ذب الملامة لطيش الريـح ي عنـادي


واقتل جفاف الحنايـا واهدنـي غيمـة


الليل دمعـة غريـب ولهفـة منـادي


والفجـر قدسيـة المنفـي وتعظيمـة


والحزن ذود بـدوي(ن) والتعـب وادي


والـروح سـدرة تخطفهـا مجاهيمـة


والقلب لا شرعوا باب السهـر غـادي


قنديل قرم(ن) معلق في نحـر خيمـة


يا حادي العيس صمت البارحة سـادي


وانا بصدري حكـي واحزانـي مقيمـة


لا أرض حست ولا حست بي أعيـادي


هو من متى السجن يدري عن مظاليمة


تعبـت والله ورب محـمـد الـهـادي


أنفض يدي من عبث وقتي ومن ضيمة


وان مل جفني وصار من التعب صادي


هزيت جـذع الكـلام وطـاح ترنيمـة


ترنيمة(ن) تستفـز السطـر لمـدادي


لين يتساقط على كف الـورق ديمـة


شرق وغرب ي حادي العيس يا حادي


أذن وكبـر وللمـحـراب تسليـمـة


أخوك لو عيفـوه الشـرب والـزادي


يموت مـا بـدل البسمـة بتجهيمـه


ماني مجرد خبـر مـن ذبذبـة رادي


ولاني بدمع(ن) تشرد من هدب ريمـة


من يوم وانا أحترك في لفـة مهـادي


والصدر بيت اجودي كثـروا معازيمـة


أكبر .. وتكبر معي نظـرات حسـادي


وان مت ماعد يصير لحاسـدي قيمـة


مثل السمك لو يجف محيطـه الهـادي


يذبل وتذبل علـى التربـة خياشيمـه


عامين والسوسنة من شرفة الكـادي


تقعد هجوس الكـلام البكـر وتقيمـة


لين استقل الرعـد واستسلـم الـوادي


والبرق شعشع وفض بكـارة الغيمـة




:

:

تحياتي لقلوبكم