بسم الله الرحمن الرحيم

سبب كتابتي للموضوع في المقام الاول إني ((عـاطـل))

انا بصراحه حاليا وصلت مرحلة يأس وفيني عناد شوي
إني ودي اتوظف في شي ((حـلال))
هالشي مو معناته ان البنوك حـرام مهب انا الي احلل واحرم
بس احاول ابعد عن الشبهات
اول شي مقادير الروحه سيارتي الموقره
((طبعا غسلناها قبل عشان الكشخه))
-----------------------------------------------

------------------------------------------------
بعد كذا جبت ملفات بلاستيك فيها نسخه من بطاقه
الاحوال وشهادتي وسيره ذاتيه بالانقليزي ((اوجه
الشكر لمنتدى بطاله على موضوع كيفية صنع السي في
من احد المواقع الاجنبيه))
----------------------------------------

----------------------------------
المهم فكرت اول شي وين اروح قلت مالي غير المستشفيات
في المقام الاول طبعا غسلت يدي من قطاع الاتصالات
بحكم الصعوبات بما اني مازلت ادرس ومحد مشغلني على عسال
عيوني ((عسال عشان لون العيون عسلي على وزن سواد))
------------------------------------------------------------------------

-----------------------------------------------------------------------
المهم شريت من دانكن وسميت بالله وتبخرت وحلقت دقني
وتعطرت وكل شي على سنقه عشره
راح احكي لكم كل مكان توجهت له وش صار
---------------------------------------------------------------

1-مسـتشفى الحبيب:انا تقدمت قبل فتره وكل شي وكنت راح انقبل ولكن
واحد هناك الله يحسبي عليه((مادعيت عليه لحد يقول لي لاتدعي اتحسب عليه
يعني اشكيه لربي وربه))
يوم نشدني وش يشتغل ابوك قلت له ************* لسان حاله
قال هذا جاي يلعب وابوه يدبر له وظيفه بسهوله
رجعت لهم امس وقابلت واحد رجال والرجال قليل
فادني والله يجزاه خير وانتظر منه اتصال بعد الاختبار الي
اجتزته والحمدلله
----------------------------------------------------------------

2-السعودي الألماني:رحت قابلتني سكرتيرة المدير قالت لي عبي
الاستماره كالعاده انا رفضت قلت بقابل المدير((هنا نقطه مهمه
حاول تبين انك مهتم مو بس ترمي ملف حاول تقابل احد وتشرح
له وضعك ومافيها شي غلط لو طولت معه ))
طبعا ماكان فيه مناصب بس استفدت ان مستشفى السعودي
الألماني لاينفع لا في الطب ولا التوظيف هههههههههههههه
-----------------------------------------------------------------

((تراني استخف دمي مالقيت اللوقو قلت احط دله للتوضيح))
3-دلــه:دخلت عليهم احتست لمن لقيت موقع الموظفين
طلع تحت عند المطبخ الكبير طبعا ريحة الاكل دوختني
رايقه كانت او انا كنت جوعان :o المهم قال لي سجل
عن طريق الموقع قلت له انا قدامك خلني اقابل احد قال:
الشروط واضحه
قلت له يابن الحلال منب ضد الشروط بس ياخي ماينفع
انا جاي ومتعني العبوا علي ..قال ماعندي غير هالحكي
طلعت وانا ابرطم ((يعني مديت بوزي انا لابديت اهوجس
ولا عصبت ولا جتني ام العبيد ابرطم ووجهي يصير
ثلاثه بخمسه))
===========================

4-مستشفى المملكه :قبلوني طبعا وفيه موضوع كامل عنه
الي يبيه يرعص على اسمي ويبحث عن مشاركاتي يلقاه
------------------------------------------------------

5-الحمادي: امممممممم رحت اقدم قالوا لي تعال الخميس
الحمادي اتوقع يقبلوني بس بخلي الموضوع كامل لاتوظفت
ههههههههههههههههههههههههههههههه
صارت لي افلام هناك البقيه لاحقا
----------------------------------------------------

6-المستشفى البريطاني للولاده:دخلت استقبلتني وحده
نفسها براس خشمها جلس استهبل عليها عشان تعصب
ماعصبت طلعت هي كذا خلقه نفسن شينه وجلدن مروح
عافاكم الله وعاافانا طلعت فوق قدمت اوراقي حسيت ان الوضع
كله اجانب قلت اييييييه عز الله توظفت يوم نزلت وخلصت
تذكرت ذيك رحت احاكيها طلعت اجنبيه قلت عز الله وظفوني
طبعا حطيت ملفي يعني قلت لعل وعسى
------------------------------------------------------------
طبعا طلعت الساعه 8 إلا ربع
ورجعت بيتنا في الساعه الواحد تقريبا
طبعا راح يكون لي زيارات غدا إن شاء الله
لــ
عيادات ادمه ((قريبه من بيتنا))
التأمينات ((المستشفى))
الإيمان((مستشفى بعد))
مغربي ((برضو بعد))
الحرس الوطنـي ((خشم العان دوت كوم ))
شركة نيسان للسيارات
التخصصي
مدينة الملك فهد الطبيه
---------------------------------------
نبي تفاعلكم عشان نكمل المسيره المباركه ^_^
ولو ماجاز لكم الموضوع عطونا رأيكم انا والله حبيت اساعد
وبنفس الوقت ابث همومي لكم

تحياتي

قفله:
يالغضي طحت كلي في دهاليز نار :::واستحالت دموعي جمرتن فوق خدي
آه ..واشقوة الي عايشن بإنتظار ..من كثير التعاسه مادرى وش يبدي