السلام عليكم ورحمة الله وبركاته

اخواني الاعزاء

اسأل الله ان تكونوا بافضل حال

اخوكم بن هاشم صاحب مؤسسة نسخ وبرمجة مفاتيح وبيع الكوالين وتاجر جملة وقطاعي بفضل من الله عز وجل

كل واحد يطلب كاسة شاهي كشري على قول اخواننا الصعايده ويكون محبوك عشان يمخمخ صح لانه الكلام الجاي كلام يبغاله تركيز وروقان لحبايبنا.

رسالتي , لمن هذا المشروع :

طبعا هذا المشروع يا اخواني مقدم لكم فقط لابناء الوطن , هذا المشروع الرائع اقدمه للاخوان الي يبغوا يشتغلوا بنفسهم ويجيبوا فلوسهم وارباحهم بعرق جبينهم مو يعتمدوا على اجنبي ويأجروا عليه المحل واذا كنت من هذا النوع رجاء تقفل الموضوع ولا اشوفك هنا لانه كفايه الي شفناه , ايضا المشروع موجه للاخوان الي يحبوا شغل الصنايعيه والهندسه , والاخوان الي يبغوا يبدئوا بخطى ثابته باذن الله لطريق النجاح والرزق المبارك الحلال , وذلك بالاستفادة من جميع ماسيذكر . ايضا هذا المشروع ستكون تكلفته من 35000 الى 45000 الف كحد اقصى وهو شامل الديكور للمحل بشكل راقي وكامل مع البترينات واللوحات والرخص و عدد جهازين برمجة ومكينتين قص ونسخ المفاتيح والبرامج الخاصة والكوالين والقلوب واكسسوارات الابواب والعديد من البضائع المميزة والاشياء المكملة لهذا النشاط,,,,, الخ باذن الله يعني من الألف للياء باذن الله



مقدمة:
طبعا احبتي بالنسبه لمشروعي وهو محل نسخ مفاتيح وبيع كوالين قبل سنين عندما بدئت واجهتني
العديد والعديد من الصعوبات والمتاعب وخاصه انه الي ماسكين الشغله اغلبهم برماويه وباكستانيه عندنا بمكه والحمدلله الان الحال افضل لوجود عدد من الشباب السعودي وطبعا لما يشوفك البرماوي ولا الهندي ولا الباكستاني انك ولد البلد مستحيل تاخذ منه الصنعه ويعلمك ومستحيل يدلك على الي يصلح والي مايصلح واش البضاعه الي تمشي والبضاعه الي ماتمشي واش المكاين الي عمليه واسعارها مناسبه لانه كصاحب محل جديد بتجي عند اصحاب الجمله وبيدفوا عليك اي مكاين وانت تاخذها وماتدري انها مثلا ماتنسخ الا نوع معين وممكن كان بسعرها تشتري مكينه تنسخ كل المطلوب مثل ماحصلي ببداياتي طبعا ولا يعلمك احد اش المفاتيح الي خامتها ممتازه واش القلوب والكوالين الي ماشيه بالسوق وعمليه وماتدوخ الزبون وتنكسر في يوم واحد ويجيك المحل يرفعلك الظغط وهذا حق من حقوقه لانه ما اخذ منك الا نوع رديئ وانت ياغافل لك الله هذا غير اصحاب الجمله حق المفاتيح الي يبعلك كل شي وماتعرف اش الي صالح فيه واش الي ينفعك واش الي مضروب ويزعل الزباين . طبعا عن نفسي اخذت الاساسيات والاشياء البسيط جداً من واحد من الاخوان الله يوفقه الى اليوم وانا ادعيله صح علمني اشياء بسيطه جدا جدا لكن بعدها بفضل الله مع السنين والممارسة بديت اطور نفسي ووجدت اني امتلك اشياء بفضل الله الان الباكستانيين والبرماويه والاجانب صاروا يجوا يتعلموها مني وفيه وطورت محلي بفضل الله وجبت اشياء ماجابها ولا محل مفاتيح بمدينتي وبشهادة الجميع ماشاءالله تبارك الله وصاروا الان ياخذوا مني ويقلدوني والحمدلله كما يقال لكل مجتهد نصيب ولازم الواحد يتميز في نشاطه عن باقي المنافسين خاصه لو كانوا اجانب لانه يدهم بيد بعض وانت تمص حومر لكن مع الكفاح الحمدلله اصبح الان الاجانب من يأتون الي لشراء بعض الاشياء . وانا لا احسدهم لا والله لانهم سعوا وتعبوا على انفسهم ولكل مجتهد نصيب والاهم من ذلك هو انهم تكاتفوا معا يد بيد وهذا هو مربط الفرس واحنا اصحابنا زمان والشباب الي معانا دايما انواع التحطيم الي يقلك وش تبي بمفاتيح كلها ريالات لكن مع التطوير والحمدلله صرت ابيع المفتاح ابو 3 ريال وابرمج وابيع المفتاج ابو 150 ريال و 350 ريال والحمدلله على كل حال واعتذر عن هذه المقدمه الطويله ولكن ماهي الا جزء بسيط مما مررنا به لكي اصل الى المرحله التي اعطاني هي ربي بفضله ومنه وكي اتميز بخدماتي وجودة منتجاتي عنهم جميعا . وهذا ما اريد جميع اخواني هنا الوصول اليه , وهو التدريب العملي والتطوير والتميز في النشاط التجاري فأتمنى فهم هذه النقاط من اخواني .

ارباح المشروع :

باذن الله وتوفيقه والنصائح التي ستتعلمها منا وبعد التدريب والتطوير المتواصل وتعليم التاجر كيفية اختيار البضاعه والنوعيات وبناء على ماذا تفاس الجودة والردائه لان الشكل دائما واحد وخلال فترة معينة لن تتعدى شهر واحد وبعد ذلك في خلال ستة أشهر اذا كنت شاطر وكان موقعك ممتاز الى سنة ستعيد رأس مالك وسيتم ذكر أسعار بعض الاصناف للجادين حيث ان بعض المنتجات كما توجد ارباح بدون اي رأس مال لانه الشغله اغلبها شغل يد وبالنسبه للمنتجات واسعار بيعها ودراسة الجدوى للمشروع وحفاظاً على الارباح لنا كأصحاب محلات مفاتيح وطالبين رزق الله ولمن سيدخل بهذا المشروع ويصبح صاحب محل مفاتيح باذن الله.

اجراءات التسجيل وفتح محل مفاتيح (حيث لن يتم ابدا بيع او تدريب اي شخص لايملك رخصة محل مفاتيح ) :
محل تجاري لايقل عن 15م
التقديم بالبلدية بعد تركيب اللوحة ثم يأتي مندوب البلدية ويكشف على المساحه اذا مطابقه او لا
- يتم تحويل المعاملة الى ادارة الأمن الوقائي وحيطلبوا منك تركيب باب حديد اذا مافيه باب حديد المحل وبعد ماتروح الامن الوقائي وتجبلهم صورة باب المحل وتوقعلهم على التعهدات كصاحب محل مفاتيح يقوموا يتحويلك لاخذ بصماتك اذا عليك سوابق لاسمح الله وبعدها بيوم او يومين تاخذ النتيجه واذا ماعليك شي تعطيهم الورقه الي تفيد انه ماعليك شي ويقوموا يسوو خطاب للبلدية انه لا مانع للمذكور من فتح محل مفاتيح وتروح البلدية لما يوصلهم الخطاب وتسدد رسوم الرخصه وتستلمها باذن الله .
طبعا جزاها الله خير الحكوميه الاجراءات ذي ممتازه جدا والنظام مطلوب في كل شي لانه الشغله ذي مو اي احد يدخل فيها وحتى محلات الجمله ماراح احد يبيعك شي ولا راح تاخد شي لين ماتطلع الرخصه وانه كل امورك مزبوطه وبالنسبه للاجراءات تاخذ من اسبوع الى عشرة ايام بالكثير من يوم ماتقدم للبلدية حتى تستلم الرخصه بجيبك وهذي الاجراءات في صالح الكل والحمدلله بعد تطبيقها حتى الان تلاحظوا انه اصبح الكثير من اصحاب محلات المفاتيح شباب سعوديين وشغالين بنفسهم الحمدلله رجال يعتمدوا على نفسهم والي متزوج ومخلف والي في بداية طريقه يعني مافي تأجير اجانب زي باقي المحلات الحمدلله مو مثل زمان وبكذا الان صاحب محل المفاتيح ماحيصير له منافسين كثير لانه بعض الاجانب الي شغالين بالمفاتيح والعياذ بالله لا ياخذ بيانات ولا يمشي بالنظام اهم شي يعبي جيبه والحمدلله الان الناس وعيت وتطورت وعندهم لما يشوفوا الشاب السعودي بمحله اكيد حيفضلوه على الاجنبي بمليون مره وهذا من باب تجربتي بالسنين الماضيه واهم شي الاخلاص بالعمل والنيه الطيبه والبعد عن كل ماهو محظور وربك ان شاءالله يرزقك بالحلال .


ملاحظة هامة للجادين فقط :

سيكون الرد على الاستفسارات بعضها على العام وبعضها على الخاص وبالنسبة للرد على الخاص وعدم ذكر الاسعار العام هذ مسألة تقييم الموضوع ومعرفة مدى تفاعل الشباب لمثل هذه المشاريع ليتم وقتها اتخاذ القرار تحديث الموضوع كل فتره او الغائه ،،،
ويسعدني ويشرفني استقبال الاستفسارات بصدر رحب عبر جميع الوسائل المتاحة سواء هنا بالعام أو بالخاص ،،،وسأتواصل معكم لمدة اسبوعين للاجابه على استفساراتكم واسئلتكم .
ثم سأكون متواجد بتركيا باذن الله بعد ذلك لاغراض تجارية وسأدع المهندس يتواصل بكم في حال سفري وحتى عودتي باذن الله .

اخوكم ابو عبدالله

بن هاشم الهاشمي