انا اليوم كلمت تاجر يستورد اغنام من السودان قالي لازم اقل عدد اجيب لك 1000 راس
وسعر الراس الواحد 320 ريال سواكن وبربري اللي تبي
بس قالي شي خلاني اتوفى دقيقتين وارجع للحياة . يقول لازم تكون عندك رخصه حتى في الغنم رخصه

كيف تستورد وأنت للحين ما تعرف شي في الغنم

لا مكان ولا خبرة في المعيشة ولا في البيع ولا في الشراء

أنا من وجهة نظري دامك راغب الشغلة لا تستعجل خالط لك ناس يبيعون في الغنم ويشترون

وكل يوم أدخل للسوق وتفرج على البيع والمشترى وتعرف على ليش النجدي أغلى من النعيمي وليش وليش وكيف وكيف

المهم أن راس مالك ممتاز

ويمكن تعين من وراها خير بإذن المولى

لكن لا تستعجل

واستشر واقرأ عن الغنم وإن شاء الله الأعضاء اللي عندهم خبرة ما يقصرون معك

المشاركة الأصلية كتبت بواسطة زاير خفيف [IMG]http://www.******.com.sa/vb/******4D/buttons/viewpost.gif[/IMG]
السلام عليكم ورحمة الله وبركاته


أخوي من واقع تجربة متواضعة


أولاً : لا تستاجر وحاول تسويلك حوش عند أحواش لناس تثق فيهم عشان تفتك من الأجار وخلافه وتحصل عامل يشرف عليهم بغيابك وتستفيد من خبرة الجيران

وجهز الحوش (من إلى) ثم بعد ذلك أشتر الغنم

وقبل هذا وذاك : إذا ما معك سيارة تشيل فيها وتحط لا تتوهق وتبدأ لأنك بتحتاجها كل يووووووووم

وأهم شي استعن بالله وبإذن الله بتعين خير


نجي للبداية بالـ 10 آلاف << هي شوية لكن إن شاء الله يكون فيها البركة

وأن تبدأ على قدك أفضل من أنك تبدأ بمبلغ كبير (دين) وخذها (سعة صدر ومحاولة نجاح مش تجارة) وإذا ما ربحت ماراح تخسر بإذن الله وخل بالك وسيع ويكفي أنك راح تشغل وقتك في شي مافيه إلا الخير بإذن الله

والطريقة :

1- إذا أنت عجل على الفائدة فعليك بالذبايح لأن الذبايح راح تشتري اللي أعمارها 3 أو 4 أو 5 شهور من 600 إلى 700 ريال

وراح تصرف على كل راس من التعليف أقل من 25ريال شهرياً ولو قلنا باقي على عيد الأضحى حوالي عشرة شهور معناها كل راس بياكل 250ريال وبيطلع راس ماله (700+250=950ريال) وبتبيع في العيد من 1200وطالع
طبعاً ما يخلى الأمر من موت بعضهم أو مرضهم والصرف عليهم


2- لو كنت راعي طويلة فلو كنت مكانك سويت التالي :

أشتري بالعشرة آلاف (متابيع+فحل) سواء نعيم أو نجد أو معزا << حسب رغبتك (وأترك المزايين لأهلها لين الله يجعلك منهم)

وبعد شهر أبيع عيالهن وأشتري بقيمتهم (متابيع + علف حق الشهر القادم)

وبعد الشهر أبيع عيال المتابيع وأشتري بقيمتهم (متابيع + علف حق الشهر القادم) وهكذا


طبعاً في كل شهر بتقل المتابيع اللي بتشتريها ولكن لا تنسى أن اللي أول ما شريت بيكونو دفيع

وبإمكانك تزيدهم من راتبك كل شهر

لكن نصيحة : عشان ما تكره الشغلة أو تتعب لا تخلط راتبك في مشروعك (أبدأ براس مال جيد ولا تاخذ منه ولا تزيده) إلا إذا عندك فايض وحرام يقعد في البنك فهنا ممكن تزيد راس مالك

والأهم إياك أن تتعب أو تمل أو تستعجل على الفائدة منهم

ويا حبذا لو كان معك أحد يرافقك في هالمشروع (مو ظروري يكون شريك) ممكن كل واحد يسوي له حوش وتروحون وتجون مع بعض وتوصيه ويوصيك على بعض الأشياء مثل شراء العلف أو يعسهم وتعسهم وهكذا

نسيت أقولك (بتسمع نصايح عدد شعر راسك وصدقني قليل جداً اللي بينصحك وهو يريد لك الخير أو أحياناً ينصحك شخص وهو ما يدري عن ظروفك أو رغباتك فلا تاخذ بكل كلمة تنقال لك)

أخيراً كل ما ذكر أعلاه قد يكون غير صحيح ولكنها وجهة نظري وحبيت أطرحها

وبالتوفيق للجميع

[align=center]
^^^^^

شرح كافي وواافي الله يبيض وجهك يالغالي ونا واعوذ بالله من كلمة انا بعلمكم وش يصير وياي اول بأول
[/align]

بالتوفيق يا عمدة

اخوي عمدة لازم اول تطب سوق الغنم عندكم و تعرف انواع الغنم و كيف تعرف سنها ومتى تلد وكم بطن بالسنه
و صفات الفحل و امراض الغنم وووووووووووو لازم تاخذلك كورس 6 شهور على الاقل بعدين فكر بالتجاره