأس الحـب در منهلـه=عندل من البيض العـذارا أطنابهـا
أريتك ليا مسنـا الجـوع والظمـأ=واحتر من الجوزاء علينا التهابهـا
وحما علينا الرمل واستاقد الحصى=وحما على روس المبادي هضابها
وطلّن عذارا من ورانـا يشارفـن=عماهيج مطـوي العبايـا ثيابهـا
ليا نزل منا في منزل هجر نولهـا=مراغيث تستن لولاك في عقابهـا
غرنا على البراق في جال تيمـاء=وأخذنا عليه ابـل طـوال رقابهـا
طوينا سقي الهلباج عن شمخ الذرا=جينـاه مـع داويـة مـا درابهـا
قطعنابهم الحبـل القصيـر وبيننـا=صفون كما أفواه القوالي ارقابهـا
ولحقوا مغاوير على كـور حـزّب=على رمك كن الظـلام انكسابهـا
قلت اللهم لا بلّهـم وابـل الحيـا=ولا جاذبوا بيض الترايـب ثيابهـا
ليا سرت منا يا سعود بـن راشـد=على حرةٍ نسل الجديعـي ضرابهـا
سرها وتلقى مـن سبيـع قبيلـة=كرام اللحا في طوع الأيدي لبابهـا
فلابـد مـا نفجـأ سبيـع بغـارة=على جرد الأيدي درعوها زهابهـا
عليها من أولاد المهـادي غلمـة=لا طعنوا مـا ثنّـوا فـي عقابهـا
وأنـا زبـون الجاذيـات محـمـد=ليا عزبوا ذود المصاليـح جابهـا
محالله عجوزٍ من سبيع بن عامـر=ما علمت غرّانهـا فـي شبابهـا
لها ولدٍ ما حـاش يـومٍ غنيمـة=سوى كلمةٍ عجفا تمـزا وجابهـا
يعنونها عسمان الأيدي عن الخطأ=محالله دنيا مـا خذينـا القضابهـا
عيون العدا كم نوخن مـن جديلـة=لا قـام بـذاخ السوالـف يهابهـا
أنا أظـن دارٍ شـد عنهـا مفـرج=حقيقٍ يا دار الخنـا فـي خرابهـا
وأنا أظن دارٍ نـزل يمهـا مفـرج=لا بـد ينبـت الزعفـران ترابهـا
فتى ما يظلـم المـال ألا وداعـة=ولو يملك الدنيا جميـعٍ صخابهـا
فتى يذبح الكوم وسديـس وحايـل=لا قيل يبزا زادهـا مـن عذابهـا
رحل جارنا ما جـاه منـا رزيّـة=وان جات ما يأتيـه منـا عتابهـا
وصلوا على سيد البرايـا محمـد=عدد مالعا القمري بعالي هضابهـا

وقد ذكر محمد بن دخيل العصيمي في كتابة (شعراء عتيبة) نقلا عن شاهر الاصقة المطيري في أحد دواوينه ، وهي كالتالي :-

كان(( نمش بن شهيل العتيبي)) ,,

جارا للوهيطات من ميمون جماعة الشيخ ((فازع بن شرار)) وبعد مضي مدة من الزمن رغب نمش بمغادرة جيرانه الى جماعته قبيلة عتيبة..

وبعد مرور مدة تقارب الخمس سنوات غزى جماعة من الوهيطات وغنموا أبل جارهم السابق وعندما علم أبن شهيل بأن الذين ظفروا بأبلهم هم جيرانه الوهيطات !!

فقد تجرأ بحكم سابق المعرفة وطلب من فازع أعادة أبله عن طريق مندوب من قبل أبن شهيل حيث كانت ظروفه لا تسمح له بالسفر..

وأرسل له هذه القصيدة :-

يا راكب اللي مالحى الكوع زاره -- حرا من اللي يبعدن المطاليب

رد السلام وخطره لآخو ساره -- لآبو جهز قطاع نشر العزازيب

يا ما أنقطع مع جرته من حواره -- هفن به الفطر طوال الشناخيب

وأبن فديغم دوره في دياره -- ماطر مبيد شايبات المحاقيب

وأبن نميش اللي يشب المناره -- ويقلط البن الاخضر للشراريب

تعد يالطرقي اليا شفت ناره -- أنصه اليا منك بغيت المعازيب

ينطحك بفنجال كثيرا بهاره -- وصينية يفدع بها فطرا شيب

الاجنبي عند الوهيطي وقاره -- نزالت العد المطرف الياهيب

((واقدري اللي بين نازل وجاره -- بين الاثنين ولاسعوا فيه بالطيب))

العصيمي ، شعراء عتيبة ، صفحة 729 ، الجزء الثاني.

الطريف في الامر بعد ذلك أرسل نمش بن شهيل مندوبه مرة أخر للوهيطات لآنه كان مربوط بأحد النياق (قدر)!!!

ومن زود العيارة نادوا الوهيطات مندوب أبن شهيل وأعطوة أكبر قدر لديهم يتسع لثلاث حيران ,,

وهو قدر كبير لديهم تختلف الروايات من أين أتوا به ، وبعد ذلك ذكر نمش بن شهيل العتيبي هذة القصيدة وشاهد على القدر البيت الاخير :-