تكفون يا اخواني افيدوني بخصوص الامر المستديم ..

عفوك ياارب · #1 (**permalink**) 25-12-2011, 06:07 AM

السلام عليكم ورحمة الله وبركاته

اخواني الاعزاء انا محتار في موضوعي وبحثت كثيراً ولم اجد الجواب الشافي ..

أملي بعد الله ثم بكم كبير في توجيهي للطريقة الصحيحة..

قصتي كالتالي اعذروني بكتبها باللهجة العامية ..

اشتريت سيارة من احد الاصدقاء بالتقسيط ثم طلب مني شيكات بالمبلغ وعطيته شيكات ثم نوجهنا للبنك وعلمنا استقطاع من حسابي لحسابه بمبلغ 1000 ريال شهرياً
طبعا الشيكات علشان يحفظ حقه الرجال ووافقت انا لأن هذا من حقه .

المهم طلبت منه ينقل السيارة باسمي .. وقال مو لازم انت بتبيعها صح ؟ قلت ايه نعم ..
قال خلاص روح المعرض ولما تبيعها اتصل علي واجيك ونخلص الموضوع .
توكلت على الله ورحت عرضت السيارة وجابت لي قيمة معقولة ثم وافقت على البيع بس صاحب المعرض رفض وقال لازم يجي صاحبها .
والسيارة من الاساس باسم ابو الرجال اللي اشتريتها منه . اتصلت على الرجال وقلت تعال نخلص البيعه .. وجاء على طول بس ماجاب ابوه معه وجاب معه بس وكالة شرعية .
صاحب المعرض رفض الوكالة واصر ان الاب يحضر لأن لاسيارة مسجله باسمه . وبعد كلام طويل مع صاحب المعرض عطانا اقتراح وقال بكتب لكم شيك باسم صاحب السيارة وهو يروح يصرفه .
وافقنا على كذا وكتب الشيك باسم صاحب السيارة .
وقلت لخويي انا بجيك بعد يومين استلم المبلغ بعد ماتصرف الشيك قال خلاص موافق .
بعد يومين انا اتصلت بالرجال ولا رد علي . ثم ارسلت اخوي بحكم اني ماكنت في نفس المدينة . ثم قال لي اخوي انا الرجال مسافر مو موجود في الديرة .
انتظرته اسبوع ولا جاء . ثم قلت خيره من ربي يمكن الله ماكتب لي اخذ هالمبلغ وبهذي الطريقة افتكيت من الدين والرجال صار كذا كأنه باع سيارته واستلم مبلغها .
المصيبة الحين في الاستقطاع بعد يمكن شهر اتصلت عليه وقلت بخصوص البيعه بما انها الان تعتبر بيعه غير صحيحه بحكم إني ما استلمت منك اي مبلغ فودي تجيني بكره بالبنك ونلغي الاستقطاع . ثم رفض وجلس يصارخ علي ويقول مو انت اللي تعلمني بالبيع .. البيعه صحيحه والمبلغ يلزمك كامل 40 الف كل شهر 1000 ريال حسب الاتفاق !
قلت وكيف تحل لك هالـ 40 الف وانا ما اخذت منك ولا هلله ؟
قال مالي شغل انت تأخرت ولا جيت تاخذ فلوسك وانا مالي شغل فيك .
والله جلست معه وقت في المكالمة وانا احاول اقنع فيه وهو رافض ثم قلت خلاص اجل نروح المحكمة ونشوف من اللي له الحق . وجلس يهدد وقال والله لو تروح لأرفع عليك شكاوي .. قلت ربك يسهل بروح انا واللي له حق بياخذه .
رحت للمحكمة وكتبت معروض وشرحت فيه كل شي . ثم رفض الشيخ استدعاء الخصم وطلبني وجيت عنده وطلب اني اشرح له كل شي بالتفصيل .. وشرحت له ثم قال حالوا تصلحون فيما بينكم
قلت والله ياشيخ رفض الرجال والحين هو ماخذ مني تقريبا 5 الاف من غير وجه حق .
ثم بعد فترة استدعانا الشيخ والرجال جلس يكذب ويوقول انا اطلب هالشخص مبلغ من زمان . وقلت هات اثبات على كلامك .. ثم قال الشيخ خلاص اصلحوا احسن ونلتقي معكم في جلسه ثانية ان شاء الله .. والحين لي شهر انتظر هالموعد الثاني ولا جاء .

الحين سؤال ياجمعة الخير .. هل يحق لي الغي الاستقطاع ؟
علماً ان الاستقطاع باسم شخص مو باسم مؤسسة او شركة ...
ودي من يساعدني في هذا الموضوع الله يفرج عنكم جميعاً يدلني على الطريقة الصحيح في الغاء الاتتقطاع .

وهذي صورة من موقع المباشر اخذتها علشان تتأكدون من الموضوع وان الامور المستديم مازال موجود ..

واللي يبغى يتأكد مستعد ارسل له كل شي من عقد بيع او صورة الشيك اللي باسم صاحب السيارة واسم المعرض وكل شي ويتأكد بنفسه وانا والله ما ابي اظلم الرجال ابد والمصيبة انه جار لنا وزميل دراسه بس مدري وش اللي غيره علينا كذا بعد ما وثقت فيه ..

اسف على الاطالة واعذروني مدري وين اكتب موضوعي فيه وكتبته هنا ولا ادري هل هذا مكانه المناسب او لا ..

رجل غيور · #2 (**permalink**) 25-12-2011, 01:14 PM

الله ياخذة

المبرمج · #3 (**permalink**) 25-12-2011, 01:41 PM

عزيزي
الامر المستدين او الامر الثابت
اذا المحكمه ما انصفتك
توجه لمؤسسة النقد
وان شاء الله ترجعلك كامل مبالغك

واي استفسار انا حاضر

المبرمج · #4 (**permalink**) 25-12-2011, 01:50 PM

سؤال :-
الامر المستدين
انت اللي مسويه في الفرع لوحدك
ولا كان الطرف الثاني معك ..؟
يعني الامر الزامي..؟
اما الشيكات قضيتها قضيه !

عفوك ياارب · #5 (**permalink**) 25-12-2011, 09:05 PM

[align=center]
الله يجزاكم كل الخير على الردود ..

الامر المستديم كان الطرف الثاني معي في البنك وسويناه مع بعض ..

والشيكات قال لي زميل لي توجه للبنك والغ جميع الشيكات وهو ماراح يقدر يشتكي لأنه عارف ان قضيته خسرانه
وانا للحين ماسويت الغاء للشيكات .
[/align]

أحساس مترف · #6 (**permalink**) 25-12-2011, 09:13 PM

أخوي إن شاء الموضوع سهل

بما أنك أنت مسوي الأمر ،،، بكرى روح الفرع وألغيه بهدوء ولا تسألهم عن شي بدون شوشره
حتى الشيكات ألغيها

وخليهم يعطونك برنت على الشهور الماضيه لأنه تثبت الاستقطاع لصالح الشخص

+

ممكن بالبنك يكون فيه مستشار قانوني يفيدونك على حسب البنك

.....

أخوي كل هالأمور ممكن تلغيها عن طريق الهاتف المصرفي

الأمر سهل بإذن الله ،، أتمنى تروح بكرى وتبشرنا وش صار معك

المبرمج · #7 (**permalink**) 26-12-2011, 12:17 AM

^
ليس بهذي السهوله

هذا امر الزامي

ــــــــــــــــــــــــــــــــــــــ
مؤسسة النقد
وحقوق الانسان اذا ما فادة المحكمه

ــــــــــــــــــــــــــــــــــــــــــــــــــ ـــــــ
وكان الله في عونك مع البنك الرخيص حرام كلمة بنك فيه ( مصرف الراجحي )

المشكله في الشيكات ... ليتها بالسهوله

لي عوده

الامل الموعود · #8 (**permalink**) 26-12-2011, 12:41 AM

شوفي اخوي هي بطفشك وبطلع الشيب براسك بس في اخر شئ بيقولك خذ فلوسك خلاص لاكن انت بعد ما تاخذها خذ تعويض عن كل الحضور الي للمحكمه لان يوم تغيب يخصم من راتبك وطفشه
بتقول كيف اثبت ان لي حق عنده شوف انت اول شئ عندكم استقطاع لراتب علي انه لسياره ولمعرض باع اسياره الي انت وديتها وكتب الشيك بسم الاب الان الاب يثبت انه اعطاك شئ اذا عنده اثبات انك اخذت منه شئ اوكي او يحلف يمن انه سلمك القيمه هذي

بس اكرر عليك يجب عليك المطالبه بتعويض شف هي بطول وتاخذ سنين بس الله يعينك

بس بقولك قصه لعها تهون عليك هذا خوي لي باع سياره قبل 12 سنه ولان مطلوب من البحث الجنائي بنماص طبعا اصلن هو حتي النماص معمره وطاها ولا عمره اتجه لديار هذيك طبعا مطلوب من العمده وشرطه انهم يحضرونه مخفور الان طبعا القصه لسع يدوب الي راح والله اعلم وش القضيه يمكن ارهاب يمكن تهريب الله اعلم السبب سياره بسمه وهو مباع الي سياره قبل 12 سنه فبعض المور ونا اخوك ربما تكون خيره لاكن راح تاخذ حقك واكرر اكرر اكرر طالب بتعويض لان حضورك الي المحكمه غياب عن عملك وتقدر تجيب ورقه من عملك بايام الي غبة فيها ولمشوار وووو الي اخره فجرجره انت لين يطفش هو

ولي يقلون يقدر يسوي الغاء لها اقول لا ميقدر الي اذا احضر الشيكات هذا والله اعلم
والله ينصرك علي الظالم

أحبك يا بحر · #9 (**permalink**) 26-12-2011, 01:38 AM

وعليكم السلام ورحمة الله وبركاته

الله يهديك يا خوي ترا بعض الثقه شينه << علم نفسك
الأمر المستديم فيه نوعين إلزامي و عادي
الألزامي زي البنوك وقروضها ياخذون لو ريال
و العادي لو يلقون بحسابك 999 ما تحول ريال واحد لازم القسط كامل
بس بقول لك حل مؤقت ،،، فضي حسابك ولاتخلي فيه ريال واحد
أسحب أو حول الراتب إذا كان عليه
و الشيكات الله يعينك لأنكم بتاكلونها سوا
يعني لو فكر يشتكي عليك بتصيرون جيران بالسجن

أحبك يا بحر · #10 (**permalink**) 26-12-2011, 01:42 AM

بس يا خوي شكلك طيوب ومنت راعي مشاكل
ومن ربع نلقاها في الآخره << ترا موب قصدي أسب أحد ،، بس بعض الناس مسالم
و خويك ذا شافك كذا وطمع فيك ... حاول فيه ،، وره عينك الحمرا

تكفون يا اخواني افيدوني بخصوص الامر المستديم ..

إستراحة الأعضـاء

السلام عليكم ورحمة الله وبركاته اخواني الاعزاء انا محتار في موضوعي وبحثت كثيراً ولم اجد الجواب الشافي .. أملي بعد الله ثم بكم كبير في توجيهي...

تكفون يا اخواني افيدوني بخصوص الامر المستديم ..

تسجيل الدخول

تكفون يا اخواني افيدوني بخصوص الامر المستديم ..

إستراحة الأعضـاء

السلام عليكم ورحمة الله وبركاته اخواني الاعزاء انا محتار في موضوعي وبحثت كثيراً ولم اجد الجواب الشافي .. أملي بعد الله ثم بكم كبير في توجيهي...

تكفون يا اخواني افيدوني بخصوص الامر المستديم ..