شاهي وقهوه على الخط السريع

خبير صناعي · #1 (**permalink**) 01-01-2012, 08:04 AM

السلام عليكم ورحمة الله وبركاته

هذا المشروع

ارباحه من وجهة نظري يتجاوز 300ريال باليوم

اولا متطلبات المشروع

ونيت حوض + ماطور كهرباء + لوحه (تقريبا 2*1 )+ السلعه المراد بيعها.

ثانيا ماهو المشروع

كلنا عارفين ان الخطوط السريعه بين مدن المملكه طويله جدا والخدمات قليله جدا

يعني بمجدر خروجك من النطاق العمارني او بالكثير 70 كيلو

لا تجد اي خدمات او تجد بعض الخدمات القليله في مواقع متفرقه

او تضطر للخروج عن الطريق السريع الى احدى القري المجاوره

لكي تقضي حاجتك

ومشروعي اللي اتكلم عنه الان هو توفير بعض الخدمات الصغيره

على الطرق السريعه مثل

1- الشاهي

2-القهوه

3- العصيرات والمويه

4-بطاقات الشحن

5-بعض الماكولات الخفيفه

6-بعض حاجات السياره الخفيفه

7- اي شي مطلوب من الزبائن طبعا هذا يتحدد بعد فتره من العمل

فكرة المشروع تقريبا مثل فكرة بياعين النعناع الموجدوين على بعض الشوارع

لكن بدل النعناع يكون مثل الكوفي شوب المتنقل

والمكان بدل شوارع المدن يكون على الطرق السريعه

والفكره ممتازه جدا جدا للقرى المجاوره للخطوط السريعه

مميزات المشروع انه مايبغاله بلديه ولا تصاريح ولا هم يحزنون اركب سيارتك

وروح المكان اللي يعجبك وشغل الماطور على شان ينور المكان ويكون واضح للمسافرين

واللوحه اكتب فيها مثلا شاهي وقهوه او كوفي شوب اوي اسم مناسب

وجرب حضك واذا ماعجبك الدخل غير المكان عندك حريه كامله بالتنقل

وبأذن الله راح تلحق خير

ومن وجهة نظري انه يكون الوقت من بعد المغرب الى الساعه 12

هذا وبالله التوفيق للجميع

دموع متفائل · #2 (**permalink**) 01-01-2012, 02:27 PM

يعطيك العافية اخوي خبير صناعي وفكرة روعة وممتازة بس السالفة يبيلها شوي صبر لو تتعامل مع هندي بس تراقبه بالاشراف وتعطيه بالنسبة .
واتمنى للجميع التوفيق ,,

ولد المالكي · #3 (**permalink**) 01-01-2012, 06:32 PM

اولا من قال إن البلديه بتسيبك في حالك

ثانيا انت تعرف الخطوط ونت رايح لمنطقه مقطوعه وفيها مافيها من قطاع الطرق ومطفين النور

وأول مايشوفون نورك ماتدري تسلم أنت ولا تروح مع تحويشة اليوم

الله يعين مجرد رأي

آلفيصل · #4 (**permalink**) 02-01-2012, 12:43 AM

اذا خايف من قطاع الطرق

شوف لك قبل محطة بنزين او قبل نقطه

وصراحه فكرتك حلوه تسلم عليييها

حمد الدمامي · #5 (**permalink**) 02-01-2012, 09:21 AM

صدق اخوي الفيصل لاتبعد

خلك عند محطات البنزين او نقاط التفتيش

وذا سويت قهوه عربيه وقدوع

اتوقع الناس يحبونها اكثر من كافي الهنود

بالتوفيق

شد حيلك ترى راس مالها دافور ودله قهوه

خبير صناعي · #6 (**permalink**) 02-01-2012, 10:46 AM

اشكر جميع الاخوان على الردود

اخوي ولد المالكي ترانا بالسعوديه والخطوط السريعه مليانه سيارات امن طرق

وبعدين ترى زباينك اغلبهم من امن الطرق

وانا ذكرت ان الفكره ممتازه جدا لاهل القرى المجاوره للطرق السريعه من ناحية انه يكون عارف المنطقه زين
ويكون الموقع قريب عليه

خبير صناعي · #7 (**permalink**) 03-01-2012, 05:55 AM

رفع للفائده

عــــــلا ٌ · #8 (**permalink**) 03-01-2012, 09:05 AM

وعليكم السلام ورحمة الله وبركاته

خبير لاتتهور بمشروعك وانا اختك

لية ماتفتح لك محطة وتقفل الموضوع تر الاراضي في المناطق القرية رخيصة مو غالية يمكن تلق ارض 8000 الالف ريالا يعني قطعة موصغير ولا كبيرة نقول وسط

طيب مو شرط تفتح محطة

شكللك ناوي خلاص ماادري احسسس

لية ماتفتح سيارتك مثل سيارة الايسكريم بالخط تروح وترجع >.>. عاداتخيل شكللك الحين

لاحد يضحك فكرة جديدة سيارة كوفي >>> من اخترع طرازنة

دمت بحفظ الرحمن الله يرزقك قد النمل بالارض

لاتنس معاك بالطريق

خبير صناعي · #9 (**permalink**) 03-01-2012, 09:31 AM

ههههههههههههههه طرازنه لو اقدر افتح محطه مالقيتيني افحط في منتدى بطاله

وبعدين سيارة الايس كريم نفس فكره الونيت

بس الونيت احسن منها لان لها استخدمات كثيره

على العموم الله يوفقك ان شاء الله

والشغلة بأذن الله ناجحه بس يبغى لها.انسان متفرغ وعنده صبر

عاآطل عن اآلامل · #10 (**permalink**) 03-01-2012, 09:39 AM

ياعمي بارنيز والشله ماخلو شي الناس ببتتركهآ وبتشرب شآهي وقهوه مآظني ..

وبعدين ماتسوى صراحه امسك خطوط واغامر عشان 300 ريآل ..

وبعدين الناس صارت ماتضمن تشتري من اي آحد ..

واخيرا انا بخط مسافر والله محطات ساعات اتكاسل اوقف اجل وشلون ..

القى واحد بحوض ونيته متربع وجآلس يبيع ..

وجهة نظر ..

بالتوفيق لك يالغالي ..