28-05-2012, 06:33 AM
|
عضو جديد
|
|
تاريخ التسجيل: May 2012
المشاركات: 10
معدل تقييم المستوى: 26
|
|
السلام عليكم ورحمة الله وبركاتة
صبحكم الله بالخير إخواني ،،،
والله امس كنت مره تعبان لأني ما نمت رحت المقابلة وانا مطبق يوم وزيادة ،،، بس للأمانة حبيت اقولكم وش صار معاي امس سؤال... سؤال
اول سؤال- تحدث عن نفسك بشكل موجز
ثاني سؤال عن الأهل وش ترتيبك وهل الوالدين على قيد الحياة طبعا هالسؤال سألوني إياه بناءا على كلامي اللي قلته في المقدمة
ثالث سؤال- هل لك اهتمامات في الكتب وش قريت اخر مره******** قلت لهم إني بصراحة ما قريت من فترة وعشان المقابلة قريت شوي من كتاب اسمه التحالف الغادر هالكتاب عن العلاقات الايرانية الامريكية الاسرائيلة.... المهم في الشغله مو وش قريت المهم كيف راح تتعامل مع الاستفزاز .... لأن يوم كنت اسولف عن الكتاب نط لي واحد وقال وش اسم الكتاب بالانجليزي وجاوبته وقالي صح...
وبعدها نط لي وقال الكتاب غير مميز وفيه تحيز******** طبعا هنا لازم تكون مركز .... قلت له هذي وجهت نظرك وانا احترمها ومعك فيها لأن الكاتب متحيز لي بلدة ولا الصحيح الكاتب ما خلى شي شين ما قاله في ايران بس الفكرة هنا انهم يبون يشوفوا هل تتقبل الرأس الاخر ولا لا...
بعدها بشوي اللي على يميني النذل طلع برا الغرفه واللي كان قاعد جنبه قال للي على يساري عندك سؤال له ،،،، طبعا هالشخص جالس يطالعني وقال لا انا اكتفي ما عندي شي اقولة.... بالنسبة لهذا الشخص احسه جايبينه عشان يجيب ام الركب لأني من قبل لا اجل جنبه وهو بدأ يكتب،،،
السؤال الرابع سألني واحد من هو النائب االثاني ومن كثر ماني مضيع قلت له صاحب السمو الملكي الامير نايف قالي متأكد وانا بصراحة ضحكت واللي سألني ضحك بعدها رقعت الاجابة وقلت مافي نائب ثاني..
خامس سؤال كان عن ادوات السياسة الخارجية طبعا وانا جالس اذكرها استغليت الفرصه وعطيتهم مثال عن ايران مره ثانية ،،، طبعا هالمره قالي واحد خلاص اترك ايران وانا سكت،،،، وعلى طول سألني سؤال " اللي هو السياسة الخارجية السعودية بدت تتغير الحين وش هو هذا التغير؟ طبعا هالسؤال ملكع،،،، وانا غيرت ام السالفه وقلت له السياسة الخارجية السعودية مسالمه وتعتمد ع الشفافية ولكن في الوضع الراهن هي تتعامل مع التوتر في المنطقه على بشكل حكيم،،،، بعدها نشب لي قالي اذكر هالسياسة الجديدة لي وزارة الخارجية،،،، وانا رجعت وغيرت ام السالفه وقلت الظاهر انك تقصد الاعلام لأن السعودية بدت تركز عليها والدليل قناة العربية السعودية ،،، رجع وقالي مؤ هذا الجواب،،، طبعا هو جالس يطفشني،،،، بالأخير قلت له من كثر ما قال مؤ هذي الاجابة قلت له حاليا لاتحضرني الاجابة الصحيحه ،،، ورجع وقال لي لا أكيد انت عارفها <<<< انا من بعدها عطيته ابتسامه وسكت...
سادس سؤال اذا كنت احد اعضاء السلك الدبلوماسي ماهي الشروط اللي لازم تتوافر فيك؟
بعدها سألني سؤال وش تعرف عن العمل الدبلوماسي في السفارات ،،،،، بصراحة هنا انا ما كنت مركز فا ما حبيت اورط نفسي قلت له لا اعرف الكثير ،بالرغم إني زرت سفارة المملكة في احد الدول،،،،
بعدها نط لي اللي قال الكتاب ما عجبني وقال لي بالانجليزي انت درست لغة بره
بعدها جاوبته وعطيته كفاحي وعثراتي اليين برا
بكذا انتهت المقابلة،،،،
نصايح جداً مهمه ،،،، قبل لا ندخل المقابلة جانا واحد منهم وقال خذوا راحتهم بس المهم اذا شديتوا معنا بنشد معكم ،،، يعني بالعربي لو بتصير عبيط تراني بنصير أعبط منك
ثاني شي بالنسبة للغة باللهجة العربية الحوارية مو شرط طول الوقت تقعد تتكلم بها >>> تراني انحشرت هههههههاااي
ركزوا على اعضاء اللجنة كأنكم تسولفون معهم طبعا اليدين خلوها تحت وحاولوا قدر المستطاع ما تطلعوها ههههههاااي
استفزاز اللجنة هو شي عادي بس المهم كيف انت تتعامل معاه،،، يعني اذا غير لك الموجه وقلبها عباطه بين له انك معاه عشان يسكت ولا يقعد يطول معك،،
طبعا الحين تبون تعرفوا وش صار معاي،،،، احب أبشركم يا إخواني ولله الحمد تم تبليغي بحضور المقابلة الشخصية اليوم الساعة 12
وأسأل الله سبحانه وتعالى ان يوفق الجميع وييسر لهم مقابلاتهم ويرزقهم .
ولاتنسوني من دعائكم أخوكم غربة وطني
.
التعديل الأخير تم بواسطة غربة وطني ; 28-05-2012 الساعة 06:37 AM
|
العرض العادي
