29-12-2011, 05:40 AM
|
عضو جديد
|
|
تاريخ التسجيل: Dec 2011
المشاركات: 5
معدل تقييم المستوى: 0
|
|
|
سوالف شيخ النظر
بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته
يسعد صباحكم بالخير بحكم أن الساعة عدّت الثانية عشرة...
أنا شخص بيروقراطي روتيني بحت لأن في بلدي يقولون الحياة للبيروقراطين فقلت أصير زيهم يمكن أصبح من أصحاب أبوسفين اللي لين أرتخى تفتحت لك الأبواب...
الحكي إلى الآن وأن على نفس الحال لاأغتنيت ولاشبعت من الغثة اللي كل يوم أسويها طبعاً أنا الآن أحدثكم من مكتب الدوام وهو أقرب مايكون إلى خندق في جبهه حربية لولا وجودي فيه بحكم أني مدني وماأدراك مالمدني...
هذا المكتب مقرر له صيانة وتغيير اثاث في عهد الملك خالد الله يرحمه ووالدي والمسلمين أجمعين وكل سنه أراجع في صيانته بحكم أني بيروقراطي ويقولون ذكرنا نشمله في ميزانية السنة الجايه لدرجة البارحه يوم أعلنوا الميزانية للأسف ماأقروا صيانته في (ميزانية الخير اللي هي أكبر ميزانية في تاريخ المملكة) لذلك سيبقى الحال على ماهو عليه يمكن لو تقاعدت يزيلونه بالكامل عشان مايشغره واحد من هالعاطلين اللي يبون يصيرون مثلي مدراء على أنفسهم...
أنا كل يوم الصبح أطلع من الدوام الساعة سبعه عقب ثمانية عشر سنة عمل لدرجة عيالي كبروا ماشفتهم للحين لأني من أوصل البيت الساعة ثمانية الصبح ألقى بس الخدامة اللي تعرفت عليها في المطار يوم أستقدمتها تبتسم وتقول بابا بيبي كلوه مدرسه ومدام نوم تخنقني العبرة وأجر أذيال الهزيمة وأروح للديوانية أرمي عمري على مسندة التبن أم حمامتين لين بيضوا في وجهي من ثقل نومي....
الكلام كل صبح أدور الطريق السريع اللي أوصل له عقب صعود عشر أرصفة وحد خمسين دينّا والإندعاس تحت ألف تريله والغبنه من أوصل له أحس نفسي مغفل وإلا شكله على كوم هالتريلات اللي فيه ماهو ملحق الطريق السلحفاتي كناية عن بطئه عاد أذكر أن مدير المرور يقول أن التريلات غير مسموح لهم بالسير هالحزة من الصبح وتلقاتني حديت عشرين واحد عشان أدخل يدي في جيبي أطلع الجوال وعقب تعب وغثا أطلع الكاتيل اللي يالبا سبيكره بس كأنه سبيكر دورية المهم وأدق على المرور اللي يكرههونك في الساعة اللي كلمتهم فيها:
المرور : عمليات المرور وشوش شيري مرحبا...
شيخ : أسمك باله وش هو!؟
المرور : أخلص وش عندك!؟
شيخ : طال عمرك التريالات ماليه الطريق زهذا مش وقتهم اللي مسموح لهم بقتل المواطنين قصدي بدعس المواطنين...
المرور : وين فيها!؟
شيخ : على الطريق السريع الشرقي والجنوبي....
المرور : طيب طيب خلاص علم...
شيخ : يعني بترسلون ذاك العسكري اللي يوقفهم على أرصفة الدائري كأنه مطير حمام يقول للتريلات على جنب ويجمعهم على الأرصفة كأنهم مواعين عجيز عقب عزيمة...!؟
المرور : تنكت أنت ووجهك.. ياعمي خليهم يمشون وش دخلك أصلاً...
شيخ : ياأخي أنا مواطن غيووور... إلا وصك السماعة في وجهي...
عاد أنا أقعد أسوي نفسي محامي على هالوطن وأحدد في هالتريلات لين بغت تتوطاني وحده لولا لطف الله سبحانه وتعالى...
حبايبي بماني بيروقراطي ولاأحب التنقل والتطور فأنا أحتليت هالمتصفح وخليته صفحه أبوح فيها مافي خاطري على حسب الفضوة والمزاج وأتمنى تتقبلوني بصدر رحب وسواليفي تراها عني وعنكم واللي في خاطره سالفة وإلا شئ ينثرها هنا عادي واللي مش عاجبه كلامي وأسلوبي عادي ينقد ترى مسموح هنا مافيه ممنوع طالما أنه في حدود المسموح به...
ودخيلكم اللي يعرفني أعتذر له مقدماً عن العزايم لأني صرت نباتي بحكم أرتفاع أسعار اللحوم في وطني الحبيب...
جدّكم
شيخ النظر
|
العرض الشجري
